Jueces 13 - Li Santil hu

Nak quiyoꞌla laj Sansón

¹ Eb laj Israel queꞌxba̱nu cuiꞌchic li ma̱usilal chiru li Ka̱cuaꞌ. Joꞌcan nak li Ka̱cuaꞌ quixkꞌaxtesiheb rubel xcuanquileb laj filisteo chiru caꞌcꞌa̱l (40) chihab.

² Saꞌ li naꞌajej Zora quicuan jun li cui̱nk aj Manoa xcꞌabaꞌ. Li cui̱nk aꞌan xcomoneb li ralal xcꞌajol laj Dan. Ma̱ jun xcocꞌal quicuan xban nak li rixakil incꞌaꞌ naqꞌuiresin.

³ Jun x-ángel li Ka̱cuaꞌ quixcꞌutbesi rib chiru li ixk ut quixye re: —La̱at ma̱ jun a̱cocꞌal cuanjenak xban nak incꞌaꞌ nacatqꞌuiresin. Abanan anakcuan tatcana̱k chi yaj aj ixk ut ta̱cua̱nk jun a̱cꞌulaꞌal chꞌina te̱lom.

⁴ Incꞌaꞌ tat-ucꞌak vino chi moco li cꞌaꞌak re ru nacaltesin ut incꞌaꞌ ta̱tzaca li cꞌaꞌak re ru li quixye li Dios nak incꞌaꞌ naru xtzacanquil.

⁵ Ta̱cua̱nk jun la̱ cꞌulaꞌal te̱lom. Incꞌaꞌ ta̱besma̱nk rismal, xban nak chalen saꞌ xyoꞌlajic li cꞌulaꞌal aꞌan aj nazareo. Ac kꞌaxtesinbil re li Dios ut aꞌan ta̱oc chi coloc reheb laj Israel saꞌ rukꞌeb laj filisteo, chan li ángel.

⁶ Ut li ixk quixserakꞌi re lix be̱lom li cꞌaꞌru quiyeheꞌ re xban li ángel. Quixye re: —Jun li cui̱nk taklanbil xban li Dios xcuulac cuiqꞌuin. Cꞌajoꞌ nak x-oc incꞌaꞌux xban. Joꞌ li aꞌan x-ángel li Ka̱cuaꞌ nak xcuil, ut la̱in incꞌaꞌ xinpatzꞌ re bar xchal chak ut ani, chi moco aꞌan xye cue ani xcꞌabaꞌ.

⁷ Aꞌan quixye cue nak ta̱cua̱nk jun incꞌulaꞌal chꞌina te̱lom. Quixye ajcuiꞌ cue nak chalen anakcuan incꞌaꞌ tin-ucꞌak vino chi moco tincuucꞌ li cꞌaꞌru nacaltesin ut incꞌaꞌ tintzaca li cꞌaꞌak re ru incꞌaꞌ naru xtzacanquil joꞌ quixye li Dios, xban nak li cꞌulaꞌal li ta̱yoꞌla̱k aj nazareo. Kꞌaxtesinbilak re li Ka̱cuaꞌ chalen saꞌ xyoꞌlajic ut toj chalen nak ta̱ca̱mk, chan li ixk.

⁸ Ut laj Manoa quitijoc ut quixye re li Ka̱cuaꞌ: —At Ka̱cuaꞌ, at inDios, nintzꞌa̱ma cha̱cuu nak ta̱takla cuiꞌchic li cui̱nk aꞌan. Chicꞌulu̱nk taxak kiqꞌuin re nak tixchꞌolob chiku chanru takaba̱nu riqꞌuin li cꞌulaꞌal li ta̱yoꞌla̱k, chan.

⁹ Ut li Dios quixsume lix tij laj Manoa. Saꞌ jun li cutan nak li ixakilbej cuan saꞌ cꞌaleba̱l xjunes, lix ángel li Ka̱cuaꞌ quixcꞌutbesi cuiꞌchic rib chiru. Abanan laj Manoa lix be̱lom ma̱ ani rochben.

¹⁰ Co̱ saꞌ junpa̱t li ixakilbej chixbokbal lix be̱lom. Quixye re: —Quim. Xcꞌulun cuiꞌchic li cui̱nk li quia̱tinac cuiqꞌuin saꞌ li cutan quinumeꞌ, chan.

¹¹ Laj Manoa co̱ chirix li rixakil chirilbal li cui̱nk. Ut quixye re: —¿Ma la̱at li cat-a̱tinac riqꞌuin li cuixakil? chan. Ut lix ángel li Ka̱cuaꞌ Dios quixye: —La̱in.—

¹² Laj Manoa quixye re: —Nak ta̱cuulak xkꞌehil xyoꞌlajic li cꞌulaꞌal li xaye, ¿chanru nak takaqꞌuiresi? Ut, ¿chanru nak ta̱cua̱nk? chan.

¹³ Lix ángel li Dios quixye re: —Tento nak la̱ cuixakil tixba̱nu chi tzꞌakal re ru chixjunil li xinye re.

¹⁴ Incꞌaꞌ naru tixtzaca li cꞌaꞌru yi̱banbil riqꞌuin li ru li uvas. Incꞌaꞌ naru ta̱rucꞌ li vino chi moco ta̱rucꞌ li haꞌ li nacaltesin. Chi moco tixtzaca li naxye saꞌ li chakꞌrab nak incꞌaꞌ naru xtzacanquil. Tixba̱nu chixjunil li xinye re, chan li ángel.

¹⁵ Ut laj Manoa quixye re lix ángel li Ka̱cuaꞌ: —Matxic cuan. Oybeni cuan junpa̱tak re nak takachik junak li chiba̱t ut takaqꞌue xtibel a̱cua, chan.

¹⁶ Abanan li ángel quixye re: —Usta tincana̱k e̱riqꞌuin junpa̱tak, incꞌaꞌ tintzaca li cꞌaꞌru nacayi̱b. Abanan cui nacacuaj xba̱nunquil, ta̱mayeja li xul aꞌan chiru li Ka̱cuaꞌ, chan. Laj Manoa incꞌaꞌ quixnau nak li cui̱nk aꞌan x-ángel li Ka̱cuaꞌ.

¹⁷ Quixye laj Manoa re: —Ye ke ani a̱cꞌabaꞌ re nak takabantioxi cha̱cuu nak ta̱cꞌulma̱nk li cꞌaꞌru xaye ke, chan.

¹⁸ Lix ángel li Ka̱cuaꞌ quixye re: —¿Cꞌaꞌut nak ta̱cuaj ta̱nau ani incꞌabaꞌ? La̱at incꞌaꞌ naru ta̱nau xban nak lin cꞌabaꞌ la̱in kꞌaxal lokꞌ, chan.

¹⁹ Joꞌcan nak laj Manoa quixcꞌam li chiba̱t ut quixcꞌam ajcuiꞌ li ru li racui̱mk ut quixmayeja saꞌ xbe̱n jun li pec chiru li Ka̱cuaꞌ Dios. Ut li Ka̱cuaꞌ quixcꞌutbesi jun li milagro chiruheb laj Manoa ut li rixakil.

²⁰ Nak yo̱ chi cꞌatc li mayej saꞌ li artal, laj Manoa ut li rixakil queꞌril lix ángel li Dios yo̱ chi takecꞌ saꞌ choxa saꞌ xxamlel li mayej. Laj Manoa ut li rixakil queꞌxhupub ribeb saꞌ chꞌochꞌ.

²¹ Laj Manoa quixqꞌue retal nak aꞌan x-ángel li Ka̱cuaꞌ. Chalen aꞌan lix ángel li Dios incꞌaꞌ chic quixcꞌutbesi rib chiruheb, chi moco chiru li cui̱nk, chi moco chiru li rixakil.

²² Laj Manoa quixye re li rixakil: —Relic chi ya̱l nak toca̱mk xban nak xkil ru li Dios, chan.

²³ Abanan li rixakil quixye re: —Incꞌaꞌ toca̱mk. Cui ta li Dios kacamsinquil ta̱raj, incꞌaꞌ raj xcꞌul li kacꞌatbil mayej chi moco quixcꞌul raj li mayej li xkaqꞌue. Ut incꞌaꞌ raj xcꞌutbesi chiku chixjunil li cꞌaꞌak re ru aꞌin, ut incꞌaꞌ raj xye ke li cꞌaꞌru ta̱cꞌulma̱nk, chan.

²⁴ Ut li ixk quicuan jun lix cꞌulaꞌal te̱lom. Aj Sansón quixqꞌue chokꞌ xcꞌabaꞌ. Li cꞌulaꞌal quiniman ut li Ka̱cuaꞌ qui-osobtesin re.

²⁵ Ut lix musikꞌ li Ka̱cuaꞌ li Dios qui-oc chirecꞌasinquil xchꞌo̱l laj Sansón nak cuan saꞌ li naꞌajej li cuanqueb cuiꞌ lix muheba̱leb li ralal xcꞌajol laj Dan, li cuan saꞌ xyiheb li cuib chi tenamit Zora ut Estaol.