Levítico 17 - Li Santil hu

Kꞌaxal lokꞌ li quicꞌ chiruheb laj Israel

¹ Li Ka̱cuaꞌ Dios quia̱tinac riqꞌuin laj Moisés ut quixye re:

² —Ye re laj Aarón ut eb li ralal joꞌ eb ajcuiꞌ chixjunileb laj Israel nak la̱in tinqꞌue li chakꞌrab aꞌin reheb.

³ Yalak ani reheb laj Israel tixcamsi junak toro, junak carner toj sa̱j, malaj ut junak chiba̱t chi saꞌ li naꞌajej li cuanqueb cuiꞌ li muheba̱leb malaj ut chirix,

⁴ ut cui incꞌaꞌ tixcꞌam chiru li oqueba̱l re li tabernáculo re tixmayeja chiru li Ka̱cuaꞌ, li cui̱nk aꞌan cua̱nk xma̱c xban nak quicamsin. Ta̱cana̱k joꞌ jun aj camsinel. Tento nak ta̱isi̱k saꞌ xya̱nkeb laj Israel xban nak quirisi xquiqꞌuel li xul.

⁵ Li chakꞌrab aꞌin qꞌuebil reheb laj Israel re nak incꞌaꞌ teꞌmayejak yalak bar saꞌ li cꞌaleba̱l. Teꞌxcꞌam riqꞌuin laj tij lix mayejeb re xcꞌambaleb rib saꞌ usilal riqꞌuin li Dios. Ut laj tij tixmayeja li xul chiru li Dios chiru li oqueba̱l re li tabernáculo saꞌ xcꞌabaꞌeb li cristian.

⁶ Laj tij tixrach lix quiqꞌuel li xul saꞌ lix artal li Ka̱cuaꞌ Dios chire li oqueba̱l re li tabernáculo. Ut tixcꞌat lix xe̱bul li tib chokꞌ re jun sununquil mayej chiru li Ka̱cuaꞌ.

⁷ Incꞌaꞌ chic teꞌxmayeja li xul yalak bar chiruheb li ma̱us aj musikꞌej li queꞌxlokꞌoni chak. Aꞌin jun li chakꞌrab cua̱nk chi junelic. Tento nak te̱ba̱nu la̱ex aj Israel ut tento ajcuiꞌ nak teꞌxba̱nu eb le̱ ralal e̱cꞌajol li teꞌcua̱nk mokon.

⁸ Ut ta̱ye ajcuiꞌ reheb nak cui junak le̱ rech aj Israelil malaj ut junak jalan xtenamit cua̱nk saꞌ e̱ya̱nk, tixqꞌue lix cꞌatbil mayej, malaj cꞌaꞌak chic re ru chi mayejil, tento nak tixcꞌam chiru li oqueba̱l re li tabernáculo.

⁹ Cui ut incꞌaꞌ tixcꞌam saꞌ li oqueba̱l re li tabernáculo re tixmayeja chiru li Dios, li jun aꞌan ta̱isi̱k saꞌ e̱ya̱nk la̱ex aj Israel.

¹⁰ Cui junak aj Israel, malaj ut junak jalan xtenamit cua̱nk saꞌ e̱ya̱nk, tixtiu li quicꞌ, la̱in tinjoskꞌokꞌ riqꞌuin ut tincuisi aꞌan saꞌ e̱ya̱nk la̱ex aj Israel.

¹¹ Li quicꞌ, aꞌan xyuꞌam ut xmetzꞌe̱u li tibelej. La̱in xinye nak te̱mayeja li quicꞌ chiru li artal re xtojbal rix le̱ ma̱c. Riqꞌuin quicꞌ te̱toj rix le̱ ma̱c xban nak li quicꞌ, aꞌan li natojoc rix le̱ yuꞌam.

¹² Joꞌcan nak la̱in xinye e̱re nak ma̱ jun saꞌ e̱ya̱nk tixtzaca li quicꞌ. Usta aj Israel usta jalan xtenamit li cua̱nk saꞌ e̱ya̱nk, incꞌaꞌ tixtzaca li quicꞌ.

¹³ Cui junak aj Israel malaj ut junak jalan xtenamit li cuan saꞌ e̱ya̱nk tixchap junak li xul saꞌ qꞌuicheꞌ malaj junak li xul li narupupic li naru xtiubal xtibel, tixhoy lix quiqꞌuel ut tixqꞌue chꞌochꞌ saꞌ xbe̱n li quicꞌ.

¹⁴ Li quicꞌ, aꞌan xyuꞌam ut xmetzꞌe̱u li tibelej. Joꞌcan nak li Ka̱cuaꞌ quixye reheb laj Israel nak incꞌaꞌ naru teꞌxtzaca li quicꞌ. Cui junak tixtzaca li quicꞌ, li jun aꞌan ta̱isi̱k saꞌ xya̱nkeb laj Israel.

¹⁵ Cui junak naxtzaca xtibel li xul li yal nacam xjunes malaj ut quicamsi̱c xban joskꞌ aj xul, li jun aꞌan xmux rib, usta aj Israel usta jalan xtenamit. Tento nak ta̱ati̱nk ut tixpuchꞌ li rakꞌ. Ut muxbil ru ta̱cana̱k toj ta̱oc li kꞌojyi̱n. Riqꞌuin aꞌan santobresinbilak chic.

¹⁶ Cui incꞌaꞌ ta̱ati̱nk ut cui incꞌaꞌ tixpuchꞌ li rakꞌ, ta̱cana̱k chi muxbil ru.