Levítico 19 - Li Santil hu

Li chakꞌrab chirix li santilal ut li ti̱quilal

¹ Li Ka̱cuaꞌ Dios quia̱tinac riqꞌuin laj Moisés ut quixye re:

² —Ta̱ye reheb chixjunileb laj Israel: Santakex che̱junilex la̱ex xban nak la̱in santin. La̱in li Ka̱cuaꞌ le̱ Dios.

³ Chexucua̱k ru le̱ naꞌ e̱yucuaꞌ. Ut te̱oxlokꞌi li hiloba̱l cutan. La̱in li Ka̱cuaꞌ le̱ Dios xinyehoc re aꞌin.

⁴ Me̱lokꞌoniheb chic li yi̱banbil dios, chi moco te̱yi̱b e̱jalanil dios chꞌi̱chꞌ re te̱lokꞌoni. La̱in li Ka̱cuaꞌ le̱ Dios xinyehoc re aꞌin.

⁵ Nak te̱qꞌue le̱ mayej re xcꞌambal e̱rib saꞌ usilal cuiqꞌuin, te̱ba̱nu joꞌ xinye e̱re re nak tincꞌul le̱ mayej.

⁶ Tento xtzacanquil li tib saꞌ li cutan nak xcamsi̱c li xul ut saꞌ li xcab li cutan. Ut li joꞌ qꞌuial chic ta̱cana̱k re li rox cutan, tento xcꞌatbal.

⁷ Muxbil chic ru li tib saꞌ li rox li cutan. Cui natiuheꞌ saꞌ li rox cutan, incꞌaꞌ ta̱cꞌulekꞌ li mayej.

⁸ Li ani ta̱tzaca̱nk re li tib saꞌ rox li cutan, li jun aꞌan cua̱nk xma̱c xban nak xmux ru li kꞌaxtesinbil cue la̱in. Ut li jun aꞌan ta̱isi̱k saꞌ xya̱nkeb lin tenamit Israel.

⁹ Ut nak te̱sicꞌ ru le̱ racui̱mk, incꞌaꞌ te̱sicꞌ chi us, chi moco te̱molcꞌa li natꞌaneꞌ.

¹⁰ Nak te̱sicꞌ ru le̱ uvas, incꞌaꞌ te̱sicꞌ chi us, chi moco te̱molcꞌa li natꞌaneꞌ. Te̱canab ban reheb li nebaꞌ ut reheb li jalaneb xtenamit. La̱in li Ka̱cuaꞌ le̱ Dios xinyehoc re aꞌin.

¹¹ Mex-elkꞌac, mexbalakꞌic, ut me̱ticꞌtiꞌi e̱rib chi ribil e̱rib.

¹² Me̱ba̱nu li juramento saꞌ incꞌabaꞌ la̱in chi ma̱cꞌaꞌ rajbal. Cui te̱ba̱nu chi joꞌcan te̱mux ru lin cꞌabaꞌ. La̱in li Ka̱cuaꞌ xinyehoc re aꞌin.

¹³ Me̱rahobtesiheb le̱ ras e̱ri̱tzꞌin, chi moco te̱relkꞌa li cꞌaꞌru reheb. Ut te̱toj le̱ mo̱s saꞌ xkꞌehil. Me̱canab chokꞌ re cuulaj.

¹⁴ Me̱hob li tzꞌaptzꞌo̱queb xic, chi moco te̱qꞌue chixtichbaleb li rok li mutzꞌeb ru. Te̱xucua cuu xban nak la̱in li Ka̱cuaꞌ le̱ Dios.

¹⁵ Nak texrakok a̱tin, cheba̱nu saꞌ xya̱lal. Me̱col rix li nebaꞌ, chi moco checol rix li biom. Saꞌ xya̱lal ban texrakok a̱tin saꞌ xbe̱neb chixjunileb.

¹⁶ Mexyoꞌoban a̱tin chirixeb le̱ ras e̱ri̱tzꞌin. Ut me̱qꞌueheb chi camsi̱c le̱ ras e̱ri̱tzꞌin. La̱in li Ka̱cuaꞌ Dios xinyehoc re aꞌin.

¹⁷ Incꞌaꞌ te̱joskꞌi le̱ ras e̱ri̱tzꞌin. Te̱kꞌus saꞌ xya̱lal li ani nama̱cob re nak incꞌaꞌ textzꞌako̱nk riqꞌuin lix ma̱c.

¹⁸ Me̱qꞌue re̱kaj li ra xi̱cꞌ riqꞌuin raylal. Ut me̱qꞌue saꞌ e̱chꞌo̱l li raylal ta̱uxk e̱re. Te̱ra ban le̱ ras e̱ri̱tzꞌin joꞌ nak nequera e̱rib. La̱in li Ka̱cuaꞌ xinyehoc re aꞌin.

¹⁹ Cheba̱nu li chakꞌrab li yo̱quin chixqꞌuebal e̱re. Me̱qꞌue chi batzꞌu̱nc le̱ queto̱mk riqꞌuin li xul li jalan pa̱y ru. Ut incꞌaꞌ te̱rau cuib pa̱y ru li iyaj saꞌ jun chi naꞌajej. Ut incꞌaꞌ te̱rocsi le̱ rakꞌ li jalan jala̱nk pa̱y ru lix nokꞌil.

²⁰ Cui junak cui̱nk ta̱cua̱nk riqꞌuin jun li mo̱s ixk li ac tzꞌa̱manbil xban jalan chic cui̱nk, abanan toj ma̱jiꞌ tojbil li rachꞌabanquil, tento nak teꞌqꞌuehekꞌ chixtojbal rix lix ma̱queb. Abanan incꞌaꞌ teꞌcamsi̱k xban nak li ixk lokꞌbil mo̱s.

²¹ Tento nak li cui̱nk aꞌan tixcꞌam jun li carner te̱lom chiru li oqueba̱l re li tabernáculo re xtzꞌa̱manquil xcuybal lix ma̱c chiru li Ka̱cuaꞌ.

²² Ut riqꞌuin li carner li tixqꞌue chokꞌ xmayej, laj tij tixtzꞌa̱ma xcuybal li ma̱c li quixba̱nu. Ut li Dios tixcuy lix ma̱c.

²³ Nak tex-oc chi cua̱nc saꞌ li naꞌajej Canaán ut te̱rau li cheꞌ li nau̱chin, muxbilak ru li ru li cheꞌ chiru oxib chihab. Chiru li oxib chihab aꞌan incꞌaꞌ naru te̱tzaca li ru nak ta̱u̱chi̱nk.

²⁴ Saꞌ xca̱ li chihab, te̱kꞌaxtesi chixjunil li ru li cheꞌ chokꞌ cue la̱in re xbantioxinquil chicuu.

²⁵ Abanan saꞌ roꞌ li chihab naru te̱tzaca li ru li cheꞌ. Cui te̱ba̱nu chi joꞌcan, kꞌaxal li ru li cheꞌ ta̱ru̱chin. La̱in li Ka̱cuaꞌ le̱ Dios xinyehoc re aꞌin.

²⁶ Me̱tiu li tib li toj cuan xquiqꞌuel. Incꞌaꞌ textu̱lak chi moco texkꞌehi̱nk.

²⁷ Me̱bes li rismal le̱ jolom chixcꞌatk le̱ xicꞌ, chi moco te̱set ruꞌuj le̱ mach.

²⁸ Me̱set le̱ tibel xban xrahil e̱chꞌo̱l chirix junak camenak. Ut incꞌaꞌ te̱qꞌue e̱retalil saꞌ le̱ tibel. La̱in li Ka̱cuaꞌ le̱ Dios xinyehoc re aꞌin.

²⁹ Me̱cꞌut xxuta̱n le̱ rabin riqꞌuin xqꞌuebal xlese̱ns chixcꞌayinquil ribeb nak nequeꞌxlokꞌoni li jalanil dios. Cui te̱ba̱nu chi joꞌcan ta̱numta̱k li ma̱usilal saꞌ li naꞌajej aꞌin.

³⁰ Che-oxlokꞌi li hiloba̱l cutan ut te̱qꞌue xlokꞌal li naꞌajej li ninlokꞌoni̱c cuiꞌ. La̱in li Ka̱cuaꞌ ninyehoc re aꞌin.

³¹ Me̱sicꞌ le̱ naꞌleb riqꞌuineb li nequeꞌa̱tinan musikꞌej chi moco te̱sicꞌ riqꞌuineb laj kꞌe. Cui te̱ba̱nu aꞌan, te̱mux e̱rib. La̱in li Ka̱cuaꞌ le̱ Dios xinyehoc re aꞌin.

³² Che-oxlokꞌi li che̱quel cristian ut cheqꞌue xlokꞌal li ti̱xeb. Chexucua cuu la̱in li Ka̱cuaꞌ le̱ Dios.

³³ Me̱rahobtesiheb li jalaneb xtenamit li cuanqueb saꞌ e̱ya̱nk.

³⁴ Te̱ba̱nu reheb joꞌ nequeba̱nu reheb le̱ rech tenamitil. Cheraheb joꞌ nak nequera e̱rib la̱ex. Chijulticokꞌ e̱re nak la̱ex jalan le̱ tenamit nak quexcuan chak Egipto. La̱in li Ka̱cuaꞌ le̱ Dios xinyehoc re aꞌin.

³⁵ Me̱balakꞌiheb le̱ ras e̱ri̱tzꞌin riqꞌuin li bisleb li incꞌaꞌ nabisoc chi tzꞌakal. Tzꞌakal ban texbisok.

³⁶ Junelic texbisok chi tzꞌakal. La̱in li Ka̱cuaꞌ le̱ Dios. La̱in quin-isin chak e̱re saꞌ li naꞌajej Egipto.

³⁷ Cheba̱nu chixjunil li chakꞌrab li xinqꞌue e̱re ut te̱ba̱nu le̱ taklanquil inban. La̱in li Ka̱cuaꞌ xinyehoc re aꞌin.