Jueces 14 - Li Santil hu

Laj Sansón quisumla riqꞌuin jun li ixk xcomoneb laj filisteo

¹ Saꞌ jun li cutan laj Sansón co̱ saꞌ li tenamit Timnat. Ut aran quiril jun li sa̱j ixk xcomoneb laj filisteo.

² Co̱ cuiꞌchic saꞌ rochoch ut quixye re lix naꞌ ut lix yucuaꞌ: —Xcuil ru jun li sa̱j ixk aj filisteo aran Timnat. Nintzꞌa̱ma che̱ru nak te̱tzꞌa̱ma chak chokꞌ cuixakil, chan.

³ Ut lix naꞌ xyucuaꞌ queꞌxye re: —¿Cꞌaꞌut nak tatxic xsicꞌbal la̱ cuixakil saꞌ xya̱nkeb li incꞌaꞌ nequeꞌxpa̱b li Dios? ¿Ma ma̱cꞌaꞌ ta biꞌ ixk saꞌ kaya̱nk la̱o? ¿Ma ma̱cꞌaꞌ ta biꞌ ixk saꞌ li katenamit? chanqueb. Abanan laj Sansón quixye cuiꞌchic reheb: —Aꞌ li ixk aꞌan, aꞌan li nacuulac chicuu. Te̱tzꞌa̱ma aꞌan chokꞌ cuixakil, chan.

⁴ Lix naꞌ xyucuaꞌ incꞌaꞌ nequeꞌxnau nak li Ka̱cuaꞌ yo̱ chixcꞌutbal li ixk aꞌan chiru laj Sansón. Saꞌ eb li cutan aꞌan eb laj filisteo yo̱queb chi takla̱nc saꞌ xbe̱neb laj Israel ut li Ka̱cuaꞌ yo̱ chixsicꞌbal chanru nak eb laj Israel teꞌpletik riqꞌuineb.

⁵ Joꞌcan nak laj Sansón co̱ Timnat rochbeneb lix naꞌ xyucuaꞌ. Nak yo̱queb chi numecꞌ saꞌ xnaꞌaj li acui̱mk uvas, laj Sansón quirabi jun li cakcoj sa̱j yo̱ chixjapbal re ut yo̱ chi cha̱lc riqꞌuin laj Sansón.

⁶ Lix musikꞌ li Ka̱cuaꞌ quichal riqꞌuin laj Sansón ut quixqꞌue xmetzꞌe̱u. Joꞌcan nak laj Sansón quixchap li cakcoj ut quixpedasi riqꞌuin rukꞌ. Chanchan jun li chꞌina chiba̱t chiru. Ut laj Sansón co̱ cuiꞌchic riqꞌuin lix naꞌ xyucuaꞌ, abanan incꞌaꞌ quixye reheb li cꞌaꞌru quixba̱nu.

⁷ Chirix aꞌan laj Sansón co̱ chi a̱tinac riqꞌuin li ixk ut li ixk quicuulac chiru laj Sansón.

⁸ Nak quinumeꞌ cuib oxib cutan, laj Sansón co̱ chi sumla̱c riqꞌuin li ixk. Nak yo̱ chi xic, quinumeꞌril li cakcoj camenak. Nak quicuulac aran, quixqꞌue retal nak saꞌ xsaꞌ li cakcoj camenak cuan xsoc li cꞌap ut cuan ajcuiꞌ xyaꞌal cab.

⁹ Quirisi li xyaꞌal cab riqꞌuin rukꞌ ut yo̱ chixloubal nak yo̱ chi xic. Nak quixtauheb lix naꞌ xyucuaꞌ, quixqꞌue li xyaꞌal cab reheb aꞌan. Ut queꞌxlou ajcuiꞌ eb aꞌan, abanan laj Sansón incꞌaꞌ quixye reheb nak xrisi saꞌ xsaꞌ li cakcoj li quixcamsi.

¹⁰ Lix yucuaꞌ co̱ saꞌ rochoch li ixk ut laj Sansón quixba̱nu jun li ninkꞌe aran joꞌ cꞌaynakeb xba̱nunquil li sa̱j cui̱nk li oqueb re chi sumla̱c.

¹¹ Nak eb laj filisteo queꞌxqꞌue retal li ninkꞌe, queꞌxtakla laje̱b xcaꞌcꞌa̱l (30) li sa̱j cui̱nk riqꞌuineb saꞌ li ninkꞌe.

¹² Laj Sansón quixye reheb: —La̱in tinye e̱re jun li serakꞌ chꞌaꞌaj xtaubal ru. Cui la̱ex te̱ye cue cꞌaꞌru lix ya̱lal chiru li cuukub cutan nak yo̱co chi ninkꞌei̱c, la̱in tinqꞌue junju̱nk le̱ rakꞌ lino, ut tinqꞌue ajcuiꞌ junju̱nk le̱ cha̱bil akꞌ re li ninkꞌe.

¹³ Cui la̱ex incꞌaꞌ te̱ye cue cꞌaꞌru xya̱lal li tinye e̱re, tento nak la̱ex te̱qꞌue cue laje̱b xcaꞌcꞌa̱l li cha̱bil akꞌej ut laje̱b xcaꞌcꞌa̱l li cha̱bil tꞌicr lino, chan laj Sansón. Ut queꞌxye re: —Ye ke li serakꞌ aꞌan, li chꞌaꞌaj xtaubal ru. Nakaj rabinquil, chanqueb.

¹⁴ Laj Sansón quixye reheb: —Saꞌ xsaꞌ li nacuaꞌac quichal li nacuaꞌeꞌ. Ut saꞌ xsaꞌ li kꞌaxal cau rib quichal li quiꞌ, chan. Ac xnumeꞌ oxib cutan ut eb li sa̱j cui̱nk aꞌin ma̱jiꞌ nequeꞌxtau ru cꞌaꞌru xya̱lal li serakꞌ aꞌan.

¹⁵ Saꞌ xca̱ li cutan queꞌco̱eb riqꞌuin li rixakil laj Sansón ut queꞌxye re: —Ye re la̱ be̱lom nak tixye a̱cue cꞌaꞌru xya̱lal li serakꞌ aꞌan ut ta̱ye ke la̱o. Cui incꞌaꞌ naxba̱nu, takacꞌat li rochoch la̱ yucuaꞌ ut tatkacꞌat ajcuiꞌ la̱at. ¿Ma xoe̱bok arin re xmakꞌbal chiku li cꞌaꞌru cuan ke? chanqueb.

¹⁶ Joꞌcan nak li rixakil laj Sansón ta̱ya̱bak nak co̱ riqꞌuin lix be̱lom ut quixye re: —Incꞌaꞌ niquina̱ra. Xicꞌ ban niquina̱cuil. Xaye jun li serakꞌ chꞌaꞌaj xtaubal ru reheb li cuech tenamitil ut incꞌaꞌ xaye cue cꞌaꞌru xya̱lal, chan. Laj Sansón quixye re: —Chi moco lin naꞌ inyucuaꞌ xinye lix ya̱lal reheb. ¿Ma tojaꞌ ta chic la̱at tinye a̱cue? chan.

¹⁷ Chiru cuukub cutan yo̱ chi ya̱bac li ixakilbej nak yo̱ li ninkꞌe toj retal nak saꞌ xcuuk li cutan laj Sansón quixye re cꞌaꞌru xya̱lal xban nak incꞌaꞌ naxcanab xpatzꞌbal. Nak ac xnau, li ixk coxye xya̱lal reheb li rech tenamitil.

¹⁸ Saꞌ xcuuk li cutan nak toj ma̱jiꞌ na-oc li kꞌojyi̱n, eb li cui̱nk queꞌxye re laj Sansón: —¿Cꞌaꞌru kꞌaxal quiꞌ chiru li xyaꞌal cab? ¿Cꞌaꞌru mas cau rib chiru li cakcoj? chanqueb. Laj Sansón quixye reheb: —Cui ta incꞌaꞌ xeqꞌue chi cꞌanjelac lin tukꞌ ixk ba̱c, incꞌaꞌ raj xenau xsumenquil li serakꞌ aꞌan, chan.

¹⁹ Ut lix musikꞌ li Ka̱cuaꞌ quichal riqꞌuin laj Sansón ut quixqꞌue xmetzꞌe̱u. Co̱ saꞌ li tenamit Ascalón. Aran quixcamsi laje̱b xcaꞌcꞌa̱l chi cui̱nk ut quixcꞌam li cha̱bil akꞌ li cuan chirixeb. Ut coxqꞌue li rakꞌ reheb li cui̱nk li queꞌyehoc cꞌaꞌru lix ya̱lal li serakꞌ li quixye. Chirix aꞌan co̱ cuiꞌchic saꞌ rochoch ut cꞌajoꞌ lix joskꞌil xban li cꞌaꞌru quicꞌulman.

²⁰ Ut li rixakil laj Sansón quiqꞌueheꞌ re li cui̱nk li quixcꞌoxla laj Sansón nak tzꞌakal rami̱g.