San Juan 9 - Li Santil hu

Li Jesús quixqꞌuirtesi jun li cui̱nk mutzꞌ ru chalen saꞌ xyoꞌlajic

¹ Nak yo̱ chi xic li Jesús, quiril jun li cui̱nk mutzꞌ ru chalen saꞌ xyoꞌlajic.

² Eb lix tzolom li Jesús queꞌxpatzꞌ re: —At tzolonel, ¿cꞌaꞌut nak mutzꞌ ru li cui̱nk aꞌin? ¿Ani cuan xma̱c? ¿Ma li cui̱nk aꞌin malaj ut lix naꞌ xyucuaꞌ? chanqueb.

³ Li Jesús quixye: —Ma̱ ani cuan xma̱c. Chi moco aꞌan, chi moco lix naꞌ xyucuaꞌ. Aꞌan xcꞌul chi joꞌcan yal re nak ta̱cꞌutbesi̱k lix cuanquilal li Dios.

⁴ Tento nak tinse̱ba cuib chixba̱nunquil li cꞌaꞌru naraj li Dios li xtaklan chak cue. Anakcuan xcutanquil xba̱nunquil xban nak ta̱cuulak xkꞌehil nak ma̱ ani chic ta̱ru̱k ta̱cꞌanjelak.

⁵ Nak toj cua̱nkin saꞌ ruchichꞌochꞌ, la̱in tincutanobresi lix cꞌaꞌuxeb li cuanqueb saꞌ ruchichꞌochꞌ, chan.

⁶ Nak ac xye aꞌin, li Jesús quichu̱bac saꞌ chꞌochꞌ. Riqꞌuin lix chu̱b quixyi̱b li sulul. Ut quixyul saꞌ rix ru li mutzꞌ.

⁷ Ut quixye re: —Ayu. Chꞌaj chak la̱ cuu saꞌ li haꞌ Siloé, chan. Siloé naraj naxye “taklanbil chak”. Li mutzꞌ co̱ ut quixchꞌaj chak li ru ut na-iloc chic nak quisukꞌi chak.

⁸ Ut eb li rech cabal ut chixjunileb li nequeꞌnaꞌoc nak mutzꞌ ru, queꞌxye: —¿Ma ma̱cuaꞌ ta biꞌ aꞌan li nacꞌojla chire be chixtzꞌa̱manquil cꞌaꞌru re? chanqueb.

⁹ Ut cuan li queꞌyehoc: —Ya̱l. Aꞌan li cui̱nk, chanqueb. Cuan cuiꞌchic li queꞌxye: —Chanchan aꞌan, aban ma̱cuaꞌ, chanqueb. Ut li cui̱nk quixye: —La̱in li cui̱nk aꞌan, chan.

¹⁰ Ut queꞌxye re: —Cui la̱at li cui̱nk aꞌan, ¿chanru nak xtehon li xnakꞌ a̱cuu? chanqueb.

¹¹ Quichakꞌoc li cui̱nk ut quixye reheb: —Li cui̱nk Jesús xcꞌabaꞌ, quixyi̱b li sulul. Quixyul saꞌ rix cuu ut quixye cue nak tinxic chi chꞌajoc saꞌ li haꞌ Siloé. Joꞌcan nak co̱in ut quinchꞌaj li cuu ut anakcuan nin-iloc chic, chan li cui̱nk.

¹² Ut queꞌxye re: —¿Bar cuan li cui̱nk aꞌan? chanqueb. Ut li cui̱nk quixye reheb: —Incꞌaꞌ ninnau bar cuan, chan.

¹³ Ut queꞌxcꞌam riqꞌuineb laj fariseo li cui̱nk li mutzꞌ nak quicuan,

¹⁴ xban nak li Jesús quixyi̱b li sulul saꞌ li hiloba̱l cutan ut quixqꞌue chi iloc li mutzꞌ.

¹⁵ Ut eb laj fariseo queꞌxpatzꞌ cuiꞌchic re li cui̱nk chanru nak quiteli li xnakꞌ ru. Li cui̱nk quixye reheb: —Li Jesús quixqꞌue li sulul saꞌ rix cuu, ut quinchꞌaj li cuu ut anakcuan nin-iloc chic, chan.

¹⁶ Cuanqueb laj fariseo queꞌxye: —Li cui̱nk aꞌan, li Jesús xcꞌabaꞌ, moco taklanbil ta chak xban li Dios xban nak incꞌaꞌ naxqꞌue xlokꞌal li hiloba̱l cutan, chanqueb. Ut cuanqueb cuiꞌchic queꞌyehoc re: —¿Chanru nak tixba̱nu li milagro junak cui̱nk aj ma̱c? chanqueb. Xban nak jalan jala̱nk nequeꞌxcꞌoxla chirix li Jesús, incꞌaꞌ chic junajeb xchꞌo̱leb.

¹⁷ Joꞌcan nak eb laj fariseo queꞌxpatzꞌ cuiꞌchic re li cui̱nk, li mutzꞌ nak quicuan. Queꞌxye re: —Ut la̱at, ¿cꞌaꞌru nacaye chirix li cui̱nk aꞌin li xqꞌuehoc a̱cue chi iloc? chanqueb re. Ut li cui̱nk quixye reheb: —La̱in ninye nak aꞌan profeta, chan.

¹⁸ Ut eb laj judío li nequeꞌtaklan incꞌaꞌ queꞌraj xpa̱banquil nak li cui̱nk mutzꞌ junxil ut na-iloc chic. Joꞌcan nak queꞌxtakla xbokbal lix naꞌ xyucuaꞌ.

¹⁹ Ut queꞌxpatzꞌ reheb: —¿Ma aꞌin le̱ ralal? ¿Ma ya̱l nak mutzꞌ li ru chalen saꞌ xyoꞌlajic? ¿Chanru nak na-iloc chic anakcuan? chanqueb.

²⁰ Queꞌchakꞌoc lix naꞌ xyucuaꞌ ut queꞌxye: —La̱o nakanau nak aꞌan li kalal. Ut nakanau nak aꞌan mutzꞌ chalen saꞌ xyoꞌlajic.

²¹ Abanan incꞌaꞌ nakanau ani xtehoc li ru chi moco nakanau chanru nak na-iloc chic. Patzꞌomak re aꞌan. Ac cuan xchihab. Tixnau chic xsumenquil aꞌan, chanqueb.

²² Queꞌxye chi joꞌcan lix naꞌ xyucuaꞌ xban nak queꞌxucuac xbaneb li nequeꞌtaklan saꞌ xya̱nkeb laj judío xban nak ac cꞌu̱banbil ru xbaneb cui ani tixye nak li Jesús, aꞌan li Cristo, li jun aꞌan incꞌaꞌ chic ta̱cꞌulekꞌ saꞌ li cab li nequeꞌxchꞌutub cuiꞌ ribeb laj judío.

²³ Joꞌcan nak lix naꞌ xyucuaꞌ queꞌxye: —Aꞌan ac cuan xchihab. Patzꞌomak re aꞌan.—

²⁴ Eb laj fariseo queꞌxbok cuiꞌchic xcaꞌ sut li cui̱nk, li mutzꞌ nak quicuan, ut queꞌxye re: —Saꞌ xcꞌabaꞌ li Dios ta̱ye ke lix ya̱lal. La̱o nakanau nak li cui̱nk aꞌan aj ma̱c, chanqueb re.

²⁵ Li cui̱nk, li mutzꞌ nak quicuan, quixye reheb: —La̱in incꞌaꞌ ninnau ma aj ma̱c malaj ut incꞌaꞌ. Caꞌaj cuiꞌ li ninnau la̱in nak mutzꞌin nak xincuan ut anakcuan nin-iloc chic, chan.

²⁶ Ut queꞌxye cuiꞌchic re: —¿Cꞌaꞌru xba̱nu a̱cue? ¿Chanru nak xatxqꞌue chi iloc? chanqueb.

²⁷ Li cui̱nk quixye reheb: —Ac xinye e̱re chanru xba̱nu nak xinixqꞌue chi iloc ut incꞌaꞌ xeraj xpa̱banquil. ¿Cꞌaꞌut nak te̱raj te̱rabi cuiꞌchic? ¿Ma te̱raj ajcuiꞌ oc chokꞌ xtzolom la̱ex? chan reheb.

²⁸ Ut queꞌxhob li cui̱nk ut queꞌxye re: —La̱at xtzolom li cui̱nk aꞌan. La̱o incꞌaꞌ. La̱o xtzolom laj Moisés, chanqueb re.

²⁹ —La̱o nakanau nak li Dios quia̱tinac riqꞌuin laj Moisés; abanan li cui̱nk aꞌan incꞌaꞌ nakanau bar xchal chak, chanqueb.

³⁰ Li cui̱nk quixye reheb: —La̱ex nequeye nak incꞌaꞌ nequenau bar xchal chak li cui̱nk aꞌan. Nasach inchꞌo̱l e̱ban xban nak li cui̱nk aꞌan xqꞌuehoc cue chi iloc la̱in.

³¹ La̱o nakanau nak li Dios incꞌaꞌ narabi nak nequeꞌtijoc laj ma̱c. Narabi ban lix tijeb li nequeꞌxxucua ru ut nequeꞌxba̱nu li cꞌaꞌru naraj.

³² Chalen chak saꞌ xticlajic li ruchichꞌochꞌ, ma̱ jun sut qui-abiman nak cuan ta junak cui̱nk tixte ta xnakꞌ ru junak mutzꞌ chalen saꞌ xyoꞌlajic.

³³ Cui ta incꞌaꞌ taklanbil chak xban li Dios li cui̱nk aꞌin, ma̱cꞌaꞌ raj naru naxba̱nu, chan li cui̱nk reheb.

³⁴ Eb aꞌan queꞌchakꞌoc ut queꞌxye re: —La̱at aj ma̱c chalen chak saꞌ a̱yoꞌlajic. ¿Ma nacacꞌoxla nak naru ta̱qꞌue kanaꞌleb la̱o? chanqueb. Ut queꞌrisi li cui̱nk saꞌ xya̱nkeb ut incꞌaꞌ chic queꞌxcꞌul.

³⁵ Li Jesús quirabi resil li cꞌaꞌru queꞌxba̱nu. Nak quixtau li cui̱nk li quixqꞌuirtesi, quixye re: —¿Ma nacapa̱b li Ralal li Dios? chan re.

³⁶ Li cui̱nk quixye re: —Ye cue ani aꞌan, Ka̱cuaꞌ, re nak ta̱ru̱k tinpa̱b la̱in, chan.

³⁷ Li Jesús quixye re: —Aꞌan li yo̱cat chirilbal ru anakcuan. Li Ralal li Dios, aꞌan la̱in li yo̱quin chi a̱tinac a̱cuiqꞌuin, chan.

³⁸ Li cui̱nk quixye: —At Ka̱cuaꞌ, la̱in nacatinpa̱b, chan ut quixcuikꞌib rib chiru ut quixlokꞌoni.

³⁹ Li Jesús quixye re: —La̱in xinchal saꞌ ruchichꞌochꞌ chi rakoc a̱tin. La̱in tincutanobresi xnaꞌlebeb li incꞌaꞌ nequeꞌxtau xya̱lal. Ut tinmuk lix ya̱lal chiruheb li nequeꞌxcꞌoxla nak cuanqueb xnaꞌleb. Chanchan nak tinqꞌueheb chi iloc li incꞌaꞌ nequeꞌiloc. Ut tinqꞌueheb chi mutzꞌocꞌ li nequeꞌiloc, chan li Jesús.

⁴⁰ Cuanqueb laj fariseo aran ut yo̱queb chirabinquil li quixye li Jesús. Eb aꞌan queꞌxye re li Jesús: —¿Ma mutzꞌo ta biꞌ la̱o nak nacacꞌoxla la̱at? chanqueb.

⁴¹ Li Jesús quixye reheb: —Chanchanex mutzꞌ. Cui ta la̱ex incꞌaꞌ nequenau xya̱lal, ma̱cꞌaꞌ raj e̱ma̱c. Abanan cuan e̱ma̱c xban nak nequeye nak nequenau xya̱lal, chan li Jesús.