Jueces 15 - Li Santil hu

¹ Mokon chic saꞌ xkꞌehil li sicꞌoc trigo, co̱ laj Sansón chirilbal li rixakil. Quixcꞌam jun li chꞌina chiba̱t re tixsi re. Quixye re lix yucuaꞌ li rixakil: —Tincuaj xic saꞌ cab riqꞌuin li cuixakil, chan. Abanan li yucuaꞌbej incꞌaꞌ quixcanab chi oc.

² Quixye re laj Sansón: —Saꞌ inchꞌo̱l la̱in nak incꞌaꞌ chic nacacuaj ru la̱ cuixakil. Joꞌcan nak xinqꞌue re la̱ cuami̱g. Abanan cuan li ri̱tzꞌin naru ta̱cꞌam chokꞌ re̱kaj. ¿Ma incꞌaꞌ ta biꞌ kꞌaxal chꞌinaꞌus li ri̱tzꞌin chiru aꞌan? chan.

³ Laj Sansón quixye re: —La̱in ma̱cꞌaꞌ inma̱c cui cꞌaꞌru incꞌaꞌ us tinba̱nu reheb laj filisteo, chan.

⁴ Ut laj Sansón co̱ ut quixchap oxib ciento li yac. Quixbacꞌ saꞌ caꞌcab riqꞌuin xyeheb ut quixbaqꞌueb ajcuiꞌ li chaj chiru lix yeheb.

⁵ Quixloch xxamlel li chaj ut quirachꞌabeb li yac saꞌ li naꞌajej li aubil cuiꞌ lix trigo eb laj filisteo. Ut quixcꞌat li trigo li ac sicꞌbil, joꞌ ajcuiꞌ li toj ma̱jiꞌ sicꞌbil. Ut quicꞌat ajcuiꞌ li uvas joꞌ eb ajcuiꞌ li cheꞌ olivo.

⁶ Eb laj filisteo queꞌxpatzꞌi ani xba̱nun re aꞌan. Ut quiyeheꞌ reheb nak aꞌan laj Sansón lix hiꞌ li cui̱nk laj Timnat xtenamit. Quixcꞌat li racui̱mkeb xban nak quiqꞌueheꞌ li rixakil re li rami̱g xban li yucuaꞌbej. Ut eb laj filisteo queꞌco̱eb ut queꞌxcꞌat li yucuaꞌbej ut queꞌxcꞌat ajcuiꞌ li rixakil laj Sansón.

⁷ Laj Sansón quixye reheb: —Xban nak xeba̱nu aꞌan, relic chi ya̱l ninye e̱re nak la̱in incꞌaꞌ ta̱sahokꞌ inchꞌo̱l toj tinqꞌue re̱kaj e̱re, chan.

⁸ Qui-oc chi pletic riqꞌuineb ut quixcamsi nabaleb. Chirix aꞌan, laj Sansón co̱ chi cua̱nc saꞌ jun li ochoch pec saꞌ li sako̱nac cuan saꞌ li naꞌajej Etam.

⁹ Ut eb laj filisteo queꞌco̱eb Judá. Aran queꞌxyi̱b lix muheba̱leb ut queꞌxjeqꞌui ribeb ut queꞌcuulac toj saꞌ li naꞌajej Lehi.

¹⁰ Eb laj Judá li cuanqueb Lehi queꞌxpatzꞌ reheb: —¿Cꞌaꞌut nak xexchal chi pletic kiqꞌuin? chanqueb reheb. Ut eb laj filisteo queꞌxye: —Xochal chixchapbal laj Sansón re nak takaqꞌue chixtoj li incꞌaꞌ us xba̱nu ke, chanqueb.

¹¹ Oxib mil li cui̱nk xcomoneb laj Judá queꞌco̱eb saꞌ li ochoch pec aran Etam chi a̱tinac riqꞌuin laj Sansón. Queꞌxye re: —¿Ma incꞌaꞌ nacanau nak eb laj filisteo nequeꞌtaklan saꞌ kabe̱n? ¿Cꞌaꞌut nak xabok raylal saꞌ kabe̱n? chanqueb. Ut laj Sansón quixye: —La̱in xinba̱nu reheb joꞌ xeꞌxba̱nu cue la̱in, chan.

¹² Xeꞌxye re: —Xochal cha̱chapbal re nak tatkakꞌaxtesi reheb laj filisteo, chanqueb. Laj Sansón quixye reheb: —¿Ma tzꞌakal ya̱l nak incꞌaꞌ tine̱camsi? chan.

¹³ Queꞌxye re: —Incꞌaꞌ tatkacamsi. Caꞌaj cuiꞌ tatkabacꞌ ut tatkakꞌaxtesi saꞌ rukꞌeb, chanqueb. Ut queꞌxbacꞌ riqꞌuin cuib li laso toj acꞌ ut queꞌrisi saꞌ li ochoch pec.

¹⁴ Nak queꞌxcꞌam aran Lehi, eb laj filisteo japjo̱queb re nak queꞌco̱eb chixcꞌulbal laj Sansón. Abanan lix musikꞌ li Ka̱cuaꞌ quichal riqꞌuin laj Sansón ut quixqꞌue xmetzꞌe̱u. Joꞌcan nak laj Sansón quixtꞌupi li laso li bacꞌbo cuiꞌ li rukꞌ. Chanchan cꞌatbil li cꞌa̱m nak quixtꞌupi.

¹⁵ Laj Sansón quixtau jun xbakel xca̱lam re bu̱r toj rax bak. Quixchap ut chiru aꞌan quixcamsiheb jun mil chi cui̱nk xcomoneb laj filisteo.

¹⁶ Laj Sansón quibichan ut quixye: —Riqꞌuin xbakel xca̱lam re bu̱r quincamsi jun mil chi cui̱nk. Riqꞌuin xbakel xca̱lam re jun li bu̱r xincanabeb chi tu̱btu, chan.

¹⁷ Chirix aꞌan quixtzꞌek xbakel xca̱lam re li bu̱r. Ut quixqꞌue chokꞌ xcꞌabaꞌ li naꞌajej aꞌan Ramat-lehi.

¹⁸ Cꞌajoꞌ nak ta̱chakik re laj Sansón nak quixye re li Ka̱cuaꞌ: —Xina̱tenkꞌa chi numta̱c saꞌ xbe̱neb laj filisteo. Ut anakcuan, ¿ma tina̱canab chi ca̱mc xban chaki el ut tineꞌxcꞌam eb laj filisteo, li incꞌaꞌ nacateꞌxpa̱b? chan.

¹⁹ Tojoꞌnak li Dios quixqꞌue chi e̱lc haꞌ saꞌ li jul li cuan aran Lehi. Qui-ucꞌac laj Sansón ut quicꞌojla xchꞌo̱l. Xban aꞌan, En-hacore quiqꞌueheꞌ chokꞌ xcꞌabaꞌ li yuꞌam haꞌ aꞌan. Toj cuan ajcuiꞌ li yuꞌam haꞌ aꞌan aran anakcuan.

²⁰ Ut laj Sansón yo̱ chi takla̱nc saꞌ xbe̱neb laj Israel chiru junmay chihab nak cuanqueb rubel xcuanquil eb laj filisteo.