Levítico 13 - Li Santil hu

Li chakꞌrab chirixeb li saklep rixeb

¹ Li Ka̱cuaꞌ quia̱tinac riqꞌuin laj Moisés ut laj Aarón ut quixye reheb:

² —Cui junak cristian cua̱nk junak li ra chiru xtibel, malaj ut xox chirix, malaj ut ta̱si̱po̱kꞌ lix tibel, li jun aꞌan tento ta̱cꞌamekꞌ riqꞌuin laj Aarón laj tij malaj ut riqꞌuin jun li ralal xcomoneb laj tij.

³ Laj tij ta̱ril chi us li ra. Cui sak chic li rismal chiru lix ra ut cui cham xsaꞌ, aꞌan saklep rix ut laj tij tixye nak muxbil ru.

⁴ Cui ut sak lix ra ut moco cham ta xsaꞌ, chi moco sak li rismal chiru, laj tij tixqꞌue li yaj xjunes chiru cuukub cutan.

⁵ Ut saꞌ li xcuuk li cutan laj tij ta̱ril cuiꞌchic lix ra li yaj. Cui ta̱ril nak incꞌaꞌ yo̱ chi nima̱nc lix ra, li yaj ta̱cana̱k cuukub cutan chic xjunes.

⁶ Ut laj tij ta̱ril cuiꞌchic lix ra saꞌ xcuuk li cutan. Cui lix ra yo̱ chi qꞌuira̱c ut incꞌaꞌ xniman, laj tij tixye nak yo̱ chi qꞌuira̱c lix ra. Yal xox li qui-el chirix ut moco muxbil ta ru. Li yaj tixpuchꞌ li rakꞌ ut moco muxbil ta ru.

⁷ Abanan cui lix ra yo̱k chi nima̱nc chirix nak laj tij quixye nak moco muxbil ta ru, tento nak tixcꞌut cuiꞌchic lix ra chiru laj tij.

⁸ Laj tij ta̱ril chi us lix ra. Ut cui yo̱ chi nima̱nc lix ra, laj tij tixye nak aꞌan saklep rix ut muxbil chic ru li yaj.

⁹ Tento nak ta̱cꞌamekꞌ riqꞌuin laj tij li ani saklep rix.

¹⁰ Laj tij ta̱ril chi us lix ra. Cui sak chic lix ra, ut cui sak chic li rismal chiru lix ra ut cui teto ru lix ra,

¹¹ aꞌan saklep rix. Ut laj tij tixye nak muxbil ru li yaj. Incꞌaꞌ tixqꞌue li yaj xjunes re rilbal chanru lix yajel xban nak ac muxbil ru.

¹² Ut laj tij tixqꞌue retal lix ra. Cui sak chic ru ut cuan saꞌ chixjunil lix tibel naticla chi rok ut nacuulac toj saꞌ xjolom,

¹³ laj tij tixye nak moco muxbil ta ru xban nak sak chic ru lix ra.

¹⁴ Abanan cui toj mokon ta̱tehekꞌ ru lix ra, aꞌan muxbilak chic ru.

¹⁵ Laj tij ta̱ril cuiꞌchic lix ra. Cui teto ru lix ra, aꞌan retalil nak saklep rix. Ut laj tij tixye nak muxbil ru.

¹⁶ Cui ta̱sakokꞌ ru ut yo̱k chi qꞌuira̱c lix ra, ta̱xic riqꞌuin laj tij.

¹⁷ Laj tij ta̱ril chi us lix ra. Cui xsakoꞌ ru lix ra ut yo̱ chi qꞌuira̱c, laj tij tixye nak xqꞌuira li yaj ut moco muxbil ta chic ru.

¹⁸ Cui junak cua̱nk xox chirix ut ta̱qꞌuira̱k,

¹⁹ abanan cui li xox nasakoꞌ ut nasipoꞌ ut nacakoꞌ ru, tento nak ta̱xic riqꞌuin laj tij chixcꞌutbal lix ra chiru.

²⁰ Laj tij ta̱ril lix ra ut cui cham xsaꞌ ut sak chic li rismal chiru lix ra, laj tij tixye nak muxbil ru li yaj. Xsukꞌi saklep li xox li qui-el chirix.

²¹ Abanan cui laj tij naril lix ra ut naxqꞌue retal nak moco cham ta xsaꞌ ut incꞌaꞌ xsakoꞌ li rismal chiru lix ra, ut yo̱ chi qꞌuira̱c, laj tij tixqꞌue li yaj xjunes chiru cuukub cutan.

²² Cui yo̱ chi nima̱nc lix ra, laj tij tixye nak saklep ut muxbil chic ru.

²³ Abanan cui incꞌaꞌ xniman lix ra, ut caꞌaj chic retalil li xox li qui-el chirix li nacꞌutun, laj tij tixye nak xqꞌuira ut moco muxbil ta ru.

²⁴ Cui junak tixcꞌat rib ut lix cꞌatal nasakoꞌ ru malaj ut nacakoꞌ ru,

²⁵ tento nak laj tij ta̱ril lix ra. Cui sak chic li rismal li cuan chiru ut cham xsaꞌ, aꞌan saklep rix. Ut laj tij tixye nak muxbil ru.

²⁶ Ut cui laj tij ta̱ril nak incꞌaꞌ xsakoꞌ li rismal chiru lix ra ut incꞌaꞌ cham xsaꞌ ut yo̱ chi qꞌuira̱c, laj tij tixqꞌue li yaj xjunes chiru cuukub cutan.

²⁷ Saꞌ xcuuk li cutan laj tij ta̱ril cuiꞌchic lix ra. Cui yo̱ chi nima̱nc lix ra, laj tij tixye nak muxbil ru xban nak saklep rix.

²⁸ Cui lix ra incꞌaꞌ xniman ut yo̱ chi qꞌuira̱c, aꞌan yal retalil li cꞌatal yo̱ chi qꞌuira̱c. Ut laj tij tixye nak moco muxbil ta ru.

²⁹ Cui junak ixk malaj ut junak cui̱nk cuan li xox saꞌ xjolom malaj ut saꞌ xmach,

³⁰ laj tij ta̱ril lix ra. Cui li ra cham xsaꞌ, ut li rismal xkꞌanoꞌ ut yo̱ chi sachc, laj tij tixye nak aꞌan muxbil ru xban nak cuan saklep saꞌ xjolom malaj ut saꞌ xmach.

³¹ Abanan nak laj tij ta̱ril lix ra, cui tixqꞌue retal nak incꞌaꞌ cham xsaꞌ, ut cui li rismal moco kꞌek ta, tento nak tixqꞌue li yaj xjunes chiru cuukub cutan.

³² Saꞌ xcuuk li cutan laj tij ta̱ril cuiꞌchic lix ra. Cui lix ra incꞌaꞌ xniman, ut cui incꞌaꞌ kꞌan li rismal chiru lix ra, ut cui incꞌaꞌ cham xsaꞌ,

³³ laj tij tixye re li yaj nak tixjo li rismal xjolom malaj ut lix mach. Abanan incꞌaꞌ tixbes li rismal chiru lix ra. Ut tixqꞌue xjunes chiru cuukub cutan chic.

³⁴ Saꞌ xcuuk li cutan laj tij ta̱ril chi us lix ra. Cui incꞌaꞌ yo̱ chi nima̱nc, ut cui incꞌaꞌ cham xsaꞌ, laj tij tixye nak xqꞌuira ut moco muxbil ta chic. Ut li yaj tixpuchꞌ li rakꞌ.

³⁵ Abanan cui yo̱k chi nima̱nc lix ra nak ac xyeheꞌ nak xqꞌuira,

³⁶ laj tij ta̱ril cuiꞌchic lix ra. Cui xniman, incꞌaꞌ tento nak ta̱ril ma kꞌan li rismal xban nak li yaj muxbil ru.

³⁷ Abanan cui incꞌaꞌ yo̱ chi nima̱nc lix ra, ut cui kꞌek li rismal chiru lix ra, aꞌan retalil nak xqꞌuira. Ut laj tij tixye nak incꞌaꞌ muxbil ru.

³⁸ Cui junak li ixk malaj ut junak li cui̱nk nasakoꞌ lix tzꞌu̱mal,

³⁹ laj tij ta̱ril lix ra. Cui xsakoꞌ lix tibel ut incꞌaꞌ nalemtzꞌun, yal xox x-el chirix. Moco muxbil ta ru li cristian aꞌan.

⁴⁰ Cui junak cui̱nk ta̱tꞌanekꞌ li rismal, ut tꞌuruꞌ xjolom ta̱cana̱k, li cui̱nk aꞌan moco muxbil ta ru.

⁴¹ Ut cui ta̱tꞌanekꞌ li rismal ut tꞌuruꞌ saꞌ xbe̱n xpe̱quem ta̱cana̱k, li cui̱nk aꞌan moco muxbil ta ru.

⁴² Abanan cui na-el li xox cak ut sak saꞌ lix jolom li tꞌuruꞌ xjolom, usta chiru usta chirix, aꞌan retalil nak cuan saklep saꞌ xjolom.

⁴³ Tento nak laj tij ta̱ril chi us lix ra. Cui xsi̱poꞌ ut cak ut sak nacꞌutun, aꞌan retalil nak saklep cuan saꞌ xjolom.

⁴⁴ Li cui̱nk aꞌan muxbil chic ru. Laj tij tixye nak muxbil ru xban nak saklep cuan saꞌ xjolom.

⁴⁵ Li ani saklep rix ta̱rocsi li rakꞌ pejel ut incꞌaꞌ tixtzꞌap xjolom. Tixtzꞌap li ru ut tixjap re chixyebal “Saklep cuix. Incꞌaꞌ chic usin.”

⁴⁶ Muxbil ru ta̱cana̱k toj nak ta̱qꞌuira̱k. Teꞌxqꞌue chi cua̱nc xjunes toj chirix li naꞌajej li cuanqueb cuiꞌ lix muheba̱leb.

Li chakꞌrab chirix li moꞌ

⁴⁷ Cui ta̱moꞌo̱nk junak li akꞌej, usta lana usta lino, malaj ut ta̱moꞌo̱nk li cꞌaꞌak re ru yi̱banbil riqꞌuin lana malaj lino,

⁴⁸ malaj ut ta̱moꞌo̱nk jun pedasak li tzꞌu̱m malaj ut li cꞌaꞌak re ru yi̱banbil riqꞌuin tzꞌu̱m,

⁴⁹ cui li moꞌ cak malaj ut rax, aꞌan xcomon li moꞌ li naxbon rib ut tento nak ta̱cꞌutekꞌ chiru laj tij.

⁵⁰ Laj tij ta̱ril li cꞌaꞌru moꞌ ru ut tixqꞌue xjunes chiru cuukub cutan.

⁵¹ Saꞌ xcuuk li cutan ta̱ril cuiꞌchic. Cui xniman li moꞌ chiru li tꞌicr malaj chiru li tzꞌu̱m, aꞌan muxbileb chic ru xban nak li moꞌ aꞌan naxbon rib.

⁵² Laj tij tento nak tixcꞌat li tꞌicr lino ut lana malaj ut li cꞌaꞌak re ru yi̱banbil riqꞌuin tzꞌu̱m. Tixcꞌat re nak tixsach ru li moꞌ aꞌan xban nak naxbon rib.

⁵³ Ut cui incꞌaꞌ xniman li moꞌ chiru li tꞌicr, malaj ut chiru li cꞌaꞌak re ru yi̱banbil riqꞌuin tzꞌu̱m,

⁵⁴ laj tij tixqꞌue chi puchꞌecꞌ ut tixcanab cuiꞌchic xjunes chiru cuukub cutan chic.

⁵⁵ Saꞌ xcuuk li cutan ta̱ril cuiꞌchic. Cui incꞌaꞌ xjala xbonol li moꞌ, usta incꞌaꞌ xniman, muxbil ru. Ut tento xcꞌatbal usta li moꞌ cuan chiru malaj ut saꞌ xsal.

⁵⁶ Ut cui li moꞌ yo̱ chi sachc xbonol nak ta̱ril laj tij, tixset saꞌ li tꞌicr, malaj ut saꞌ li tzꞌu̱m.

⁵⁷ Ut cui ta̱moꞌo̱nk cuiꞌchic ru li tꞌicr, malaj ut li cꞌaꞌak re ru yi̱banbil riqꞌuin tzꞌu̱m, tento nak ta̱cꞌatekꞌ xban nak naxbon rib li moꞌ.

⁵⁸ Cui tixpuchꞌ li tꞌicr aꞌan malaj ut li tzꞌu̱m ut ta̱e̱lk li moꞌ chiru, tento cuiꞌchic xpuchꞌbal xcaꞌ sut re nak ta̱e̱lk chi junaj cua li moꞌ chiru.

⁵⁹ Aꞌan aꞌin li chakꞌrab li tinqꞌue chirix li moꞌ li nanak chiru le̱ rakꞌ lana malaj ut lino, ut chiru li quembil tꞌicr malaj ut chiru li yi̱banbil riqꞌuin tzꞌu̱m. Yo̱quin chixyebal aꞌin e̱re re nak naru te̱qꞌue retal ma muxbil ru malaj ut incꞌaꞌ muxbil ru, chan li Dios.