Jueces 3 - Li Santil hu

¹ Li Ka̱cuaꞌ quixcanabeb lix xicꞌ nequeꞌiloc reheb saꞌ lix naꞌajeb laj Israel re xyalbal rixeb li ralal xcꞌajol eb laj Israel li toj teꞌyoꞌla̱k mokon xban nak incꞌaꞌ queꞌpletic chire̱chaninquil li naꞌajej Canaán.

² Quixba̱nu chi joꞌcan yal re nak teꞌxtzol rib chi pletic eb laj Israel, li ma̱jiꞌ nequeꞌyoꞌla nak quicuan li ple̱t junxil.

³ Aꞌaneb aꞌin li tenamit li queꞌcanaba̱c saꞌ li naꞌajej Canaán: eb li o̱b chi rey li queꞌtaklan saꞌ xbe̱neb laj filisteo, chixjunileb laj cananeo, eb laj Sidón, ut eb laj heveo li queꞌcuan saꞌ eb li tzu̱l re Líbano, li naticla saꞌ li tzu̱l Baal-hermón toj saꞌ li naꞌajej Hamat.

⁴ Eb aꞌan queꞌcanaba̱c aran re xyalbal rixeb laj Israel ut re rilbal ma teꞌxba̱nu na li cꞌaꞌru tzꞌi̱banbil saꞌ li chakꞌrab li quiqꞌueheꞌ re laj Moisés xban li Ka̱cuaꞌ reheb lix xeꞌto̱nil xyucuaꞌeb.

⁵ Joꞌcan nak eb laj Israel queꞌcuan saꞌ xya̱nkeb laj cananeo, eb laj hiteo, eb laj amorreo, eb laj ferezeo, eb laj heveo ut eb laj jebuseo.

⁶ Ut eb laj Israel queꞌxsumubeb li ralal xcꞌajol riqꞌuineb li ralal xcꞌajoleb li tenamit li queꞌcana aran. Ut queꞌxcꞌam ribeb saꞌ usilal riqꞌuineb ut queꞌxlokꞌoni ajcuiꞌ lix dioseb.

Laj Otoniel

⁷ Eb laj Israel queꞌxba̱nu li ma̱usilal chiru li Ka̱cuaꞌ. Queꞌxcanab xlokꞌoninquil li Ka̱cuaꞌ lix Dioseb. Aꞌ chic eb li yi̱banbil dios Baal ut eb li yi̱banbil dios Asera queꞌxlokꞌoni.

⁸ Xban li ma̱usilal queꞌxba̱nu, cꞌajoꞌ nak quijoskꞌoꞌ li Dios saꞌ xbe̱neb ut quixcanabeb saꞌ rukꞌeb laj Cusan-risataim, lix reyeb laj Mesopotamia. Joꞌcan nak eb laj Israel queꞌcuan rubel xtakl li rey aꞌan chiru cuakxakib chihab.

⁹ Tojoꞌnak eb laj Israel queꞌxya̱ba xcꞌabaꞌ li Ka̱cuaꞌ. Ut li Ka̱cuaꞌ quixsicꞌ ru jun li cui̱nk re ta̱colok reheb chiruheb li xicꞌ nequeꞌiloc reheb. Li cui̱nk aꞌan, aꞌan laj Otoniel, li ralal laj Cenaz. Laj Cenaz, aꞌan li ri̱tzꞌin laj Caleb.

¹⁰ Lix musikꞌ li Ka̱cuaꞌ cuan riqꞌuin laj Otoniel ut aꞌan chic laj cꞌamol be chiruheb laj Israel. Laj Otoniel quipletic riqꞌuin laj Cusan-risataim. Ut li Ka̱cuaꞌ quixtenkꞌa laj Otoniel chi numta̱c saꞌ xbe̱neb.

¹¹ Incꞌaꞌ chic quicuan li pletic chiru caꞌcꞌa̱l chihab nak toj yoꞌyo laj Otoniel li ralal laj Cenaz.

Laj Aod

¹² Queꞌma̱cob cuiꞌchic chiru li Ka̱cuaꞌ eb laj Israel. Joꞌcan nak li Ka̱cuaꞌ quixqꞌue xmetzꞌe̱u laj Eglón chi numta̱c saꞌ xbe̱neb. Laj Eglón, aꞌan lix reyeb laj Moab. Kꞌaxal cau rib laj Eglón chiruheb laj Israel.

¹³ Eb laj Eglón queꞌxjunaji ribeb riqꞌuineb li ralal xcꞌajol laj Amón ut riqꞌuineb li ralal xcꞌajol laj Amalec. Queꞌcuulac chi pletic riqꞌuineb laj Israel ut queꞌre̱chani li tenamit Jericó li cuan cuiꞌ nabal li cheꞌ palmera.

¹⁴ Chiru cuakxaklaju chihab eb laj Israel queꞌcuan rubel xtakl laj Eglón lix reyeb laj Moab.

¹⁵ Ut eb laj Israel queꞌxya̱ba cuiꞌchic xcꞌabaꞌ li Ka̱cuaꞌ Dios. Ut li Ka̱cuaꞌ quixsicꞌ ru jun li cui̱nk re ta̱colok reheb chiruheb laj Moab. Li cui̱nk li quisiqꞌueꞌ ru, aꞌan laj Aod li ralal laj Gera ut xcomoneb li ralal xcꞌajol laj Benjamín. Laj Aod nacꞌanjelac riqꞌuin lix tzꞌe ukꞌ. Eb laj Israel queꞌxtakla laj Aod riqꞌuin laj Eglón lix reyeb laj Moab re tixqꞌue jun lix ma̱tan.

¹⁶ Laj Aod quixyi̱b jun lix chꞌi̱chꞌ caꞌ pacꞌal xkꞌesnal. Mero vara tana li rok. Quixchꞌic saꞌ xcꞌa̱mal xsaꞌ saꞌ li rakꞌ saꞌ lix nim.

¹⁷ Tojoꞌnak co̱ chixkꞌaxtesinquil lix ma̱tan laj Eglón, li kꞌaxal nim xtibel.

¹⁸ Nak ac xqꞌue lix ma̱tan laj Eglón, laj Aod quixtaklaheb cuiꞌchic saꞌ rochocheb li cui̱nk li queꞌcꞌamoc chak re li ma̱tan.

¹⁹ Nak quicuulac nachꞌ riqꞌuin li naꞌajej Gilgal bar cuanqueb cuiꞌ li jalam u̱ch, laj Aod quisukꞌi riqꞌuin li rey Eglón ut quixye re: —At rey, cuan cꞌaꞌru nacuaj xyebal a̱cue a̱junes, chan. Tojoꞌnak li rey Eglón quixye reheb li cuanqueb rochben nak teꞌxcanab xjunes. Ut eb aꞌan queꞌel chixjunileb.

²⁰ Nak cꞌojcꞌo xjunes li rey saꞌ xcaꞌ tasal li rochoch li naxnumsi cuiꞌ li sakꞌehil, laj Aod quinachꞌoc riqꞌuin ut quixye re: —Li Ka̱cuaꞌ Dios quinixtakla chixyebal a̱cue li a̱tin aꞌin, chan. Ut li rey Eglón quicuacli chirabinquil.

²¹ Ut laj Aod quixchꞌic lix tzꞌe ukꞌ rubel li rakꞌ ut quirisi saꞌ rochoch lix chꞌi̱chꞌ ut quixchꞌic chi cau saꞌ xsaꞌ laj Eglón.

²² Kꞌaxal cau quixchꞌic saꞌ lix saꞌ toj retal qui-oc chixjunil li chꞌi̱chꞌ rech xxiquic lix chapbal. Ut qui-el lix cꞌamcꞌot. Incꞌaꞌ chic quicꞌutun lix chꞌi̱chꞌ xban nak kꞌaxal nim xtibel laj Eglón. Ut aran quicana li chꞌi̱chꞌ. Laj Aod incꞌaꞌ chic quirisi.

²³ Ut laj Aod quixqꞌue saꞌ lau li puerta nak qui-el saꞌ li ventana.

²⁴ Nak ac x-el laj Aod, eb lix mo̱s li rey Eglón queꞌsukꞌi. Queꞌxqꞌue retal nak cuan saꞌ lau li puerta. Abanan queꞌxcꞌoxla nak li rey quiqꞌuehoc re saꞌ lau re nak ta̱xic chi chuꞌuc.

²⁵ Najt queꞌroybeni, abanan nak incꞌaꞌ quixte li puerta li rey, queꞌoc xcꞌaꞌuxeb. Queꞌxsicꞌ li lau ut queꞌxte li puerta ut queꞌxtau li rey tꞌantꞌo aran. Camenak chic.

²⁶ Nak eb li mo̱s toj yo̱queb chi oybeni̱nc, laj Aod quie̱lelic, ut co̱ chi najt. Quinumeꞌ cuiꞌchic cuanqueb cuiꞌ li jalam u̱ch ut aran quixcol rib saꞌ li naꞌajej Seirat.

²⁷ Nak quicuulac saꞌ lix naꞌajeb li ralal xcꞌajol laj Efraín, li tzu̱l ru, laj Aod quixya̱basi li trompeta re xbokbaleb laj Israel. Ut chixjunileb queꞌco̱eb chirix. Laj Aod yo̱ chi cꞌamoc be chiruheb.

²⁸ Laj Aod quixye reheb: —Tine̱ta̱ke. Li Ka̱cuaꞌ ac xkꞌaxtesi saꞌ kukꞌ eb laj Moab, li xicꞌ nequeꞌiloc ke, chan. Joꞌcan nak eb laj Israel queꞌxta̱ke laj Aod. Li Dios quixtenkꞌaheb chi pletic ut queꞌre̱chani li naꞌajej bar nequeꞌnumeꞌ cuiꞌ jun pacꞌal li nimaꞌ Jordán. Ma̱ jun queꞌxcanab chi numecꞌ jun pacꞌal li nimaꞌ.

²⁹ Saꞌ li cutan aꞌan eb laj Israel queꞌxcamsi laje̱b mil (10,000) tana lix soldado laj Moab, li kꞌaxal cauheb rib. Ma̱ jun quiru quie̱lelic chiruheb laj Israel.

³⁰ Joꞌcaꞌin nak eb laj Israel queꞌnumta saꞌ xbe̱neb laj Moab saꞌ li cutan aꞌan. Ut incꞌaꞌ chic queꞌpletic chiru ca̱cꞌa̱l chihab.

³¹ Li jun chic li quicꞌamoc be chiruheb laj Israel, aꞌan laj Samgar li ralal laj Anat. Laj Samgar quicoloc reheb laj Israel chiruheb laj filisteo xban nak quixcamsi cuakib ciento (600) aj filisteo riqꞌuin lix cheꞌ re xberesinquil bo̱yx.