Jueces 19 - Li Santil hu

Nak queꞌxcamsi li ixk li cuan riqꞌuin laj levita

¹ Saꞌ eb li cutan nak eb laj Israel toj ma̱cꞌaꞌ xreyeb quicuan jun li cui̱nk xcomoneb li ralal xcꞌajol laj Leví saꞌ lix naꞌajeb li ralal xcꞌajol laj Efraín, li tzu̱l ru. Li cui̱nk aꞌan quixsicꞌ jun li ixk re ta̱cua̱nk riqꞌuin. Li ixk aꞌan, Belén xtenamit xcue̱nt Judá.

² Abanan li ixk aꞌan incꞌaꞌ us xnaꞌleb. Quixcanab li cui̱nk, ut quisukꞌi Belén saꞌ rochoch lix yucuaꞌ ut aran quicuan chiru ca̱hib po.

³ Nak ac cuan aran ca̱hib po, co̱ li cui̱nk aj levita chi a̱tinac riqꞌuin chixtzꞌa̱manquil chiru nak ta̱xic cuiꞌchic riqꞌuin. Quixcꞌam jun lix mo̱s chirix ut quixcꞌam ajcuiꞌ cuib li bu̱r. Li ixk quirocsi li cui̱nk saꞌ rochoch lix yucuaꞌ.

⁴ Li yucuaꞌbej quixqꞌue xsahil xchꞌo̱l ut quixye re nak ta̱cana̱k riqꞌuineb. Ut li cui̱nk aj levita quicana aran oxib cutan. Quiqꞌueheꞌ xcua ut quiqꞌueheꞌ rucꞌa ut quiqꞌueheꞌ ajcuiꞌ xnaꞌaj re ta̱cua̱rk.

⁵ Saꞌ li xca̱ li cutan nak quisake̱u, queꞌcuacli toj ekꞌela ut laj levita quixcauresi rib re ta̱xic saꞌ xtenamit. Abanan lix yucuaꞌ li ixk quixye re: —Cuaꞌin cuan, tojoꞌnak tatxic re nak cauhak a̱cuib chi be̱c, chan.

⁶ Ut queꞌchunla chi xcabichaleb ut queꞌcuaꞌac ut queꞌucꞌac. Ut li yucuaꞌbej quixye re li cui̱nk: —Ba̱nu usilal, chanumsi li kꞌojyi̱n arin ut chisahokꞌ saꞌ a̱chꞌo̱l, chan.

⁷ Cuulajak chic quicuacli laj levita re ta̱xic. Abanan li yucuaꞌbej quixpuersi chi cana̱c. Ut li cui̱nk quixsume cana̱c jun kꞌojyi̱n chic.

⁸ Saꞌ roꞌ li cutan quicuacli ekꞌela re ta̱xic. Abanan lix yucuaꞌ li ixk quixye: —Ba̱nu usilal, cuaꞌin cuan tojoꞌnak tatxic, chan. Ut chi xcabichaleb queꞌoc chi cuaꞌac toj retal quicuaꞌleboꞌ.

⁹ Ut li cui̱nk rochben li ixk queꞌoc cuiꞌchic chi xic saꞌ lix viaje rochben lix mo̱s. Abanan li yucuaꞌbej quixye reheb: —Qꞌuehomak retal. Ac yo̱ chi ecuu̱c. Chenumsi li kꞌojyi̱n arin ut cuulaj ekꞌela naru nequexxic saꞌ le̱ rochoch, chan.

¹⁰ Abanan li cui̱nk incꞌaꞌ quixcꞌul xchꞌo̱l nak teꞌcana̱k jun kꞌojyi̱nak chic. Quixcꞌam li ixk ut lix mo̱s ut li cuib chi bu̱r. Nak ac nachꞌ cuanqueb riqꞌuin li tenamit Jebús, li nayeman Jerusalén re,

¹¹ lix mo̱s quixye re laj levita: —¿Ma incꞌaꞌ raj us nak toxic saꞌ li tenamit Jebús? Takanumsi li kꞌojyi̱n saꞌ li tenamit aꞌan saꞌ xya̱nkeb laj jebuseo, chan.

¹² Abanan li cui̱nk quixye re: —Incꞌaꞌ tocana̱k chi cua̱rc saꞌ junak tenamit ma̱cuaꞌ xcomoneb laj Israel. Toxic ban toj Gabaa, chan.

¹³ Quixye ajcuiꞌ re lix mo̱s: —Kayalak kakꞌe chi xic toj Gabaa malaj ut toj Ramá re nak aran tocana̱k chi cua̱rc, chan.

¹⁴ Ut queꞌnumeꞌ saꞌ li tenamit Jebús ut queꞌco̱eb. Ac x-ecuu chi us nak queꞌcuulac Gabaa, li cuan saꞌ xcue̱nt lix naꞌajeb li ralal xcꞌajol laj Benjamín.

¹⁵ Queꞌoc saꞌ li tenamit Gabaa re teꞌxnumsi li kꞌojyi̱n aran. Queꞌcꞌojla saꞌ xyi li tenamit, abanan ma̱ ani quiyechiꞌin xnaꞌajeb re teꞌcua̱rk cuiꞌ.

¹⁶ Quinumeꞌ jun li che̱quel cui̱nk quisukꞌi chak saꞌ cꞌaleba̱l chi cꞌanjelac. Yo̱ chi xic saꞌ rochoch. Li cui̱nk aꞌan cuan Gabaa, aban chalenak chak saꞌ lix naꞌajeb li ralal xcꞌajol laj Efraín, li tzu̱l ru. Eb li cristian li cuanqueb saꞌ li tenamit Gabaa, aꞌan xcomoneb li ralal xcꞌajol laj Benjamín.

¹⁷ Li che̱quel cui̱nk quiril li cui̱nk li yal numecꞌ yo̱ chunchu saꞌ xyi li tenamit. Quixpatzꞌ re: —¿Bar xatchal? Ut, ¿bar xic a̱cue? chan re.

¹⁸ Laj levita quixye re: —Yal numecꞌ yo̱co arin. Belén xochal chak, li cuan xcue̱nt Judá. Xic ke saꞌ kochoch. Najt cuanco chak toj saꞌ xnaꞌajeb li ralal xcꞌajol laj Efraín, li tzu̱l ru. Xincuulac chak Belén ut anakcuan xic ke saꞌ rochoch li Dios. Ma̱ ani nayechiꞌin kanaꞌaj re tocua̱rk cuiꞌ.

¹⁹ Cuan kacaxlan cua ut cuan vino chokꞌ cue la̱in ut reheb ajcuiꞌ li cuixakil ut lin mo̱s. Ut cuan ajcuiꞌ richaj li kabu̱r. Ma̱cꞌaꞌ pa̱lt ke.—

²⁰ Li che̱quel cui̱nk quixye reheb: —Cꞌulbilex saꞌ li cuochoch. Naru nequexxic chi cua̱rc saꞌ li cuochoch. Incꞌaꞌ naru nequexincanab arin. La̱in tinqꞌue e̱re chixjunil li cꞌaꞌru te̱raj, chan.

²¹ Ut quixcꞌameb saꞌ li rochoch ut quixqꞌue richaj lix bu̱reb. Li cui̱nk ut eb li cuanqueb rochben queꞌxchꞌaj li rokeb ut queꞌcuaꞌac ut queꞌucꞌac.

²² Nak sa saꞌ xchꞌo̱leb, queꞌcuulac jun chꞌu̱tal li cui̱nk li incꞌaꞌ useb xnaꞌleb. Queꞌxsut li cab ut yo̱queb chixtꞌochbal li puerta ut queꞌxye re li che̱quel cui̱nk, laj e̱chal re li cab: —Isi chak li cui̱nk li xacꞌul saꞌ la̱ cuochoch. Takaj ma̱cobc riqꞌuin, chanqueb.

²³ Li che̱quel cui̱nk qui-el chirix cab ut quixye reheb: —Ex cuas cui̱tzꞌin, me̱ba̱nu li ma̱c aꞌan. Li cui̱nk aꞌin cuulaꞌ. Me̱ba̱nu ma̱usilal re.

²⁴ Cuan jun li ixk riqꞌuin ut cuan ajcuiꞌ lin rabin ma̱jiꞌ cuanjenak riqꞌuin cui̱nk. La̱in tinkꞌaxtesiheb saꞌ e̱rukꞌ ut naru te̱ba̱nu li cꞌaꞌru te̱raj riqꞌuineb. Abanan me̱ba̱nu ma̱usilal re li cui̱nk aꞌin, chan.

²⁵ Abanan eb li cui̱nk incꞌaꞌ queꞌrabi li cꞌaꞌru quixye li che̱quel cui̱nk. Joꞌcan nak laj levita quirisi chirix cab li ixk. Queꞌxbatzꞌune ut queꞌxba̱nu li cꞌaꞌru queꞌraj re chixjunil li kꞌojyi̱n toj quisake̱u.

²⁶ Li ixk co̱ cuiꞌchic saꞌ rochoch li cui̱nk ut quitꞌaneꞌ chire xpuertil li cab li cuan cuiꞌ laj levita. Aran cuan nak quicutanoꞌ.

²⁷ Nak quicuacli laj levita, quixte li puerta re ta̱xic. Quiril li ixk tꞌantꞌo aran chire li puerta. Yo̱ raj xyalbal xtebal li puerta.

²⁸ Li cui̱nk quixye re: —Cuaclin, yoꞌo, chan. Abanan li ixk incꞌaꞌ quichakꞌoc xban nak ac camenak chic. Li cui̱nk quixqꞌue li camenak chirix li bu̱r ut co̱ saꞌ rochoch.

²⁹ Nak quicuulac saꞌ rochoch quixchap jun lix chꞌi̱chꞌ ut quixseti li camenak ut cablaju jachal qui-el. Quixtakla lix tibel li camenak saꞌ lix tenamiteb laj Israel. Jun jachal quixtakla riqꞌuineb li junju̱nk xte̱paleb laj Israel re teꞌril.

³⁰ Chixjunileb li queꞌiloc re aꞌan queꞌxye: —Ma̱ jun cua kilom aꞌin chalen kelic chak Egipto. ¿Cꞌaꞌru xcꞌulman? Tento takacꞌoxla chi us cꞌaꞌru takaba̱nu, chanqueb.