Lamentaciones 1 - Li Santil hu

Lix rahil xchꞌo̱leb laj Jerusalén

¹ Tokꞌob xak ru li tenamit Jerusalén. Ma̱cꞌaꞌ chic cuan chi saꞌ. Nimla tenamit nak quicuan, abanan anakcuan chanchan aj chic jun xma̱lcaꞌan xcana. Junxil li tenamit Jerusalén kꞌaxal nim saꞌ xya̱nkeb chixjunileb li tenamit ut aꞌan nataklan saꞌ xbe̱neb. Abanan anakcuan aꞌan chic li natakla̱c.

² Cꞌajoꞌ nak nequeꞌya̱bac chiru kꞌojyi̱n li cuanqueb Jerusalén. Li xyaꞌal ruheb natꞌululnac saꞌ xnakꞌ ruheb. Saꞌ xya̱nkeb chixjunileb li nequeꞌrahoc reheb, ma̱ ani naru nacꞌojoban re xchꞌo̱leb. Xeꞌtzꞌekta̱na̱c xbaneb li rami̱gueb nak queꞌcuan ut xicꞌ chic nequeꞌileꞌ.

³ Eb li ralal xcꞌajol laj Judá xeꞌchapeꞌ ut xeꞌcꞌameꞌ saꞌ jalan tenamit xbaneb li xicꞌ nequeꞌiloc reheb ut yo̱queb chi rahobtesi̱c. Ma̱ bar chic naru nequeꞌhilan. Eb li xicꞌ nequeꞌiloc reheb xeꞌnumta saꞌ xbe̱neb ut incꞌaꞌ chic naru nequeꞌe̱lelic chiruheb.

⁴ Kꞌaxal ra saꞌ xchꞌo̱leb li be li nequeꞌxic aran Sión xban nak ma̱ ani nanumeꞌ aran re teꞌxic saꞌ eb li ninkꞌe. Ma̱ ani nacuan chiruheb li oqueba̱l re li tenamit ut eb laj tij yo̱queb chixjikꞌbal xchꞌo̱leb xban li raylal yo̱queb chixcꞌulbal. Kꞌaxal ra saꞌ xchꞌo̱leb li tukꞌ ixk joꞌqueb ajcuiꞌ chixjunileb li tenamit.

⁵ Eb li xicꞌ nequeꞌiloc reheb, aꞌaneb chic li nequeꞌtaklan saꞌ xbe̱neb. Eb li xicꞌ nequeꞌiloc reheb us nequeꞌel riqꞌuin li cꞌaꞌru nequeꞌxba̱nu. Li Ka̱cuaꞌ quixqꞌueheb li ralal xcꞌajol laj Judá chixtojbal rix lix ma̱queb. Eb li ralal xcꞌajol queꞌchapeꞌ ut queꞌcꞌameꞌ chi najt xbaneb li xicꞌ nequeꞌiloc reheb.

⁶ Anakcuan xsach lix lokꞌal li tenamit Jerusalén. Eb li nequeꞌcꞌamoc be chiruheb chanchaneb chic li quej li incꞌaꞌ nequeꞌxtau xcuaheb. Ma̱cꞌaꞌ chic xmetzꞌe̱uheb nak yo̱queb chi e̱lelic chiruheb li yo̱queb chi chapoc reheb.

⁷ Nak cuanqueb saꞌ raylal ut xjuneseb, nequeꞌjulticoꞌ reheb laj Jerusalén chanru nak quicuan nabal xbiomaleb junxil. Najulticoꞌ reheb chanru nak xeꞌtꞌaneꞌ saꞌ rukꞌeb li xicꞌ nequeꞌiloc reheb ut ma̱ ani quitenkꞌan reheb. Eb li xicꞌ nequeꞌiloc reheb queꞌsahoꞌ saꞌ xchꞌo̱leb ut yo̱queb chixhobbal laj Jerusalén nak yo̱queb chixcꞌulbal li raylal.

⁸ Kꞌaxal cuiꞌchic numtajenak li ma̱c queꞌxba̱nu eb laj Jerusalén. Xban li ma̱usilal queꞌxba̱nu incꞌaꞌ chic nequeꞌqꞌueheꞌ xlokꞌal. Eb li queꞌqꞌuehoc xlokꞌaleb laj Jerusalén junxil, anakcuan nequeꞌxtzꞌekta̱na xban nak xeꞌxqꞌue retal li ma̱usilal queꞌxba̱nu. Joꞌcan nak yo̱queb chi ya̱bac ut nequeꞌxuta̱na̱c eb laj Jerusalén.

⁹ Quicꞌutun chi tzꞌakal li ma̱usilal li queꞌxba̱nu, abanan incꞌaꞌ quiyotꞌeꞌ xchꞌo̱leb. Incꞌaꞌ queꞌxqꞌue retal cꞌaꞌru teꞌxcꞌul mokon. Cꞌajoꞌ li raylal queꞌxcꞌul nak qui-isi̱c xcuanquileb. Ma̱ ani nacꞌojoban xchꞌo̱leb. Nequeꞌtijoc ut nequeꞌxye re li Dios: —At Ka̱cuaꞌ, chaqꞌue taxak retal li raylal li yo̱co chixcꞌulbal. Chaqꞌue taxak retal chanru nak eb li xicꞌ nequeꞌiloc ke yo̱queb chi numta̱c saꞌ kabe̱n, chanqueb.

¹⁰ Eb li xicꞌ nequeꞌiloc reheb laj Jerusalén queꞌxcꞌam chokꞌ reheb chixjunil lix biomal li tenamit Jerusalén. Eb laj Jerusalén queꞌril nak queꞌoc saꞌ li lokꞌlaj templo bar caye nak incꞌaꞌ naru teꞌoc li ma̱cuaꞌeb aj judío.

¹¹ Chixjunileb laj Israel yo̱queb chi ya̱bac xban li raylal yo̱queb chixcꞌulbal ut yo̱queb chixsicꞌbal xtzacae̱mkeb. Nequeꞌxcꞌayi li kꞌaxal lokꞌ chiruheb re xlokꞌbal xtzacae̱mkeb re nak incꞌaꞌ teꞌca̱mk xban xtzꞌocajiqueb. Nequeꞌtijoc ut nequeꞌxye: —At Ka̱cuaꞌ, ta̱cuil taxak xtokꞌoba̱l ku xban nak kꞌaxal ra cuanco, chanqueb.

¹² Nequeꞌxye reheb li nequeꞌnumeꞌ aran: —¿Ma incꞌaꞌ nayotꞌeꞌ e̱chꞌo̱l chirilbal li raylal li yo̱co chixcꞌulbal? ¿Ma cuanqueb ta biꞌ queꞌcꞌuluc li raylal li yo̱co chixcꞌulbal la̱o? Li Ka̱cuaꞌ xoxqꞌue chixcꞌulbal li raylal aꞌin xban nak yo̱ xjoskꞌil saꞌ kabe̱n.

¹³ Chanchan nak li Ka̱cuaꞌ quixtakla chak jun li xam toj saꞌ choxa. Nacuulac xtikcual toj saꞌ kabakel. Chanchan nak quixqꞌue jun li raꞌal saꞌ kabe re totꞌanekꞌ cuiꞌ. Ut chirix aꞌan coxcanab kajunes chixcꞌulbal li raylal.

¹⁴ Li Ka̱cuaꞌ yo̱ chak chixqꞌuebal retal li ma̱c li xkaba̱nu. Chanchan nak quixchꞌutubeb li kama̱c ut quixbacꞌ chiru li kacux. Chanchan li yugo li kꞌaxal a̱l xcꞌambal. Yo̱ chi osocꞌ li kametzꞌe̱u. Li Ka̱cuaꞌ coxkꞌaxtesi saꞌ rukꞌeb li xicꞌ nequeꞌiloc ke ut la̱o incꞌaꞌ chic nakacuy xcolbal kib chiruheb.

¹⁵ Li Ka̱cuaꞌ quirisi xmetzꞌe̱uheb li kasolda̱d li cauheb raj rib chikacolbal. Ut quixtaklaheb jun chꞌu̱tal lix soldado li xicꞌ nequeꞌiloc ke chixsachbal ruheb li sa̱j cui̱nk saꞌ kaya̱nk. Xban nak kꞌaxal yo̱ xjoskꞌil, joꞌcan nak quixtakla raylal saꞌ kabe̱n. Chanchan nak nayatzꞌeꞌ li ru li uvas re risinquil li xyaꞌal.

¹⁶ Xban li raylal li yo̱co chixcꞌulbal, nocoya̱bac. Natꞌuluc xyaꞌal ku. Ma̱ ani nacꞌojoban kachꞌo̱l ut ma̱ ani naru naqꞌuehoc xcacuil kachꞌo̱l. Ut eb li kalal kacꞌajol xeꞌcana chi ma̱cꞌaꞌ chic cuan reheb xban nak eb li xicꞌ nequeꞌiloc ke xeꞌnumta saꞌ kabe̱n.

¹⁷ Eb li cuanqueb Sión yo̱queb chixtzꞌa̱manquil xtenkꞌanquil. Abanan ma̱ ani natenkꞌan reheb. Li Ka̱cuaꞌ quixye nak eb li cuanqueb chi nachꞌ xicꞌ chic teꞌrileb li ralal xcꞌajol laj Jacob. Eb li cuanqueb Jerusalén tzꞌekta̱nanbileb xbaneb li xicꞌ nequeꞌiloc reheb.

¹⁸ Li Ka̱cuaꞌ quirakoc a̱tin saꞌ kabe̱n saꞌ ti̱quilal. La̱o xkakꞌet li ra̱tin. Che̱junilex la̱ex, qꞌuehomak retal li raylal li yo̱co chixcꞌulbal. Chixjunileb li toj sa̱jeb queꞌchapeꞌ ut queꞌcꞌameꞌ chi najt, joꞌ cui̱nk, joꞌ ixk.

¹⁹ Kajap ke chixbokbaleb li nequeꞌrahoc ke, abanan xoeꞌxbalakꞌi. Eb laj tij ut eb li nequeꞌcꞌamoc be chiku yo̱queb chi ca̱mc saꞌ li tenamit. Yo̱queb raj chixsicꞌbal lix tzacae̱mkeb re nak incꞌaꞌ teꞌca̱mk.

²⁰ At Ka̱cuaꞌ, at kaDios, chaqꞌue taxak retal li raylal li yo̱co chixcꞌulbal. Ta̱qꞌue taxak retal lix rahil li kachꞌo̱l. Cꞌajoꞌ nak nayotꞌeꞌ li kachꞌo̱l xban li ma̱c xkaba̱nu. Saꞌ eb li be yo̱queb chi camsi̱c li kalal kacꞌajol ut yo̱queb ajcuiꞌ chi ca̱mc saꞌ li kochoch.

²¹ Eb li tenamit queꞌrabi nak yo̱co chi ya̱bac xban li raylal, abanan ma̱ ani nacꞌojoban kachꞌo̱l. Nequeꞌsahoꞌ saꞌ xchꞌo̱leb li xicꞌ nequeꞌiloc ke nak nequeꞌrabi resil li raylal li xaqꞌue saꞌ kabe̱n. Chicuulak taxak xkꞌehil li rakba a̱tin re nak teꞌxcꞌul ajcuiꞌ eb aꞌan joꞌ yo̱co chixcꞌulbal la̱o.

²² Chaqꞌue taxak retal li incꞌaꞌ us nequeꞌxba̱nu li xicꞌ nequeꞌiloc ke. Chaba̱nu taxak riqꞌuineb aꞌan joꞌ xaba̱nu kiqꞌuin la̱o xban li ma̱usilal xkaba̱nu. Cꞌajoꞌ nak nayotꞌeꞌ kachꞌo̱l ut tacuajenako xban li raylal yo̱co chixcꞌulbal.