Levítico 2 - Li Santil hu

Li mayej cꞌaj

¹ Nak junak cristian tixmayeja ru li racui̱mk, tento nak tixqꞌue li cha̱bil cꞌaj. Tixqꞌue aceite saꞌ xbe̱n ut tixqꞌue ajcuiꞌ incienso.

² Chirix aꞌan tixcꞌam riqꞌuineb laj tij. Aꞌaneb li ralal xcꞌajol laj Aarón. Jun reheb laj tij tixchap jun mo̱chꞌ li cha̱bil cꞌaj rochben aceite ut incienso, ut tixcꞌat saꞌ xbe̱n li artal chokꞌ mayej chiru li Ka̱cuaꞌ. Aꞌan retalil nak chixjunil li cꞌaj kꞌaxtesinbil re li Dios. Li mayej li ta̱cꞌatk, aꞌanak jun sununquil mayej chiru li Ka̱cuaꞌ.

³ Ut li joꞌ qꞌuial chic li mayej cꞌaj li ta̱cana̱k, aꞌan ta̱qꞌuehekꞌ re laj Aarón ut reheb li ralal. Li cꞌaj aꞌan santobresinbil chic xban li ac xcꞌatman chokꞌ mayej chiru li Ka̱cuaꞌ.

⁴ Cui tixmayeja li caxlan cua li yi̱banbil saꞌ horno, tento nak yi̱banbilak riqꞌuin cha̱bil cꞌaj, ut tento nak ma̱cꞌaꞌak xchꞌamal. Naru tixmayeja li caxlan cua li pim, li yokꞌinbil riqꞌuin li cha̱bil aceite oliva, malaj ut naru tixmayeja li caxlan cua, sursu ut jay, li yulbil riqꞌuin aceite oliva.

⁵ Cui tixmayeja li caxlan cua yi̱banbil saꞌ qꞌuil tento nak ta̱yi̱ba̱k riqꞌuin li cha̱bil cꞌaj yokꞌinbil riqꞌuin aceite oliva, abanan ma̱cꞌaꞌak xchꞌamal.

⁶ Tixjachi ut tixqꞌue li aceite chiru. Aꞌanak jun li mayej cꞌaj.

⁷ Cui li mayej cꞌaj ta̱yi̱ba̱k saꞌ jun li xartin, tento nak ta̱yi̱ba̱k riqꞌuin li cha̱bil cꞌaj ut riqꞌuin aceite.

⁸ Tixcꞌam chiru li Ka̱cuaꞌ li mayej cꞌaj li yi̱banbil riqꞌuin li aceite ut tixqꞌue reheb laj tij ut eb aꞌan teꞌxqꞌue saꞌ li artal.

⁹ Laj tij tixchap caꞌchꞌinak li caxlan cua ut tixcꞌat saꞌ xbe̱n li artal chokꞌ retalil nak kꞌaxtesinbil re li Ka̱cuaꞌ lix comon li mayej. Ut li mayej aꞌan, aꞌanak jun sununquil mayej chiru li Ka̱cuaꞌ.

¹⁰ Ut li joꞌ qꞌuial chic li mayej ta̱cana̱k, aꞌan ta̱qꞌuehekꞌ re laj Aarón ut reheb li ralal. Li mayej cꞌaj aꞌan li kꞌaxal santo saꞌ xya̱nkeb li nequeꞌxcꞌat chokꞌ mayej chiru li Ka̱cuaꞌ.

¹¹ Nak te̱qꞌue le̱ mayej cꞌaj chiru li Ka̱cuaꞌ, incꞌaꞌ te̱qꞌue xchꞌamal. Ma̱ jun li mayej ta̱cꞌatekꞌ chi cua̱nk xchꞌamal, chi moco te̱qꞌue li xyaꞌal cab.

¹² Ta̱ru̱k te̱qꞌue li caxlan cua cuan xchꞌamal ut li xyaꞌal cab chokꞌ e̱mayej re li xbe̱n ru le̱ racui̱mk. Abanan incꞌaꞌ ta̱cꞌatekꞌ saꞌ xbe̱n li artal.

¹³ Chixjunil li ru le̱ racui̱mk li te̱mayeja, tento nak te̱qꞌue ratzꞌamil. Incꞌaꞌ te̱qꞌue le̱ mayej chi ma̱cꞌaꞌ ratzꞌamil xban nak aꞌan retalil li contrato li quixba̱nu li Dios e̱riqꞌuin. Nak te̱qꞌue le̱ mayej, junelic te̱qꞌue ratzꞌamil.

¹⁴ Nak te̱qꞌue li xbe̱n ru le̱ racui̱mk chokꞌ e̱mayej chiru li Ka̱cuaꞌ, te̱qꞌuili li ju̱nk chijil nak toj rax. Nak acak xeqꞌuili, te̱ten ut te̱qꞌue li ru chokꞌ e̱mayej.

¹⁵ Saꞌ xbe̱n li mayej aꞌin te̱qꞌue li aceite ut li incienso. Aꞌanak jun li mayej re li ru le̱ racui̱mk.

¹⁶ Ut laj tij tixcꞌat caꞌchꞌinak li ru li acui̱mk, li tenbil rochben li aceite ut li incienso. Aꞌanak jun li cꞌatbil mayej chiru li Ka̱cuaꞌ.