Jueces 7 - Li Santil hu

¹ Quicuacli toj ekꞌela laj Gedeón, li nequeꞌxye ajcuiꞌ Jerobaal re. Ut chixjunileb li queꞌco̱eb chirix queꞌxchꞌutub ribeb cuan cuiꞌ li yuꞌam haꞌ Harod. Lix muheba̱leb laj Madián cuan saꞌ li norte jun pacꞌal li tzu̱l More saꞌ li ru takꞌa.

² Ut li Ka̱cuaꞌ Dios quixye re laj Gedeón: —Kꞌaxal nabaleb li soldado cuanqueb a̱cuochben. Cui tincanabeb chi numta̱c saꞌ xbe̱neb laj Madián, teꞌxye nak xjuneseb xeꞌxba̱nu ut teꞌxqꞌue xlokꞌal xjuneseb rib ut incꞌaꞌ teꞌxqꞌue inlokꞌal la̱in.

³ Ta̱ye reheb chi joꞌcaꞌin: “Li joꞌ qꞌuialex li yo̱ e̱xiu texsukꞌi̱k saꞌ le̱ rochoch. Ut eb li ani incꞌaꞌ yo̱queb xxiu teꞌcana̱k arin saꞌ li tzu̱l Galaad cuochben la̱in, chaꞌkat reheb,” chan li Dios. Ut laj Gedeón quixba̱nu joꞌ quiyeheꞌ re xban li Dios. Joꞌcan nak queꞌsukꞌi saꞌ rochocheb li cuib xcaꞌcꞌa̱l (22,000) mil chi cui̱nk. Ut li laje̱b mil chic queꞌcana rochben laj Gedeón.

⁴ Ut li Ka̱cuaꞌ quixye cuiꞌchic re laj Gedeón: —Toj nabaleb li soldado li cuanqueb a̱cuochben. Cꞌameb chire li nimaꞌ chi ucꞌac. Ut aran tinyal rixeb. La̱in tinye a̱cue bar cuan li teꞌxic cha̱cuix ut bar cuan li incꞌaꞌ teꞌxic cha̱cuix, chan li Dios.

⁵ Laj Gedeón quixcꞌameb chire li haꞌ. Ut li Ka̱cuaꞌ Dios quixye re: —Chixjunileb li nequeꞌxlec chi rukꞌeb li haꞌ ut nequeꞌxrekꞌ joꞌ nequeꞌxba̱nu li tzꞌiꞌ ta̱cuisiheb saꞌ xya̱nkeb li nequeꞌxcuikꞌib ribeb chi ucꞌac, chan.

⁶ Oxib ciento ajcuiꞌ chi cui̱nk li queꞌxlec li haꞌ chi rukꞌeb ut queꞌxrekꞌ. Ut eb li jun chꞌol chic queꞌxcuikꞌib ribeb chi ucꞌac.

⁷ Li Ka̱cuaꞌ quixye re laj Gedeón: —Eb li oxib ciento chi cui̱nk li queꞌxrekꞌ li haꞌ, aꞌan eb li teꞌxic cha̱cuix chi pletic riqꞌuineb laj Madián. Ut eb li jun chꞌol chic, taklaheb saꞌ rochocheb. La̱in tincolok e̱re chiruheb laj Madián ut tinkꞌaxtesiheb saꞌ e̱rukꞌ la̱ex, chan.

⁸ Joꞌcan nak laj Gedeón quixtaklaheb chixjunileb saꞌ lix muheba̱leb. Caꞌaj chic li oxib ciento queꞌcana rochben. Ut quicana rochbeneb li cꞌaꞌru ta̱cꞌanjelak chiruheb joꞌqueb ajcuiꞌ li trompeta. Lix muheba̱leb laj Israel cuan takecꞌ ut lix muheba̱leb laj Madián cuan saꞌ li ru takꞌa.

⁹ Saꞌ ajcuiꞌ li kꞌojyi̱n aꞌan li Dios quixye re laj Gedeón: —Ayu cuan cuiꞌ lix muheba̱leb laj Madián xban nak anakcuan tinkꞌaxtesiheb aꞌan saꞌ a̱cuukꞌ.

¹⁰ Abanan cui nacatxucuac chi pletic riqꞌuineb, ayu a̱cuochben laj Fura la̱ mo̱s cuan cuiꞌ lix muheba̱leb.

¹¹ Ta̱cuabi nak yo̱keb chi a̱tinac eb laj Madián. Nak ta̱cuabi li cꞌaꞌru yo̱keb chixyebal, ta̱cacuu̱k a̱chꞌo̱l chi pletic riqꞌuineb, chan li Dios. Ut laj Gedeón rochben laj Fura lix mo̱s queꞌco̱eb cuanqueb cuiꞌ lix muheba̱leb laj Madián.

¹² Eb laj Madián ut eb laj Amalec ut eb li queꞌchal saꞌ li oriente chanchaneb jun tu̱b chi aj sa̱cꞌ saꞌ li ru takꞌa xban nak kꞌaxal nabaleb. Nabaleb lix camellos. Chanchan xqꞌuial li samaib li cuan chire li palau.

¹³ Nak quicuulac aran, laj Gedeón quirabi nak jun li cui̱nk yo̱ chixserakꞌinquil lix matcꞌ re li jun chic. Quixye re: —Joꞌcaꞌin xinmatqꞌue. Saꞌ lin matcꞌ xcuil nak jun li caxlan cua yi̱banbil riqꞌuin cebada yo̱ chak chi tolcꞌoc chiru tzu̱l. Quichal arin saꞌ li kanaꞌaj. Quixtochꞌ jun li kamuheba̱l ut li muheba̱l quitꞌaneꞌ saꞌ chꞌochꞌ, chan.

¹⁴ Ut li rochben quixye re: —Aꞌan retalil lix chꞌi̱chꞌ laj Gedeón, li ralal laj Joás laj Israel. Li Ka̱cuaꞌ Dios toxkꞌaxtesi chikajunilo la̱o aj Madián saꞌ rukꞌ aꞌan, chan.

¹⁵ Nak laj Gedeón quirabi lix matcꞌ li cui̱nk ut lix ya̱lal, quixlokꞌoni li Dios. Quisukꞌi cuanqueb cuiꞌ lix muheba̱leb laj Israel. Quixye reheb: —Cuaclinkex chi junpa̱t. Li Ka̱cuaꞌ Dios toxtenkꞌa chi numta̱c saꞌ xbe̱neb lix soldado laj Madián, chan.

¹⁶ Laj Gedeón quixchꞌutubeb li oxib ciento chi soldado. Oxib chꞌu̱tal quirisiheb. Ut quixqꞌueheb junju̱nk xtrompeta saꞌ rukꞌeb chixjunileb ut quixqꞌue ajcuiꞌ junju̱nk xcuqueb cuan xam chi saꞌ.

¹⁷ Ut quixye reheb: —Te̱qꞌue retal li cꞌaꞌru tinba̱nu la̱in. Nak acak xocuulac cuan cuiꞌ lix muheba̱leb, la̱ex te̱ba̱nu li cꞌaꞌru tinba̱nu la̱in.

¹⁸ Nak tinya̱basi li trompeta la̱in cuochbeneb li cuanqueb cuochben, te̱ya̱basi ajcuiꞌ le̱ re la̱ex li cuanquex chi xjun sutam lix muheba̱leb laj Madián. Ut te̱jap e̱re chixyebal: “Saꞌ xcꞌabaꞌ li Dios ut saꞌ xcꞌabaꞌ ajcuiꞌ laj Gedeón tonumta̱k saꞌ e̱be̱n,” chaꞌkex.—

¹⁹ Ut queꞌcuulac jun pacꞌal lix muheba̱leb laj Madián laj Gedeón rochbeneb li jun ciento chi soldado li queꞌco̱eb chirix. Tuktu kꞌojyi̱n queꞌcuulac laj Gedeón. Tojeꞌ ajcuiꞌ teꞌxjal ribeb li soldado aj Madián li nequeꞌcꞌacꞌalen re li naꞌajej aꞌan. Queꞌxya̱basi lix trompeta laj Gedeón ut eb li rochben ut queꞌxjor li cuc li yo̱queb chixcꞌambal saꞌ rukꞌeb.

²⁰ Ut li oxib chꞌu̱tal chi soldado quilajeꞌxya̱basi lix trompeta ut quilajeꞌxjor lix cuqueb. Saꞌ lix nim ukꞌeb cuan lix trompeta ut saꞌ lix tzꞌe ukꞌeb cuan lix xameb. Ut queꞌxjap reheb chixyebal: —Saꞌ xcꞌabaꞌ li Dios ut saꞌ xcꞌabaꞌ ajcuiꞌ laj Gedeón tonumta̱k saꞌ e̱be̱n, chanqueb.

²¹ Ut chixjunileb lix soldado laj Gedeón queꞌcana saꞌ xnaꞌajeb chi xjun sutam lix muheba̱leb laj Madián. Ut eb li soldado aj Madián japjo̱queb re xban xxiuheb nak yo̱queb chi e̱lelic.

²² Ut eb li oxib ciento chi soldado yo̱queb chixya̱basinquil lix trompeta. Ut li Ka̱cuaꞌ quixsach xnaꞌlebeb li soldado aj Madián ut chi ribileb rib queꞌxcamsi ribeb. Joꞌ qꞌuial li incꞌaꞌ queꞌxcamsi ribeb queꞌe̱lelic ut queꞌco̱eb toj Bet-sita saꞌ xjayal li naꞌajej Zerera ut queꞌcuulac toj saꞌ li naꞌajej Abel-mehola li cuan nachꞌ riqꞌuin Tabat.

²³ Laj Gedeón quixtakla xbokbaleb laj Israel. Aꞌan eb li ralal xcꞌajol laj Neftalí, joꞌqueb ajcuiꞌ li ralal xcꞌajol laj Aser ut eb li ralal xcꞌajol laj Manasés. Ut co̱eb chirixeb laj Madián chixchapbaleb.

²⁴ Ut laj Gedeón quixtakla lix takl saꞌ lix naꞌaj laj Efraín, li tzu̱l ru, ut quixye reheb: —Cauresihomak e̱rib chixcꞌulbaleb laj Madián. Texxic saꞌ eb li naꞌajej Bet-bara bar incꞌaꞌ cham chi us li haꞌ, ut te̱ram xbeheb laj Madián re nak incꞌaꞌ teꞌnumekꞌ jun pacꞌal li nimaꞌ Jordán, chan. Ut eb li ralal xcꞌajol laj Efraín queꞌxba̱nu joꞌ quiyeheꞌ reheb.

²⁵ Ut queꞌxchap cuibeb li nequeꞌtaklan saꞌ xya̱nkeb laj Madián. Aꞌaneb laj Oreb ut laj Zeeb. Laj Oreb queꞌxcamsi saꞌ li sako̱nac Oreb xcꞌabaꞌ. Ut queꞌxcamsi laj Zeeb saꞌ li naꞌajej li naxyatzꞌ cuiꞌ lix uvas laj Zeeb. Nak queꞌsukꞌi chak chira̱linanquileb laj Madián, queꞌxcꞌam chak lix jolomeb laj Oreb ut laj Zeeb ut queꞌxkꞌaxtesi re laj Gedeón jun pacꞌal li nimaꞌ Jordán.