Jueces 11 - Li Santil hu

¹ Laj Jefté, aꞌan jun cui̱nk aj Galaad. Cau rib ut cau xchꞌo̱l chi pletic. Lix naꞌ li cui̱nk aꞌan, aꞌan jun li ixk xcomoneb li nequeꞌxcꞌayi rib. Ut lix yucuaꞌ aj Galaad xcꞌabaꞌ.

² Laj Galaad quicuan xcocꞌal riqꞌuin li rixakil. Ut nak queꞌni̱nkan li cocꞌal queꞌpoꞌ saꞌ xbe̱n laj Jefté ut queꞌra̱lina ut queꞌxye re: —La̱at incꞌaꞌ tattzꞌak li cꞌaꞌru re li kayucuaꞌ xban nak la̱at jalan a̱naꞌ, chanqueb re laj Jefté.

³ Joꞌcan nak quie̱lelic laj Jefté chiruheb li ri̱tzꞌin. Co̱ chi cua̱nc saꞌ li naꞌajej Tob. Ut queꞌxchꞌutub ribeb riqꞌuin jun chꞌu̱tal li cui̱nk li nequeꞌcuulac chiru pletic ut aꞌan chic nataklan saꞌ xbe̱neb.

⁴ Mokon chic eb li ralal xcꞌajol laj Amón queꞌcuulac chi pletic riqꞌuineb laj Israel.

⁵ Nak ac yo̱queb chi pletic riqꞌuineb laj Israel saꞌ li tenamit Galaad, eb laj cꞌamol be queꞌxtakla xcꞌambal laj Jefté li cuan chak saꞌ li naꞌajej Tob.

⁶ Ut queꞌxye re laj Jefté: —La̱o aj Galaad takaj nak la̱at tatcꞌamok be chiku nak topletik riqꞌuineb laj amonita, chanqueb re.

⁷ Ut laj Jefté quichakꞌoc ut quixye reheb li nequeꞌcꞌamoc be saꞌ li tenamit Galaad: —¿Cꞌaꞌut nak xexchal chinsicꞌbal? ¿Ma ma̱cuaꞌ ta biꞌ la̱ex xicꞌ xex-iloc cue? ¿Ma ma̱cuaꞌ ta biꞌ la̱ex xex-isin chak cue saꞌ rochoch lin yucuaꞌ? ¿Cꞌaꞌut nak xexchal chinsicꞌbal anakcuan nak cuanquex saꞌ raylal? chan.

⁸ Ut queꞌchakꞌoc li nequeꞌcꞌamoc be saꞌ xya̱nkeb laj Galaad ut queꞌxye re: —Aꞌan aj e nak xochal cha̱sicꞌbal. La̱o takaj nak tatxic chikix re tatpletik riqꞌuineb laj Amón. Ut la̱akat chic aj cꞌamol be saꞌ kaya̱nk chikajunilo li cuanco Galaad, chanqueb re.

⁹ Quichakꞌoc laj Jefté ut quixye reheb: —Cui la̱ex te̱raj nak tinxic chi pletic riqꞌuineb li ralal xcꞌajol laj Amón, ut cui li Ka̱cuaꞌ tixkꞌaxtesiheb saꞌ cuukꞌ, ¿ma tine̱qꞌue chi takla̱nc saꞌ e̱be̱n? chan.

¹⁰ Eb aꞌan queꞌchakꞌoc ut queꞌxye re: —Li Ka̱cuaꞌ nanaꞌoc re nak takaba̱nu li cꞌaꞌru nacacuaj, chanqueb.

¹¹ Ut laj Jefté co̱ chirixeb laj cꞌamol be saꞌ xya̱nkeb laj Galaad. Ut eb li tenamit queꞌxxakab aꞌan re nak aꞌan chic ta̱takla̱nk saꞌ xbe̱neb li tenamit ut aꞌan ajcuiꞌ ta̱cꞌamok be chiruheb li soldados. Ut aran Mizpa laj Jefté quixye cuiꞌchic chiru li Ka̱cuaꞌ chixjunil li a̱tin li ac xye.

¹² Chirix aꞌan laj Jefté quixtaklaheb lix takl riqꞌuin lix reyeb laj Amón chixyebal re: —¿Cꞌaꞌut nak xicꞌ nocoe̱ril? ¿Cꞌaꞌut nak te̱raj cha̱lc chi pletic kiqꞌuin? chan laj Jefté.

¹³ Lix reyeb laj Amón quixye reheb lix takl laj Jefté: —Nak queꞌel chak Egipto, eb laj Israel queꞌrelkꞌa lin chꞌochꞌ. Naticla saꞌ li nimaꞌ Arnón. Nacuulac toj saꞌ li nimaꞌ Jaboc ut toj saꞌ li nimaꞌ Jordán. Nintzꞌa̱ma che̱ru nak te̱kꞌaxtesi ke saꞌ xya̱lal, chan.

¹⁴ Ut laj Jefté quixtakla cuiꞌchic xyebal re lix reyeb laj Amón:

¹⁵ —Eb laj Israel incꞌaꞌ queꞌxchap lix naꞌajeb laj Moab, chi moco queꞌxchap le̱ naꞌaj la̱ex aj Amón.

¹⁶ Nak eb laj Israel queꞌel chak Egipto, queꞌnumeꞌ saꞌ li chaki chꞌochꞌ toj cuan cuiꞌ li Caki Palau ut queꞌcuulac aran Cades.

¹⁷ Ut eb laj Israel queꞌxtaklaheb lix takl riqꞌuin lix reyeb laj Edom. Queꞌxye re, “La̱o nakatzꞌa̱ma cha̱cuu nak ta̱canabeb laj Israel chi numecꞌ saꞌ la̱ naꞌaj.” Abanan lix reyeb laj Edom incꞌaꞌ quixcanabeb chi numecꞌ. Ut queꞌxtzꞌa̱ma ajcuiꞌ chiru lix reyeb laj Moab nak teꞌcanaba̱k chi numecꞌ saꞌ lix naꞌajeb. Chi moco lix reyeb laj Moab quixcanabeb chi numecꞌ saꞌ lix naꞌajeb. Joꞌcan nak eb laj Israel queꞌcana aran Cades.

¹⁸ Nak queꞌoc cuiꞌchic chi xic, eb laj Israel toj saꞌ li chaki chꞌochꞌ coxeꞌxqꞌue chak vue̱lt. Queꞌnumeꞌ chire lix naꞌajeb laj Edom ut eb laj Moab toj retal queꞌcuulac jun pacꞌal li nimaꞌ Arnón saꞌ xjayal lix naꞌajeb laj Moab, li cuan saꞌ li este. Ut aran queꞌxyi̱b lix muheba̱leb. Abanan incꞌaꞌ queꞌnumeꞌ jun pacꞌal li nimaꞌ Arnón xban nak aꞌan lix naꞌajeb laj Moab.

¹⁹ Ut eb laj Israel queꞌxtakla lix takl aran Hesbón chixtzꞌa̱manquil chiru laj Sehón lix reyeb laj amorreo nak tixcanabeb chi numecꞌ saꞌ lix naꞌajeb nak yo̱queb chi xic saꞌ lix naꞌajeb laj Israel.

²⁰ Abanan laj Sehón incꞌaꞌ cꞌojcꞌo xchꞌo̱l riqꞌuineb laj Israel. Joꞌcan nak incꞌaꞌ quixcanabeb chi numecꞌ saꞌ lix naꞌajeb. Quixchꞌutubeb ban lix soldado ut queꞌxyi̱b lix muheba̱leb aran Jahaza ut queꞌxtiquib pletic riqꞌuineb laj Israel.

²¹ Abanan li Ka̱cuaꞌ li kaDios la̱o aj Israel, coxtenkꞌa chi numta̱c saꞌ xbe̱neb laj Sehón. Joꞌcan nak xke̱chani lix naꞌajeb laj amorreo li cuanqueb saꞌ li naꞌajej aꞌan.

²² Quike̱chani chixjunil lix naꞌajeb laj amorreo, li naticla cuan cuiꞌ li nimaꞌ Arnón ut nacuulac saꞌ li nimaꞌ Jaboc. Saꞌ xjayal li na-el cuiꞌ chak li sakꞌe naticla saꞌ li chaki chꞌochꞌ ut nacuulac toj saꞌ li nimaꞌ Jordán saꞌ xjayal li na-oc cuiꞌ li sakꞌe.

²³ Li Ka̱cuaꞌ li kaDios la̱o aj Israel, aꞌan li quikꞌaxtesin saꞌ kukꞌ chixjunil lix naꞌajeb laj amorreo. ¿Ma la̱ex texmakꞌok re chiku chi joꞌcanan?

²⁴ Cui ta laj Quemos le̱ dios tixsi e̱chꞌochꞌ, ¿ma ma̱cuaꞌak ta biꞌ e̱re? Joꞌcan ajcuiꞌ la̱o. Chixjunil li xsi ke li kaDios, aꞌan ke ajcuiꞌ la̱o.

²⁵ ¿Ma kꞌaxal cau ta biꞌ a̱cuib chiru laj Balac li ralal laj Zipor, lix reyeb laj Moab? ¿Ma quixcacuubresi ta biꞌ rib laj Balac ut quichal ta chi pletic kiqꞌuin?

²⁶ Ac cuan oxib ciento chihab koquic la̱o aj Israel saꞌ li naꞌajej Hesbón ut saꞌ eb lix cꞌaleba̱l. Cuanqueb ajcuiꞌ saꞌ li naꞌajej Aroer ut saꞌ eb lix cꞌaleba̱l. Ut cuanqueb ajcuiꞌ saꞌ chixjunil li naꞌajej Arnón. ¿Cꞌaꞌut nak incꞌaꞌ xamakꞌ chiku li naꞌajej chiru li oxib ciento chihab aꞌin?

²⁷ La̱o incꞌaꞌ xoma̱cob che̱ru la̱ex. La̱o incꞌaꞌ yo̱co chi pletic e̱riqꞌuin. Abanan la̱ex incꞌaꞌ us yo̱quex nak xexchal chi pletic kiqꞌuin. Li Ka̱cuaꞌ Dios, aꞌan laj rakol a̱tin. Aꞌan li ta̱rakok a̱tin saꞌ kabe̱n la̱o aj Israel ut saꞌ e̱be̱n ajcuiꞌ la̱ex aj Amón, chan laj Jefté.

²⁸ Abanan lix reyeb laj Amón incꞌaꞌ quixcꞌul xchꞌo̱l li cꞌaꞌru quixtakla xyebal laj Jefté.

²⁹ Lix musikꞌ li Dios quichal riqꞌuin laj Jefté, ut quixcꞌut chiru cꞌaꞌru tixba̱nu. Joꞌcan nak eb laj Israel queꞌnumeꞌ saꞌ li naꞌajej Galaad ut Manasés ut queꞌnumeꞌ ajcuiꞌ Mizpa, li cuan saꞌ xcue̱nt Galaad re nak teꞌre̱chani lix naꞌajeb laj Amón.

³⁰ Ut laj Jefté quixye re li Ka̱cuaꞌ: —Xakꞌaxtesi ta saꞌ cuukꞌ eb li ralal xcꞌajol laj Amón.

³¹ Cui ta̱kꞌaxtesiheb saꞌ cuukꞌ, la̱in tinmayeja cha̱cuu li xbe̱n li ta̱e̱lk chak chincꞌulbal nak tinsukꞌi̱k saꞌ cuochoch. Cꞌatbil nak tinmayeja cha̱cuu, chan laj Jefté.

³² Ut laj Jefté quinumeꞌ jun pacꞌal li nimaꞌ chi pletic riqꞌuineb laj Amón. Ut li Ka̱cuaꞌ Dios quixkꞌaxtesiheb laj Amón saꞌ rukꞌeb laj Israel.

³³ Queꞌnumta saꞌ xbe̱neb junmay chi tenamit saꞌ eb li naꞌajej Aroer, Minit ut Abel-keramim. Joꞌcaꞌin nak queꞌnumta laj Israel saꞌ xbe̱neb laj Amón.

³⁴ Laj Jefté quisukꞌi Mizpa saꞌ li rochoch. Ut lix rabin qui-el chak chixcꞌulbal lix yucuaꞌ. Yo̱ chi xajoc ut yo̱ chixchꞌeꞌbal lix pandero li cuan saꞌ rukꞌ. Jun ajcuiꞌ lix rabin laj Jefté. Ma̱ jun chic xcocꞌal cuan.

³⁵ Cꞌajoꞌ nak quirahoꞌ xchꞌo̱l laj Jefté nak quiril lix rabin. Quixpej li rakꞌ xban xrahil xchꞌo̱l ut quixye: —At inrabin, cꞌajoꞌ xrahil inchꞌo̱l nachal a̱ban. ¿Cꞌaꞌut nak la̱at li xbe̱n li xat-el chak chincꞌulbal? Ac xinyechiꞌi re li Dios nak tinmayejak chiru ut incꞌaꞌ naru tinkꞌet li cua̱tin, chan.

³⁶ Lix rabin quixye: —At inyucuaꞌ, cui xayechiꞌi re li Ka̱cuaꞌ Dios nak tatmayejak, ba̱nu cuiqꞌuin li cꞌaꞌru xayechiꞌi re li Ka̱cuaꞌ Dios xban nak aꞌan xkꞌaxtesi saꞌ a̱cuukꞌ eb laj Amón, li xicꞌ nequeꞌiloc a̱cue.

³⁷ Caꞌaj cuiꞌ nintzꞌa̱ma cha̱cuu nak tina̱canab chi yoꞌyo cuibak po chic re nak tinxic saꞌ eb li tzu̱l cuochbeneb li cuami̱g chi kꞌaxal ra saꞌ inchꞌo̱l xban nak tento tinca̱mk chi toj ma̱jiꞌ ninsumla, chan.

³⁸ Ut laj Jefté quixcanab chi yoꞌyo cuib po chic re ta̱xic rochbeneb li xkaꞌal chi kꞌaxal ra saꞌ xchꞌo̱l xban nak tento ta̱ca̱mk chi toj ma̱jiꞌ sumsu.

³⁹ Nak ac xnumeꞌ li cuib po, quisukꞌi riqꞌuin lix yucuaꞌ ut aꞌan quixba̱nu joꞌ quixyechiꞌi re li Dios. Ut lix rabin quicam nak toj tukꞌ ixk ut toj ma̱jiꞌ cuanjenak riqꞌuin cui̱nk.

⁴⁰ Xban aꞌan, eb li sa̱j ixk nequeꞌxic saꞌ eb li tzu̱l rajlal chihab chi ya̱bac chirix lix camic lix rabin laj Jefté aj Galaad. Ca̱hib cutan nequeꞌcuan chak aran.