Levítico 11 - Li Santil hu

Eb li xul li naru xtzacanquil joꞌ ajcuiꞌ li incꞌaꞌ naru xtzacanquileb

¹ Li Ka̱cuaꞌ Dios quia̱tinac riqꞌuineb laj Moisés ut laj Aarón ut quixye reheb:

² —Yehomak chi joꞌcaꞌin reheb laj Israel. Saꞌ xya̱nkeb li xul li cuanqueb saꞌ ruchichꞌochꞌ sicꞌbil ru li naru te̱tiu xtibel.

³ Naru nequetiu xtibeleb li xul li jun xxa̱la rok ut cuib rixiꞌijeb, li nequeꞌxhab xcuaheb xcaꞌ sut.

⁴ Abanan, eb li xul li incꞌaꞌ nequeꞌxhab xcuaheb xcaꞌ sut ut eb li ma̱cꞌaꞌ cuib rixiꞌij incꞌaꞌ naru nequetzaca. Incꞌaꞌ naru nequetzaca li camello xban nak usta naxhab xcua xcaꞌ sut, moco cuib ta rixiꞌij.

⁵ Incꞌaꞌ naru nequetzaca li xul tejón xcꞌabaꞌ xban nak usta naxhab xcua xcaꞌ sut, abanan moco jun ta xxa̱la rok. Aꞌan jun li xul incꞌaꞌ us te̱tzaca.

⁶ Joꞌcan ajcuiꞌ li imul. Incꞌaꞌ naru nequetzaca xban nak usta naxhab xcua xcaꞌ sut, abanan moco jun ta xxa̱la rok. Aꞌan jun li xul incꞌaꞌ us te̱tzaca.

⁷ Joꞌcan ajcuiꞌ li a̱k. Incꞌaꞌ naru nequetzaca xban nak usta jun ajcuiꞌ lix xa̱la rok, abanan incꞌaꞌ naxhab xcua xcaꞌ sut. Aꞌan jun li xul incꞌaꞌ us chokꞌ e̱re.

⁸ Incꞌaꞌ naru nequetiu xtibeleb li xul aꞌin ut incꞌaꞌ ajcuiꞌ naru nequechꞌeꞌ nak camenakeb xban nak cui nequechꞌeꞌ, muxbil chic e̱ru texcana̱k.

⁹ Saꞌ xya̱nkeb chixjunileb li xul li cuanqueb saꞌ li palau ut saꞌ eb li nimaꞌ naru nequetzaca eb li car li cuan xxicꞌ ut li cuan xta rix.

¹⁰ Abanan eb li xul li cuanqueb saꞌ eb li nimaꞌ ut li palau incꞌaꞌ te̱tzaca cui ma̱cꞌaꞌeb xxicꞌ ut ma̱cꞌaꞌeb xta rix. Tzꞌekta̱nanbilak e̱ban.

¹¹ Incꞌaꞌ naru te̱tzaca. Tzꞌekta̱nanbilak ban e̱ban. Incꞌaꞌ te̱tiu lix tibeleb, chi moco te̱chꞌeꞌ cui camenak.

¹² Chixjunileb li xul li cuanqueb saꞌ haꞌ tzꞌekta̱nanbilakeb e̱ban cui ma̱cꞌaꞌeb xxicꞌ ut ma̱cꞌaꞌeb xta rix.

¹³ Chixjunileb li xul aꞌin li nequeꞌrupupic, tzꞌekta̱nanbilak e̱ban ut incꞌaꞌ naru te̱tiu lix tibeleb; li tꞌiu, li soꞌsol li kꞌek rix, ut li soꞌsol li cak rix;

¹⁴ li cꞌuch li kꞌek rix joꞌ ajcuiꞌ li cak rix;

¹⁵ joꞌ eb ajcuiꞌ li qꞌuila pa̱y ru chi tzꞌok;

¹⁶ joꞌ ajcuiꞌ li nimla xul avestruz, ut li cuarom ut li jotz, joꞌ eb ajcuiꞌ li qꞌuila pa̱y ru chi cꞌuch;

¹⁷ li qꞌuila pa̱y ru li cuarom ut li qꞌuila pa̱y ru li jotz;

¹⁸ lix patux haꞌ, ut li pelícano, ut jun pa̱y chic ru li soꞌsol;

¹⁹ li cigueña, li sakiquil, li xul abubilla, joꞌ ajcuiꞌ li sotzꞌ.

²⁰ Incꞌaꞌ naru te̱tzaca li cocꞌ xul li cuanqueb xxicꞌ ut cuanqueb ca̱hib li rokeb. Tzꞌekta̱nanbilak e̱ban.

²¹ Abanan cuanqueb li xul li cuanqueb xxicꞌ ut cuanqueb rok naru te̱tzaca. Aꞌaneb li xul li nequeꞌpiscꞌoc.

²² Naru te̱tzaca laj sa̱cꞌ joꞌ eb ajcuiꞌ li jun chꞌol chic ut naru te̱tzaca ajcuiꞌ li cuib pa̱y ru li chiliꞌ ut li jun chꞌol chic li nequeꞌpiscꞌoc.

²³ Abanan incꞌaꞌ naru te̱tzaca li jun chꞌol chic li xul li cuanqueb xxicꞌ ut cuanqueb ca̱hib rok. Tzꞌekta̱nanbilak e̱ban.

²⁴ Cuanqueb li xul camenak incꞌaꞌ naru te̱chꞌeꞌ. Cui te̱chꞌeꞌ, te̱mux e̱rib ut muxbil chic ru texcana̱k toj ta̱oc li kꞌojyi̱n.

²⁵ Li ani tixcuaclesi li camenak xul aꞌin, tento nak tixpuchꞌ li rakꞌ ut li jun aꞌan muxbil chic ru ta̱cana̱k toj ta̱oc li kꞌojyi̱n.

²⁶ Aꞌaneb aꞌin li xul aꞌin: eb li xul li cuanqueb cuib li rixiꞌij, abanan ma̱cꞌaꞌ xxa̱la li rok ut eb li incꞌaꞌ nequeꞌxhab xcuaheb xcaꞌ sut. Muxbil ru ta̱cana̱k li ani ta̱chꞌeꞌok re li camenak xul xcomoneb aꞌan.

²⁷ Incꞌaꞌ naru te̱tzaca li xul li cuanqueb ca̱hib li rok cui nequeꞌbe̱c tzꞌakal saꞌ xyi li rokeb. Li ani ta̱chꞌeꞌok re junak li camenak xul xcomoneb aꞌan, muxbil chic ru ta̱cana̱k toj ta̱oc li kꞌojyi̱n.

²⁸ Li ani tixcuaclesi junak li camenak xul xcomoneb aꞌan, tento nak tixpuchꞌ li rakꞌ ut li jun aꞌan muxbil chic ru ta̱cana̱k toj ta̱oc li kꞌojyi̱n.

²⁹ Saꞌ xya̱nkeb li xul li nequeꞌbe̱c chi cꞌachcꞌo saꞌ ruchichꞌochꞌ, aꞌaneb aꞌin li incꞌaꞌ naru te̱tzaca: li sakbin, li chꞌo, ut li amoch;

³⁰ li qꞌuix u̱ch, li ahin, li to̱lococ, ut li chujchuj joꞌ ajcuiꞌ li pereꞌma̱l.

³¹ Aꞌaneb aꞌin li xul li incꞌaꞌ naru te̱tzaca xcomoneb li nequeꞌbe̱c saꞌ chꞌochꞌ. Li ani ta̱chꞌeꞌok re jun li camenak xul xcomoneb aꞌan muxbil chic ru ta̱cana̱k toj ta̱oc li kꞌojyi̱n.

³² Ut cui li camenak xul ta̱tꞌanekꞌ saꞌ xbe̱n li cꞌaꞌ re ru, li quinak cuiꞌ muxbilak chic ru, usta cheꞌ, usta tꞌicr, usta tzꞌu̱m, usta kꞌes ru tꞌicr ut yalak cꞌaꞌru chi cꞌanjeleba̱l. Muxbilak chic ru ta̱cana̱k toj ta̱oc li kꞌojyi̱n. Ut tento nak ta̱qꞌuehekꞌ saꞌ haꞌ re nak incꞌaꞌ chic muxbilak ru.

³³ Cui jun li camenak xul ta̱tꞌanekꞌ chi saꞌ li chꞌochꞌ ucꞌal, muxbil chic ru ta̱cana̱k li ucꞌal joꞌ ajcuiꞌ li cuan chi saꞌ. Tento nak te̱jor li ucꞌal aꞌan.

³⁴ Ut cui li haꞌ li cuan saꞌ li ucꞌal aꞌan ta̱nak saꞌ li tzacae̱mk, muxbil chic ru ta̱cana̱k li tzacae̱mk. Ut chixjunil li haꞌ li cuan saꞌ li ucꞌal aꞌan, muxbil chic ru ta̱cana̱k.

³⁵ Aꞌ yal cꞌaꞌru ta̱nak cuiꞌ li camenak xul muxbil chic ru ta̱cana̱k ut lix naꞌaj li xam malaj ut li horno yi̱banbil riqꞌuin chꞌochꞌ muxbileb chic ru ut tento te̱jucꞌ.

³⁶ Abanan moco muxbilak ta ru li yuꞌam haꞌ ut li becbil haꞌ li ta̱nak cuiꞌ li camenak xul. Abanan li ani ta̱chꞌeꞌok re jun li camenak xul, muxbil chic ru ta̱cana̱k.

³⁷ Cui li camenak xul ta̱tꞌanekꞌ saꞌ xbe̱n li iyaj li oc re raubal, li iyaj aꞌan moco muxbil ta ru.

³⁸ Abanan cui ac qꞌuebil saꞌ haꞌ li iyaj nak li camenak xul ta̱tꞌanekꞌ saꞌ xbe̱n, li iyaj aꞌan muxbil chic ru ta̱cana̱k.

³⁹ Cui junak li xul ta̱ca̱mk xcomoneb li nequetiu, li ani ta̱chꞌeꞌok re tixmux rib. Ut muxbilak ru ta̱cana̱k toj ta̱oc li kꞌojyi̱n.

⁴⁰ Ut cui junak tixtiu xtibel li camenak xul, li jun aꞌan tento nak tixpuchꞌ li rakꞌ. Abanan muxbilak ru ta̱cana̱k toj ta̱oc li kꞌojyi̱n. Ut li ani tixpako li camenak xul tixmux rib. Tento nak tixpuchꞌ li rakꞌ ut muxbilak ru ta̱cana̱k toj ta̱oc li kꞌojyi̱n.

⁴¹ Incꞌaꞌ naru te̱tzaca li xul li nequeꞌxjucu ribeb saꞌ chꞌochꞌ. Tzꞌekta̱nanbilak ban e̱ban.

⁴² Incꞌaꞌ naru te̱tzaca li xul li nequeꞌxjucuqui ribeb saꞌ chꞌochꞌ, chi moco li nequeꞌbe̱c chi cꞌachcꞌo, joꞌ ajcuiꞌ li cuanqueb nabal rokeb.

⁴³ Me̱mux e̱rib riqꞌuin xtzacanquileb li xul aꞌin. Me̱mux e̱rib riqꞌuineb chi moco te̱qꞌue e̱rib chi muxecꞌ xbaneb.

⁴⁴ La̱in li Ka̱cuaꞌ le̱ Dios. Santobresihomak e̱rib re nak santakex xban nak santin la̱in. Me̱mux e̱rib xbaneb li xul li nequeꞌxjucu ribeb saꞌ chꞌochꞌ.

⁴⁵ La̱in li Ka̱cuaꞌ Dios. La̱in li quin-isin chak e̱re aran Egipto. La̱in le̱ Dios. Santobresinbilakex la̱ex xban nak santin la̱in.

⁴⁶ Aꞌan aꞌin li chakꞌrab tinqꞌue chirixeb chixjunileb li xul li cuanqueb saꞌ ruchichꞌochꞌ, joꞌ li nequeꞌrupupic, joꞌ ajcuiꞌ li cuanqueb saꞌ li haꞌ, joꞌ eb ajcuiꞌ li nequeꞌxjucuqui ribeb saꞌ chꞌochꞌ.

⁴⁷ Riqꞌuin aꞌin te̱qꞌue retal cꞌaꞌru li muxbil ru ut cꞌaꞌru li incꞌaꞌ muxbil ru. Tento nak te̱nau bar cuan li xul li naru te̱tzaca ut bar cuan li xul li incꞌaꞌ naru te̱tzaca, chan li Dios.