Jueces 18 - Li Santil hu

¹ Saꞌ eb li cutan aꞌan toj ma̱cꞌaꞌak rey aran Israel. Eb li ralal xcꞌajol laj Dan yo̱queb chixsicꞌbal lix naꞌajeb xban nak toj ma̱jiꞌ nequeꞌxcꞌul lix naꞌajeb saꞌ xya̱nkeb li cablaju xte̱paleb li ralal xcꞌajol laj Israel.

² Joꞌcan nak eb li ralal xcꞌajol laj Dan queꞌxsicꞌ ruheb o̱b chi cui̱nk cauheb xchꞌo̱l saꞌ xya̱nkeb ut queꞌxtaklaheb chixqꞌuebal retal chanru li naꞌajej. Queꞌxye reheb: —Ayukex ut qꞌuehomak chak retal chanru li naꞌajej, chanqueb. Queꞌel saꞌ eb li tenamit Zora ut Estaol ut queꞌco̱eb saꞌ lix naꞌajeb li ralal xcꞌajol laj Efraín, li tzu̱l ru, ut queꞌxnumsi li kꞌojyi̱n saꞌ li rochoch laj Micaía.

³ Nak yo̱queb chi nachꞌoc riqꞌuin li rochoch laj Micaía, queꞌrabi nak yo̱ chi a̱tinac li sa̱j cui̱nk. Queꞌxqꞌue retal nak aꞌan aj Leví xban li ra̱tinoba̱l. Nak queꞌcuulac queꞌxye re: —¿Cꞌaꞌru yo̱cat arin? ¿Ani xcꞌamoc chak a̱cue arin? ¿Cꞌaꞌru aj e nak cuancat arin? chanqueb.

⁴ Li sa̱j cui̱nk quixye: —Laj Micaía quixye cue nak tincꞌanjelak chiru chokꞌ aj tij ut niquinixtoj, chan.

⁵ Ut eb li cui̱nk queꞌxye re: —Patzꞌ re li Dios ma us ta̱e̱lk chiku li yo̱co chixba̱nunquil arin, chanqueb.

⁶ Laj tij quichakꞌoc ut quixye reheb: —Naru nequexxic chi ma̱cꞌaꞌ e̱cꞌaꞌux. Li Ka̱cuaꞌ ta̱tenkꞌa̱nk e̱re saꞌ le̱ viaje yalak bar texxic, chan.

⁷ Ut eb li o̱b chi cui̱nk queꞌel aran ut queꞌco̱eb saꞌ li tenamit Lais. Nak queꞌcuulac aran, queꞌxqꞌue retal nak eb li tenamit cꞌojcꞌo̱queb xchꞌo̱l. Chanchaneb laj Sidón. Cuanqueb saꞌ xya̱lal ut ma̱ ani nachꞌiꞌchꞌiꞌin reheb. Cuan chixjunil li cꞌaꞌruheb re. Najt xya̱nkeb riqꞌuineb laj Sidón. Ut incꞌaꞌ nequeꞌlokꞌoc chi moco nequeꞌcꞌayin riqꞌuineb li jalaneb xtenamit.

⁸ Li o̱b chi cui̱nk queꞌsukꞌi saꞌ eb li tenamit Zora ut Estaol. Ut eb lix comon queꞌxpatzꞌ reheb: —¿Cꞌaꞌru xeril chak? chanqueb.

⁹ Eb li o̱b chi cui̱nk queꞌxye: —Yoꞌkeb chi pletic riqꞌuineb li cuanqueb Lais. Xkaqꞌue retal chi us li naꞌajej. Aꞌan cha̱bil naꞌajej. ¿Cꞌaꞌut nak tocana̱k chi ma̱cꞌaꞌ takaba̱nu? Se̱bahomak e̱rib. Yoꞌkeb chire̱chaninquil li naꞌajej aꞌan, chanqueb.

¹⁰ Tocuulak chi pletic riqꞌuineb chi ma̱cꞌaꞌ saꞌ xchꞌo̱leb li cuanqueb aran. Toxkatau jun nimla naꞌajej. Saꞌ li naꞌajej aꞌan ma̱cꞌaꞌ pa̱lt. Cuan ban chixjunil. Li Dios ac xkꞌaxtesi li naꞌajej aꞌan saꞌ kukꞌ, chanqueb.

¹¹ Joꞌcan nak queꞌco̱eb li cuakib ciento chi cui̱nk xcomoneb li ralal xcꞌajol laj Dan. Queꞌel saꞌ eb li tenamit Zora ut Estaol. Cuanqueb lix chꞌi̱chꞌ re pletic riqꞌuineb nak queꞌco̱eb.

¹² Queꞌco̱eb ut eb li ralal xcꞌajol laj Dan ut queꞌxyi̱b lix muheba̱leb nachꞌ riqꞌuin li naꞌajej Quiriat-jearim li cuan saꞌ xcue̱nt Judá saꞌ xjayal li na-oc cuiꞌ li sakꞌe. Li naꞌajej aꞌan nequeꞌxye re: “Xnaꞌaj xmuheba̱leb laj Dan” toj chalen anakcuan.

¹³ Nak queꞌel aran queꞌco̱eb saꞌ lix naꞌajeb li ralal xcꞌajol laj Efraín, li tzu̱l ru. Ut queꞌcuulac saꞌ li rochoch laj Micaía.

¹⁴ Li o̱beb chi cui̱nk li queꞌco̱eb chi qꞌuehoc etal saꞌ li naꞌajej Lais queꞌxye reheb lix comon: —Cꞌoxlahomak cꞌaꞌru te̱ba̱nu xban nak saꞌ li rochoch li cui̱nk aꞌan cuan jun li efod ut cuanqueb li yi̱banbil dios. Ut cuan lix dios yi̱banbil riqꞌuin cheꞌ ut li ru yi̱banbil riqꞌuin plata. ¿Cꞌaꞌru nequecꞌoxla? ¿Cꞌaꞌru takaba̱nu? chanqueb.

¹⁵ Joꞌcan nak queꞌoc saꞌ li rochoch laj Micaía chi a̱tinac riqꞌuin li sa̱j cui̱nk aj levita. Ut queꞌxpatzꞌ re chanru cuan.

¹⁶ Nak yo̱ chi cꞌulma̱nc aꞌin, eb li cuakib ciento chi soldado xcomoneb li ralal xcꞌajol laj Dan cuanqueb saꞌ li oqueba̱l. Ac cauresinbileb re teꞌpletik.

¹⁷ Ut eb li o̱b chi aj qꞌuehol etal queꞌoc saꞌ li rochoch laj Micaía ut queꞌxcꞌam lix efod ut queꞌxcꞌam ajcuiꞌ lix dios yi̱banbil riqꞌuin cheꞌ joꞌ ajcuiꞌ li dios yi̱banbil riqꞌuin plata. Queꞌxcꞌam chixjunil li yi̱banbil dios. Ut laj tij xakxo saꞌ li oqueba̱l rochbeneb li cuakib ciento chi soldado.

¹⁸ Nak laj tij quiril nak li o̱b chi cui̱nk queꞌoc saꞌ li rochoch laj Micaía ut yo̱queb chixcꞌambal chixjunileb li yi̱banbil dios ut li efod, quixye reheb: ¿Cꞌaꞌru yo̱quex chixba̱nunquil? chan.

¹⁹ Ut eb aꞌan queꞌxye re: —Matchokin. Yoꞌo chikix. La̱o takaj nak tatcꞌanjelak chokꞌ aj tij kiqꞌuin. Chanchanakat kayucuaꞌ nak tatcua̱nk. ¿Ma incꞌaꞌ ta biꞌ us nak tatcꞌanjelak chokꞌ aj tij chiruheb li jun chꞌu̱tal chi ralal xcꞌajol laj Israel chiru nak yo̱kat chi cꞌanjelac chiru jun cabal ajcuiꞌ? chanqueb re.

²⁰ Li cꞌaꞌru queꞌxye eb aꞌan quicuulac chiru laj tij. Joꞌcan nak quixchapeb li yi̱banbil dios ut li efod joꞌ ajcuiꞌ li dios li queꞌxtakla xyi̱banquil. Ut co̱ chirixeb li ralal xcꞌajol laj Dan.

²¹ Queꞌxqꞌue chi ubej eb li cocꞌal, li queto̱mk ut chixjunil li cꞌaꞌru cuan reheb ut queꞌco̱eb.

²² Najt ac xeꞌbe̱c nak laj Micaía quixbokeb li rech cabal re teꞌxic rochben chi pletic riqꞌuineb li ralal xcꞌajol laj Dan.

²³ Queꞌxtauheb ut queꞌxjap reheb chixbokbaleb. Ut eb li ralal xcꞌajol laj Dan queꞌxsukꞌisi ribeb ut queꞌxye re laj Micaía: —¿Cꞌaꞌru nequecꞌul? ¿Cꞌaꞌut nak nequejap e̱re chikix? chanqueb.

²⁴ Laj Micaía quixye reheb: —¿Ma incꞌaꞌ ta biꞌ xecꞌam lin dios li xinyi̱b la̱in? ¿Ma incꞌaꞌ ta biꞌ xecꞌam che̱rix laj tij li yo̱ chi cꞌanjelac chicuu? ¿Cꞌaꞌut nak nequepatzꞌ cue cꞌaꞌru nincꞌul? chan.

²⁵ Eb li ralal xcꞌajol laj Dan queꞌxye re: —Matchokin chic. Cuanqueb cui̱nk arin kꞌaxal joskꞌeb. Ma̱chikꞌ xjoskꞌileb. Naru teꞌxtiquib pletic e̱riqꞌuin. Naru tatcamsi̱k la̱at ut teꞌcamsi̱k ajcuiꞌ chixjunileb la̱ cuechꞌalal, chanqueb.

²⁶ Laj Micaía quixqꞌue retal nak nabaleb li ralal xcꞌajol laj Dan ut incꞌaꞌ quiraj pletic riqꞌuineb. Ti̱c quisukꞌi saꞌ rochoch. Ut eb li ralal xcꞌajol laj Dan queꞌoc cuiꞌchic chi xic.

²⁷ Queꞌxcꞌam li cꞌaꞌru re laj Micaía. Queꞌxcꞌameb li dios li quixyi̱b ut queꞌxcꞌam ajcuiꞌ laj tij. Queꞌco̱eb saꞌ li naꞌajej Lais. Eb li cuanqueb aran cuanqueb saꞌ xya̱lal ut ma̱cꞌaꞌ nequeꞌxcꞌoxla. Abanan eb li ralal xcꞌajol laj Dan queꞌxcamsiheb chi chꞌi̱chꞌ li cristian ut queꞌxcꞌat lix tenamiteb.

²⁸ Ma̱ ani quicoloc reheb li cuanqueb Lais xban nak najt cuan li tenamit Sidón riqꞌuineb ut xban ajcuiꞌ nak ma̱ ani aj iqꞌuin nequeꞌxcꞌam ribeb. Li tenamit Lais cuan saꞌ li ru takꞌa chixcꞌatk li tenamit Bet-rehob. Eb li ralal xcꞌajol laj Dan queꞌxyi̱b cuiꞌchic li tenamit ut aran queꞌcana chi cua̱nc.

²⁹ Queꞌxjal xcꞌabaꞌ li tenamit aꞌan. Incꞌaꞌ chic queꞌxye “Lais” re. “Dan” chic queꞌxqꞌue chokꞌ xcꞌabaꞌ xban nak aj Dan xcꞌabaꞌ lix xeꞌto̱nil xyucuaꞌeb. Laj Dan, aꞌan li ralal laj Jacob.

³⁰ Ut eb li ralal xcꞌajol laj Dan queꞌxxakab li yi̱banbil dios re teꞌxlokꞌoni. Ut laj Jonatán, li ralal laj Gersón, rochben li ralal xcꞌajol queꞌcꞌanjelac chokꞌ aj tij chiruheb li ralal xcꞌajol laj Dan chalen toj nak queꞌchapeꞌ ut queꞌcꞌameꞌ chi najt. Laj Gersón, aꞌan li ralal laj Moisés.

³¹ Ut li yi̱banbil dios, li quixyi̱b laj Micaía, quicuan saꞌ xya̱nkeb laj Dan joꞌ najtil quicuan li rochoch li Ka̱cuaꞌ Dios aran Silo.