Jueces 21 - Li Santil hu

¹ Eb li ralal xcꞌajol laj Israel queꞌxba̱nu jun li juramento aran Mizpa ut queꞌxye nak ma̱ jun reheb teꞌxsumub lix rabineb riqꞌuineb li ralal xcꞌajol laj Benjamín.

² Ut chixjunileb laj Israel queꞌxchꞌutub ribeb aran Bet-el. Queꞌxnumsi li cutan aꞌan chiru li Ka̱cuaꞌ toj qui-ecuu. Queꞌya̱bac chi cau ut queꞌxye:

³ —At Ka̱cuaꞌ, la̱at li kaDios la̱o aj Israel. ¿Cꞌaꞌut nak xkacꞌul chi joꞌcaꞌin? ¿Cꞌaꞌut nak teꞌosokꞌ chi junaj cua li jun xte̱paleb laj Israel? chanqueb.

⁴ Cuulajak chic eb laj Israel queꞌcuacli ekꞌela ut queꞌxyi̱b jun li artal. Queꞌxqꞌue lix cꞌatbil mayej ut queꞌmayejac re nak teꞌxcꞌam cuiꞌchic rib saꞌ usilal riqꞌuin li Ka̱cuaꞌ.

⁵ Queꞌxye chi ribileb rib: —¿Ma cuanqueb kacomon incꞌaꞌ queꞌcuulac nak kachꞌutub kib aran Mizpa re xlokꞌoninquil li Ka̱cuaꞌ? La̱o kaba̱nu li juramento nak teꞌcamsi̱k li incꞌaꞌ queꞌcuulac chixchꞌutubanquil ribeb Mizpa, chanqueb.

⁶ Ut queꞌyotꞌeꞌ xchꞌo̱leb xban li cꞌaꞌru queꞌxcꞌul eb li ralal xcꞌajol laj Benjamín ut queꞌxye: —Anakcuan teꞌosokꞌ li jun xte̱paleb laj Israel.

⁷ ¿Cꞌaꞌru takaba̱nu re nak teꞌcua̱nk rixakileb li ralal xcꞌajol laj Benjamín li toj yoꞌyo̱queb? La̱o ac xkaba̱nu li juramento nak incꞌaꞌ takasumub li karabin riqꞌuineb, chanqueb.

⁸ Ut queꞌxye chi ribileb rib: —¿Ma cuanqueb saꞌ xya̱nkeb li ralal xcꞌajol laj Israel li incꞌaꞌ queꞌxchꞌutub ribeb chiru li Ka̱cuaꞌ arin Mizpa? chanqueb. Ut queꞌxqꞌue retal nak eb li cuanqueb Jabes-galaad incꞌaꞌ queꞌcuan aran nak queꞌxchꞌutub ribeb.

⁹ Queꞌxnau nak ma̱ aniheb xban nak queꞌpatzꞌeꞌ xcꞌabaꞌeb ut ma̱ jun re li tenamit Jabes-galaad queꞌchakꞌoc xban nak ma̱ aniheb.

¹⁰ Ut eb li chꞌutchꞌu̱queb aran queꞌxsiqꞌueb ru cablaju mil lix soldado li kꞌaxal cauheb rib chi pletic ut queꞌxye reheb: —Texxic aran Jabes-galaad ut te̱camsiheb chixjunileb li cuanqueb aran, joꞌ ixk, joꞌ cocꞌal.

¹¹ Te̱camsiheb ajcuiꞌ chixjunileb li cui̱nk ut eb li ixk li ac cuanjenakeb riqꞌuin cui̱nk, chanqueb.

¹² Ca̱hib ciento li tukꞌ ixk li ma̱jiꞌ cuanjenakeb riqꞌuin cui̱nk li queꞌxtau aran. Ut queꞌxcꞌameb saꞌ li muheba̱l li cuan aran Silo xcue̱nt Canaán.

¹³ Ut eb li chꞌutchꞌu̱queb queꞌxtakla resil riqꞌuineb li ralal xcꞌajol laj Benjamín li cuanqueb saꞌ li sako̱nac aran Rimón. Queꞌxbokeb re nak teꞌxcꞌam cuiꞌchic ribeb saꞌ usilal.

¹⁴ Joꞌcan nak eb li ralal xcꞌajol laj Benjamín queꞌsukꞌi cuiꞌchic ut eb li tukꞌ ixk li incꞌaꞌ queꞌcamsi̱c aran Jabes-galaad queꞌqꞌueheꞌ reheb chokꞌ rixakileb. Abanan incꞌaꞌ quitzꞌakloc xban nak nabaleb li cui̱nk.

¹⁵ Ut eb laj Israel queꞌrahoꞌ xchꞌo̱leb chirixeb li ralal xcꞌajol laj Benjamín xban nak jun te̱p li ralal xcꞌajoleb laj Israel incꞌaꞌ chic tzꞌakal ruheb.

¹⁶ Ut eb li nequeꞌtaklan saꞌ xya̱nkeb queꞌxye: —¿Cꞌaꞌru takaba̱nu riqꞌuineb li ralal xcꞌajol laj Benjamín li ma̱cꞌaꞌ rixakileb xban nak quilajeꞌcamsi̱c chixjunileb li ixk? chanqueb.

¹⁷ Tento nak ta̱cua̱nk ralal xcꞌajoleb li ralal laj Benjamín re nak incꞌaꞌ teꞌe̱lk saꞌ xya̱nkeb laj Israel li xte̱paleb li ralal xcꞌajol laj Benjamín, chanqueb.

¹⁸ Queꞌxye ajcuiꞌ: —La̱o incꞌaꞌ naru takaqꞌueheb li karabin reheb xban nak xkaba̱nu li juramento ut xkaye nak tzꞌekta̱nanbilakeb li ani teꞌxqꞌueheb xrabin chokꞌ rixakileb li ralal xcꞌajol laj Benjamín.

¹⁹ Rajlal chihab nacuan jun li ninkꞌe aran Silo re xlokꞌoninquil li Ka̱cuaꞌ, chanqueb. Li tenamit Silo cuan saꞌ xyiheb li cuib chi tenamit Bet-el ut Lebona. Bet-el nacana saꞌ li sur. Lebona nacana saꞌ li norte. Ut nachꞌ riqꞌuin li tenamit Silo, saꞌ li oriente, nanumeꞌ li be li naxic toj Siquem.

²⁰ Eb li nequeꞌtaklan saꞌ xbe̱neb li tenamit queꞌxtakla resil riqꞌuineb li ralal xcꞌajol laj Benjamín ut queꞌxye reheb: —Ayukex aran Silo ut mukumak e̱rib saꞌ xya̱nk li acui̱mk uvas. Aran yo̱kex chi oybeni̱nc.

²¹ Kꞌesak e̱ru chi iloc. Nak yo̱keb chi ninkꞌei̱k, eb li xkaꞌal teꞌe̱lk chi chꞌu̱tal re teꞌxajok. Che̱junilex la̱ex tex-e̱lk saꞌ li naꞌajej li mukmu̱kex cuiꞌ. Ut chi ju̱nkal te̱chap ju̱nkak le̱ rixakil saꞌ xya̱nkeb li yo̱keb chi xajoc ut texxic chi junpa̱t saꞌ le̱ tenamit.

²² Ut cui teꞌcuulak lix yucuaꞌeb malaj ut li raseb chixyebal ke cꞌaꞌut nak xcꞌulman chi joꞌcaꞌin, la̱o takaye reheb, “Nakatzꞌa̱ma che̱ru nak te̱ba̱nu usilal reheb, ut te̱canabeb li xkaꞌal chokꞌ rixakileb. La̱o xocuulac saꞌ li ple̱t ut incꞌaꞌ xoru chixtaubal tzꞌakal li ixk re takaqꞌue chokꞌ rixakileb. Moco xekꞌet ta li contrato li xeba̱nu, xban nak moco la̱ex ta xexqꞌuehoc reheb. Yal elkꞌanbil ban xeꞌxba̱nu,” chaꞌko reheb.—

²³ Ut eb li ralal xcꞌajol laj Benjamín queꞌxba̱nu joꞌ quiyeheꞌ reheb. Queꞌrelkꞌa li xkaꞌal re teꞌxcꞌam chokꞌ rixakileb nak yo̱queb chi xajoc li tukꞌ ixk. Queꞌsukꞌi saꞌ li naꞌajej li quiqꞌueheꞌ reheb junxil ut queꞌxyi̱b cuiꞌchic lix tenamiteb ut aran queꞌcana chi cua̱nc.

²⁴ Ut chixjunileb li ralal xcꞌajol laj Israel queꞌsukꞌi saꞌ lix naꞌajeb, li quiqꞌueheꞌ reheb junxil bar cuan cuiꞌ li rochocheb ut eb li ralal xcꞌajol.

²⁵ Saꞌ eb li cutan aꞌan ma̱cꞌaꞌ xreyeb laj Israel. Chixjunileb queꞌxba̱nu li cꞌaꞌru queꞌraj xba̱nunquil xjuneseb.