Jueces 9 - Li Santil hu

Laj Abimelec ut laj Jotam

¹ Laj Abimelec, li ralal laj Jerobaal, quicuulac Siquem chi a̱tinac riqꞌuineb li ras lix naꞌ ut riqꞌuineb chixjunileb li cuanqueb saꞌ rochoch lix yucuaꞌ lix naꞌ. Ut quixye reheb:

² —Nintzꞌa̱ma che̱ru nak te̱patzꞌ reheb chixjunileb li cuanqueb Siquem cꞌaꞌru li kꞌaxal us chokꞌ reheb. ¿Ma us nak li laje̱b xca̱cꞌa̱l (70) chi ralal laj Jerobaal teꞌtakla̱nk saꞌ xbe̱neb? ¿Malaj ut us nak jun ajcuiꞌ ta̱takla̱nk saꞌ xbe̱neb? Chijulticokꞌ e̱re nak la̱in le̱ comon, chan.

³ Eb li ras lix naꞌ laj Abimelec queꞌxserakꞌi chixjunil aꞌin reheb li cuanqueb Siquem. Ut queꞌxcꞌul xchꞌo̱leb nak laj Abimelec ta̱takla̱nk saꞌ xbe̱neb xban nak aꞌan xcomoneb, chanqueb.

⁴ Queꞌrisi laje̱b xca̱cꞌa̱l chi tumin plata saꞌ li rochoch li yi̱banbil dios Baal-berit ut queꞌxsi re laj Abimelec. Laj Abimelec quixsiqꞌueb li cui̱nk li incꞌaꞌ useb xnaꞌleb, li junes subuc cutan nequeꞌxba̱nu, ut riqꞌuin li tumin aꞌan quixtojeb chixtenkꞌanquil.

⁵ Queꞌco̱eb aran Ofra saꞌ li rochoch laj Jerobaal lix yucuaꞌ. Ut aran chiru jun chi pec queꞌxcamsiheb li laje̱b xca̱cꞌa̱l chi ralal laj Jerobaal, ri̱tzꞌineb rib riqꞌuin laj Abimelec. Caꞌaj cuiꞌ laj Jotam li i̱tzꞌinbej quixmuk rib. Joꞌcan nak quicoleꞌ.

⁶ Chirix chic aꞌan, chixjunileb li cuanqueb Siquem queꞌxjunaji ribeb riqꞌuineb li cuanqueb Bet-milo ut queꞌco̱eb bar cuan cuiꞌ li cheꞌ ji ut li pec li quixakaba̱c aran Siquem. Ut aran queꞌxxakab laj Abimelec chokꞌ xreyeb.

⁷ Nak laj Jotam quirabi resil li queꞌxba̱nu, quitakeꞌ saꞌ xbe̱n li tzu̱l Gerizim. Ut toj aran quixjap chak re chixyebal: —Ex cui̱nk aj Siquem, cherabihak li cꞌaꞌru oc cue chixyebal ut chirabihak ta ajcuiꞌ li Dios li cꞌaꞌru te̱ye la̱ex.

⁸ Saꞌ jun li cutan queꞌxchꞌutub ribeb li cheꞌ re nak teꞌxxakab junak lix reyeb, ut queꞌxye re li cheꞌ olivo, “Tatkaxakab chi takla̱nc saꞌ kabe̱n”, chanqueb.

⁹ Quichakꞌoc li cheꞌ olivo ut quixye: ¿Ma tincanab ta biꞌ xqꞌuebal li aceite li na-el saꞌ lin cheꞌel yal re nak tinxic chi cꞌanjelac chokꞌ e̱rey? Li aceite li ninqꞌue la̱in, aꞌan nacꞌanjelac chiru li Dios ut chiruheb li cui̱nk, chan li cheꞌ olivo.

¹⁰ Ut eb li cheꞌ queꞌxye re li cheꞌ higo: —Tatkaxakab la̱at chokꞌ karey, chanqueb re li higo.

¹¹ Ut li cheꞌ higo quixye reheb: —La̱in incꞌaꞌ naru nincanab ru̱chininquil li quiꞌil kꞌe̱n kꞌaxal cha̱bil yal re nak tincꞌanjelak chokꞌ e̱rey la̱ex, chan.

¹² Ut eb li cheꞌ queꞌxye re lix cheꞌel li uvas: —La̱at tatkaxakab chokꞌ karey, chanqueb.

¹³ Aꞌut lix cheꞌel li uvas quixye reheb: —¿Cꞌaꞌut? ¿Ma naru ta biꞌ tincanab xqꞌuebal li vino li nasahoꞌ cuiꞌ xchꞌo̱l li Ka̱cuaꞌ ut eb li cui̱nk yal re nak tincꞌanjelak chokꞌ e̱rey? chan.

¹⁴ Tojoꞌnak eb li cheꞌ queꞌxye re li tun qꞌuix: —La̱at tatkaxakab chokꞌ karey, chanqueb.

¹⁵ Ut li tun qꞌuix quixye reheb: —Cui ya̱l nak la̱ex te̱raj nak la̱in tin-oc chokꞌ e̱rey, quimkex biꞌ anakcuan. Qꞌuehomak e̱rib chi rubel lin mu. Cui ut incꞌaꞌ nequeraj chi joꞌcan, chie̱lk li xam cuiqꞌuin ut chixcꞌatak li chacalteꞌ re Líbano, chan.

¹⁶ Ut laj Jotam quixpatzꞌ reheb: —¿Ma chi anchal e̱chꞌo̱l ut ma saꞌ xya̱lal xexakab laj Abimelec chokꞌ rey? ¿Ma xeba̱nu usilal re laj Gedeón ut reheb li ralal xcꞌajol joꞌ nak laj Gedeón quixba̱nu usilal e̱re la̱ex?

¹⁷ Laj Gedeón lin yucuaꞌ incꞌaꞌ quixra lix yuꞌam nak co̱ chi pletic riqꞌuineb laj Madián re e̱colbal la̱ex.

¹⁸ Abanan anakcuan la̱ex xeba̱nu ma̱usilal reheb li ralal lin yucuaꞌ. Chiru jun chi pec xecamsiheb li laje̱b xca̱cꞌa̱l chi ralal laj Gedeón. Ut xexakab laj Abimelec chokꞌ e̱rey, xban nak aꞌan e̱rechꞌalal. Aꞌan ralal laj Gedeón riqꞌuin jun lix mo̱s ixk.

¹⁹ Cui xexcuan saꞌ xya̱lal riqꞌuin laj Gedeón ut riqꞌuineb li ralal xcꞌajol chiru li cutan aꞌin, naru texcua̱nk chi sa saꞌ e̱chꞌo̱l riqꞌuin laj Abimelec. Ut laj Abimelec chicua̱nk chi sa saꞌ xchꞌo̱l e̱riqꞌuin.

²⁰ Cui ut incꞌaꞌ xexcuan saꞌ xya̱lal, chie̱lk ta xam riqꞌuin laj Abimelec ut cheꞌcꞌatk ta chixjunileb li cui̱nk aj Siquem ut eb laj Bet-milo. Ut chie̱lk ta xam riqꞌuineb laj Siquem ut eb laj Bet-milo ut chicꞌatk ta laj Abimelec, chan laj Jotam.

²¹ Ut xban nak laj Jotam quixucuac chiru laj Abimelec li ras, joꞌcan nak quie̱lelic chiru ut co̱ chi cua̱nc saꞌ li tenamit Beer.

²² Oxib chihab queꞌcuan laj Israel rubel xcuanquilal laj Abimelec.

²³ Ut li Dios quixtakla jun chꞌaꞌajquilal saꞌ xbe̱neb laj Abimelec ut eb laj Siquem re nak xicꞌ chic teꞌril ribeb chi ribileb rib. Ut eb laj Siquem queꞌxkꞌetkꞌeti ribeb chiru laj Abimelec.

²⁴ Li Dios quixba̱nu chi joꞌcan re nak laj Abimelec rochbeneb li cui̱nk aj Siquem teꞌxtoj rix li ma̱c li queꞌxba̱nu nak queꞌxcamsiheb li laje̱b xca̱cꞌa̱l (70) chi ralal laj Jerobaal.

²⁵ Eb laj Siquem queꞌxxakabeb li cui̱nk re nak teꞌxmuk ribeb saꞌ eb li tzu̱l. Ut queꞌrelkꞌa chixjunil li cꞌaꞌru cuan reheb li nequeꞌnumeꞌ aran. Abanan laj Abimelec quirabi resil li cꞌaꞌru yo̱queb chixba̱nunquil.

²⁶ Laj Gaal, li ralal laj Ebed, co̱ chi cua̱nc Siquem rochbeneb li ras ut eb li ri̱tzꞌin. Ut eb laj Siquem queꞌxserakꞌi re li cꞌaꞌru yo̱queb chixba̱nunquil.

²⁷ Queꞌco̱eb chixsicꞌbal ru li uvas ut queꞌxyatzꞌ re risinquil lix yaꞌal. Chirix aꞌan queꞌxba̱nu jun li ninkꞌe saꞌ rochoch lix dioseb. Nak yo̱queb chi cuaꞌac ut chi ucꞌac, yo̱queb chixmajecuanquil laj Abimelec.

²⁸ Ut laj Gaal, ralal laj Ebed, quixye: —¿Ani laj Abimelec ut aniho la̱o nak takaqꞌue kib rubel xtakl? ¿Ma ma̱cuaꞌ ta biꞌ laj Abimelec ralal laj Jerobaal? Ut laj Zebul cuan rubel xtakl. ¿Cꞌaꞌut nak tocꞌanjelak chiru aꞌan? Tocꞌanjelak ban chiruheb li ralal xcꞌajol laj Hamor li quiyi̱ban re li tenamit aꞌan.

²⁹ Cui ta la̱in nintaklan saꞌ e̱be̱n, ac xkasach raj ru laj Abimelec. Ac raj xinye re nak tixcauresiheb lix soldado re teꞌcha̱lk chi pletic kiqꞌuin, chan laj Gaal.

³⁰ Nak quirabi resil li cꞌaꞌru quixye laj Gaal, ralal laj Ebed, cꞌajoꞌ nak quijoskꞌoꞌ laj Zebul li nataklan saꞌ xbe̱neb li tenamit aꞌan.

³¹ Saꞌ mukmu quixtakla resil riqꞌuin laj Abimelec ut quixye re: —Laj Gaal, ralal laj Ebed, rochbeneb li ras ut eb li ri̱tzꞌin cuanqueb arin Siquem ut yo̱queb chixtacchiꞌinquileb li tenamit re nak incꞌaꞌ chic teꞌabi̱nk cha̱cuu.

³² Joꞌcan nak chiru li kꞌojyi̱n aꞌin la̱at a̱cuochbeneb li soldados texcha̱lk ut te̱muk e̱rib chire li tenamit.

³³ Nak ta̱sake̱uk cuulaj texcuacli̱k ut tex-oc chi pletic saꞌ li tenamit. Nak teꞌe̱lk laj Gaal rochbeneb lix soldado, la̱at ta̱cuil cꞌaꞌru ta̱ba̱nu riqꞌuineb, chan.

³⁴ Joꞌcan nak chiru kꞌojyi̱n laj Abimelec rochbeneb lix soldado queꞌco̱eb chire li tenamit Siquem ut queꞌxmuk ribeb chirix li tenamit. Ca̱hib chꞌu̱tal queꞌel nak queꞌxjachi ribeb.

³⁵ Nak laj Gaal qui-el ut quixakli chire li oqueba̱l re li tenamit, laj Abimelec ut eb li soldado queꞌel chak saꞌ eb li naꞌajej li mukmu̱queb cuiꞌ.

³⁶ Laj Gaal quirileb ut quixye re laj Zebul: —¡Il! Cuanqueb cui̱nk yo̱queb chak chi cubec saꞌ li tzu̱l, chan. Ut laj Zebul quixye: —Ma̱cuaꞌeb cui̱nk nacacuil. Yal mu nacꞌutun saꞌ li tzu̱l, chan.

³⁷ Laj Gaal quixye cuiꞌchic: —Ya̱l nak cui̱nk yo̱queb chak chi cubec saꞌ li tzu̱l. Ut yo̱queb ajcuiꞌ chi cha̱lc saꞌ li be cuan cuiꞌ li ji li nequeꞌcuan cuiꞌ laj kꞌe, chan.

³⁸ Laj Zebul quixye re: —¿Ma incꞌaꞌ ta biꞌ cau a̱cuib? ¿Ma incꞌaꞌ ta biꞌ yo̱cat chixhobbal laj Abimelec nak xaye, “¿Cꞌaꞌru aj e nak tocꞌanjelak chiru aꞌan?” chancat. Ayu chi pletic riqꞌuineb anakcuan, chan laj Zebul.

³⁹ Ut laj Gaal quicꞌamoc be chiruheb li cui̱nk aj Siquem nak queꞌco̱eb chi pletic riqꞌuineb laj Abimelec.

⁴⁰ Laj Abimelec quira̱linaheb laj Gaal ut nabaleb queꞌcam nak yo̱queb chi xic saꞌ li oqueba̱l re li tenamit.

⁴¹ Ut laj Abimelec quicana chi cua̱nc saꞌ li tenamit Aruma. Ut laj Zebul quirisi laj Gaal saꞌ li tenamit Siquem rochbeneb li ras ut eb li ri̱tzꞌin re nak incꞌaꞌ chic teꞌcua̱nk aran.

⁴² Cuulajak chic laj Abimelec quirabi resil nak eb laj Siquem teꞌxic saꞌ li cꞌaleba̱l.

⁴³ Joꞌcan nak quixjachi lix soldado chi oxib chꞌu̱tal ut quixtaklaheb chixmukbal ribeb saꞌ li cꞌaleba̱l roybeninquil nak teꞌe̱lk saꞌ li tenamit Siquem. Nak queꞌel saꞌ li tenamit, eb laj Abimelec queꞌel saꞌ lix naꞌajeb ut queꞌxcamsiheb.

⁴⁴ Nak eb laj Abimelec ut eb li soldado li cuanqueb rochben yo̱queb chi oc chi pletic saꞌ li tenamit, li cuib chꞌu̱tal chic chi soldado yo̱queb chixcamsinquileb li cuanqueb saꞌ cꞌaleba̱l.

⁴⁵ Chiru chixjunil li cutan yo̱queb chi pletic toj retal nak laj Abimelec quinumta saꞌ xbe̱neb laj Siquem. Quixcamsiheb ut quixjucꞌ li tenamit ut quixpaji atzꞌam saꞌ li naꞌajej aꞌan.

⁴⁶ Nak eb li cuanqueb saꞌ li cab li najt xteram queꞌrabi li cꞌaꞌru yo̱ chi cꞌulma̱nc, queꞌcube ut queꞌco̱eb chixcolbal ribeb saꞌ li cab cuan cuiꞌ laj Baal-berit, lix dioseb.

⁴⁷ Ut laj Abimelec quirabi resil nak chꞌutchꞌu̱queb aran.

⁴⁸ Co̱ rochbeneb lix soldado saꞌ li tzu̱l Salmón. Quixchap lix ma̱l laj Abimelec ut quixyocꞌ jun li rukꞌ cheꞌ ut quixqꞌue saꞌ xbe̱n xtel. Quixye reheb li rochben: —Cheba̱nu joꞌ xinba̱nu la̱in. Ut se̱bahomak e̱rib, chan.

⁴⁹ Ut chixjunileb queꞌxyocꞌ li rukꞌ cheꞌ ut queꞌxpako saꞌ xbe̱n xteleb ut queꞌco̱eb chirix laj Abimelec saꞌ li cab li chꞌutchꞌu̱queb cuiꞌ laj Siquem. Queꞌxqꞌue li rukꞌ cheꞌ chirix li cab ut queꞌxloch xxamlel ut queꞌcꞌateꞌ li cuanqueb chi saꞌ. Joꞌcan nak queꞌcam li cristian li cuanqueb Siquem. Numenak tana jun mil li queꞌcam, joꞌ cui̱nk, joꞌ ixk.

⁵⁰ Chirix chic aꞌan laj Abimelec queꞌco̱eb toj saꞌ li tenamit Tebes ut queꞌxtiquib pletic toj retal queꞌre̱chani li tenamit.

⁵¹ Saꞌ li tenamit aꞌan cuan jun li nimla cab najt xteram re teꞌxcol cuiꞌ ribeb. Chixjunileb li cuanqueb saꞌ li tenamit queꞌco̱eb aran, joꞌ cui̱nk, joꞌ ixk. Ut queꞌco̱eb ajcuiꞌ eb li nequeꞌtaklan saꞌ li tenamit aꞌan. Queꞌxqꞌue saꞌ lau lix puertil ut queꞌtakeꞌ saꞌ xbe̱n li cab.

⁵² Laj Abimelec co̱ cuan cuiꞌ li oqueba̱l re li cab aꞌan re tixcꞌat.

⁵³ Abanan jun li ixk quixcut jun tokol li pec re li molino. Li pec aꞌan quinak saꞌ xjolom laj Abimelec ut quijoreꞌ lix jolom.

⁵⁴ Laj Abimelec quixbok saꞌ junpa̱t li cui̱nk li nacꞌamoc re lix chꞌi̱chꞌ ut quixye re: —Isi chak la̱ chꞌi̱chꞌ ut tina̱camsi re nak ma̱ ani ta̱yehok re nak ixk xcamsin cue, chan. Ut li cui̱nk quixnumsi lix chꞌi̱chꞌ saꞌ xsaꞌ. Joꞌcaꞌin nak quicam laj Abimelec.

⁵⁵ Nak queꞌxqꞌue retal laj Israel nak ac xcam laj Abimelec, queꞌsukꞌi cuiꞌchic saꞌ li rochocheb.

⁵⁶ Joꞌcaꞌin nak quiqꞌueheꞌ laj Abimelec xban li Dios chixtojbal rix li ma̱c quixba̱nu chiru lix naꞌ xyucuaꞌ nak quixcamsiheb li laje̱b xca̱cꞌa̱l (77) li ras ut li ri̱tzꞌin.

⁵⁷ Ut li Dios quixqꞌueheb ajcuiꞌ chixtojbal rix lix ma̱queb li cui̱nk li cuanqueb Siquem. Queꞌxcꞌul joꞌ quixye laj Jotam li ralal laj Jerobaal.