Jueces 17 - Li Santil hu

Laj Micaía quixyi̱b jun lix dios ut quixxakab jun li cui̱nk chi cꞌanjelac chiru

¹ Quicuan jun li cui̱nk aj Micaía xcꞌabaꞌ saꞌ lix naꞌajeb li ralal xcꞌajol laj Efraín, li tzu̱l ru.

² Laj Micaía quixye re lix naꞌ: —Nak qui-elkꞌa̱c cha̱cuu li jun mil riqꞌuin jun ciento chi tumin plata, la̱at xatzꞌa̱ma ma̱usilal saꞌ xbe̱n li ani qui-elkꞌan re. La̱in xin-elkꞌan re la̱ tumin. Cueꞌ li tumin cuan cuiqꞌuin. Anakcuan tinkꞌaxtesi a̱cue, chan. Ut li naꞌbej quixye: —Li Ka̱cuaꞌ Dios taxak chi-osobtesi̱nk a̱cue, chan.

³ Ut laj Micaía quixkꞌaxtesi li tumin re lix naꞌ. Ut li naꞌbej quixye: —Relic chi ya̱l nak li tumin ac xinkꞌaxtesi re li Ka̱cuaꞌ saꞌ xcꞌabaꞌ lin yum re xyi̱banquil indios. Tinqꞌue chi yi̱ba̱c indios cheꞌ ut li ru yi̱banbilak riqꞌuin plata, chan.

⁴ Laj Micaía quixqꞌue li tumin re lix naꞌ. Ut lix naꞌ quixqꞌue cuib ciento li tumin plata re jun aj tenol chꞌi̱chꞌ re nak tixyi̱b lix dios cheꞌ ut tixletz li plata chiru. Ut li yi̱banbil dios aꞌan quiqꞌueheꞌ saꞌ rochoch laj Micaía.

⁵ Saꞌ li rochoch laj Micaía quicuan jun li naꞌajej re xlokꞌoninquil lix dioseb. Quixyi̱b jun li efod ut quixyi̱beb ajcuiꞌ lix dios. Ut quixxakab jun li ralal chi cꞌanjelac chokꞌ aj tij chiruheb li yi̱banbil dios.

⁶ Saꞌ eb li cutan aꞌan li junju̱nk queꞌxba̱nu li cꞌaꞌru queꞌraj xba̱nunquil xban nak ma̱cꞌaꞌ junak rey chi takla̱nc saꞌ xbe̱neb.

⁷ Saꞌ eb li cutan aꞌan jun li sa̱j cui̱nk aj levita cuan saꞌ li tenamit Belén xcue̱nt Judá, usta aꞌan ma̱cuaꞌ tzꞌakal ralal xcꞌajol laj Judá.

⁸ Li sa̱j cui̱nk aꞌan qui-el Belén ut yo̱ chixsicꞌbal lix naꞌaj re ta̱cua̱nk cuiꞌ. Nak yo̱ chixsicꞌbal lix naꞌaj, quicuulac saꞌ li rochoch laj Micaía li cuan saꞌ lix naꞌajeb li ralal xcꞌajol laj Efraín, li tzu̱l ru.

⁹ Laj Micaía quixpatzꞌ re: —¿Bar xatchal chak? chan. Li sa̱j cui̱nk quixye re: —La̱in laj levita. Xinchal chak Belén xcue̱nt Judá. Yo̱quin chixsicꞌbal junak innaꞌaj re tincua̱nk cuiꞌ, chan.

¹⁰ Laj Micaía quixye re: —Cana̱kat cuiqꞌuin. La̱at tatcꞌanjelak chicuu chokꞌ aj tij ut ta̱qꞌue innaꞌleb joꞌ junak yucuaꞌbej. Tinqꞌue a̱cue laje̱b chi tumin plata rajlal chihab ut tinqꞌue a̱cuakꞌ ut tinqꞌue a̱tzacae̱mk, chan laj Micaía.

¹¹ Quixcꞌul xchꞌo̱l laj levita ut quicana aran joꞌ jun reheb li ralal laj Micaía.

¹² Laj Micaía quixxakab li sa̱j cui̱nk chi cꞌanjelac chokꞌ aj tij. Ut li sa̱j cui̱nk quicana chi cua̱nc saꞌ rochoch laj Micaía.

¹³ Laj Micaía quixye: —Anakcuan li Ka̱cuaꞌ ta̱osobtesi̱nk cue xban nak jun aj levita yo̱ chi cꞌanjelac chicuu joꞌ aj tij, chan.