Jueces 2 - Li Santil hu

¹ Qui-el ut lix ángel li Ka̱cuaꞌ saꞌ li tenamit Gilgal ut co̱ toj Boquim. Quixye reheb laj Israel: —La̱in quin-isin chak e̱re Egipto ut la̱in xexincꞌam chak saꞌ li naꞌajej aꞌin li xinyechiꞌi reheb le̱ xeꞌto̱nil yucuaꞌ riqꞌuin juramento. Quinye e̱re, “La̱in ma̱ jaruj tinkꞌet li contrato li xinba̱nu e̱riqꞌuin.

² Abanan tento nak la̱ex incꞌaꞌ te̱ba̱nu junak contrato riqꞌuineb li cuanqueb saꞌ li naꞌajej aꞌin. Te̱juqꞌui ban lix artaleb.” Abanan la̱ex incꞌaꞌ xeba̱nu li quinye e̱re. Xekꞌet ban li cua̱tin.

³ Joꞌcan nak la̱in ninye e̱re nak incꞌaꞌ tincuisiheb li tenamit che̱ru saꞌ li naꞌajej aꞌin. Xicꞌ tex-ilekꞌ xbaneb ut texqꞌuehekꞌ chi ma̱cobc xbaneb lix dioseb, chan li ángel.

⁴ Nak queꞌrabi li cꞌaꞌru quixye li ángel, eb laj Israel queꞌoc chi ya̱bac chi cau.

⁵ Joꞌcan nak queꞌxqꞌue Boquim chokꞌ xcꞌabaꞌ li naꞌajej aꞌan. Ut aran queꞌmayejac chiru li Ka̱cuaꞌ.

⁶ Ut laj Josué quixchakꞌrabiheb laj Israel ut queꞌco̱eb chi xjunju̱nkaleb chi cua̱nc saꞌ lix naꞌajeb li queꞌre̱chani.

⁷ Eb li tenamit queꞌcꞌanjelac chiru li Ka̱cuaꞌ joꞌ najtil quicuan laj Josué saꞌ xya̱nkeb. Ut nak ac xcam laj Josué, queꞌxlokꞌoni ajcuiꞌ li Dios joꞌ najtil yoꞌyo̱queb li queꞌcꞌamoc be chiruheb, li queꞌril riqꞌuin xnakꞌeb ru li quixba̱nu li Ka̱cuaꞌ re xcolbaleb laj Israel.

⁸ Oꞌcꞌa̱l chihab riqꞌuin laje̱b chihab (110) cuan re laj Josué, laj cꞌanjel chiru li Dios, nak quicam. Laj Josué, aꞌan li ralal laj Nun.

⁹ Ut queꞌxmuk aran Timnat-sera saꞌ li naꞌajej li quire̱chani aꞌan. Li naꞌajej aꞌan cuan jun pacꞌal li tzu̱l Gaas saꞌ li norte saꞌ lix naꞌajeb li ralal xcꞌajol laj Efraín, li tzu̱l ru.

¹⁰ Ut queꞌcam ajcuiꞌ chixjunileb laj Israel li cuanqueb nak toj yoꞌyo laj Josué. Ut eb li ralal xcꞌajol li queꞌyoꞌla mokon incꞌaꞌ chic queꞌxpa̱b li Ka̱cuaꞌ, chi moco queꞌxnau chixjunil li usilal li quixba̱nu li Dios reheb laj Israel.

¹¹ Ut queꞌxba̱nu li incꞌaꞌ us chiru li Ka̱cuaꞌ. Queꞌoc chixlokꞌoninquileb li yi̱banbil dios Baal.

¹² Queꞌxtzꞌekta̱na li Ka̱cuaꞌ, lix Dioseb lix xeꞌto̱nil yucuaꞌ, li qui-isin chak reheb saꞌ li naꞌajej Egipto. Ut queꞌxtiquib xlokꞌoninquileb li yi̱banbil dios li nequeꞌxlokꞌoni li tenamit li cuanqueb chi nachꞌ riqꞌuineb. Ut riqꞌuin xlokꞌoninquil li yi̱banbil dios, queꞌxchikꞌ xjoskꞌil li Ka̱cuaꞌ.

¹³ Queꞌxtzꞌekta̱na li tzꞌakal Dios ut queꞌxlokꞌoniheb li yi̱banbil dios Baal, ut eb li yi̱banbil dios Astarot xcꞌabaꞌeb.

¹⁴ Cꞌajoꞌ nak quichal xjoskꞌil li Dios saꞌ xbe̱neb laj Israel. Joꞌcan nak quixkꞌaxtesiheb saꞌ rukꞌeb laj e̱lkꞌ ut qui-elkꞌa̱c chixjunil li cꞌaꞌru cuan reheb. Quixkꞌaxtesiheb saꞌ rukꞌeb li xicꞌ nequeꞌiloc reheb, li cuanqueb chi nachꞌ riqꞌuineb ut eb aꞌan chic queꞌnumta saꞌ xbe̱neb. Ut eb laj Israel incꞌaꞌ queꞌxcuy xcolbaleb rib chiruheb.

¹⁵ Nak nequeꞌxic chi pletic yalak bar, li Ka̱cuaꞌ incꞌaꞌ chic naxtenkꞌaheb. Incꞌaꞌ chic naxcoleb chiruheb li xicꞌ nequeꞌiloc reheb. Quixcanabeb ban chi rahobtesi̱c joꞌ quixye reheb. Kꞌaxal ra queꞌxcꞌul joꞌ quiyeheꞌ reheb xban li Ka̱cuaꞌ.

Li Dios quixqꞌueheb laj rakol a̱tin chi cꞌamoc be chiruheb laj Israel

¹⁶ Usta yo̱ xjoskꞌil li Ka̱cuaꞌ saꞌ xbe̱neb, abanan quixxakabeb laj rakol a̱tin chixtenkꞌanquileb laj Israel re nak teꞌxcol ribeb chiruheb li yo̱queb chi makꞌoc re li cꞌaꞌru reheb.

¹⁷ Abanan eb laj Israel incꞌaꞌ ajcuiꞌ queꞌabin chiruheb laj rakol a̱tin. Toj yo̱queb ajcuiꞌ chixlokꞌoninquil li jalanil dios. Eb aꞌan incꞌaꞌ queꞌxba̱nu li naxye lix chakꞌrab li Ka̱cuaꞌ joꞌ queꞌxba̱nu chak lix xeꞌto̱nil yucuaꞌeb najter.

¹⁸ Nak li Ka̱cuaꞌ naxxakab junak aj rakol a̱tin, aꞌan ajcuiꞌ natenkꞌan re. Ut aꞌan ajcuiꞌ nacoloc reheb laj Israel saꞌ rukꞌeb li xicꞌ nequeꞌiloc reheb joꞌ najtil yoꞌyo laj rakol a̱tin. Li Ka̱cuaꞌ quiril xtokꞌoba̱l ruheb nak yo̱queb chi ya̱bac xban li raylal li yo̱queb chixcꞌulbal saꞌ rukꞌeb li xicꞌ nequeꞌiloc reheb.

¹⁹ Ut nak nacam laj rakol a̱tin, nequeꞌoc cuiꞌchic xba̱nunquil li ma̱usilal eb laj Israel ut kꞌaxal cuiꞌchic yibru li nequeꞌxba̱nu chiru li queꞌxba̱nu chak lix naꞌ xyucuaꞌeb. Nequeꞌxlokꞌoni li jalanil dios ut nequeꞌcꞌanjelac chiruheb. Ut incꞌaꞌ nequeꞌxcanab xba̱nunquil li ma̱usilal xban nak kꞌaxal cauheb xchꞌo̱l.

²⁰ Cꞌajoꞌ nak quijoskꞌoꞌ li Ka̱cuaꞌ saꞌ xbe̱neb laj Israel. Ut quixye: —Eb li tenamit aꞌin xeꞌxkꞌet li contrato li quinba̱nu riqꞌuineb lix xeꞌto̱nil xyucuaꞌeb. Incꞌaꞌ nequeꞌraj xba̱nunquil li cꞌaꞌru ninye reheb.

²¹ Joꞌcan nak incꞌaꞌ teꞌcuisi saꞌ lix naꞌajeb li tenamit li incꞌaꞌ quirisiheb laj Josué nak toj ma̱jiꞌ nacam.

²² Tinba̱nu chi joꞌcaꞌin re xyalbal rixeb laj Israel ma teꞌxba̱nu na li cꞌaꞌru ninye joꞌ queꞌxba̱nu lix xeꞌto̱nil xyucuaꞌeb malaj ut incꞌaꞌ, chan li Ka̱cuaꞌ.

²³ Joꞌcan nak li Ka̱cuaꞌ quixcanabeb li tenamit chi cua̱nc saꞌ li naꞌajej aꞌan. Incꞌaꞌ quirisiheb saꞌ junpa̱t li tenamit li incꞌaꞌ quixkꞌaxtesiheb saꞌ rukꞌ laj Josué nak toj yoꞌyo.