Jueces 12 - Li Santil hu

¹ Eb li ralal xcꞌajol laj Efraín queꞌxchꞌutub ribeb chi xic chi pletic. Queꞌnumeꞌ jun pacꞌal li nimaꞌ Jordán ut queꞌco̱eb saꞌ li tenamit Zafón. Queꞌcuulac riqꞌuin laj Jefté ut queꞌxye re: —¿Cꞌaꞌut nak quexco̱ex chi pletic riqꞌuineb laj Amón ut incꞌaꞌ coe̱bok che̱rix? Anakcuan takacꞌat la̱ cuochoch ut aran ajcuiꞌ tatcꞌatk la̱at, chanqueb.

² Ut laj Jefté quixye reheb: —La̱in ut eb lin tenamit cau xopletic riqꞌuineb laj Amón. Xexkabok re nak toe̱tenkꞌa, abanan incꞌaꞌ xoe̱tenkꞌa chi pletic.

³ Nak xinqꞌue retal nak incꞌaꞌ toe̱tenkꞌa, incꞌaꞌ xinra lin yuꞌam. Xco̱in ban chi pletic riqꞌuineb laj Amón. Ut li Ka̱cuaꞌ Dios quixkꞌaxtesiheb saꞌ cuukꞌ. ¿Cꞌaꞌut nak la̱ex xexchal anakcuan chi pletic kiqꞌuin? chan laj Jefté.

⁴ Ut laj Jefté quixchꞌutubeb chixjunileb li cui̱nk li cuanqueb Galaad. Queꞌpletic riqꞌuineb li ralal xcꞌajol laj Efraín ut queꞌnumta saꞌ xbe̱neb. Queꞌxba̱nu chi joꞌcan xban nak eb li ralal xcꞌajol laj Efraín queꞌxye nak eb laj Galaad, li cuanqueb saꞌ xya̱nkeb laj Efraín ut laj Manasés, queꞌxtzꞌekta̱naheb li ralal xcꞌajol laj Efraín, li rech tenamitil.

⁵ Eb laj Galaad queꞌxrameb li naꞌajej li incꞌaꞌ cham cuiꞌ li haꞌ bar nequeꞌru cuiꞌ chi numecꞌ jun pacꞌal li nimaꞌ Jordán re nak eb li ralal xcꞌajol laj Efraín incꞌaꞌ teꞌe̱lelik chiruheb. Nak eb laj Efraín queꞌraj xic saꞌ xnaꞌajeb, tento nak teꞌxpatzꞌ xlese̱ns chi numecꞌ. Ut eb laj Galaad queꞌxpatzꞌ reheb ma aꞌaneb li ralal xcꞌajol laj Efraín.

⁶ Cui eb aꞌan teꞌxye nak incꞌaꞌ, quiyeheꞌ reheb nak teꞌxye li a̱tin “Xibolet”. Ut eb laj Efraín queꞌxye “Sibolet” xban nak incꞌaꞌ queꞌru chixyebal chi tzꞌakal li a̱tin aꞌan. Riqꞌuin aꞌan queꞌxnau nak aꞌaneb xcomoneb li ralal xcꞌajol laj Efraín. Queꞌchapeꞌ ut queꞌcamsi̱c saꞌ li naꞌajej li na-ux cuiꞌ numecꞌ jun pacꞌal li nimaꞌ Jordán. Joꞌcan nak queꞌcamsi̱c cuib roxcꞌa̱l (42,000) mil li ralal xcꞌajol laj Efraín.

⁷ Laj Jefté quitaklan saꞌ xbe̱neb laj Israel chiru cuakib chihab. Nak quicam, quimukeꞌ saꞌ li tenamit li quiyoꞌla cuiꞌ aran Galaad.

⁸ Nak ac xcam laj Jefté, aꞌ chic laj Ibzán qui-oc chi takla̱nc saꞌ xbe̱neb laj Israel. Laj Ibzán, aꞌan Belén xtenamit.

⁹ Laj Ibzán quicuan laje̱b xcaꞌcꞌa̱l (30) li ralal ut laje̱b xcaꞌcꞌa̱l (30) lix rabin. Ut chixjunileb quixsumubeb riqꞌuineb li jalaneb xtenamit. Ut quitaklan saꞌ xbe̱neb laj Israel chiru cuukub chihab.

¹⁰ Nak quicam, quimukeꞌ aran Belén.

¹¹ Nak ac xcam laj Ibzán, aꞌ chic laj Elón, li xcomoneb li ralal xcꞌajol laj Zabulón, qui-oc chi takla̱nc saꞌ xbe̱neb laj Israel. Ut quitaklan saꞌ xbe̱neb chiru laje̱b chihab.

¹² Nak quicam laj Elón, quimukeꞌ saꞌ li tenamit Ajalón li cuan saꞌ li naꞌajej Zabulón.

¹³ Nak ac xcam laj Elón, aꞌ chic laj Abdón, li ralal laj Hilel, quitaklan saꞌ xbe̱neb laj Israel. Piratón xtenamit.

¹⁴ Laj Abdón quicuan caꞌcꞌa̱l (40) li ralal ut laje̱b xcaꞌcꞌa̱l (30) li ri. Eb li ralal xcꞌajol junes chirix bu̱r nequeꞌbe̱c. Laj Abdón quitaklan saꞌ xbe̱neb laj Israel chiru cuakxakib chihab.

¹⁵ Nak quicam, laj Abdón ralal laj Hilel quimukeꞌ saꞌ li tenamit Piratón saꞌ xcue̱nteb laj Efraín saꞌ lix naꞌaj laj Amalec, li tzu̱l ru.