Levítico 14 - Li Santil hu

Li chakꞌrab reheb li saklep rixeb nak nequeꞌqꞌuira̱c

¹ Li Ka̱cuaꞌ quia̱tinac riqꞌuin laj Moisés ut quixye re:

² —Aꞌan aꞌin li chakꞌrab li tixba̱nu li saklep rix nak acak xqꞌuira. Ta̱cꞌamekꞌ riqꞌuin laj tij.

³ Laj tij ta̱xic toj chirix lix naꞌaj lix muheba̱leb chirilbal ma ac xqꞌuira li saklep chirix.

⁴ Cui ac xqꞌuira li saklep rix, laj tij tixtakla xcꞌambal chak cuibak li tzentzeyul xcomoneb li incꞌaꞌ muxbileb ru re ta̱cꞌanjelak re li ac xqꞌuira. Ta̱cꞌamekꞌ ajcuiꞌ chak jun tokolak li cheꞌ chacalteꞌ, jun li caki nokꞌ, ut jun li pim hisopo xcꞌabaꞌ.

⁵ Laj tij tixtakla xcamsinquil jun reheb li tzentzeyul saꞌ xbe̱n jun li chꞌochꞌ ucꞌal cua̱nk haꞌ chi saꞌ li isinbil saꞌ junak yuꞌam haꞌ.

⁶ Chirix aꞌan laj tij tixtzꞌa li tzentzeyul li yoꞌyo saꞌ xquiqꞌuel li tzentzeyul li quicamsi̱c saꞌ xbe̱n li chꞌochꞌ ucꞌal li cuan haꞌ chi saꞌ. Ut tixtzꞌa ajcuiꞌ saꞌ li quicꞌ li cheꞌ chacalteꞌ ut li caki nokꞌ ut li hisopo.

⁷ Laj tij tixrach cuukub sut li quicꞌ saꞌ xbe̱n li cristian li ac xqꞌuira. Ut laj tij tixye nak ac xqꞌuira li cristian ut ta̱rachꞌab li tzentzeyul li yoꞌyo.

⁸ Li ac xqꞌuira tixpuchꞌ li rakꞌ. Tixbes chixjunil li rismal ut ta̱ati̱nk re nak incꞌaꞌ chic muxbilak ru. Ta̱oc cuiꞌchic saꞌ li tenamit, aban incꞌaꞌ ta̱oc chi ticto saꞌ lix muheba̱l. Cuukub cutan ta̱cua̱nk chirix lix muheba̱l.

⁹ Saꞌ xcuuk li cutan tixbes cuiꞌchic chixjunil li rismal. Tixjo rib ut ta̱risi lix ma̱tz ru. Tixpuchꞌ li rakꞌ ut ta̱ati̱nk. Ut riqꞌuin aꞌan ta̱yema̱nk nak moco muxbil ta chic ru.

¹⁰ Saꞌ xcuakxak li cutan li cristian li ac xqꞌuira tixcꞌam saꞌ li tabernáculo cuib li cha̱bil carner te̱lom toj sa̱j ut li tzꞌakal re ru. Tixcꞌam ajcuiꞌ jun li ixki carner jun chihab cuan re ut tzꞌakal re ru. Tixcꞌam ajcuiꞌ numenak ca̱laju libra li cha̱bil cꞌaj rochben aceite re lix mayej. Tixcꞌam ajcuiꞌ mero botella li aceite.

¹¹ Laj tij tixcꞌam li jun li xqꞌuira rochben lix mayej saꞌ li oqueba̱l re li tabernáculo.

¹² Tixchap jun li carner te̱lom laj tij ut tixchap li aceite. Tixtaksi chiru li Ka̱cuaꞌ ut tixmayeja joꞌ li mayej nequeꞌxqꞌue nak nequeꞌxkꞌet lix chakꞌrab li Ka̱cuaꞌ.

¹³ Tixcamsi li carner saꞌ li santil naꞌajej li nacꞌatman cuiꞌ li xul re li cꞌatbil mayej ut re xpatzꞌbal xcuybal li ma̱c. Tento nak tixba̱nu chi joꞌcan xban nak li mayej aꞌan, joꞌ ajcuiꞌ li mayej re xtojbal rix li ma̱c, aꞌan jun santil mayej chiru li Ka̱cuaꞌ ut re laj tij.

¹⁴ Laj tij tixchap caꞌchꞌinak lix quiqꞌuel li carner ut tixqꞌue saꞌ lix xic li xqꞌuira li cuan saꞌ xnim. Tixqꞌue ajcuiꞌ saꞌ li nimla ruꞌuj rukꞌ, li cuan saꞌ xnim. Ut tixqꞌue ajcuiꞌ saꞌ li nimla ruꞌuj rok li cuan saꞌ xnim.

¹⁵ Laj tij tixchap caꞌchꞌinak li aceite ut tixqꞌue saꞌ lix tzꞌe ukꞌ.

¹⁶ Chirix aꞌan tixtzꞌa saꞌ li aceite li ruꞌuj rukꞌ li cuan saꞌ xnim. Ut tixrachrachi li aceite cuukub sut chiru li Ka̱cuaꞌ.

¹⁷ Tixchap caꞌchꞌinak li aceite li cuan saꞌ rukꞌ ut tixqꞌue saꞌ lix xic li cuan saꞌ xnim li jun li xqꞌuira. Ut tixqꞌue ajcuiꞌ saꞌ li ruꞌuj rukꞌ nim li cuan saꞌ xnim, ut saꞌ li ruꞌuj rok nim li cuan saꞌ xnim. Tixqꞌue bar quixqꞌue cuiꞌ lix quiqꞌuel li carner li xqꞌueheꞌ re xtojbal rix li ma̱c.

¹⁸ Ut li joꞌ qꞌuial chic li aceite li ta̱cana̱k saꞌ rukꞌ laj tij tixqꞌue saꞌ xjolom li cristian li ac xqꞌuira. Joꞌcaꞌin nak laj tij tixqꞌue li mayej re xtojbal rix lix ma̱c chiru li Ka̱cuaꞌ.

¹⁹ Ut laj tij ta̱mayejak re xtojbal rix lix ma̱c li jun li ac xqꞌuira. Chirix aꞌan tixcamsi li xul re li cꞌatbil mayej.

²⁰ Ut tixmayeja saꞌ xbe̱n li artal rochben li mayej cꞌaj. Chi joꞌcaꞌin tixtoj rix lix ma̱c ut moco muxbilak ta chic ru.

²¹ Cui nebaꞌ li cristian li ac xqꞌuira ut incꞌaꞌ naxcuy xtzꞌak naru tixcꞌam jun ajcuiꞌ li carner te̱lom toj sa̱j re xtojbal rix lix ma̱c. Tixcꞌam ajcuiꞌ caꞌchꞌin ma̱ o̱b libra li cha̱bil cꞌaj junajinbil riqꞌuin aceite re lix mayej ut mero litro li aceite.

²² Tixcꞌam cuib li mucuy. Abanan cui ma̱cꞌaꞌ xtumin re xlokꞌbal aꞌan, naru tixcꞌam cuib li paloma toj sa̱j. Jun ta̱cꞌanjelak re xpatzꞌbal xcuybal lix ma̱c ut li jun chic ta̱cꞌanjelak re lix cꞌatbil mayej.

²³ Nak ac yo̱ cuakxakib cutan xsantobresinquil rib, li yaj tixcꞌam lix mayej ut tixqꞌue re laj tij chiru li Ka̱cuaꞌ saꞌ li oqueba̱l re li tabernáculo.

²⁴ Laj tij tixchap li carner li toj sa̱j li ta̱mayeja̱k re xtojbal rix lix ma̱c li cristian li ac xqꞌuira ut tixchap ajcuiꞌ li aceite ut tixtaksiheb saꞌ rukꞌ chiru li Ka̱cuaꞌ.

²⁵ Tixcamsi li carner li ta̱mayeja̱k re xtojbal rix li ma̱c. Tixqꞌue caꞌchꞌinak lix quiqꞌuel saꞌ lix xic li jun li ac xqꞌuira, li cuan saꞌ xnim. Tixqꞌue ajcuiꞌ saꞌ li ruꞌuj rukꞌ nim ut saꞌ li ruꞌuj rok nim li cuan saꞌ xnim.

²⁶ Ut laj tij tixqꞌue caꞌchꞌinak li aceite saꞌ lix tzꞌe ukꞌ.

²⁷ Ut riqꞌuin li ruꞌuj rukꞌ li cuan saꞌ xnim tixrachrachi li aceite chiru li Ka̱cuaꞌ cuukub sut.

²⁸ Tixqꞌue li aceite saꞌ lix xic li cuan saꞌ xnim ut tixqꞌue ajcuiꞌ saꞌ li ruꞌuj rukꞌ nim li cuan saꞌ xnim ut saꞌ li ruꞌuj rok nim li cuan saꞌ xnim. Tixba̱nu riqꞌuin li aceite joꞌ quixba̱nu riqꞌuin li quicꞌ re xtojbal rix lix ma̱c li jun li ac xqꞌuira.

²⁹ Ut li joꞌ qꞌuial chic li aceite li ta̱cana̱k saꞌ rukꞌ, laj tij tixqꞌue saꞌ xjolom li jun li ac xqꞌuira re xtojbal rix lix ma̱c chiru li Ka̱cuaꞌ.

³⁰ Chirix aꞌan laj tij tixmayeja jun reheb li cuib chi mucuy malaj ut jun reheb li cuib chi paloma, aꞌ yal bar cuan li jun li tixcuy xqꞌuebal li jun li ac xqꞌuira.

³¹ Jun tixmayeja re xtzꞌa̱manquil xcuybal lix ma̱c ut li jun chic tixmayeja re li cꞌatbil mayej rochben lix mayej cꞌaj. Chi joꞌcan tixba̱nu laj tij re xtojbal rix lix ma̱c li xqꞌuira.

³² Aꞌan aꞌin li chakꞌrab li tinqꞌue reheb li nebaꞌ li nequeꞌxyajeni li yajel saklep ut incꞌaꞌ nequeꞌxcuy xtzꞌak li jun chꞌol chic li mayej re nak ta̱qꞌuira̱k.

³³ Li Ka̱cuaꞌ quia̱tinac riqꞌuineb laj Moisés ut laj Aarón ut quixye reheb:

³⁴ —Nak la̱ex tex-oc saꞌ li naꞌajej Canaán li tinqꞌue e̱re ut cui la̱in tintakla li moꞌ saꞌ junak li cab,

³⁵ tento nak laj e̱chal re li cab ta̱xic chixyebal re laj tij chi joꞌcaꞌin: “Chanchan nak cuan moꞌ saꞌ li cuochoch,” chaꞌak.

³⁶ Laj tij tixtakla risinquil chixjunil li cꞌaꞌru cuan saꞌ li cab nak toj ma̱jiꞌ na-oc chirilbal. Tento risinquil chixjunil re nak incꞌaꞌ tixbon rib li cꞌaꞌak re ru. Ut nak ac xeꞌrisi li cꞌaꞌ re ru, laj tij ta̱oc chirilbal ma cuan moꞌ saꞌ li cab aꞌan.

³⁷ Nak yo̱k chirilbal li cab laj tij, cui ta̱ril nak cuan li caki moꞌ malaj ut li raxi moꞌ chiru li tzꞌac, ut tixqꞌue retal nak cham ac xco̱,

³⁸ laj tij ta̱e̱lk saꞌ li cab ut tixtzꞌap li cab aꞌan chiru cuukub cutan.

³⁹ Saꞌ xcuuk li cutan laj tij ta̱xic cuiꞌchic chirilbal li cab. Cui yo̱k chi nima̱nc li moꞌ chiru li tzꞌac,

⁴⁰ laj tij tixtakla xbecbal li tzꞌac li cuan moꞌ chiru. Ut tixtakla xtzꞌekbal toj chirix li naꞌajej li cuanqueb cuiꞌ lix muheba̱leb saꞌ jun li naꞌajej li natzꞌekeꞌ cuiꞌ li cꞌaꞌak re ru muxbil ru.

⁴¹ Tento xjotzbal ru li tzꞌac chi saꞌ li cab ut tento teꞌxtzꞌek lix cꞌaj li tzꞌac saꞌ li naꞌajej chirix li tenamit li natzꞌekman cuiꞌ li muxbil ru.

⁴² Jalan chic li tzꞌac li teꞌxyi̱b ut jalan chic li seb li teꞌxyul chiru.

⁴³ Cui li moꞌ ta̱e̱lk cuiꞌchic saꞌ li cab aꞌan nak ac isinbil li moꞌ ru, ut ac jotzbil ru li tzꞌac ut ac qꞌuebil cuiꞌchic li seb chiru,

⁴⁴ laj tij ta̱oc saꞌ li cab chirilbal. Cui tixqꞌue retalil nak yo̱ chi nima̱nc li moꞌ saꞌ li cab, aꞌan retalil nak naxbon rib li moꞌ ut muxbil chic ru li cab aꞌan.

⁴⁵ Tixtakla xjucꞌbal li cab. Ut li pec, li cheꞌ ut chixjunil li tzꞌac teꞌcꞌamekꞌ chirix li naꞌajej li cuanqueb cuiꞌ lix muheba̱leb saꞌ li naꞌajej li natzꞌekman cuiꞌ li cꞌaꞌak re ru muxbil ru.

⁴⁶ Yalak ani ta̱oc saꞌ li cab nak tzꞌaptzꞌo̱k, aꞌan muxbilak chic ru toj ta̱oc li kꞌojyi̱n.

⁴⁷ Ut li ani ta̱cua̱rk saꞌ li cab aꞌan, tento tixpuchꞌ li rakꞌ. Joꞌcan ajcuiꞌ li ani ta̱cuaꞌak saꞌ li cab aꞌan, tixpuchꞌ li rakꞌ.

⁴⁸ Ut cui laj tij ta̱oc saꞌ li cab chirilbal ut naxqꞌue retal nak ma̱cꞌaꞌ chic li moꞌ nak ac xqꞌueheꞌ cuiꞌchic li se̱b chiru li tzꞌac, tixye nak moco muxbil ta ru xban nak ma̱cꞌaꞌ chic li moꞌ.

⁴⁹ Laj tij tixtakla xcꞌambal chak cuibak li tzentzeyul. Ut ta̱cꞌamekꞌ ajcuiꞌ chak jun tokolak li cheꞌ chacalteꞌ, jun li caki nokꞌ, ut jun li pim hisopo.

⁵⁰ Tixcamsi jun li tzentzeyul saꞌ xbe̱n jun li chꞌochꞌ ucꞌal, cua̱nk haꞌ chi saꞌ, li isinbil saꞌ junak yuꞌam haꞌ.

⁵¹ Chirix aꞌan tixtzꞌa li tzentzeyul li yoꞌyo saꞌ xquiqꞌuel li tzentzeyul camenak li junajinbil riqꞌuin li haꞌ. Ut tixtzꞌa ajcuiꞌ li tokol li cheꞌ chacalteꞌ, li hisopo, ut li caki nokꞌ. Ut tixrachrachi li quicꞌ chiru li cab cuukub sut.

⁵² Joꞌcaꞌin nak tixsantobresi li cab riqꞌuin lix quiqꞌuel li tzentzeyul li quixcamsi, ut riqꞌuin li haꞌ, ut li tzentzeyul li yoꞌyo, ut li jun tokol li cheꞌ chacalteꞌ, ut li hisopo, joꞌ ajcuiꞌ li caki nokꞌ.

⁵³ Ut chirix aꞌan ta̱rachꞌab li tzentzeyul li yoꞌyo toj chirix lix naꞌaj lix muheba̱leb. Aꞌin tixba̱nu re xsantobresinquil li cab ut incꞌaꞌ chic muxbil ru.

⁵⁴ Aꞌan aꞌin li chakꞌrab chirix li yajel saklep ut li moꞌ,

⁵⁵ joꞌ li moꞌ li nanak chiru li rakꞌeb malaj ut saꞌ eb li rochocheb,

⁵⁶ ut chirix li xox li nasipoꞌ ut chirix li xox li teto ru, ut chirix li yajel li nasakoꞌ lix tibel xban.

⁵⁷ Yo̱quin chixqꞌuebal e̱re li chakꞌrab aꞌin re nak te̱qꞌue retal bar cuan li muxbil ru ut bar cuan li incꞌaꞌ. Toj arin xcuulac le̱ chakꞌrabinquil li xinqꞌue chirixeb li cꞌaꞌak re ru aꞌin.