Lamentaciones 2 - Li Santil hu

¹ Chanchan nak xoxqꞌue saꞌ kꞌojyi̱n li Ka̱cuaꞌ nak xqꞌue li raylal saꞌ xbe̱n li tenamit Jerusalén. Cꞌajoꞌ nak quijoskꞌoꞌ li Ka̱cuaꞌ saꞌ kabe̱n nak quirisi lix lokꞌal li katenamit. Chanchan nak quixtzꞌek saꞌ chꞌochꞌ. Chi moco quiril xtokꞌoba̱l ru li lokꞌlaj templo, lix naꞌaj li rok.

² Li Ka̱cuaꞌ cꞌajoꞌ lix joskꞌil. Ma̱ jun chic li rochocheb li ralal xcꞌajol laj Jacob quixcanab chi xakxo. Quilajxsach ajcuiꞌ ruheb chixjunil li cab li nequeꞌxcol cuiꞌ ribeb laj Judá. Quixcꞌut xxuta̱n li rey joꞌ eb ajcuiꞌ chixjunileb li nequeꞌtenkꞌan re.

³ Xban xjoskꞌil li Ka̱cuaꞌ quixsach xcuanquileb laj Israel. Incꞌaꞌ chic quixtenkꞌaheb laj Israel nak queꞌchal li xicꞌ nequeꞌiloc reheb chi pletic riqꞌuineb. Quixcanab chixjunil chi sachecꞌ. Chanchan queꞌcꞌateꞌ xban xam nak queꞌsacheꞌ ruheb.

⁴ Chanchan nak li Ka̱cuaꞌ yo̱ chixti̱canquileb riqꞌuin lix tzimaj. Quixcanab chi sachecꞌ chixjunil li chꞌinaꞌus rilbal. Cꞌajoꞌ li raylal xeꞌxcꞌul arin Jerusalén. Chanchan nak yo̱queb chi cꞌatc xban xam.

⁵ Chanchan nak xicꞌ chic narileb li tenamit Israel li Ka̱cuaꞌ xban nak quixsach ru li tenamit Jerusalén. Quixcanabeb re nak ta̱juqꞌui̱k chixjunil li cab li bar nequeꞌxcol cuiꞌ ribeb. Ut queꞌxjuqꞌui ajcuiꞌ li rochocheb li rey. Cꞌajoꞌ li raylal quixqꞌue saꞌ xbe̱neb li ralal xcꞌajol laj Judá.

⁶ Moco ra ta chiru nak quixqꞌue chi poꞌi̱c li templo. Ut quixsach ru li naꞌajej li nequeꞌlokꞌonin cuiꞌ li tenamit. Incꞌaꞌ chic nequeꞌlokꞌonin saꞌ li hiloba̱l cutan, chi moco nequeꞌxba̱nu li ninkꞌe joꞌ queꞌxba̱nu junxil. Xban xjoskꞌil li Ka̱cuaꞌ, quixtzꞌekta̱naheb chixjunileb, joꞌ li rey, joꞌ eb ajcuiꞌ laj tij.

⁷ Quixtzꞌekta̱na lix artal li Ka̱cuaꞌ ut quixtzꞌekta̱na ajcuiꞌ li templo. Quixcanabeb saꞌ rukꞌeb li xicꞌ nequeꞌiloc re, re nak teꞌxjuqꞌui li rochoch li rey. Ut japjo̱queb re saꞌ li templo. Chanchan nak yo̱queb chi ninkꞌei̱c.

⁸ Li Ka̱cuaꞌ quixye nak ta̱sachekꞌ ru li tzꞌac li sutsu cuiꞌ Jerusalén ut incꞌaꞌ quixjal xcꞌaꞌux. Quixqꞌue ban chi sachecꞌ chixjunil. Li tzꞌac joꞌ ajcuiꞌ li cab najt xteram li nequeꞌxcol cuiꞌ ribeb ac juqꞌuinbil chic.

⁹ Eb li oqueba̱l re li tenamit tꞌanenakeb chic saꞌ chꞌochꞌ. Jorbil chic li ni̱nki cheꞌ li queꞌtzꞌapoc re li oqueba̱l. Li rey joꞌqueb ajcuiꞌ li queꞌtenkꞌan re queꞌchapeꞌ ut queꞌcꞌameꞌ chi najt saꞌ jalan tenamit. Ma̱cꞌaꞌ chic xchakꞌrab li Dios. Ut li Ka̱cuaꞌ incꞌaꞌ chic naxcꞌutbesi li visión chiruheb li profeta.

¹⁰ Eb li nequeꞌcꞌamoc be chiruheb li cuanqueb Sión, chunchu̱queb chic saꞌ chꞌochꞌ. Incꞌaꞌ nequeꞌa̱tinac. Queꞌxqꞌue li poks saꞌ xjolomeb ut queꞌxqꞌue li kꞌes ru tꞌicr chirixeb retalil lix rahil xchꞌo̱leb. Ut eb li tukꞌ ixk nequeꞌxxulub lix jolomeb xban xrahil xchꞌo̱leb.

¹¹ Incꞌaꞌ chic sa nin-iloc xban li ya̱bac ninba̱nu. Nayotꞌeꞌ li cua̱m xban xrahil inchꞌo̱l xban nak queꞌsacheꞌ ruheb lin tenamit. Ut li cocꞌal nequeꞌcam saꞌ be xban xtzꞌocajiqueb.

¹² Nequeꞌxye reheb lix naꞌ: —Ma̱cꞌaꞌ chic kacua kucꞌa, chanqueb. Ut nequeꞌtꞌaneꞌ saꞌ eb li be xban xtzꞌocajiqueb. Ut nequeꞌcam saꞌ rukꞌeb lix naꞌ xban nak ma̱cꞌaꞌ chic xtzacae̱mkeb.

¹³ ¿Cꞌaꞌ ta cuiꞌ ru tinye che̱rix la̱ex li cuanquex Jerusalén? ¿Cꞌaꞌru texinjuntakꞌe̱ta cuiꞌ? ¿Chan ta cuiꞌ ru nak tincꞌojob e̱chꞌo̱l, la̱ex li cuanquex Sión? Kꞌaxal nim li raylal cuanquex cuiꞌ. Chanchan xnimal li palau. ¿Ani ta̱ru̱k ta̱colok e̱re?

¹⁴ Aꞌaneb ajcuiꞌ le̱ profeta li queꞌbalakꞌin e̱re. La̱ex yo̱quex chi ma̱cobc, abanan incꞌaꞌ queꞌxye e̱re nak incꞌaꞌ us yo̱quex. Incꞌaꞌ queꞌxye e̱re nak te̱yotꞌ e̱chꞌo̱l ut te̱jal e̱cꞌaꞌux re nak incꞌaꞌ texchapekꞌ. Ticꞌtiꞌ ban li queꞌxye e̱re.

¹⁵ Chixjunileb li nequeꞌnumeꞌ, nequeꞌxpokꞌpokꞌi li rukꞌeb nak nequexril. Nequeꞌseꞌec ut nequexhob la̱ex li cuanquex Jerusalén. Ut nequeꞌxye: —¿Ma aꞌin ta biꞌ li tenamit li kꞌaxal chꞌinaꞌus nayeheꞌ re? ¿Ma aꞌin ta biꞌ li tenamit li ta̱qꞌuehekꞌ xlokꞌal xbaneb chixjunileb li cuanqueb saꞌ ruchichꞌochꞌ? chanqueb.

¹⁶ Chixjunileb li xicꞌ nequeꞌiloc e̱re yo̱queb che̱hobbal. Nequeꞌrecꞌasi lix jolomeb ut nequeꞌseꞌec. Ut nequeꞌxye: —Chanchan xkanukꞌeb nak xkasach ruheb. Aꞌan aꞌin li cutan yo̱co chiroybeninquil nak teꞌsachekꞌ ruheb laj Jerusalén. Toj xkil ajcuiꞌ nak xeꞌsacheꞌ ruheb, chanqueb.

¹⁷ Li Ka̱cuaꞌ xba̱nu e̱re li cꞌaꞌru quixye chak junxil. Incꞌaꞌ xril xtokꞌoba̱l e̱ru. Xsach ban e̱ru. Incꞌaꞌ chic xcuy e̱ma̱c. Xqꞌueheb xcuanquil li xicꞌ nequeꞌiloc e̱re re teꞌnumta̱k saꞌ e̱be̱n, ut xexqꞌue chi seꞌe̱c.

¹⁸ La̱ex li cuanquex Jerusalén, cheya̱ba xcꞌabaꞌ li Ka̱cuaꞌ. Chi kꞌek chi cutan texya̱bak. Tꞌululnak xyaꞌal e̱ru. Chanchanak li nimaꞌ. Me̱canab ya̱bac. Me̱qꞌue chi hila̱nc li xnakꞌ e̱ru.

¹⁹ Chexcuacli̱k chiru kꞌojyi̱n nabal sut ut te̱ya̱ba xcꞌabaꞌ li Ka̱cuaꞌ chi anchal e̱chꞌo̱l. Chetzꞌa̱ma chiru li Dios re nak ta̱ril xtokꞌoba̱leb ru le̱ cocꞌal li yo̱queb chi ca̱mc saꞌ be yalak bar xban nak ma̱cꞌaꞌ xtzacae̱mkeb.

²⁰ At Ka̱cuaꞌ, qꞌue retal. ¿Ma cuan ta biꞌ anihak xaba̱nu re joꞌ yo̱cat chixba̱nunquil ke la̱o? ¿Ma tento ta biꞌ nak eb li naꞌbej teꞌxtiu xtibeleb lix cocꞌal li nequeꞌxra? ¿Ma tento ta biꞌ nak teꞌcamsi̱k saꞌ li templo eb laj tij ut eb li profeta?

²¹ Eb li camenak nequeꞌtꞌanaxin saꞌ eb li be, joꞌ cocꞌal, joꞌ ti̱xeb. Eb li sa̱j cui̱nk ut eb li tukꞌ ixk xelajeꞌcamsi̱c. Xban a̱joskꞌil, at Ka̱cuaꞌ, cacanabeb chi camsi̱c ut incꞌaꞌ cacuil xtokꞌoba̱l ruheb.

²² Xiu xiu cuanco. Yalak bar yo̱queb chi cha̱lc li nequeꞌba̱nun raylal ke. Chanchan li bokbileb saꞌ junak ninkꞌe. At Ka̱cuaꞌ, ma̱ ani naru naxcol rib cha̱cuu nak yo̱ a̱joskꞌil. Eb li xinqꞌuiresiheb quilajeꞌcamsi̱c; ut li xinchꞌolaniheb queꞌsacheꞌ ruheb xbaneb li xicꞌ nequeꞌiloc ke.