Jueces 10 - Li Santil hu

¹ Nak ac xcam laj Abimelec, jun li cui̱nk xcomoneb li ralal xcꞌajol laj Isacar qui-oc chi tenkꞌa̱nc reheb laj Israel. Li cui̱nk aꞌan aj Tola xcꞌabaꞌ. Cuan saꞌ li tenamit Samir li nacana saꞌ lix naꞌajeb li ralal xcꞌajol laj Efraín, li tzu̱l ru. Laj Tola, aꞌan li ralal laj Fúa. Ut laj Fúa, aꞌan li ralal laj Dodo.

² Laj Tola quitaklan saꞌ xbe̱neb laj Israel chiru oxib xcaꞌcꞌa̱l (23) chihab toj nak quicam ut quimukeꞌ saꞌ li tenamit Samir.

³ Nak ac xcam laj Tola, laj Jair Galaad xtenamit qui-oc chi takla̱nc saꞌ xbe̱neb laj Israel. Ut aꞌan quitaklan saꞌ xbe̱neb li tenamit cuib xcaꞌcꞌa̱l (22) chihab.

⁴ Ut queꞌcuan laje̱b xcaꞌcꞌa̱l li ralal laj Jair. Junes chirix bu̱r nequeꞌbe̱c. Queꞌtaklan saꞌ xbe̱neb laje̱b xcaꞌcꞌa̱l chi tenamit saꞌ li naꞌajej Galaad. Toj chalen anakcuan nequeꞌxye “Lix tenamit laj Jair” reheb li tenamit aꞌan.

⁵ Ut quicam laj Jair, ut quimukeꞌ saꞌ li tenamit Camón.

Laj Jefté

⁶ Ut eb laj Israel queꞌxba̱nu cuiꞌchic li ma̱usilal chiru li Ka̱cuaꞌ Dios. Queꞌxlokꞌoniheb li yi̱banbil dios Baal ut Astarot. Ut queꞌxlokꞌoniheb ajcuiꞌ lix dioseb laj Siria, ut lix dioseb laj Sidón, joꞌ ajcuiꞌ lix dioseb laj Moab. Ut queꞌxlokꞌoniheb lix dioseb laj Amón ut eb laj filisteo. Eb laj Israel queꞌxtzꞌekta̱na li Ka̱cuaꞌ Dios ut incꞌaꞌ chic queꞌcꞌanjelac chiru.

⁷ Ut li Ka̱cuaꞌ Dios quijoskꞌoꞌ saꞌ xbe̱neb laj Israel. Joꞌcan nak quixkꞌaxtesiheb saꞌ rukꞌeb laj filisteo ut saꞌ rukꞌeb laj Amón.

⁸ Eb laj filisteo ut eb laj Amón queꞌnumta saꞌ xbe̱neb. Cuakxaklaju chihab queꞌrahobtesi̱c laj Israel aran Galaad jun pacꞌal li nimaꞌ Jordán saꞌ xnaꞌajeb laj amorreo.

⁹ Ut eb laj Amón queꞌnumeꞌ jun pacꞌal li nimaꞌ Jordán chi pletic riqꞌuineb li ralal xcꞌajol laj Judá, ut eb li ralal xcꞌajol laj Benjamín, joꞌ ajcuiꞌ li ralal xcꞌajol laj Efraín. Ut kꞌaxal ra queꞌxcꞌul eb laj Israel.

¹⁰ Joꞌcan nak eb laj Israel queꞌxya̱ba cuiꞌchic xcꞌabaꞌ li Ka̱cuaꞌ ut queꞌxye: —At Ka̱cuaꞌ, at kaDios, la̱o xoma̱cob cha̱cuu xban nak xatkatzꞌekta̱na. Xoma̱cob cha̱cuu xban nak xkalokꞌoniheb li yi̱banbil dios Baal, chanqueb.

¹¹ Li Ka̱cuaꞌ quixye reheb: —¿Ma incꞌaꞌ ta biꞌ quexrahobtesi̱c xbaneb laj Egipto ut eb laj amorreo? ¿Ma incꞌaꞌ ta biꞌ quexrahobtesi̱c xbaneb laj Amón ut xbaneb laj filisteo?

¹² Ut, ¿ma incꞌaꞌ ta biꞌ quexrahobtesi̱c xbaneb laj Sidón ut eb laj Amalec, joꞌqueb ajcuiꞌ laj Madián? ¿Ma incꞌaꞌ ta biꞌ xexincol saꞌ rukꞌeb nak xetzꞌa̱ma chicuu nak texintenkꞌa?

¹³ Abanan, la̱ex xine̱tzꞌekta̱na ut xelokꞌoniheb li jalanil dios. Joꞌcan nak la̱in incꞌaꞌ chic texincol saꞌ rukꞌeb li xicꞌ nequeꞌiloc e̱re.

¹⁴ Ayukex ut ya̱bahomak xcꞌabaꞌeb li jalanil dios li xesicꞌ ruheb. Ma̱re eb aꞌan chic teꞌcolok e̱re chiru li raylal li cuanquex cuiꞌ anakcuan, chan li Dios.

¹⁵ Eb laj Israel queꞌxye re li Dios: —La̱o xoma̱cob cha̱cuu. Ba̱nu li cꞌaꞌru ta̱cuaj kiqꞌuin. Caꞌaj cuiꞌ nakatzꞌa̱ma cha̱cuu nak toa̱col anakcuan, chanqueb.

¹⁶ Ut queꞌrisi eb li jalanil dios saꞌ xya̱nkeb ut queꞌxlokꞌoni li Ka̱cuaꞌ. Ut li Dios quirahoꞌ xchꞌo̱l chirilbal li raylal li cuanqueb cuiꞌ.

¹⁷ Queꞌxchꞌutub ribeb laj Amón ut queꞌxyi̱b lix muheba̱leb aran Galaad. Ut joꞌcan ajcuiꞌ eb laj Israel. Queꞌxchꞌutub ribeb ut queꞌxyi̱b lix muheba̱leb aran Mizpa.

¹⁸ Ut eb laj Israel li cuanqueb Galaad ut eb li nequeꞌcꞌamoc be chiruheb queꞌxye chi ribileb rib: —¿Ani ta̱cꞌamok be chiku nak topletik riqꞌuineb li ralal xcꞌajol laj Amón? Li ani ta̱cꞌamok be chiku, aꞌan li ta̱takla̱nk saꞌ xbe̱neb chixjunileb li cuanqueb Galaad, chanqueb.