Lamentaciones 3 - Li Santil hu

¹ La̱in jun cui̱nk quincꞌul nabal li raylal xban nak yo̱ xjoskꞌil li Dios saꞌ inbe̱n.

² Cꞌajoꞌ li raylal xqꞌue saꞌ inbe̱n. Incꞌaꞌ chic us nin-el. Chanchan nak yo̱quin chi be̱c saꞌ kꞌojyi̱n ut incꞌaꞌ naxcutanobresi lin be.

³ Rajlal cutan junes raylal nincꞌul.

⁴ Xban li raylal li yo̱quin chixcꞌulbal, chanchan nak ti̱xin chic chi us. Ut chanchan tokoleb lin bakel.

⁵ Junes raylal ut chꞌaꞌajquilal nincꞌul. Sutsu̱quin xban li raylal.

⁶ Xban li raylal li nincꞌul, chanchan nak cuanquin saꞌ kꞌojyi̱n, joꞌ eb li camenak li ac xeꞌcam najter.

⁷ Chanchan nak sutsu̱quin saꞌ tzꞌac re nak incꞌaꞌ tine̱lelik. Chanchan nak bacꞌbo̱quin riqꞌuin cadena kꞌaxal a̱l xban li raylal li yo̱quin chixcꞌulbal.

⁸ Usta xinjap cue chixtzꞌa̱manquil intenkꞌanquil chiru, abanan li Ka̱cuaꞌ incꞌaꞌ xrabi lin tij.

⁹ Chanchan nak eb li tzꞌac yi̱banbil riqꞌuin pec nequeꞌramoc re lin be. Ut incꞌaꞌ chic nintau cꞌaꞌru tinba̱nu.

¹⁰ Li Ka̱cuaꞌ chanchan jun li oso malaj ut jun li cakcoj mukmu roybeninquil ani tixchap.

¹¹ Chanchan nak quinixchap ut quinixrahobtesi ut quinixcanab injunes chi ma̱ ani natenkꞌan cue.

¹² Chanchan nak yo̱ chinti̱canquil riqꞌuin lix tzimaj.

¹³ Chanchan nak quinixcut riqꞌuin lix tzimaj ut kꞌaxal cham qui-oc.

¹⁴ Chixjunileb li cuech tenamitil niquineꞌxhob. Rajlal cutan yo̱queb chinseꞌenquil.

¹⁵ Junes raylal nincꞌul. Chanchan nak junes cꞌa chic li nintzaca.

¹⁶ Chanchan nak quinixcut chiru chꞌochꞌ ut xeꞌtokeꞌ li ruch cue. Ut chanchan nak quinixtolcꞌosi saꞌ poks.

¹⁷ Ma̱cꞌaꞌ chic tuktu̱quil usilal cuiqꞌuin. Ut ma̱cꞌaꞌ chic li sahil chꞌo̱lejil.

¹⁸ Ma̱cꞌaꞌ chic inmetzꞌe̱u. Ut nincꞌoxla nak ma̱cꞌaꞌ chic nacuoybeni riqꞌuin li Ka̱cuaꞌ.

¹⁹ La̱in nincꞌoxlac chirix chixjunil li raylal ut li rahil chꞌo̱lejil li nincꞌul. Nacuecꞌa tzꞌakal xmay li raylal li nincꞌul.

²⁰ Incꞌaꞌ na-el saꞌ inchꞌo̱l. Ut yo̱ chi chꞌina̱nc inchꞌo̱l.

²¹ Abanan cuan jun li nacꞌojla cuiꞌ inchꞌo̱l. Ut aꞌan li nacuoybeni.

²² Xban nak junelic naruxta̱na ku li Ka̱cuaꞌ, joꞌcan nak incꞌaꞌ xo-osoꞌ. Junelic naril xtokꞌoba̱l ku.

²³ Cuulaj cuulaj nocorosobtesi. Acꞌ chic li kosobtesinquil xban nak kꞌaxal nim li rusilal saꞌ kabe̱n.

²⁴ Li Ka̱cuaꞌ, aꞌan li natenkꞌan cue. Ut aꞌan li ninyoꞌoni.

²⁵ Li Ka̱cuaꞌ junelic cha̱bil riqꞌuineb li nequeꞌyoꞌonin riqꞌuin. Ut naruxta̱na ruheb li nequeꞌxsicꞌ xtenkꞌanquil riqꞌuin.

²⁶ Kꞌaxal us nak junak ta̱roybeni nak ta̱tenkꞌa̱k xban li Ka̱cuaꞌ. Ut incꞌaꞌ yo̱k chixcuechꞌinquil li cꞌaꞌru naxba̱nu.

²⁷ Kꞌaxal us nak junak tixcanab rib chi takla̱c xban li Ka̱cuaꞌ chalen saꞌ xsa̱jilal.

²⁸ Kꞌaxal us nak junak tixcꞌojob xchꞌo̱l ut incꞌaꞌ ta̱cuechꞌi̱nk xban nak li Ka̱cuaꞌ, aꞌan li quiqꞌuehoc re chixcꞌulbal li raylal.

²⁹ Chixcubsihak ban rib rubel xcuanquil li Ka̱cuaꞌ, xban nak toj cuan cꞌaꞌru naroybeni.

³⁰ Chixqꞌuehak chi saqꞌuecꞌ saꞌ xnakꞌ ru xbaneb li xicꞌ nequeꞌiloc re usta ta̱cꞌutekꞌ xxuta̱n.

³¹ Li Ka̱cuaꞌ incꞌaꞌ nocoxtzꞌekta̱na chi junaj cua.

³² Usta naxqꞌue xrahil kachꞌo̱l, abanan naruxta̱na ku xban nak kꞌaxal nim li ruxta̱n saꞌ kabe̱n.

³³ Moco yal naraj ta xchꞌo̱l li Ka̱cuaꞌ nak naxqꞌue li raylal saꞌ kabe̱n.

³⁴ Li Ka̱cuaꞌ incꞌaꞌ nacuulac chiru nak teꞌrahobtesi̱k li cuanqueb rubel xcuanquil jalan tenamit.

³⁵ Chi moco nacuulac chiru li Ka̱cuaꞌ nak ta̱makꞌekꞌ chiruheb li cꞌaꞌru reheb.

³⁶ Li Ka̱cuaꞌ incꞌaꞌ nacuulac chiru nak incꞌaꞌ narakeꞌ a̱tin saꞌ ti̱quilal.

³⁷ ¿Ani ta biꞌ ta̱ru̱k tixye cꞌaꞌru tixcꞌul junak cui moco joꞌcan ta naraj li Dios?

³⁸ Nakacꞌul li us joꞌ ajcuiꞌ li incꞌaꞌ us xban nak joꞌcan naraj li Ka̱cuaꞌ.

³⁹ ¿Cꞌaꞌut nak ta̱rahokꞌ xchꞌo̱l li cui̱nk xban li raylal li naxcꞌul, cui aꞌan ajcuiꞌ li yo̱ chi ma̱cobc?

⁴⁰ Chikaqꞌuehak retal chi us cꞌaꞌru takaba̱nu. Chikajal li kacꞌaꞌux ut chosukꞌi̱k riqꞌuin li Ka̱cuaꞌ.

⁴¹ Chikaya̱ba xcꞌabaꞌ li Ka̱cuaꞌ cuan saꞌ choxa ut takaye:

⁴² —La̱o xkakꞌet la̱ cua̱tin ut xoma̱cob cha̱cuu. Ut la̱at incꞌaꞌ xacuy kama̱c.

⁴³ Cꞌajoꞌ la̱ joskꞌil. Joꞌcan nak xaqꞌue li raylal saꞌ kabe̱n. Xoa̱canab chi camsi̱c ut incꞌaꞌ xacuil xtokꞌoba̱l ku.

⁴⁴ Chanchan nak xamuk a̱cuib saꞌ chok re nak incꞌaꞌ ta̱cuabi li katij.

⁴⁵ Xban li raylal xaqꞌue saꞌ kabe̱n, chanchano aj chic mul ut ma̱cꞌaꞌ chic noco-oc cuiꞌ chiruheb chixjunileb li tenamit.

⁴⁶ Chixjunileb li xicꞌ nequeꞌiloc ke nocoeꞌxhob.

⁴⁷ Kꞌaxal ra xkacꞌul. Xsacheꞌ ru li katenamit. Ut yo̱ kaxiu.—

⁴⁸ Li xyaꞌal cuu natꞌululnac saꞌ xnakꞌ cuu xban nak queꞌsacheꞌ ruheb lin tenamit.

⁴⁹ Incꞌaꞌ tincanab ya̱bac xban nak ma̱cꞌaꞌ nacꞌojoban inchꞌo̱l,

⁵⁰ toj retal nak li Ka̱cuaꞌ ta̱ril chak xtokꞌoba̱l ku saꞌ choxa.

⁵¹ Cꞌajoꞌ nak nayotꞌeꞌ inchꞌo̱l xban li raylal li xeꞌxcꞌul eb li ixk li cuanqueb Jerusalén.

⁵² Eb li xicꞌ nequeꞌiloc cue xineꞌxchap chi ma̱cꞌaꞌ inma̱c. Chanchanin li xul li quitꞌaneꞌ saꞌ jun li raꞌal ut incꞌaꞌ naru ta̱e̱lelik.

⁵³ Xineꞌxcut chi yoꞌyo saꞌ jun li chamal jul ut queꞌxtzꞌap li re riqꞌuin jun nimla pec.

⁵⁴ Saꞌ inchꞌo̱l la̱in nak oc cue chi subu̱nc saꞌ haꞌ. Ut quinye: —Anakcuan xin-osoꞌ.—

⁵⁵ At Ka̱cuaꞌ, la̱in quinya̱ba la̱ cꞌabaꞌ nak cuanquin chak saꞌ xchamal li jul.

⁵⁶ Cacuabi li cꞌaꞌru quinye nak quintzꞌa̱ma cha̱cuu nak tina̱col. Incꞌaꞌ xacanab yal chi joꞌcan li cꞌaꞌru quintzꞌa̱ma cha̱cuu.

⁵⁷ Saꞌ li cutan nak quintzꞌa̱ma intenkꞌanquil a̱cue, la̱at caye cue: Matxucuac.

⁵⁸ At Ka̱cuaꞌ, la̱at cat-oquen chicuix ut quina̱col.

⁵⁹ At Ka̱cuaꞌ, la̱at caqꞌue retal li raylal yo̱quin chixcꞌulbal chi ma̱cꞌaꞌ inma̱c. Chacol rix lin yuꞌam.

⁶⁰ La̱at nacanau nak xicꞌ niquineꞌril. Nacaqꞌue retal nak yo̱queb chixcꞌu̱banquil chanru nak tineꞌxcamsi li xicꞌ nequeꞌiloc cue.

⁶¹ La̱at xacuabi nak yo̱queb chinhobbal. Nacanau chixjunil li cꞌaꞌru nequeꞌxcꞌu̱b chicuix.

⁶² Nacanau cꞌaꞌru nequeꞌxye li xicꞌ nequeꞌiloc cue. Rajlal chicuix nequeꞌa̱tinac.

⁶³ Chaqꞌue retal li cꞌaꞌru nequeꞌxba̱nu. Chalen ekꞌela ut toj ecuu, junelic yo̱queb chinhobbal.

⁶⁴ Chaqꞌueheb chixtojbal rix lix ma̱queb, at Ka̱cuaꞌ. Chaba̱nu reheb joꞌ xcꞌulubeb xcꞌulbal.

⁶⁵ Chacacuubresi lix chꞌo̱leb re nak incꞌaꞌ teꞌxtau xya̱lal ut chamajecuaheb.

⁶⁶ Chacꞌut la̱ joskꞌil chiruheb ut chasach ruheb. Chacuisiheb saꞌ li ruchichꞌochꞌ, at Ka̱cuaꞌ.