San Juan 21 - Li Santil hu

Li Jesús quixcꞌutbesi rib chiruheb cuukub lix tzolom

¹ Mokon chic quixcꞌutbesi cuiꞌchic rib li Jesús chiruheb lix tzolom chire li palau Tiberias. Joꞌcaꞌin nak quixcꞌut rib chiruheb:

² Chꞌutchꞌu̱queb laj Simón Pedro ut laj Tomás li nayeheꞌ lut re, ut laj Natanael, Caná xtenamit li cuan saꞌ xcue̱nt Galilea. Cuanqueb ajcuiꞌ aran li ralal laj Zebedeo ut cuibeb chic lix tzolom li Jesús.

³ Laj Simón Pedro quixye reheb: —La̱in xic cue chi caribc, chan. —Toxic ajcuiꞌ la̱o cha̱cuix, chanqueb re. Ut queꞌoc saꞌ jun li jucub ut queꞌxnumsi li kꞌojyi̱n chi caribc. Abanan ma̱ jun li car queꞌxchap.

⁴ Nak ac yo̱ chic chi sake̱uc, li Jesús quixcꞌutbesi cuiꞌchic rib chiruheb chire li palau. Abanan eb lix tzolom incꞌaꞌ queꞌxnau nak aꞌan li Jesús.

⁵ Quixye li Jesús reheb: —Ex cualal incꞌajol, ¿ma xechap li car? chan. Eb aꞌan queꞌchakꞌoc ut queꞌxye: —Ma̱ jun xkachap.—

⁶ Li Jesús quixye reheb: —Cutumak le̱ yoy chixcꞌatk li jucub, saꞌ le̱ nim re nak te̱chap li car, chan. Ut queꞌxcut lix yoy saꞌ li haꞌ ut incꞌaꞌ chic queꞌxcuy risinquil xban xqꞌuial li car li queꞌxchap.

⁷ Ut lix tzolom li Jesús, li raro xban, quixye re laj Pedro: —¡Aꞌan li Ka̱cuaꞌ!— Ut laj Pedro, nak quirabi nak aꞌan li Ka̱cuaꞌ, quixqꞌue cuiꞌchic li rakꞌ chirix xban nak quirisi nak qui-oc chi caribc, ut quixcut rib saꞌ li haꞌ re ta̱xic riqꞌuin li Jesús.

⁸ Ut eb lix comon queꞌchal saꞌ li jucub. Yo̱queb chixquelonquil lix yoy nujenak chi car. Moco najt ta cuanqueb chire li palau, yal ocꞌa̱l metro tana.

⁹ Nak queꞌel saꞌ li jucub queꞌril nak cuan jun li xam cꞌu̱bcꞌu. Li Jesús yo̱ chixpombal jun li car saꞌ xbe̱n li ru xam ut cuan ajcuiꞌ caxlan cua riqꞌuin.

¹⁰ Li Jesús quixye reheb: —Cꞌamomak chak cuib oxibak li car li xechap.—

¹¹ Laj Simón Pedro qui-oc saꞌ li jucub ut quixquelo li yoy chi chꞌochꞌel nujenak chi ni̱nki car. Jun ciento riqꞌuin oxlaju roxcꞌa̱l (153) li car cuan saꞌ li yoy. Usta kꞌaxal nabaleb li car cuan chi saꞌ, abanan incꞌaꞌ quipejeꞌ li yoy.

¹² Li Jesús quixye reheb: —Quimkex ut cuaꞌinkex.— Ut ma̱ jun reheb lix tzolom quiraj xpatzꞌbal re ma aꞌan li Ka̱cuaꞌ xban nak ac nequeꞌxnau nak aꞌan li Ka̱cuaꞌ.

¹³ Ut li Jesús quixchap li caxlan cua ut quixqꞌue reheb. Ut quixqꞌue ajcuiꞌ li car.

¹⁴ Aꞌin li rox sut nak quixcꞌutbesi cuiꞌchic rib li Jesús chiruheb lix tzolom nak ac xcuacli cuiꞌchic chi yoꞌyo saꞌ xya̱nkeb li camenak.

Li Jesús quixye re laj Pedro nak ta̱rileb lix carner

¹⁵ Nak ac xeꞌcuaꞌac, li Jesús quixye re laj Simón Pedro: —At Simón, ralalat laj Jonás, ¿ma kꞌaxal niquina̱ra chiruheb aꞌin?— Laj Pedro quixye re: —Ka̱cuaꞌ, la̱at nacanau nak nacatinra, chan. Ut li Jesús quixye re: —Chacuilakeb li cualal incꞌajol li toj kꞌuneb xchꞌo̱l saꞌ lix pa̱ba̱leb joꞌ jun li pastor narileb lix cocꞌ carner.—

¹⁶ Ut li Jesús quixye cuiꞌchic re: —At Simón, ralalat laj Jonás, ¿ma niquina̱ra?— Laj Pedro quixye: —Ka̱cuaꞌ, la̱at nacanau nak nacatinra.— Ut li Jesús quixye re: —Chacuilakeb li cualal incꞌajol joꞌ jun li pastor narileb lix carner, chan.

¹⁷ Ut li Jesús quixpatzꞌ cuiꞌchic re rox sut: —At Simón, ralalat laj Jonás, ¿ma niquina̱ra?— Ut quirahoꞌ saꞌ xchꞌo̱l laj Pedro xban nak li Jesús quixpatzꞌ re rox sut “¿ma niquina̱ra?”. Joꞌcan nak quixye re li Jesús: —Ka̱cuaꞌ, la̱at nacanau chixjunil li cꞌaꞌak re ru. ¡La̱at nacanau nak nacatinra!— Ut li Jesús quixye cuiꞌchic re: —Chacuilakeb li cualal incꞌajol joꞌ jun li pastor narileb lix carner.

¹⁸ Relic chi ya̱l ninye a̱cue nak toj sa̱jat, nacabacꞌ a̱saꞌ a̱junes ut nacatxic yalak bar nacacuaj xic. Abanan nak ac ti̱xakat chic, ta̱yeꞌ la̱ cuukꞌ ut jalan ta̱bacꞌok re ut tatxcꞌam bar incꞌaꞌ nacacuaj xic, chan.

¹⁹ Riqꞌuin li a̱tin aꞌin li quixye li Jesús, yo̱ chixyebal chanru nak ta̱camsi̱k laj Pedro. Ut riqꞌuin xcamic tixqꞌue xlokꞌal li Dios. Nak ac xye aꞌin, li Jesús quixye re laj Pedro: —China̱ta̱ke, chan re.

Laj Pedro quixpatzꞌ cꞌaꞌru tixcꞌul li tzolom li raro xban li Jesús

²⁰ Laj Pedro quixsukꞌisi rib ut quiril lix tzolom li Jesús, li raro xban, yo̱ chi xic chirixeb. Aꞌan lix tzolom li quipatzꞌoc re li Jesús nak yo̱queb chi cuaꞌac, “¿Ani ta̱kꞌaxtesi̱nk a̱cue, at Ka̱cuaꞌ?”

²¹ Nak laj Pedro quiril aꞌan, quixpatzꞌ re li Jesús: —Ut li cui̱nk aꞌan, Ka̱cuaꞌ, ¿ma tixcꞌul joꞌ tincꞌul la̱in? chan.

²² Li Jesús quixye re: —Cui la̱in tincuaj nak yoꞌyo̱k aꞌan toj tincꞌulu̱nk cuiꞌchic, ¿cꞌaꞌru ta̱cuaj re la̱at? La̱at qꞌue a̱chꞌo̱l chinta̱kenquil, chan li Jesús re laj Pedro.

²³ Joꞌcan nak qui-el resil saꞌ xya̱nkeb laj pa̱banel nak li jun aꞌan incꞌaꞌ ta̱ca̱mk. Abanan ma̱cuaꞌ joꞌcan quixye li Jesús. Incꞌaꞌ quixye nak incꞌaꞌ ta̱ca̱mk. Caꞌaj cuiꞌ quixye, “Cui la̱in tincuaj nak yoꞌyo̱k toj tincꞌulu̱nk, ¿cꞌaꞌru ta̱cuaj re la̱at?”

²⁴ Ut li tzolom aꞌan, aꞌan la̱in laj Juan. La̱in quin-iloc re li cꞌaꞌru quicꞌulman ut xinchꞌolob xya̱lal saꞌ li hu aꞌin. Ut la̱o nakanau nak tzꞌakal ya̱l li cꞌaꞌru xintzꞌi̱ba saꞌ li hu aꞌin.

²⁵ Toj cuan chic nabal li cꞌaꞌak re ru quilajxba̱nu li Jesús. Cui ta tzꞌi̱banbil retalil chi xjunju̱nkal, la̱in ninye nak ma̱ jokꞌe raj ta̱tzꞌaklok li ruchichꞌochꞌ chokꞌ xnaꞌaj li hu li ta̱tzꞌi̱bama̱nk cuiꞌ retalil. Joꞌcan taxak.