Jueces 5 - Li Santil hu

Aꞌan aꞌin lix bich lix Débora

¹ Saꞌ li cutan aꞌan, lix Débora ut laj Barac li ralal laj Abinoam queꞌbichan ut queꞌxye chi joꞌcaꞌin:

² —Cheqꞌuehak taxak xlokꞌal li Ka̱cuaꞌ che̱junilex la̱ex xban nak saꞌ li tenamit Israel toj cuanqueb cui̱nk cauheb xchꞌo̱l chi pletic ut xban ajcuiꞌ nak toj cuanqueb cui̱nk teꞌraj oque̱nc saꞌ li ple̱t.

³ Chine̱rabihak la̱ex rey. Chine̱rabihak la̱ex li nequextaklan saꞌ xbe̱neb li tenamit. Cheqꞌuehak retal xban nak la̱in oc cue chi bicha̱nc re xqꞌuebal xlokꞌal li Ka̱cuaꞌ. Tinbicha xlokꞌal li nimajcual Dios li nakalokꞌoni la̱o aj Israel.

⁴ At Ka̱cuaꞌ, nak cat-el saꞌ li naꞌajej Seir, qui-ecꞌan li ruchichꞌochꞌ saꞌ xnaꞌaj. Ut nak cat-el saꞌ li naꞌajej Edom, cꞌajoꞌ li hab quixqꞌue.

⁵ At Ka̱cuaꞌ, xban nak nim a̱cuanquil, eb li tzu̱l quilajeꞌecꞌan saꞌ xnaꞌaj. Li tzu̱l Sinaí qui-ecꞌan saꞌ xnaꞌaj xban la̱ cuanquil la̱at, at kaDios la̱o aj Israel.

⁶ Saꞌ eb li cutan nak queꞌcuan laj Samgar, li ralal laj Anat, ut lix Jael, eb laj cꞌay incꞌaꞌ chic queꞌnumeꞌ saꞌ li nim be ut eb laj viaje junes jalbe aj chic queꞌnumeꞌ cuiꞌ.

⁷ Eb li queꞌcuan saꞌ li cocꞌ tenamit li cuanqueb saꞌ xcue̱nt Israel quilajeꞌel. Eb li naꞌajej queꞌcana chi ma̱ ani cuan aran toj nak la̱in lix Débora xin-oc chixtenkꞌanquileb. Chanchanin lix naꞌeb laj Israel nak xin-oc chixtenkꞌanquileb.

⁸ Nak nequeꞌoc chixlokꞌoninquil li jalanil dios, naticla cuiꞌchic li ple̱t. Ut ma̱ jun saꞌ xya̱nkeb li caꞌcꞌa̱l mil (40,000) chi cui̱nk quicuan xchꞌi̱chꞌ malaj xla̱ns re teꞌxcol cuiꞌ ribeb nak queꞌchal chi pletic li xicꞌ nequeꞌiloc reheb.

⁹ Junelic ninqꞌue inchꞌo̱l chixtenkꞌanquileb li nequeꞌcꞌamoc be saꞌ xya̱nkeb laj Israel, li xoleꞌxqꞌue rib chi anchaleb xchꞌo̱l saꞌ xya̱nkeb li queꞌpletic re xcolbaleb laj Israel. Chinima̱k taxak ru li Ka̱cuaꞌ.

¹⁰ Cheyehak resilal che̱junilex la̱ex li nequexxic chirixeb li bu̱r li sak rixeb ut la̱ex li nequexrakoc a̱tin. Cheyehak ajcuiꞌ resilal la̱ex li nequexxic che̱rok.

¹¹ Chicuulak ta xya̱b lix bicheb toj saꞌ eb li naꞌajej li cuan cuiꞌ li haꞌ. Najt riqꞌuineb li nequeꞌpletic, cheꞌxbicha resil li usilal quilajxba̱nu li Ka̱cuaꞌ reheb laj Israel. Cheꞌxbicha resil chanru nak quixtenkꞌaheb laj Israel chixcolbal ribeb. Ut lix tenamit li Dios queꞌco̱eb saꞌ li oqueba̱l re li tenamit.

¹² Chacuabi, at Débora. Chacuabi. Bicha junak li bich. Ut la̱at, at Barac, ralal laj Abinoam, ayu. Cꞌameb chixjunileb li tenamit li queꞌchapeꞌ chak saꞌ li ple̱t.

¹³ Eb laj Israel queꞌco̱eb chi pletic. Eb laj Israel, lix tenamit li Dios, queꞌco̱eb chi pletic riqꞌuineb li cuanqueb xcuanquil.

¹⁴ Eb li ralal xcꞌajol laj Efraín li cuanqueb saꞌ li naꞌajej li queꞌcuan cuiꞌ laj Amalec, queꞌco̱eb saꞌ li ru takꞌa. Queꞌco̱eb ajcuiꞌ li ralal xcꞌajol laj Benjamín. Ut queꞌco̱eb li nequeꞌtaklan saꞌ xya̱nkeb laj Maquir, joꞌ eb ajcuiꞌ li cuanqueb xcuanquil saꞌ xya̱nkeb li ralal xcꞌajol laj Zabulón.

¹⁵ Eb li nequeꞌcꞌamoc be saꞌ xya̱nkeb li ralal xcꞌajol laj Isacar queꞌco̱eb rochben lix Débora. Queꞌco̱eb laj Isacar joꞌ nak co̱ laj Barac. Eb li ralal xcꞌajol laj Isacar queꞌxta̱ke laj Barac toj saꞌ li ru takꞌa. Abanan eb li ralal xcꞌajol laj Rubén queꞌchꞌinan xchꞌo̱leb. Incꞌaꞌ queꞌco̱eb chi pletic.

¹⁶ ¿Cꞌaꞌut nak incꞌaꞌ queꞌco̱eb li ralal xcꞌajol laj Rubén? ¿Cꞌaꞌut nak queꞌcana chirabinquil lix carner nak nequeꞌya̱bac? Eb li ralal xcꞌajol laj Rubén cauheb raj rib. Abanan queꞌxucuac.

¹⁷ Incꞌaꞌ queꞌco̱eb li ralal xcꞌajol laj Galaad li cuanqueb jun pacꞌal li nimaꞌ Jordán saꞌ li este. Ut incꞌaꞌ queꞌco̱eb li ralal xcꞌajol laj Dan li nequeꞌcꞌanjelac saꞌ li ni̱nki jucub. Chi moco queꞌco̱eb li ralal xcꞌajol laj Aser li cuanqueb saꞌ li naꞌajej chire li nimla palau.

¹⁸ Abanan eb li ralal xcꞌajol laj Zabulón ut eb li ralal xcꞌajol laj Neftalí incꞌaꞌ queꞌxra lix yuꞌameb. Queꞌco̱eb ban chi pletic.

¹⁹ Queꞌchal eb li rey aj Canaán chi pletic saꞌ li tenamit Taanac, li cuan nachꞌ riqꞌuin li haꞌ li cuan Meguido. Abanan ma̱cꞌaꞌ queꞌre̱chani.

²⁰ Eb li chahim li cuanqueb saꞌ choxa queꞌpletic. Nak queꞌxbeni ribeb chiru choxa queꞌpletic riqꞌuin laj Sísara.

²¹ Quilajeꞌcꞌameꞌ xban haꞌ nak quibutꞌir li nimaꞌ Cisón, li junelic cau rok. La̱in tinpletik. Incꞌaꞌ ta̱chꞌina̱nk inchꞌo̱l, chan lix Débora.

²² Kꞌaxal cau xya̱b rokeb li cacua̱y nak queꞌa̱linac chi cau. Nequeꞌtꞌilicbac nak yo̱queb chi xic.

²³ Lix ángel li Ka̱cuaꞌ quixye, “Chetzꞌekta̱naheb li cuanqueb saꞌ li tenamit Meroz xban nak incꞌaꞌ queꞌco̱eb chi pletic. Chetzꞌekta̱naheb xban nak incꞌaꞌ queꞌxtenkꞌaheb lix soldado li Ka̱cuaꞌ nak queꞌpletic riqꞌuineb li cuanqueb xcuanquil.”

²⁴ Us xak re lix Jael li rixakil laj Heber laj Ceneo. Qꞌuebil taxak xlokꞌal saꞌ xya̱nkeb li ixk li nequeꞌcuan saꞌ eb li muheba̱l yi̱banbil riqꞌuin tꞌicr.

²⁵ Laj Sísara quixtzꞌa̱ma li haꞌ re ta̱rucꞌ ut lix Jael quixqꞌue leche re ta̱rucꞌ. Cha̱bil lech quixqꞌue re saꞌ jun cha̱bil secꞌ.

²⁶ Ut quixchap jun li cheꞌ kꞌes ruꞌuj li naxxakab cuiꞌ li muheba̱l. Ut riqꞌuin li rukꞌ jun quixchap li martillo. Quixten li cheꞌ chi cau riqꞌuin li martillo toj retal quinumeꞌ saꞌ xjolom laj Sísara ut quijoreꞌ lix bakel xjolom.

²⁷ Laj Sísara yo̱ chixtolcꞌosinquil rib chi rok lix Jael ut aran quicam. Quicana chi tꞌantꞌo saꞌ chꞌochꞌ.

²⁸ Yo̱ chi iloc saꞌ ventana lix naꞌ laj Sísara. Aran saꞌ lix ventana yo̱ chi iloc ut yo̱ chixyebal, “¿Cꞌaꞌut nak xbay chak laj Sísara? ¿Cꞌaꞌut nak incꞌaꞌ nequeꞌxse̱ba chak ribeb li cacua̱y li yo̱queb chi quelo̱nc re lix carruaje?” chan.

²⁹ Ut eb li ixk li kꞌaxal cuanqueb xnaꞌleb li nequeꞌochbenin re queꞌxsume li quixye. Ut junaj ru lix cꞌaꞌux li naꞌbej riqꞌuineb.

³⁰ Queꞌxye re, “¿Ma incꞌaꞌ ta biꞌ yo̱queb chixjeqꞌuinquil chi ribileb rib li queꞌre̱chani saꞌ li ple̱t? Jun malaj cuib chi ixk li teꞌxcꞌul li junju̱nk chi soldado. Laj Sísara tixcꞌul li cha̱bil tꞌicr li cuan xsahob ru li nabal xbonol. Teꞌxcꞌul li tꞌicr li yi̱banbil chi us saꞌ xcaꞌ pacꞌalil eb li queꞌtaklan saꞌ xbe̱neb li soldados saꞌ li ple̱t.”

³¹ Joꞌcaꞌin taxak nak cheꞌosokꞌ chixjunileb li xicꞌ nequeꞌiloc a̱cue, at Ka̱cuaꞌ. Ut eb li nequeꞌrahoc a̱cue, chanchanakeb taxak li sakꞌe nak nalemtzꞌun cuaꞌleb, chanqueb saꞌ lix bich. Nak ac xnumeꞌ li ple̱t aꞌin, li tenamit Israel queꞌcuan saꞌ usilal chiru caꞌcꞌa̱l chihab.