Jueces 4 - Li Santil hu

Lix Débora ut laj Barac

¹ Nak ac xcam laj Aod, eb laj Israel queꞌoc cuiꞌchic chixba̱nunquil li incꞌaꞌ us chiru li Ka̱cuaꞌ.

² Joꞌcan nak li Ka̱cuaꞌ quixkꞌaxtesiheb saꞌ rukꞌ laj Jabín lix reyeb laj Canaán. Aꞌan nataklan saꞌ li tenamit Hazor. Li cui̱nk li nacꞌamoc be saꞌ xya̱nkeb lix soldado li rey Jabín, aꞌan laj Sísara. Aꞌan nacuan saꞌ li naꞌajej Haroset-goim.

³ Li rey Jabín cuan bele̱b ciento lix carruaje re pletic yi̱banbil riqꞌuin chꞌi̱chꞌ. Cꞌajoꞌ li raylal yo̱ chixba̱nunquil reheb laj Israel ut kꞌaxal cau quitaklan saꞌ xbe̱neb chiru junmay chihab. Xban li raylal li yo̱queb chixcꞌulbal, eb laj Israel queꞌxtzꞌa̱ma xtenkꞌanquil chiru li Ka̱cuaꞌ Dios.

⁴ Saꞌ eb li cutan aꞌan yo̱ chi cꞌamoc be saꞌ xya̱nkeb laj Israel jun li ixk, xDébora xcꞌabaꞌ. Aꞌan rixakil laj Lapidot ut xprofeta li Ka̱cuaꞌ.

⁵ Lix Débora rajlal naxic chi chunla̱c rubel jun to̱n li palmera chi rakoc a̱tin. Li naꞌajej aꞌan “Palmera re lix Débora” nequeꞌxye re. Li cheꞌ aꞌan cuan saꞌ lix naꞌajeb li ralal xcꞌajol laj Efraín li tzu̱l ru li cuan saꞌ xyi li tenamit Ramá ut Bet-el. Ut eb laj Israel rajlal nequeꞌxic riqꞌuin re teꞌxyi̱b ru lix chꞌaꞌajquilaleb.

⁶ Saꞌ jun li cutan lix Débora quixtakla xbokbal laj Barac li ralal laj Abinoam li cuan saꞌ li tenamit Cedes li cuanqueb cuiꞌ li ralal xcꞌajol laj Neftalí, ut quixye re: —Li Ka̱cuaꞌ lix Dios eb laj Israel xye a̱cue chi joꞌcaꞌin, “Ta̱chꞌutubeb ru laje̱b mil chi cui̱nk xcomoneb li ralal xcꞌajol laj Neftalí ut laj Zabulón ut texxic saꞌ li tzu̱l Tabor.

⁷ La̱in tinba̱nu̱nk re nak teꞌcha̱lk laj Sísara cuan cuiꞌ li nimaꞌ Cisón. Laj Sísara, aꞌan li nacꞌamoc be chiruheb lix soldado li rey Jabín. Teꞌcha̱lk chi pletic e̱riqꞌuin rochbeneb lix soldado ut lix carruaje re pletic. La̱in tatinqꞌue chi numta̱c saꞌ xbe̱neb,” chan li Ka̱cuaꞌ.—

⁸ Laj Barac quichakꞌoc ut quixye re: —La̱in incꞌaꞌ tinxic cui incꞌaꞌ nacatxic chicuix. Cui tatxic la̱at, tinxic la̱in, chan.

⁹ Ut lix Débora quixye re laj Barac: —La̱in tinxic cha̱cuix. Abanan ma̱cuaꞌ la̱at ta̱qꞌuehekꞌ a̱lokꞌal nak ta̱cue̱chani li ple̱t, xban nak li Ka̱cuaꞌ tixkꞌaxtesi laj Sísara saꞌ rukꞌ jun li ixk, chan. Ut lix Débora co̱ chirix laj Barac saꞌ li tenamit Cedes.

¹⁰ Ut laj Barac quixchꞌutubeb li ralal xcꞌajol laj Zabulón joꞌ eb ajcuiꞌ li ralal xcꞌajol laj Neftalí aran Cedes. Laje̱b mil chi cui̱nk li queꞌcana rubel xtakl laj Barac ut queꞌco̱eb. Ut co̱ ajcuiꞌ lix Débora.

¹¹ Quicuan jun li cui̱nk aj Heber xcꞌabaꞌ. Aꞌan xcomoneb li ralal xcꞌajol laj Hobab, lix yucuaꞌ li rixakil laj Moisés. Saꞌ jun li cutan laj Heber quixcanabeb lix comon ut qui-el saꞌ li tenamit Ceneo. Coxyi̱b lix muheba̱l rubel jun to̱n li ji saꞌ li ru takꞌa Zaanaim nachꞌ riqꞌuin li naꞌajej Cedes.

¹² Laj Sísara quirabi resil nak laj Barac li ralal laj Abinoam ac xcuulac saꞌ li tzu̱l Tabor.

¹³ Ut quixchꞌutubeb bele̱b ciento (900) lix carruaje re pletic ut quixchꞌutubeb ajcuiꞌ chixjunileb lix soldado. Queꞌel aran Haroset-goim ut co̱eb cuan cuiꞌ li nimaꞌ Cisón.

¹⁴ Ut lix Débora quixye re laj Barac: —Anakcuan xcuulac xkꞌehil. Ayukex chi pletic xban nak li Ka̱cuaꞌ ac xkꞌaxtesi saꞌ a̱cuukꞌ laj Sísara. Li Ka̱cuaꞌ yo̱ chi tenkꞌa̱nc e̱re, chan. Ut queꞌcube saꞌ li tzu̱l Tabor laj Barac rochbeneb li laje̱b mil chi soldado.

¹⁵ Nak queꞌoc chi pletic riqꞌuin chꞌi̱chꞌ laj Barac, li Dios quixsach xnaꞌleb laj Sísara joꞌqueb ajcuiꞌ lix soldado ut eb li yo̱queb chi beresi̱nc reheb li carruaje. Laj Sísara quicube saꞌ lix carruaje ut chi rok chic co̱ nak quie̱lelic.

¹⁶ Ut laj Barac quira̱linaheb li soldado ut li carruaje toj saꞌ li naꞌajej Haroset-goim ut quixsach ruheb chixjunileb li soldado. Ma̱ jun chic lix soldado laj Sísara quicana chi yoꞌyo. Chixjunileb queꞌcamsi̱c riqꞌuin chꞌi̱chꞌ.

¹⁷ Laj Heber aj Ceneo ut laj Jabín lix reyeb laj Hazor cuanqueb saꞌ usilal chi ribileb rib. Joꞌcan nak laj Sísara co̱ chixcolbal rib saꞌ lix muheba̱l lix Jael li rixakil laj Heber.

¹⁸ Lix Jael qui-el chak saꞌ lix muheba̱l chixcꞌulbal laj Sísara ut quixye re: —Ocan chak, ka̱cuaꞌ. Arin tat-oc chak. Matxucuac, chan re. Ut laj Sísara qui-oc saꞌ lix muheba̱l lix Jael, ut quiqꞌueheꞌ jun li tꞌicr saꞌ xbe̱n xban li ixk.

¹⁹ Laj Sísara quixye re lix Jael: —Ba̱nu usilal, si bayak inhaꞌ. Ta̱chakik cue, chan. Lix Jael quixcꞌam chak li bo̱ls tzꞌu̱m cuan cuiꞌ li leche ut quixqꞌue li leche chirucꞌ. Ut nak ac xrucꞌ lix leche, lix Jael quixqꞌue cuiꞌchic li tꞌicr saꞌ xbe̱n.

²⁰ Ut laj Sísara quixye re lix Jael: —Cua̱nkat aran chire li oqueba̱l. Cui ani nachal ut tixye a̱cue: “¿Ma ma̱ ani xol-ocak a̱cuiqꞌuin?” la̱at ta̱ye nak ma̱ ani, chan.

²¹ Ut laj Sísara quicube xcuara xban nak kꞌaxal lublu. Lix Jael quixchap chak jun li cheꞌ kꞌes ruꞌuj xcomon li nequeꞌxtꞌoj saꞌ chꞌochꞌ re xchapbal li muheba̱l. Ut quixchap lix martillo ut quijiloc riqꞌuin laj Sísara chi timil timil ut quixnumsi li kꞌesnal cheꞌ saꞌ xjolom toj retal qui-oc li cheꞌ saꞌ chꞌochꞌ. Joꞌcaꞌin nak quicam laj Sísara.

²² Laj Barac toj yo̱ chixsicꞌbal laj Sísara. Nak quicuulac aran, qui-el lix Jael chixcꞌulbal ut quixye re: —Quim arin, chola̱cuil li cui̱nk li yo̱cat chixsicꞌbal, chan. Ut laj Barac qui-oc toj saꞌ lix muheba̱l lix Jael ut aran quixtau laj Sísara jiljo saꞌ chꞌochꞌ. Ac camenak chic ut toj laplo ajcuiꞌ li cheꞌ saꞌ lix jolom.

²³ Joꞌcaꞌin nak li Dios quixcubsi xcuanquil laj Jabín lix reyeb laj Canaán chiruheb laj Israel.

²⁴ Ut chalen aꞌan, eb laj Israel yo̱queb chi pletic riqꞌuin laj Jabín lix rey eb laj Canaán toj retal queꞌxsach ru.