Levítico 12 - Li Santil hu

Aꞌan aꞌin li chakꞌrab reheb li ixk li ta̱cua̱nk xcꞌulaꞌaleb

¹ Li Ka̱cuaꞌ Dios quia̱tinac riqꞌuin laj Moisés ut quixye re:

² —Joꞌcaꞌin ta̱ye reheb laj Israel: Nak ta̱yoꞌla̱k xcꞌulaꞌal te̱lom junak li ixk, muxbilak ru ta̱cana̱k chiru cuukub cutan joꞌ naxba̱nu nak naxcꞌul xyajel re li po.

³ Ut saꞌ xcuakxak li cutan li cꞌulaꞌal tixcꞌul li circuncisión.

⁴ Ut li ixk aꞌin ta̱roybeni oxlaju xcaꞌcꞌa̱l (33) cutan toj ta̱numekꞌ xyajel. Incꞌaꞌ naru tixchꞌeꞌ li cꞌaꞌak re ru santobresinbil, chi moco ta̱ru̱k ta̱oc saꞌ li tabernáculo toj ta̱tzꞌaklok li cutan nak tixsantobresi rib.

⁵ Cui ut ta̱yoꞌla̱k junak xcꞌulaꞌal chꞌina xkaꞌal, li ixk aꞌan muxbilak ru chiru cuib xama̱n joꞌ naxba̱nu nak naxcꞌul xyajel re li po. Ut nak ac xnumeꞌ cuakib xca̱cꞌa̱l (66) cutan, ta̱tzꞌaklok li cutan nak tixsantobresi rib.

⁶ Nak ac xeꞌnumeꞌ li cutan re xsantobresinquil rib chirix lix yoꞌlajic lix cꞌulaꞌal, usta te̱lom, usta chꞌina xkaꞌal, li ixk ta̱xic chixqꞌuebal lix mayej re laj tij chiru li oqueba̱l re li tabernáculo. Tixqꞌue jun li carner aj jun chihab chokꞌ re lix cꞌatbil mayej ut tixqꞌue ajcuiꞌ jun li paloma toj sa̱j malaj ut jun li mucuy re nak incꞌaꞌ chic muxbilak ru.

⁷ Ut laj tij tixmayejaheb li xul chiru li Ka̱cuaꞌ re nak incꞌaꞌ chic muxbilak ru li ixk. Ut chirix aꞌan santobresinbil chic ta̱cana̱k li ixk riqꞌuin lix yajel. Aꞌan aꞌin li chakꞌrab reheb li ixk chirix lix yoꞌlajic lix cꞌulaꞌal, usta te̱lom usta xkaꞌal li ta̱yoꞌla̱k.

⁸ Cui li ixk incꞌaꞌ ta̱ru̱k xlokꞌbal li carner, naru tixqꞌue cuib li mucuy malaj ut cuib li paloma toj sa̱jeb. Jun tixqꞌue re li cꞌatbil mayej ut li jun chic tixqꞌue re nak incꞌaꞌ chic muxbil ru. Chi joꞌcaꞌin laj tij tixtoj rix lix ma̱c ut li ixk ta̱santobresi̱k riqꞌuin lix yajel.