Jueces 6 - Li Santil hu

Laj Gedeón

¹ Ut eb laj Israel queꞌxba̱nu cuiꞌchic li ma̱usilal chiru li Ka̱cuaꞌ. Joꞌcan nak li Ka̱cuaꞌ quixkꞌaxtesiheb saꞌ rukꞌeb laj Madián chiru cuukub chihab.

² Eb laj Madián cꞌajoꞌ nak queꞌxrahobtesiheb laj Israel. Joꞌcan nak eb laj Israel queꞌxmuk ribeb saꞌ eb li ochoch pec ut saꞌ eb li tzu̱l. Queꞌxyi̱b lix muheba̱leb saꞌ eb li naꞌajej bar incꞌaꞌ teꞌtaꞌekꞌ cuiꞌ.

³ Rajlal nak eb laj Israel yo̱queb chi a̱uc, eb laj Madián, ut eb laj Amalec rochbeneb li cuanqueb saꞌ li oriente queꞌxjunaji ribeb, ut queꞌco̱eb chi pletic riqꞌuineb laj Israel.

⁴ Nequeꞌxyi̱b lix muheba̱leb ut nequeꞌcuan aran. Nequeꞌxsach ru chixjunil li racui̱mkeb laj Israel nacuulac toj saꞌ li naꞌajej Gaza. Ut nequeꞌcꞌameꞌ eb lix carner, eb lix bu̱r, ut eb lix cuacaxeb laj Israel. Ut nequeꞌcanaba̱c chi ma̱cꞌaꞌ xtzacae̱mkeb.

⁵ Nak nequeꞌxic eb laj Madián chixsachbal chixjunil li cꞌaꞌru cuan reheb laj Israel, queꞌxcꞌam chirixeb lix queto̱mk ut eb lix muheba̱l. Chanchaneb laj sa̱cꞌ nak queꞌchal xban nak kꞌaxal cuiꞌchic nabaleb. Incꞌaꞌ naru rajlanquileb chi moco naru rajlanquileb lix camello.

⁶ Eb laj Israel nequeꞌcanaba̱c saꞌ nebaꞌil xbaneb laj Madián. Joꞌcan nak queꞌxtzꞌa̱ma cuiꞌchic xtenkꞌanquil chiru li Ka̱cuaꞌ Dios.

⁷ Queꞌxya̱ba xcꞌabaꞌ li Ka̱cuaꞌ eb laj Israel xban li raylal li yo̱queb chixcꞌulbal saꞌ rukꞌeb laj Madián.

⁸ Joꞌcan nak li Ka̱cuaꞌ quixtakla jun li profeta riqꞌuineb. Li profeta quixye reheb: —Joꞌcaꞌin xye e̱re li Ka̱cuaꞌ lix Dioseb laj Israel, “La̱in quin-isin chak e̱re aran Egipto saꞌ li naꞌajej li quexcuan cuiꞌ chokꞌ rahobtesinbil mo̱s.

⁹ La̱in quexincol chiruheb laj Egipto ut quexincol ajcuiꞌ chiruheb li queꞌrahobtesin e̱re. La̱in quin-isin reheb saꞌ li naꞌajej li cuanquex cuiꞌ ut quinqꞌue e̱re lix naꞌajeb.

¹⁰ Ut quinye ajcuiꞌ e̱re nak la̱in li Ka̱cuaꞌ le̱ Dios. Quinye e̱re nak incꞌaꞌ te̱lokꞌoni lix dioseb laj amorreo li cuanqueb saꞌ li naꞌajej li xex-oc cuiꞌ chi cua̱nc. Abanan la̱ex incꞌaꞌ queba̱nu li cꞌaꞌru quinye e̱re,” chan li Dios.—

¹¹ Ut quichal lix ángel li Ka̱cuaꞌ ut quicꞌojla rubel jun to̱n li ji cuan saꞌ li tenamit Ofra. Li naꞌajej aꞌan re laj Joás xcomoneb li ralal xcꞌajol laj Abiezer. Laj Gedeón, li ralal laj Joás, yo̱ chixpuxinquil ru li trigo saꞌ li naꞌajej bar nequeꞌxyatzꞌ cuiꞌ li uvas re nak incꞌaꞌ ta̱ilekꞌ xbaneb laj Madián.

¹² Quixcꞌutbesi rib lix ángel li Ka̱cuaꞌ chiru laj Gedeón ut quixye re: —At cui̱nk, li Ka̱cuaꞌ cuan a̱cuiqꞌuin. La̱at cau a̱chꞌo̱l ut cau a̱cuib, chan.

¹³ Quichakꞌoc laj Gedeón ut quixye re: —At Ka̱cuaꞌ, cui li Dios cuan kiqꞌuin, ¿cꞌaꞌut nak yo̱co chixcꞌulbal li raylal aꞌin? ¿Bar cuan li milagros queꞌxserakꞌi ke li kanaꞌ kayucuaꞌ nak queꞌxye: “¿Ma incꞌaꞌ ta biꞌ xorisi chak li Ka̱cuaꞌ Egipto?” chanqueb. Anakcuan li Ka̱cuaꞌ xoxtzꞌekta̱na ut xoxkꞌaxtesi saꞌ rukꞌeb laj Madián, chan.

¹⁴ Ut li Ka̱cuaꞌ quiril laj Gedeón ut quixye re: —Ayu ut ta̱coleb laj Israel riqꞌuin la̱ metzꞌe̱u chiruheb laj Madián. ¿Ma ma̱cuaꞌ ta biꞌ la̱in yo̱quin chi takla̱nc a̱cue? chan.

¹⁵ Quichakꞌoc laj Gedeón ut quixye: —Chacuy inma̱c, at Ka̱cuaꞌ. ¿Chan ta cuiꞌ ru nak tincoleb li tenamit Israel? Lin naꞌ inyucuaꞌ, aꞌaneb li kꞌaxal nebaꞌeb saꞌ xya̱nkeb li ralal xcꞌajol laj Manasés. Ut la̱in caꞌchꞌin incuanquil saꞌ xya̱nkeb li cuanqueb saꞌ rochoch lin yucuaꞌ, chan.

¹⁶ Ut li Ka̱cuaꞌ quixye re: —La̱in cua̱nkin a̱cuiqꞌuin. La̱at tatnumta̱k saꞌ xbe̱neb laj Madián. Chanchanakeb jun chi cui̱nk nak ta̱sacheb ru, chan li Ka̱cuaꞌ.

¹⁷ Quichakꞌoc laj Gedeón ut quixye: —At Ka̱cuaꞌ, cui sa a̱chꞌo̱l cuiqꞌuin, qꞌue junak retalil re nak la̱in tinnau nak relic chi ya̱l la̱at li Ka̱cuaꞌ li yo̱cat chi a̱tinac cuiqꞌuin.

¹⁸ Ba̱nu usilal. China̱cuoybeni junpa̱tak. Toj xic cue chixcꞌambal lin mayej re tinqꞌue a̱cue, chan laj Gedeón. Ut li Ka̱cuaꞌ quixye: —Arin cua̱nkin cha̱cuoybeninquil, chan.

¹⁹ Ut laj Gedeón co̱ saꞌ rochoch ut quixcamsi jun li chiba̱t toj sa̱j ut quixchik. Riqꞌuin junmay litro li harina quixyi̱b li caxlan cua ma̱cꞌaꞌ xchꞌamal. Quixqꞌue li tib saꞌ jun li chacach ut quixqꞌue li caldo saꞌ jun li ucꞌal. Quixcꞌam chixjunil aran rubel li cheꞌ ji ut quixqꞌue re li ángel.

²⁰ Ut lix ángel li Ka̱cuaꞌ quixye re: —Qꞌue li tib ut li caxlan cua saꞌ xbe̱n li pec aꞌin ut ta̱hoy li caldo saꞌ xbe̱n, chan. Ut laj Gedeón quixba̱nu joꞌ quiyeheꞌ re.

²¹ Ut li ángel quixchꞌeꞌ li tib ut li caxlan cua riqꞌuin li ruꞌuj li xukꞌ li cuan saꞌ rukꞌ. Ut quiloch xxamlel li pec ut quixcꞌat li tib ut li caxlan cua. Ut incꞌaꞌ chic qui-ileꞌ ru li ángel xban laj Gedeón.

²² Laj Gedeón quixqꞌue retal nak relic chi ya̱l aꞌan lix ángel li Ka̱cuaꞌ Dios ut cꞌajoꞌ nak quixucuac. Quixye: —At nimajcual Dios, la̱in xcuil ru chi tzꞌakal la̱ ángel, chan.

²³ Ut li Ka̱cuaꞌ quixye re: —Matxucuac xban nak incꞌaꞌ tatca̱mk. Chicua̱nk taxak a̱cuiqꞌuin li tuktu̱quil usilal, chan.

²⁴ Laj Gedeón quixyi̱b jun li artal saꞌ li naꞌajej aꞌan re xlokꞌoninquil li Ka̱cuaꞌ ut Jehová-salom quixqꞌue chokꞌ xcꞌabaꞌ. Chalen anakcuan toj cuan ajcuiꞌ li artal aꞌan saꞌ li naꞌajej Ofra li cuan saꞌ lix naꞌajeb li ralal xcꞌajol laj Abiezer.

²⁵ Saꞌ ajcuiꞌ li kꞌojyi̱n aꞌan, li Ka̱cuaꞌ quixye re laj Gedeón: —Cꞌam lix toro la̱ yucuaꞌ, li xcab toro li cuan cuukub chihab re. Ta̱jucꞌ li artal li quixyi̱b la̱ yucuaꞌ re xlokꞌoninquil li yi̱banbil dios Baal. Ut ta̱yocꞌ ajcuiꞌ li cheꞌ li nequeꞌxlokꞌoni cuiꞌ lix Asera lix dioseb li cuan chixcꞌatk li yi̱banbil dios Baal.

²⁶ Ut ta̱yi̱b chi cha̱bil jun chic li artal saꞌ xbe̱n li bol aꞌin re inlokꞌoninquil la̱in li Ka̱cuaꞌ la̱ Dios. Ut saꞌ li artal li ta̱yi̱b, ta̱cꞌat li toro chokꞌ a̱mayej. Lix cheꞌel li dios Asera li xayocꞌ, aꞌan li ta̱cꞌanjelak chokꞌ a̱siꞌ re xcꞌatbal li toro, chan li Ka̱cuaꞌ.

²⁷ Ut laj Gedeón, rochbeneb laje̱b lix mo̱s, queꞌxba̱nu joꞌ quixye li Ka̱cuaꞌ. Abanan incꞌaꞌ quixba̱nu chi cutan. Chiru kꞌojyi̱n ban quixba̱nu xban nak quixucuac chiruheb lix comon ut chiruheb ajcuiꞌ li cui̱nk li cuanqueb saꞌ li tenamit aꞌan.

²⁸ Nak quisake̱u, eb li cuanqueb saꞌ li tenamit queꞌcuacli ut queꞌril nak jucꞌbil chic lix artal laj Baal. Ut queꞌxqꞌue retal nak yocꞌbil li cheꞌ li queꞌxlokꞌoni cuiꞌ li yi̱banbil dios xAsera. Ut queꞌxqꞌue ajcuiꞌ retal nak quicꞌateꞌ li toro li cuukub chihab cuan re saꞌ xbe̱n li artal li tojeꞌ quiyi̱ba̱c aran.

²⁹ Queꞌxye chiribileb rib: —¿Ani xba̱nun re aꞌin? chanqueb. Queꞌtzꞌiloc a̱tin chirix toj retal queꞌxnau nak laj Gedeón li ralal laj Joás, aꞌan li quiba̱nun re.

³⁰ Ut eb li cui̱nk li cuanqueb saꞌ li tenamit aꞌan queꞌxye re laj Joás: —Cꞌam chak la̱ cualal kiqꞌuin. Takacamsi xban nak aꞌan quixjucꞌ lix artal li dios Baal ut quixyocꞌ ajcuiꞌ li cheꞌ re li dios Asera li cuan chixcꞌatk li artal, chanqueb.

³¹ Laj Joás quixye reheb li cui̱nk li yo̱queb chi sutuc re: —¿Ma tex-oque̱nk chirix laj Baal? ¿Ma te̱yal xcolbal rix? Li ani tixyal xcolbal rix camenak chic nak ta̱sake̱uk cuulaj. Cui ya̱l nak Dios laj Baal, chixcolak rib chiruheb li queꞌjucꞌuc re lix artal, chan laj Joás.

³² Chalen saꞌ li cutan aꞌan “Jerobaal” quiyeheꞌ re laj Gedeón xban nak saꞌ li a̱tinoba̱l hebreo, aꞌan naraj naxye: “Laj Baal, aꞌan li tixyal xcolbal rib”. Queꞌxye chi joꞌcan xban nak laj Gedeón, aꞌan li quijucꞌuc re lix artal.

³³ Queꞌxjunaji ribeb li ralal xcꞌajol laj Madián ut eb li ralal xcꞌajol laj Amalec, joꞌ eb ajcuiꞌ chixjunileb li cuanqueb saꞌ li oriente ut coleꞌxyi̱b lix muheba̱leb saꞌ li ru takꞌa re Jezreel li cuan jun pacꞌal li nimaꞌ Jordán.

³⁴ Ut lix musikꞌ li Ka̱cuaꞌ quichal riqꞌuin laj Gedeón ut quixcꞌut chiru cꞌaꞌru tixba̱nu. Joꞌcan nak laj Gedeón quixya̱basi lix xucub re xbokbaleb chixjunileb li ralal xcꞌajol laj Abiezer.

³⁵ Ut quixtakla xbokbaleb chixjunileb li ralal xcꞌajol laj Manasés. Queꞌchal ut queꞌxchꞌutub ribeb riqꞌuin laj Gedeón. Ut quixtakla ajcuiꞌ xbokbaleb li ralal xcꞌajol laj Aser, eb li ralal xcꞌajol laj Zabulón ut eb li ralal xcꞌajol laj Neftalí. Eb aꞌan queꞌchal ut queꞌxchꞌutub ribeb riqꞌuin.

³⁶ Laj Gedeón quixye re li Dios: —Cui ya̱l nak la̱at tattenkꞌa̱nk cue chixcolbaleb laj Israel, cꞌut chicuu junak li retalil.

³⁷ La̱in tinqꞌue jun rix li carner saꞌ li naꞌajej bar nequeꞌxpuxi cuiꞌ ru li trigo. Cui tꞌaktꞌakak rix li xul nak ta̱sake̱uk ut incꞌaꞌ ta̱tꞌaka̱k li chꞌochꞌ chi xjun sutam li rix li xul, aꞌanak li retalil chicuu nak la̱at tattenkꞌa̱nk cue chixcolbaleb laj Israel joꞌ xaye, chan laj Gedeón.

³⁸ Ut li Dios quixba̱nu joꞌ quixtzꞌa̱ma laj Gedeón. Nak quisake̱u, laj Gedeón quixtau li rix li xul chi tꞌaktꞌak. Quixyatzꞌ li rix li xul ut jun secꞌ li haꞌ quirisi saꞌ li rix.

³⁹ Ut laj Gedeón quixye cuiꞌchic re li Dios: —Chacuy inma̱c, at inDios. Incꞌaꞌ taxak tatjoskꞌokꞌ cuiqꞌuin. Tintzꞌa̱ma cha̱cuu nak ta̱cꞌut jun chic li retalil chicuu. Tinqꞌue cuiꞌchic li rix li carner. Ut anakcuan nacuaj nak incꞌaꞌ ta̱tꞌaka̱k li rix li carner. Caꞌaj cuiꞌ chi xjun sutam ta̱tꞌakresi li chꞌochꞌ, chan laj Gedeón re li Dios.

⁴⁰ Ut saꞌ li kꞌojyi̱n aꞌan li Dios quixba̱nu joꞌ quixtzꞌa̱ma laj Gedeón. Li rix li xul incꞌaꞌ quitꞌaka. Caꞌaj cuiꞌ li chꞌochꞌ chi xjun sutam quitꞌaka.