Jueces 20 - Li Santil hu

¹ Quilajeꞌxchꞌutub ribeb chixjunileb li cui̱nk aj Israel saꞌ li naꞌajej cuan cuiꞌ li tabernáculo aran Mizpa. Eb aꞌan queꞌchal chak saꞌ eb li naꞌajej li naticla chak Dan ut nacuulac Beerseba ut toj Galaad.

² Queꞌxchꞌutub ajcuiꞌ ribeb chixjunileb li nequeꞌcꞌamoc be saꞌ xya̱nkeb laj Israel. Ut cuanqueb ajcuiꞌ ca̱hib ciento (400,000) mil chi soldado xcomoneb li nequeꞌxic chi rokeb.

³ Quicuulac resil riqꞌuineb li ralal xcꞌajol laj Benjamín nak eb li jun chꞌol chic aj Israel queꞌxchꞌutub ribeb aran Mizpa. Ut eb laj Israel queꞌxpatzꞌ re laj levita: —¿Chanru nak xcuan li ma̱usilal aꞌin? chanqueb re.

⁴ Ut li cui̱nk laj levita li quicamsi̱c rixakil quixye reheb: —La̱in cuochben li cuixakil xo-oc chi cua̱rc saꞌ li tenamit Gabaa li cuan saꞌ xnaꞌajeb li ralal xcꞌajol laj Benjamín.

⁵ Chiru li kꞌojyi̱n aꞌan, eb laj Gabaa queꞌxsut li cab li cuanco cuiꞌ. Queꞌraj raj incamsinquil. Ut queꞌxba̱nu raylal re li cuixakil toj retal queꞌxcamsi.

⁶ Joꞌcan nak la̱in xinseti li camenak ut xintakla saꞌ le̱ tenamit re nak te̱nau nak arin Israel xcuan camsi̱nc ut xcuan ma̱usilal.

⁷ Che̱junilex li cuanquex arin, la̱ex aj Israel. La̱ex te̱ye cꞌaꞌru takaba̱nu anakcuan, chan.

⁸ Ut chixjunileb laj Israel chi junajeb xchꞌo̱l queꞌxye: —Ma̱ jun ke ta̱sukꞌi̱k saꞌ rochoch. Ma̱ ani ta̱xic saꞌ xmuheba̱l.

⁹ Li cꞌaꞌru tento takaba̱nu, aꞌan bu̱lic chirix li ani teꞌxic chi pletic riqꞌuineb laj Gabaa.

¹⁰ Laje̱tk chi cui̱nk takisi saꞌ xya̱nkeb li ju̱nk ciento chi cui̱nk re nak teꞌxic chixsicꞌbal li tzacae̱mk. Ut li jun chꞌol chic teꞌxic saꞌ li tenamit Gabaa chi pletic toj retal teꞌxqꞌueheb laj Gabaa chixtojbal li ma̱usilal xeꞌxba̱nu saꞌ li tenamit Israel, chanqueb.

¹¹ Ut junajeb xchꞌo̱l chixjunileb li cui̱nk aj Israel nak queꞌco̱eb chi pletic riqꞌuineb li cuanqueb Gabaa.

¹² Ut queꞌxtakla resil saꞌ xya̱nkeb li ralal xcꞌajol laj Benjamín ut queꞌxye: —¿Cꞌaꞌut nak xeꞌxba̱nu li ma̱usilal aꞌin saꞌ e̱ya̱nk?

¹³ Kꞌaxtesihomakeb saꞌ kukꞌ eb li cui̱nk aj Gabaa, li xeꞌxba̱nu li ma̱usilal. Takacamsiheb re nak ta̱e̱lk li ma̱usilal saꞌ li katenamit Israel, chanqueb. Abanan eb li ralal xcꞌajol laj Benjamín incꞌaꞌ queꞌraj rabinquil li cꞌaꞌru queꞌxye li rech aj Israelil.

¹⁴ Chixjunileb li ralal xcꞌajol laj Benjamín queꞌchal yalak bar. Queꞌxchꞌutub ribeb aran Gabaa chi pletic riqꞌuineb li rech aj Israelil.

¹⁵ Chixjunileb li cui̱nk li queꞌxchꞌutub rib saꞌ xya̱nkeb li ralal xcꞌajol laj Benjamín cuanqueb cuakib xcaꞌcꞌa̱l mil chi cui̱nk cuanqueb xchꞌi̱chꞌ. Ut cuanqueb ajcuiꞌ cuukub ciento li cui̱nk li sicꞌbileb ru saꞌ li tenamit Gabaa.

¹⁶ Saꞌ xya̱nkeb chixjunileb li cui̱nk cuanqueb cuukub ciento li nequeꞌcutuc chi rantꞌin riqꞌuin lix tzꞌe ukꞌ. Kꞌaxal ti̱c rukꞌeb. Usta jun chi chꞌina ismal teꞌxcut, ho̱n nequeꞌxtau riqꞌuin li pec.

¹⁷ Ut eb li cui̱nk aj Israel li queꞌco̱eb chi pletic riqꞌuineb laj Benjamín, cuanqueb ca̱hib ciento mil li cui̱nk li cuanqueb xchꞌi̱chꞌ. Chixjunileb li cui̱nk aꞌan nequeꞌxnau pletic.

¹⁸ Eb laj Israel queꞌco̱eb Bet-el saꞌ li rochoch li Dios chi tijoc. Queꞌxye re li Dios: —At Ka̱cuaꞌ, ba̱nu usilal, cꞌut chiku aniheb li teꞌxic xbe̱n cua chi pletic riqꞌuineb li ralal xcꞌajol laj Benjamín, chanqueb. Ut li Dios quixye reheb: —Eb li ralal xcꞌajol laj Judá, aꞌaneb li teꞌxic xbe̱n cua, chan.

¹⁹ Cuulajak chic eb laj Israel queꞌco̱eb ut queꞌxyi̱b lix muheba̱leb nachꞌ riqꞌuin li tenamit Gabaa.

²⁰ Queꞌco̱eb li ralal xcꞌajol laj Israel chi pletic riqꞌuineb li ralal xcꞌajol laj Benjamín. Ut queꞌcana nachꞌ riqꞌuin li tenamit Gabaa. Queꞌxtus ribeb re nak teꞌxtiquib pletic.

²¹ Ut eb li ralal xcꞌajol laj Benjamín queꞌel saꞌ li tenamit Gabaa ut queꞌxcamsiheb cuib xcaꞌcꞌa̱l mil (22,000) chi soldado aj Israel saꞌ li cutan aꞌan.

²² Eb li ralal xcꞌajol laj Israel queꞌxcacuubresi cuiꞌchic xchꞌo̱leb re nak teꞌxic cuiꞌchic chi pletic saꞌ li naꞌajej li queꞌco̱eb cuiꞌ saꞌ li xbe̱n cutan.

²³ Eb laj Israel queꞌco̱eb saꞌ li rochoch li Dios. Chalen ekꞌela toj retal qui-ecuu queꞌya̱bac. Queꞌtijoc ut queꞌxye re li Ka̱cuaꞌ Dios: —¿Ma toxic cuiꞌchic chi pletic riqꞌuineb li ralal xcꞌajol laj Benjamín, li kech aj Israelil? chanqueb. Ut li Ka̱cuaꞌ quixye reheb: —Texxic, chan.

²⁴ Joꞌcan nak queꞌco̱eb cuiꞌchic chi pletic riqꞌuineb li ralal xcꞌajol laj Benjamín saꞌ xcab li cutan.

²⁵ Ut joꞌcan cuiꞌchic queꞌxcꞌul. Eb li ralal xcꞌajol laj Benjamín queꞌel saꞌ li tenamit Gabaa ut queꞌxcamsiheb cuakxaklaju mil (18,000) chic li soldado li nequeꞌxnau pletic chi us.

²⁶ Ut chixjunileb laj Israel queꞌco̱eb Bet-el. Queꞌxchꞌutub ribeb chiru li Ka̱cuaꞌ. Queꞌtijoc ut queꞌayunic toj qui-ecuu. Queꞌxmayeja li cꞌatbil xul ut queꞌxqꞌue ajcuiꞌ li mayej re xcꞌambaleb rib saꞌ usilal riqꞌuin li Dios.

²⁷ Ut eb li ralal xcꞌajol laj Israel queꞌtijoc chiru li Ka̱cuaꞌ ut queꞌxpatzꞌ re cꞌaꞌru us teꞌxba̱nu. (Saꞌ eb li cutan aꞌan li Lokꞌlaj Ca̱x xocxo cuiꞌ li laje̱b chi chakꞌrab cuan aran Bet-el.)

²⁸ Ut laj Finees, aꞌan laj tij saꞌ eb li cutan aꞌan. Laj Finees, aꞌan li ralal laj Eleazar. Ut laj Eleazar, aꞌan li ralal laj Aarón. Eb laj Israel queꞌxye re li Dios: —¿Ma us nak toxic cuiꞌchic cuulaj chi pletic riqꞌuineb li ralal xcꞌajol laj Benjamín, li kech aj Israelil, malaj ut incꞌaꞌ chic toxic? chanqueb. Ut li Ka̱cuaꞌ quixye reheb: —Texxic cuiꞌchic chi pletic riqꞌuineb xban nak cuulaj la̱in tinkꞌaxtesiheb saꞌ e̱rukꞌ, chan.

²⁹ Cuanqueb cui̱nk aj Israel queꞌxmuk ribeb chi xjun sutam li tenamit Gabaa.

³⁰ Ut eb li ralal xcꞌajol laj Israel queꞌco̱eb ut queꞌxtus ribeb re nak teꞌxtiquib cuiꞌchic pletic riqꞌuineb laj Benjamín joꞌ nak queꞌxba̱nu xbe̱n sut ut xcaꞌ sut.

³¹ Ut eb li ralal xcꞌajol laj Benjamín queꞌel saꞌ li tenamit chixcꞌulbaleb. Najt caꞌchꞌin riqꞌuin li tenamit queꞌxtiquib xcamsinquileb laj Israel. Saꞌ eb li be li nequeꞌxic Bet-el ut Gabaa queꞌxcamsiheb laje̱b xcaꞌcꞌa̱l chi soldado xcomoneb laj Israel.

³² Eb li ralal xcꞌajol laj Benjamín queꞌxye: —Xonumta saꞌ xbe̱neb joꞌ junxil, chanqueb. Abanan eb li ralal xcꞌajol laj Israel ac cuan saꞌ xchꞌo̱leb nak teꞌe̱lelik chiruheb re nak teꞌe̱lk saꞌ li tenamit ut teꞌxic saꞌ eb li be.

³³ Nak ma̱cꞌaꞌ saꞌ xchꞌo̱leb li ralal xcꞌajol laj Benjamín, eb li ralal xcꞌajol laj Israel queꞌxtus ribeb re teꞌpletik aran Baal-tamar. Ut eb laj Israel li mukmu̱queb chi xjun sutam li tenamit Gabaa queꞌel chak saꞌ li pim li mukmu̱queb cuiꞌ.

³⁴ Laje̱b mil chi soldado, li sicꞌbileb ru saꞌ xya̱nkeb li ralal xcꞌajol laj Israel, queꞌxtiquib pletic saꞌ li tenamit Gabaa ut cau queꞌpletic. Ma̱cꞌaꞌ saꞌ xchꞌo̱leb li ralal xcꞌajol laj Benjamín nak oc re xsachbal ruheb.

³⁵ Li Ka̱cuaꞌ quixtenkꞌaheb li ralal xcꞌajol laj Israel chi numta̱c saꞌ xbe̱neb li ralal xcꞌajol laj Benjamín. O̱b xcaꞌcꞌa̱l mil riqꞌuin jun ciento (25,100) lix soldado li ralal xcꞌajol laj Benjamín queꞌcamsi̱c saꞌ li cutan aꞌan.

³⁶ Ut eb li ralal xcꞌajol laj Benjamín queꞌxqꞌue retal nak incꞌaꞌ queꞌnumta saꞌ xbe̱neb laj Israel. Lix qꞌuialeb li ralal xcꞌajol laj Israel queꞌa̱linac chiruheb laj Benjamín xban nak cꞌojcꞌo̱queb xchꞌo̱l riqꞌuineb li mukmu̱queb chi xjun sutam li tenamit Gabaa.

³⁷ Eb li cui̱nk mukmu̱queb, queꞌco̱eb chi junpa̱t. Queꞌxjeqꞌui ribeb saꞌ li tenamit Gabaa ut quilajeꞌxcamsi chi chꞌi̱chꞌ chixjunileb li cuanqueb saꞌ li tenamit Gabaa.

³⁸ Ac queꞌxcꞌu̱b riqꞌuineb li queꞌxmuk rib nak teꞌril li sib yo̱ chi takecꞌ saꞌ li tenamit, teꞌsukꞌi̱k chirix re teꞌoc chi pletic riqꞌuineb li ralal xcꞌajol laj Benjamín.

³⁹ Eb laj Israel queꞌxba̱nu ribeb nak yo̱queb chi e̱lelic chiruheb laj Benjamín. Eb li ralal xcꞌajol laj Benjamín ac queꞌxcamsiheb li laje̱b xcaꞌcꞌa̱l (30) chi cui̱nk aj Israel. Joꞌcan nak queꞌxye: —Ac xonumta saꞌ xbe̱neb joꞌ xkaba̱nu xbe̱n cua, chanqueb.

⁴⁰ Tojoꞌnak queꞌiloc chirixeb ut queꞌril li sib li yo̱ chi takecꞌ saꞌ xbe̱n li tenamit Gabaa. Cꞌajoꞌ nak queꞌsach xchꞌo̱leb li ralal xcꞌajol laj Benjamín.

⁴¹ Ut eb li ralal xcꞌajol laj Israel queꞌxsukꞌisi ribeb ut queꞌxtiquib cuiꞌchic pletic riqꞌuineb. Qui-oc xxiuheb li ralal xcꞌajol laj Benjamín xban nak queꞌxqꞌue retal nak teꞌsachekꞌ ruheb.

⁴² Ut queꞌxtiquib e̱lelic chiruheb li ralal xcꞌajol laj Israel. Queꞌco̱eb saꞌ xjayal li chaki chꞌochꞌ. Abanan incꞌaꞌ queꞌru chi e̱lelic. Eb laj Israel li yo̱queb chi e̱lc saꞌ li tenamit quilajeꞌxcamsiheb li ralal xcꞌajol laj Benjamín.

⁴³ Eb li ralal xcꞌajol laj Israel queꞌxsut eb li ralal xcꞌajol laj Benjamín. Ut quilajeꞌxcamsiheb. Naticla chak cuan cuiꞌ li tenamit Menúha ut nacuulac saꞌ xcaꞌyaba̱l li tenamit Gabaa li cuan saꞌ li na-el cuiꞌ li sakꞌe.

⁴⁴ Cuakxaklaju mil (18,000) chi xsoldado xcomoneb li ralal xcꞌajol laj Benjamín queꞌcamsi̱c. Chixjunileb li queꞌcamsi̱c kꞌaxal cauheb rib chi pletic.

⁴⁵ Eb li jun chꞌol chic li ralal xcꞌajol laj Benjamín queꞌsukꞌi chirixeb ut queꞌoc chi e̱lelic saꞌ li sako̱nac re Rimón li cuan saꞌ li chaki chꞌochꞌ. O̱b mil chic li queꞌcamsi̱c saꞌ xya̱nkeb saꞌ eb li be. Eb li ralal xcꞌajol laj Israel queꞌra̱linaheb toj saꞌ li naꞌajej Gidom ut queꞌxcamsi cuib mil chic.

⁴⁶ Chixjunileb li soldado reheb laj Benjamín li queꞌcamsi̱c saꞌ li cutan aꞌan cuanqueb o̱b xcaꞌcꞌa̱l mil chi cui̱nk, li kꞌaxal cauheb rib chi pletic.

⁴⁷ Abanan cuakib ciento chi cui̱nk queꞌe̱lelic ut queꞌxmuk ribeb saꞌ li sako̱nac li cuan Rimón ut aran queꞌcuan ca̱hib po.

⁴⁸ Ut eb li ralal xcꞌajol laj Israel queꞌco̱eb saꞌ chixjunileb li tenamit li cuanqueb cuiꞌ eb li ralal xcꞌajol laj Benjamín. Queꞌxcamsi chi chꞌi̱chꞌ chixjunil li queꞌxtau, joꞌ cristian, joꞌqueb ajcuiꞌ li xul. Ut quilajeꞌxcꞌat chixjunileb lix tenamiteb.