San Juan 3 - Li Santil hu

Laj Nicodemo quicuulac chi a̱tinac riqꞌuin li Jesús

¹ Quicuan jun li cui̱nk aj fariseo aj Nicodemo xcꞌabaꞌ. Aꞌan xcomoneb li nequeꞌtaklan saꞌ xya̱nkeb laj judío.

² Saꞌ jun li kꞌojyi̱n laj Nicodemo quicuulac chi a̱tinac riqꞌuin li Jesús ut quixye re: —At tzolonel, la̱o nakanau nak riqꞌuin li Dios chalenakat chak chokꞌ aj tzolol ke xban nak ma̱ ani ta̱ru̱k tixba̱nu li milagros li nacaba̱nu la̱at cui ta ma̱cuaꞌ riqꞌuin xcuanquil li Dios, chan.

³ Quichakꞌoc li Jesús ut quixye re: —Relic chi ya̱l ninye a̱cue, ma̱ ani naru ta̱oc rubel xnimajcual cuanquilal li Dios cui incꞌaꞌ ta̱yoꞌla̱k cuiꞌchic xcaꞌ sut, chan li Jesús.

⁴ Laj Nicodemo quixye re: —¿Chan ta cuiꞌ ru nak ta̱yoꞌla̱k cuiꞌchic xcaꞌ sut junak cui̱nk? ¿Ma ta̱ru̱k ta biꞌ ta̱oc cuiꞌchic riqꞌuin lix naꞌ ut ta̱yoꞌla̱k cuiꞌchic xcaꞌ sut? chan.

⁵ Quichakꞌoc li Jesús ut quixye re: —Relic chi ya̱l ninye a̱cue nak ani incꞌaꞌ ta̱yoꞌla̱k riqꞌuin haꞌ ut riqꞌuin li Santil Musikꞌej moco ta̱ru̱k ta ta̱oc rubel lix nimajcual cuanquilal li Dios.

⁶ Li ani yoꞌlajenak riqꞌuin lix naꞌ xyucuaꞌ cuan xyuꞌam saꞌ ruchichꞌochꞌ. Abanan li ani yoꞌlajenak riqꞌuin li Santil Musikꞌej cuan xyuꞌam chi junelic.

⁷ Misach a̱chꞌo̱l xban nak xinye a̱cue nak tento tatyoꞌla̱k cuiꞌchic xcaꞌ sut.

⁸ Li ikꞌ nanumeꞌ bar naraj chi incꞌaꞌ nacanau bar nachal chak chi moco nacanau bar yo̱ chi xic. Incꞌaꞌ nacacuil ru. Caꞌaj cuiꞌ lix ya̱b nacacuabi nak nanumeꞌ. Joꞌcan ajcuiꞌ lix yuꞌameb li yoꞌlajenakeb riqꞌuin li Santil Musikꞌej. Cuan xyuꞌameb chi junelic chi incꞌaꞌ nacanau chi tzꞌakal chanru, chan li Jesús.

⁹ Quichakꞌoc laj Nicodemo ut quixye re: —¿Chanru nak nacꞌulman aꞌin? Incꞌaꞌ nintau ru, chan.

¹⁰ Li Jesús quixye re: —La̱at aj tzolol reheb laj Israel ut incꞌaꞌ nacatau ru li yo̱quin chixyebal.

¹¹ Relic chi ya̱l ninye e̱re: La̱o nocoa̱tinac chirix li nakanau. Ut nakachꞌolob resil li cꞌaꞌru nakil. Abanan la̱ex incꞌaꞌ nequecꞌu̱luban li cꞌaꞌru nakachꞌolob xya̱lal che̱ru.

¹² La̱at incꞌaꞌ nacapa̱b li cꞌaꞌru ninye a̱cue chirix li cꞌaꞌru nacꞌulman saꞌ ruchichꞌochꞌ. ¿Ma tojaꞌ ta chic ta̱pa̱b nak tinye a̱cue li choxahil naꞌleb?

¹³ Ma̱ ani quicuulac saꞌ choxa. Caꞌaj cuiꞌ la̱in li Cꞌajolbej. La̱in xinchal chak saꞌ choxa.

¹⁴ Nak toj cuanqueb laj judío saꞌ li chaki chꞌochꞌ, laj Moisés quixtaksi chiru jun cheꞌ jun li cꞌantiꞌ yi̱banbil riqꞌuin li chꞌi̱chꞌ bronce. Joꞌcan ajcuiꞌ la̱in li Cꞌajolbej. Tento nak tintaksi̱k chiru jun li cheꞌ,

¹⁵ re nak chixjunileb li teꞌpa̱ba̱nk cue la̱in incꞌaꞌ teꞌsachk. Teꞌcua̱nk ban xyuꞌam chi junelic.

¹⁶ Li Dios cꞌajoꞌ nak quixraheb li cuanqueb saꞌ ruchichꞌochꞌ nak quixqꞌue li Ralal junaj chi ribil re nak chixjunileb li ani teꞌpa̱ba̱nk re incꞌaꞌ teꞌsachk. Ta̱cua̱nk ban xyuꞌameb chi junelic.

¹⁷ Li Dios incꞌaꞌ quixtakla chak li Ralal saꞌ ruchichꞌochꞌ chixtenebanquil li tojba ma̱c saꞌ xbe̱neb li cuanqueb saꞌ ruchichꞌochꞌ. Quixtakla ban chak re nak saꞌ xcꞌabaꞌ aꞌan teꞌcolekꞌ.

¹⁸ Li ani napa̱ban re, ma̱cꞌaꞌ li tojba ma̱c saꞌ xbe̱n. Abanan li ani incꞌaꞌ napa̱ban re, ac cuan li tojba ma̱c saꞌ xbe̱n xban nak incꞌaꞌ xpa̱b li Ralal li Dios, li junaj chi ribil.

¹⁹ Xban nak incꞌaꞌ nequeꞌpa̱ban, cuan li tojba ma̱c saꞌ xbe̱neb. Li Cꞌajolbej quicꞌulun saꞌ ruchichꞌochꞌ chixcꞌutbal lix ya̱lal chiruheb li cuanqueb saꞌ ruchichꞌochꞌ. Aꞌan chanchan li cutan. Abanan eb li cuanqueb saꞌ ruchichꞌochꞌ kꞌaxal queꞌraj cua̱nc saꞌ xkꞌojyi̱nal ru li ma̱c ut incꞌaꞌ queꞌraj cua̱nc saꞌ li cutan xban nak incꞌaꞌ us lix naꞌlebeb.

²⁰ Li ani nequeꞌxba̱nu li ma̱usilal, xicꞌ nequeꞌril lix ya̱lal. Incꞌaꞌ nacuulac chiruheb cua̱nc saꞌ xya̱lal xban nak incꞌaꞌ nequeꞌraj ta̱cꞌutu̱nk li ma̱usilal nequeꞌxba̱nu.

²¹ Abanan li ani cuanqueb saꞌ ti̱quilal, nequeꞌcuulac chiru cua̱nc saꞌ xya̱lal re nak ta̱cꞌutu̱nk nak nequeꞌxba̱nu li cꞌaꞌru naraj li Dios, chan li Jesús.

Laj Juan naxchꞌolob cuiꞌchic xya̱lal nak li Jesús aꞌan li Mesías

²² Chirix chic aꞌin, li Jesús co̱ saꞌ li naꞌajej Judea rochbeneb lix tzolom. Aran queꞌcana cuib oxib cutan ut yo̱ chi cubsi̱nc haꞌ.

²³ Laj Juan laj Cubsihom Haꞌ yo̱ ajcuiꞌ chi cubsi̱nc haꞌ saꞌ li naꞌajej Enón li cuan nachꞌ riqꞌuin li naꞌajej Salim xban nak aran cuan nabal li haꞌ. Ut nequeꞌcuulac li cristian riqꞌuin ut naxcubsi xhaꞌeb.

²⁴ Aꞌin quicꞌulman nak toj ma̱jiꞌ quiqꞌueheꞌ saꞌ tzꞌalam laj Juan.

²⁵ Queꞌoc chixcuechꞌinquil ribeb lix tzolom laj Juan riqꞌuineb laj judío. Queꞌxcuechꞌi ribeb chirix li cubi haꞌ li yo̱queb chixba̱nunquil.

²⁶ Queꞌcuulac lix tzolom laj Juan riqꞌuin ut queꞌxye re: —At tzolonel, li cui̱nk li quicuulac a̱cuiqꞌuin aran jun pacꞌal li nimaꞌ Jordán, li cachꞌolob chak resil chiku, aꞌan yo̱ chi cubsi̱nc haꞌ. Ut chixjunileb li cristian yo̱queb chi cuulac riqꞌuin, chanqueb.

²⁷ Quichakꞌoc laj Juan ut quixye: —Junak cui̱nk ma̱cꞌaꞌ cꞌaꞌru tixba̱nu chi incꞌaꞌ ta qꞌuebil re xban li Dios.

²⁸ La̱ex querabi ajcuiꞌ chak nak quinye nak moco la̱in ta li Cristo. Yal taklanbilin ban chak xbe̱n cua chiru aꞌan chixchꞌolobanquil li resilal.

²⁹ Junak cui̱nk xic re chi sumla̱c cuan li ixakilbej riqꞌuin. Ut li rami̱g cuan aran ut nasahoꞌ saꞌ xchꞌo̱l chirabinquil li naxye li be̱lomej. Li Cristo, aꞌan joꞌ jun li be̱lomej ut la̱in yal joꞌ jun li rami̱g. La̱in nasahoꞌ saꞌ inchꞌo̱l nak yo̱queb chi xic li cristian riqꞌuin xban nak aꞌan li tzꞌakal aj Colonel.

³⁰ Tento nak aꞌan ta̱nima̱nk xcuanquil ut la̱in ta̱cube̱k incuanquil, chan laj Juan.

Li xchal chak saꞌ choxa, aꞌan li kꞌaxal nim xcuanquil

³¹ Ut quixye ajcuiꞌ laj Juan: —Aꞌan xchal chak saꞌ choxa ut kꞌaxal nim xcuanquil saꞌ xbe̱n chixjunil. La̱in quinyoꞌla saꞌ ruchichꞌochꞌ ut rehin ajcuiꞌ li ruchichꞌochꞌ. Ut nina̱tinac chirix li cꞌaꞌru nacꞌulman saꞌ ruchichꞌochꞌ. Li jun li xchal chak saꞌ choxa, aꞌan li kꞌaxal nim xcuanquil saꞌ xbe̱n chixjunil.

³² Ut li cꞌaꞌru quiril ut quirabi, aꞌan li naxchꞌolob xya̱lal. Abanan moco qꞌuiheb ta li nequeꞌpa̱ban re li cꞌaꞌru naxye.

³³ Abanan li ani naxpa̱b li cꞌaꞌru naxye, riqꞌuin aꞌan naxcꞌut nak naxpa̱b nak tzꞌakal ya̱l li cꞌaꞌru yebil xban li Dios.

³⁴ Li Jesucristo, aꞌan taklanbil chak xban li Dios ut naxye li cꞌaꞌru nayeheꞌ re xban li Dios xban nak li Santil Musikꞌej cuan riqꞌuin chi tzꞌakal.

³⁵ Li Acuabej Dios naxra li Ralal ut quixkꞌaxtesi chixjunil saꞌ rukꞌ aꞌan, ut aꞌan chic yal re saꞌ xbe̱n.

³⁶ Li ani napa̱ban re li Cꞌajolbej cuan xyuꞌam chi junelic. Ut li ani incꞌaꞌ napa̱ban re li Cꞌajolbej incꞌaꞌ ta̱cua̱nk xyuꞌam chi junelic. Cuan ban li tojba ma̱c saꞌ xbe̱n, chan laj Juan.