Jueces 8 - Li Santil hu

¹ Eb li ralal xcꞌajol laj Efraín queꞌjoskꞌoꞌ ut queꞌxcuechꞌi laj Gedeón ut queꞌxye re: —¿Cꞌaꞌut nak xaba̱nu chi joꞌcan? ¿Cꞌaꞌut nak incꞌaꞌ xatakla kabokbal nak xco̱ex chi pletic riqꞌuineb laj Madián? chanqueb re.

² Ut laj Gedeón quixye reheb: —¿Cꞌaꞌru xinba̱nu la̱in? ¿Ma ma̱cuaꞌ ta biꞌ la̱ex nabal xeba̱nu chiku la̱o? La̱o caꞌchꞌin ajcuiꞌ xkaba̱nu. Abanan la̱ex nabal xeba̱nu.

³ Li Dios quixkꞌaxtesi saꞌ e̱rukꞌ la̱ex laj Oreb ut laj Zeeb, li cuib li nequeꞌtaklan saꞌ xbe̱neb laj Madián. La̱ex nabal xeba̱nu chiru li xkaba̱nu la̱o, chan. Riqꞌuin li quixye laj Gedeón, quinumeꞌ lix joskꞌileb.

⁴ Laj Gedeón rochbeneb li oxib ciento chi cui̱nk queꞌcuulac chire li nimaꞌ Jordán ut queꞌnumeꞌ jun pacꞌal. Lublu̱queb ut tacuajenakeb, abanan toj queꞌxqꞌue xchꞌo̱l chixchapbaleb li xicꞌ nequeꞌiloc reheb.

⁵ Nak queꞌcuulac saꞌ li tenamit Sucot, laj Gedeón quixye reheb li cuanqueb aran: —Nintzꞌa̱ma che̱ru nak te̱ba̱nu li usilal. Te̱qꞌue xtzacae̱mkeb li cui̱nk li cuanqueb cuochben xban nak tacuajenakeb. La̱o yo̱co chira̱linanquileb re takachapeb laj Zeba ut laj Zalmuna lix reyeb laj Madián, chan.

⁶ Abanan eb li nequeꞌtaklan aran Sucot queꞌxye re: —¿Cꞌaꞌut nak takaqꞌue xcuaheb la̱ soldado? ¿Ma ac xechapeb ta biꞌ laj Zeba ut laj Zalmuna? chanqueb.

⁷ Laj Gedeón quixye reheb: —Nak li Ka̱cuaꞌ acak xkꞌaxtesiheb saꞌ kukꞌ laj Zeba ut laj Zalmuna, la̱in tinsukꞌi̱k e̱riqꞌuin ut tinqꞌue e̱lo̱b ut texinrahobtesi riqꞌuin li qꞌuix li nacuan saꞌ li chaki chꞌochꞌ, chan.

⁸ Ut laj Gedeón rochbeneb lix soldado queꞌco̱eb Peniel. Ut quixtzꞌa̱ma cuiꞌchic usilal chiruheb joꞌ quixba̱nu aran Sucot. Ut eb li cuanqueb Peniel queꞌxye re joꞌ li queꞌxye li cuanqueb aran Sucot.

⁹ Joꞌcan nak laj Gedeón quixye reheb: —Nak acak xonumta saꞌ xbe̱neb li xicꞌ nequeꞌiloc ke, la̱o tosukꞌi̱k arin, ut takatꞌan li ochoch aꞌin li najt xteram, chan.

¹⁰ Laj Zeba ut laj Zalmuna cuanqueb saꞌ li naꞌajej Carcor rochbeneb oꞌlaju mil (15,000) lix soldado. Caꞌaj cuiꞌ eb aꞌan li toj yoꞌyo̱queb. Li jun ciento mil riqꞌuin junmay mil chic ac queꞌcamsi̱c saꞌ li ple̱t.

¹¹ Laj Gedeón rochbeneb lix soldado yo̱queb chi xic saꞌ li be li cuan saꞌ xnuba̱l li chaki chꞌochꞌ li cuan saꞌ xjayal li oriente riqꞌuineb li tenamit Noba ut Jogbeha. Nak ma̱cꞌaꞌ saꞌ xchꞌo̱leb laj Madián, laj Gedeón rochbeneb lix soldado queꞌoc chi pletic riqꞌuineb.

¹² Laj Zeba ut laj Zalmuna li cuib chi xreyeb laj Madián, queꞌoc chi e̱lelic chiruheb, abanan eb laj Gedeón queꞌra̱linaheb toj retal queꞌxchap laj Zeba ut laj Zalmuna. Ut eb lix soldado queꞌsach xchꞌo̱leb xban xxiuheb.

¹³ Nak laj Gedeón li ralal laj Joás queꞌsukꞌi chak chi pletic, queꞌnumeꞌ saꞌ li be li naxic saꞌ li naꞌajej Heres.

¹⁴ Ut aran queꞌxchap jun li sa̱j al aj Sucot ut queꞌxpatzꞌ re ani xcꞌabaꞌeb li nequeꞌtaklan aran Sucot. Li al quixtzꞌi̱ba xcꞌabaꞌeb li cuuklaju xca̱cꞌa̱l (77) chi cui̱nk li nequeꞌtaklan joꞌ eb ajcuiꞌ li nequeꞌcꞌamoc be saꞌ li tenamit aꞌan.

¹⁵ Ut laj Gedeón rochbeneb lix soldado queꞌco̱eb Sucot. Laj Gedeón quixye reheb li cuanqueb aran: —¿Ma jultic e̱re chanru nak xine̱hob saꞌ xcꞌabaꞌ laj Zeba ut laj Zalmuna? ¿Ma toj cuan saꞌ e̱chꞌo̱l nak incꞌaꞌ xeqꞌue xcuaheb lin soldado, usta tacuajenakeb, nak xinpatzꞌ e̱re? “¿Ma ac xexnumta ta biꞌ saꞌ xbe̱neb laj Zeba ut laj Zalmuna?” chanquex ke. Arin cuanqueb anakcuan, chan laj Gedeón.

¹⁶ Laj Gedeón quixchap li qꞌuix li nacuan saꞌ li chaki chꞌochꞌ. Ut riqꞌuin aꞌan quixrahobtesiheb li nequeꞌtaklan aran Sucot.

¹⁷ Ut queꞌxjucꞌ ajcuiꞌ li cab li najt xteram aran Peniel ut queꞌxcamsiheb li cui̱nk li cuanqueb saꞌ li tenamit aꞌan.

¹⁸ Laj Gedeón quixpatzꞌ reheb laj Zeba ut laj Zalmuna: ¿Chanruheb li cui̱nk li quecamsiheb aran Tabor? chan. Queꞌxye re: —Chanchaneb ajcuiꞌ la̱at. Chanchaneb ralal rey, chanqueb.

¹⁹ Laj Gedeón quixye reheb: —Aꞌaneb li cuas. Junaj li kanaꞌ. Saꞌ xcꞌabaꞌ li Dios ninye e̱re, cui ta incꞌaꞌ quecamsiheb incꞌaꞌ raj texincamsi la̱ex, chan.

²⁰ Ut laj Gedeón quixye re laj Jeter li xbe̱n ralal: —Camsiheb anakcuan, chan. Abanan laj Jeter incꞌaꞌ quirisi lix chꞌi̱chꞌ. Quixucuac ban chixcamsinquileb xban nak toj sa̱j al.

²¹ Tojoꞌnak laj Zeba ut laj Zalmuna queꞌxye re: —Choa̱camsi la̱at. ¿Ma ma̱cuaꞌ ta biꞌ la̱at li cui̱nk cau a̱cuib? chanqueb. Joꞌcan nak laj Gedeón quixcamsiheb ut quixcꞌam chokꞌ re li xsahob ruheb lix camellos li nacuan saꞌ xcuxeb.

²² Chirix chic aꞌan, eb laj Israel queꞌxye re laj Gedeón: —La̱at chic tattakla̱nk saꞌ kabe̱n joꞌqueb ajcuiꞌ la̱ cualal a̱cꞌajol xban nak la̱at xatcoloc ke saꞌ rukꞌeb laj Madián, chanqueb.

²³ Laj Gedeón quixye reheb: —Chi moco la̱in, chi moco li cualal ta̱takla̱nk saꞌ e̱be̱n. Aꞌ ban li Ka̱cuaꞌ Dios ta̱takla̱nk saꞌ e̱be̱n, chan.

²⁴ Laj Gedeón quixye ajcuiꞌ reheb: —Jun ajcuiꞌ li nintzꞌa̱ma che̱ru. Li junju̱nk e̱re te̱kꞌaxtesi cue li caꞌ xic li xexoc riqꞌuineb laj Madián li ralal xcꞌajoleb laj Ismael, chan. (Eb li queꞌcuan saꞌ li chaki chꞌochꞌ cꞌaynakeb chirocsinquil li caꞌxic yi̱banbil riqꞌuin oro.)

²⁵ Eb laj Israel queꞌxye re chi saheb saꞌ xchꞌo̱l: —Takaqꞌue a̱cue li caꞌxic, chanqueb. Ut queꞌxhel saꞌ chꞌochꞌ jun li tꞌicr ut aran queꞌxqꞌue li caꞌxic li quexoc chixju̱nkaleb.

²⁶ Aꞌan aꞌin xqꞌuial li ra̱lal li caꞌxic oro: Numenak caꞌcꞌa̱l libra xbisbal li caꞌxic aꞌan. Incꞌaꞌ queꞌxqꞌue li jun chꞌol chic joꞌ li kꞌol ut li terto̱quil pec, chi moco li cha̱bil akꞌej yi̱banbil riqꞌuin li tꞌicr púrpura li nequeꞌrocsi lix reyeb laj Madián. Chi moco queꞌxqꞌue li kꞌol li nequeꞌrocsi saꞌ xcuxeb li camello.

²⁷ Ut riqꞌuin li caꞌxic li quikꞌaxtesi̱c re, laj Gedeón quixyi̱b jun li efod oro ut quixqꞌue aran Ofra saꞌ lix tenamit. Ut chixjunileb laj Israel queꞌxcanab xlokꞌoninquil li Ka̱cuaꞌ lix Dioseb. Aꞌ chic li efod queꞌxqꞌue xlokꞌal. Joꞌcan nak laj Gedeón quixbalakꞌi rib ut quixbalakꞌiheb ajcuiꞌ li ralal xcꞌajol.

²⁸ Eb laj Israel queꞌnumta saꞌ xbe̱neb laj Madián. Ut incꞌaꞌ chic queꞌpletic riqꞌuineb laj Israel. Chiru caꞌcꞌa̱l (40) chihab eb laj Israel queꞌcuan saꞌ tuktu̱quil usilal nak toj yoꞌyo laj Gedeón.

²⁹ Laj Gedeón li ralal laj Joás, li nequeꞌxye ajcuiꞌ Jerobaal re, quisukꞌi saꞌ li rochoch ut aran quicana chi cua̱nc.

³⁰ Ut queꞌcuan laje̱b xca̱cꞌa̱l (70) li ralal xban nak nabaleb li rixakil.

³¹ Quicuan jun li ralal riqꞌuin jun reheb li ixk li nequeꞌcuan riqꞌuin. Li ixk aꞌan cuan aran Siquem. Aj Abimelec quixqꞌue chokꞌ xcꞌabaꞌ li ralal aꞌan.

³² Laj Gedeón, li ralal laj Joás, ac ti̱x chic chi us nak quicam. Quimukeꞌ saꞌ li naꞌajej li quimukeꞌ cuiꞌ laj Joás lix yucuaꞌ. Li mukleba̱l aꞌan cuan saꞌ li tenamit Ofra, lix tenamiteb li ralal xcꞌajol laj Abiezer.

³³ Nak ac xcam laj Gedeón, eb laj Israel queꞌoc cuiꞌchic chixba̱nunquil li ma̱usilal. Queꞌxlokꞌoniheb li yi̱banbil dios Baal. Ut queꞌxsicꞌ ru chokꞌ xdioseb laj Baal-berit xcꞌabaꞌ.

³⁴ Ut eb laj Israel incꞌaꞌ chic quijulticoꞌ reheb li Ka̱cuaꞌ Dios li quicoloc reheb chiruheb li xicꞌ nequeꞌiloc reheb, li cuanqueb chi xjun sutam lix naꞌajeb.

³⁵ Chi moco queꞌxbantioxi chiruheb li ralal xcꞌajol laj Gedeón chixjunil li usilal li quixba̱nu reheb.