Jueces 1 - Li Santil hu

Eb li ralal xcꞌajol laj Israel queꞌpletic riqꞌuineb laj Canaán

¹ Nak ac xcam laj Josué, eb laj Israel queꞌtijoc chiru li Ka̱cuaꞌ ut queꞌxye re: —¿Ani ke xbe̱n cua teꞌxic chi pletic riqꞌuineb laj Canaán? chanqueb.

² Quichakꞌoc li Ka̱cuaꞌ ut quixye reheb: —Aꞌaneb laj Judá li teꞌxic xbe̱n cua. La̱in tinkꞌaxtesi li naꞌajej saꞌ rukꞌeb aꞌan, chan.

³ Eb li ralal xcꞌajol laj Judá queꞌa̱tinac riqꞌuineb li ralal xcꞌajol laj Simeón ut queꞌxye reheb: —Choe̱tenkꞌa chi pletic riqꞌuineb laj Canaán re nak take̱chani li naꞌajej. Ut la̱o toxic ajcuiꞌ che̱tenkꞌanquil chi pletic chirix li naꞌajej li textzꞌak la̱ex, chanqueb. Ut eb li ralal xcꞌajol laj Simeón queꞌxsume xic chixtenkꞌanquileb.

⁴ Joꞌcan nak eb li ralal xcꞌajol laj Judá queꞌco̱eb chi pletic. Ut li Ka̱cuaꞌ Dios quixtenkꞌaheb chi numta̱c saꞌ xbe̱neb laj cananeo ut laj ferezeo. Queꞌxcamsiheb laje̱b mil (10,000) chi cui̱nk saꞌ li naꞌajej Bezec.

⁵ Aran Bezec queꞌxtau laj Adoni-bezec lix reyeb ut queꞌpletic riqꞌuin. Queꞌnumta saꞌ xbe̱neb laj cananeo ut eb laj ferezeo.

⁶ Laj Adoni-bezec quie̱lelic chiruheb laj Israel. Abanan queꞌxta̱ke toj retal queꞌxchap ut queꞌrisiheb lix mamaꞌil li ruꞌuj rok ut lix mamaꞌil li ruꞌuj rukꞌ.

⁷ Ut laj Adoni-bezec quixye: —Junxil la̱in xintakla xyocꞌbal xmamaꞌil li ruꞌuj rokeb ut lix mamaꞌil li ruꞌuj rukꞌeb laje̱b xca̱cꞌa̱l (70) chi rey ut nequeꞌxxoc lix cꞌaj li cua li natꞌaneꞌ rubel lin me̱x re nak teꞌcuaꞌak. Anakcuan li Dios xba̱nu cue joꞌ xinba̱nu reheb aꞌan, chan. Ut laj Adoni-bezec quicꞌameꞌ Jerusalén ut aran quicam.

⁸ Eb li ralal xcꞌajol laj Judá queꞌpletic riqꞌuineb li cuanqueb Jerusalén ut queꞌnumta saꞌ xbe̱neb. Queꞌxcamsiheb li cristian ut queꞌxcꞌat lix tenamiteb.

⁹ Chirix aꞌan queꞌco̱eb chi pletic riqꞌuineb laj Canaán li cuanqueb saꞌ li tzu̱l ru ut saꞌ li ru takꞌa, joꞌ eb ajcuiꞌ li cuanqueb Neguev.

¹⁰ Ut queꞌco̱eb ajcuiꞌ chi pletic riqꞌuineb laj cananeo li cuanqueb saꞌ li tenamit Hebrón li nequeꞌxye ajcuiꞌ Quiriat-arba re junxil. Ut queꞌnumta saꞌ xbe̱neb laj Sesai, eb laj Ahimán, ut eb laj Talmai.

¹¹ Chirix aꞌan queꞌco̱eb chi pletic saꞌ li tenamit Debir, li queꞌxye Quiriat-sefer re junxil.

¹² Ut laj Caleb quixye: —Li ani ta̱xic chire̱chaninquil li tenamit Quiriat-sefer, la̱in tinqꞌue lin rabin, lix Acsa xcꞌabaꞌ, chokꞌ rixakil, chan.

¹³ Ut laj Otoniel li ralal laj Cenaz, aꞌan li quie̱chanin chak re li tenamit. Joꞌcan nak laj Caleb quixqꞌue lix Acsa chokꞌ rixakil laj Otoniel. Laj Cenaz, aꞌan li ri̱tzꞌin laj Caleb.

¹⁴ Nak ac xiqueb re saꞌ rochocheb, laj Otoniel quixye re lix Acsa nak tixtzꞌa̱ma chiru lix yucuaꞌ nak tixqꞌue xchꞌochꞌ re a̱uc. Ut lix Acsa quicube chirix lix bu̱r ut laj Caleb quixye re: —¿Cꞌaꞌ raj ru ta̱cuaj? chan.

¹⁵ Ut lix Acsa quixye re: —Nintzꞌa̱ma junak usilal cha̱cuu. Ac xaqꞌue cue li chꞌochꞌ li cuan saꞌ xcue̱nt Neguev. Ta̱qꞌueheb ajcuiꞌ li yuꞌam haꞌ cue, chan. Ut laj Caleb quixqꞌue re eb li yuꞌam haꞌ li cuanqueb saꞌ li ru takꞌa joꞌ eb ajcuiꞌ li cuanqueb saꞌ li naꞌajej li tzu̱l ru.

¹⁶ Eb li ralal xcꞌajol lix yucuaꞌ li rixakil laj Moisés, aꞌaneb laj Ceneo. Eb aꞌan queꞌrochbeni li ralal xcꞌajol laj Judá nak queꞌel saꞌ li tenamit Jericó bar cuanqueb cuiꞌ nabal chi cheꞌ palmera. Queꞌco̱eb saꞌ li chaki chꞌochꞌ li cuan nachꞌ riqꞌuin li tenamit Arad saꞌ xcue̱nt Neguev. Ut aran queꞌcana chi cua̱nc saꞌ xya̱nkeb li cuanqueb saꞌ li naꞌajej aꞌan.

¹⁷ Ut eb li ralal xcꞌajol laj Judá queꞌco̱eb rochbeneb li ralal xcꞌajol laj Simeón chi pletic riqꞌuineb laj cananeo li cuanqueb saꞌ li tenamit Sefat ut queꞌnumta saꞌ xbe̱neb. Xban nak queꞌxsach ru li tenamit, joꞌcan nak queꞌxqꞌue Horma chokꞌ xcꞌabaꞌ li tenamit aꞌan.

¹⁸ Eb li ralal xcꞌajol laj Judá queꞌre̱chaniheb li tenamit Gaza, Ascalón ut Ecrón rochbeneb li naꞌajej li cuanqueb chi xjun sutam.

¹⁹ Li Ka̱cuaꞌ cuan riqꞌuineb li ralal xcꞌajol laj Judá ut queꞌnumta saꞌ xbe̱neb li cuanqueb saꞌ li naꞌajej li tzu̱l ru. Abanan incꞌaꞌ queꞌru queꞌnumta saꞌ xbe̱neb li cuanqueb saꞌ li ru takꞌa xban nak eb aꞌan cuanqueb lix carruaje yi̱banbil riqꞌuin chꞌi̱chꞌ.

²⁰ Li tenamit Hebrón quiqꞌueheꞌ re laj Caleb joꞌ quixye laj Moisés. Ut laj Caleb quirisiheb saꞌ li naꞌajej aꞌan li oxib chꞌu̱tal li ralal xcꞌajol laj Anac.

²¹ Abanan eb li ralal xcꞌajol laj Benjamín incꞌaꞌ queꞌrisiheb laj jebuseo saꞌ li tenamit Jerusalén. Toj chalen anakcuan eb laj jebuseo cuanqueb saꞌ xya̱nkeb li ralal xcꞌajol laj Benjamín.

²² Eb li ralal xcꞌajol laj José queꞌco̱eb chi pletic riqꞌuineb li cuanqueb Bet-el. Ut li Ka̱cuaꞌ cuan riqꞌuineb.

²³ Eb li ralal xcꞌajol laj José queꞌxtaklaheb laj qꞌuehol etal saꞌ li tenamit Bet-el, li quiyeman ajcuiꞌ Luz re junxil.

²⁴ Queꞌril jun li cui̱nk eb laj qꞌuehol etal nak yo̱ chi e̱lc saꞌ li tenamit ut queꞌxye re: —Ta̱cꞌut chiku chanru naru to-oc saꞌ li tenamit ut takuxta̱na a̱cuu nak tonumta̱k saꞌ xbe̱n li tenamit, chanqueb re.

²⁵ Joꞌcan nak li cui̱nk quixcꞌut chiruheb chanru nak teꞌoc saꞌ li tenamit. Ut nak queꞌoc, queꞌxcamsi chixjunileb li cuanqueb aran. Caꞌaj cuiꞌ li cui̱nk aꞌan rochbeneb li ralal xcꞌajol ut li rixakil queꞌxcanab chi e̱lc saꞌ li naꞌajej aꞌan.

²⁶ Li cui̱nk aꞌan co̱ chi cua̱nc saꞌ lix naꞌajeb laj heteo. Quixyi̱b jun li tenamit aran ut quixqꞌue Luz chokꞌ xcꞌabaꞌ. Toj chalen anakcuan Luz nayeman re li tenamit aꞌan.

²⁷ Eb li ralal xcꞌajol laj Manasés incꞌaꞌ queꞌru risinquileb li cuanqueb saꞌ eb li tenamit Bet-seán ut Taanac, joꞌ ajcuiꞌ li tenamit Dor. Chi moco queꞌrisiheb saꞌ li cocꞌ cꞌaleba̱l li cuanqueb chi xjun sutam. Ut incꞌaꞌ queꞌrisiheb saꞌ eb li tenamit Ibleam ut Meguido, chi moco queꞌrisiheb saꞌ li cocꞌ cꞌaleba̱l li cuanqueb chi xjun sutam. Joꞌcan nak eb laj cananeo queꞌcana chi cua̱nc saꞌ li naꞌajej aꞌan.

²⁸ Nak quicacuu xmetzꞌe̱uheb laj Israel, queꞌxpuersiheb laj cananeo chixtojbal rix lix naꞌajeb. Ut incꞌaꞌ queꞌrisiheb saꞌ li naꞌajej aꞌan.

²⁹ Joꞌcan ajcuiꞌ eb li ralal xcꞌajol laj Efraín incꞌaꞌ queꞌrisiheb laj cananeo saꞌ li naꞌajej Gezer. Queꞌcana ban chi cua̱nc saꞌ xya̱nkeb li ralal xcꞌajol laj Efraín.

³⁰ Eb li ralal xcꞌajol laj Zabulón incꞌaꞌ queꞌrisiheb laj cananeo saꞌ eb li tenamit Quitrón ut Naalal. Queꞌcana ban chi cua̱nc aran. Abanan eb li ralal xcꞌajol laj Zabulón queꞌxpuersiheb chixtojbal rix lix naꞌajeb.

³¹ Chi moco eb li ralal xcꞌajol laj Aser queꞌrisiheb li cuanqueb saꞌ eb li tenamit Aco, Sidón, Alab, Aczib, Helba ut Afec joꞌ ajcuiꞌ Rehob.

³² Joꞌcan nak eb li ralal xcꞌajol laj Aser queꞌcuan saꞌ xya̱nkeb laj cananeo xban nak incꞌaꞌ queꞌrisiheb saꞌ li naꞌajej aꞌan.

³³ Eb li ralal xcꞌajol laj Neftalí incꞌaꞌ ajcuiꞌ queꞌrisiheb li cuanqueb saꞌ eb li tenamit Bet-semes ut Bet-anat. Queꞌcuan ban saꞌ xya̱nkeb. Abanan eb li ralal xcꞌajol laj Neftalí queꞌxpuersiheb laj Canaán chixtojbal rix lix naꞌajeb.

³⁴ Eb laj amorreo incꞌaꞌ queꞌxcanabeb li ralal xcꞌajol laj Dan chi oc saꞌ li ru takꞌa. Queꞌcana ban saꞌ li naꞌajej li tzu̱l ru.

³⁵ Eb laj amorreo queꞌcana chi cua̱nc saꞌ li tzu̱l Heres, ut saꞌ eb li tenamit Ajalón ut Saalbim. Nak queꞌcacuu xmetzꞌe̱uheb li ralal xcꞌajol laj José queꞌxpuersiheb chixtojbal rix lix naꞌajeb.

³⁶ Li nuba̱l re lix naꞌajeb laj amorreo naticla cuan cuiꞌ li tzu̱l Acrabim xcꞌabaꞌ. Nacuulac toj saꞌ li tenamit Sela li cuan saꞌ li norte.