Lamentaciones 5 - Li Santil hu

¹ At Ka̱cuaꞌ, chijulticokꞌ taxak a̱cue li cꞌaꞌru xkacꞌul. Chacuil taxak xtokꞌoba̱l ku xban nak xuta̱nal xo-el.

² Eb li jalaneb xtenamit queꞌxmakꞌ chiku li kanaꞌaj li xke̱chani junxil. Ut queꞌxmakꞌ ajcuiꞌ li kochoch.

³ Xocana chi ma̱ ani chic na-iloc ke. Chanchan nak ma̱cꞌaꞌ chic kayucuaꞌ. Ut eb li kanaꞌ chanchaneb chic li xma̱lcaꞌan.

⁴ Li haꞌ nakucꞌ toj nakalokꞌ. Ut joꞌcan ajcuiꞌ li kasiꞌ lokꞌbil.

⁵ Rahobtesinbilo xbaneb li xicꞌ nequeꞌiloc ke ut tacuajenako. Abanan, incꞌaꞌ naru nocohilan.

⁶ Re nak ta̱cua̱nk li katzacae̱mk, xkaqꞌue kib rubel xcuanquileb li tenamit Egipto ut li tenamit Asiria.

⁷ Queꞌma̱cob li kaxeꞌto̱nil yucuaꞌ ut anakcuan camenakeb chic. Abanan la̱o yo̱co chixcꞌulbal li raylal xban li ma̱c queꞌxba̱nu eb aꞌan.

⁸ Eb li queꞌcuan chokꞌ lokꞌbil mo̱s junxil, aꞌaneb chic li nequeꞌtaklan saꞌ kabe̱n anakcuan. Ut ma̱ ani nacoloc ke chiruheb.

⁹ Eb laj camsinel cuanqueb yalak bar. Xiu xiu nak nocoxic chixsicꞌbal katzacae̱mk xban nak incꞌaꞌ nakanau ma tosukꞌi̱k chak malaj ut incꞌaꞌ.

¹⁰ Li katibel xkꞌekoꞌ. Chanchan li horno. Ut yo̱ katik xban katzꞌocajic.

¹¹ Queꞌxmux ruheb li kixakil nak queꞌxchꞌic rib riqꞌuineb aran Sión. Ut queꞌxmux ajcuiꞌ ruheb li tukꞌ ixk aran Judá.

¹² Eb li queꞌcꞌamoc be chiku queꞌbaqꞌueꞌ li rukꞌeb ut riqꞌuin aꞌan queꞌtꞌuyuba̱c. Ut eb li ac ti̱xeb incꞌaꞌ chic queꞌqꞌueheꞌ xlokꞌal.

¹³ Eb li sa̱j cui̱nk queꞌqꞌueheꞌ chixqueꞌbal li ru li trigo. Ra sa nak nequeꞌru xqꞌuebal vue̱lt re li nimla pec li nequeꞌxqueꞌ cuiꞌ li trigo. Ut joꞌcaneb ajcuiꞌ li cocꞌal. Incꞌaꞌ nequeꞌxcuy ri̱kanquil li siꞌ xban nak kꞌaxal a̱l.

¹⁴ Incꞌaꞌ chic nequeꞌcꞌojla chire li oqueba̱l re li tenamit eb li ac che̱queb. Ut eb li toj sa̱j incꞌaꞌ chic nequeꞌbichan.

¹⁵ Incꞌaꞌ chic nocoxajoc xban xsahil kachꞌo̱l. Lix sahil kachꞌo̱l xsukꞌi chokꞌ rahil chꞌo̱lej.

¹⁶ Ma̱cꞌaꞌ chic kalokꞌal. Tokꞌob ku xban nak xoma̱cob.

¹⁷ Xban li raylal nakacꞌul, xrahoꞌ kachꞌo̱l. Ut incꞌaꞌ chic saken noco-iloc.

¹⁸ Chixjunil li cuan saꞌ li tzu̱l Sión ac juqꞌuinbil. Juneseb aj chic li yac nequeꞌbe̱c aran.

¹⁹ Abanan, la̱at at Ka̱cuaꞌ, la̱at li tzꞌakal rey chi junelic kꞌe cutan. Ut la̱ cuanquil cuan chi junelic.

²⁰ ¿Cꞌaꞌut nak nocosach saꞌ a̱chꞌo̱l chi junaj cua, at Ka̱cuaꞌ? Ut, ¿cꞌaꞌut nak kꞌaxal najt xoa̱canab kajunes?

²¹ At Ka̱cuaꞌ, choa̱cꞌul cuiꞌchic a̱cuiqꞌuin ut la̱o chosukꞌi̱k ta cuiꞌchic a̱cuiqꞌuin. Ut ta̱qꞌue taxak kalokꞌal joꞌ nak cocuan chak junxil.

²² ¿Malaj ut toa̱tzꞌekta̱na chi junaj cua? ¿Ma junelic yo̱k a̱joskꞌil saꞌ kabe̱n?