San Juan 20 - Li Santil hu

Li Jesús quicuacli cuiꞌchic chi yoꞌyo saꞌ xya̱nkeb li camenak

¹ Saꞌ li xbe̱n li cutan re li xama̱n nak toj ma̱jiꞌ nasake̱u co̱ lix María Magdala xtenamit saꞌ li mukleba̱l. Nak quicuulac cuan cuiꞌ li mukleba̱l, quixqꞌue retal nak ac isinbil chic li nimla pec li queꞌxqꞌue chire li mukleba̱l.

² Co̱ saꞌ a̱nil riqꞌuin laj Simón Pedro ut riqꞌuin li jun chic xtzolom li Jesús li raro xban, ut quixye reheb: —Xeꞌrisi li Ka̱cuaꞌ saꞌ li mukleba̱l ut incꞌaꞌ nakanau bar ta xeꞌxqꞌue, chan.

³ Co̱eb saꞌ li mukleba̱l laj Pedro rochben li jun chic xtzolom li Jesús.

⁴ Co̱eb saꞌ a̱nil xcabichaleb. Ut lix tzolom jun chic kꞌaxal cau quia̱linac chiru laj Pedro ut aꞌan xbe̱n cua quicuulac saꞌ li mukleba̱l.

⁵ Quixcꞌutzub rib chi iloc chi saꞌ. Quiril li tꞌicr li queꞌxlan cuiꞌ li Jesús. Abanan incꞌaꞌ qui-oc toj chi saꞌ.

⁶ Quicuulac laj Pedro toj chi ixbej. Ticto qui-oc chi saꞌ li mukleba̱l ut quiril li tꞌicr sokꞌso aran.

⁷ Cuan ajcuiꞌ aran li tꞌicr li queꞌxbacꞌ cuiꞌ lix jolom li Jesús. Moco cuan ta saꞌ xya̱nk li tꞌicr. Jalan basbo cuiꞌ xjunes.

⁸ Ut qui-oc ajcuiꞌ chi saꞌ li mukleba̱l li tzolom li quicuulac xbe̱n cua. Quiril li tꞌicr aran ut quixpa̱b nak ac xcuacli cuiꞌchic chi yoꞌyo li Jesús.

⁹ Toj ma̱jiꞌ queꞌxtau ru chi tzꞌakal li tzꞌi̱banbil saꞌ li Santil Hu li naxye nak tento ta̱cuacli̱k cuiꞌchic chi yoꞌyo saꞌ xya̱nkeb li camenak.

¹⁰ Ut eb lix tzolom queꞌsukꞌi cuiꞌchic saꞌ li cab li cuanqueb cuiꞌ.

Li Jesús quixcꞌutbesi rib chiru lix María, Magdala xtenamit

¹¹ Lix María cuan chire li mukleba̱l. Yo̱ chi ya̱bac. Quixcꞌutzub rib chi iloc chi saꞌ li mukleba̱l.

¹² Quiril cuib li ángel sak li rakꞌeb. Cꞌojcꞌo̱queb aran bar quicuan cuiꞌ li Jesús. Jun cuan saꞌ xjolom ut jun cuan chi rok.

¹³ Queꞌxye re: —At ixk, ¿cꞌaꞌut nak yo̱cat chi ya̱bac?— Lix María quixye reheb: —Yo̱quin chi ya̱bac xban nak xeꞌrisi li Ka̱cuaꞌ arin ut incꞌaꞌ ninnau bar xeꞌxqꞌue.—

¹⁴ Saꞌ li ho̱nal aꞌan, lix María qui-iloc chirix ut quiril li Jesús xakxo aran, abanan incꞌaꞌ quixnau nak aꞌan ta li Jesús.

¹⁵ Li Jesús quixye re: —At ixk, ¿cꞌaꞌut nak yo̱cat chi ya̱bac? ¿Ani nacasicꞌ? chan. Saꞌ xchꞌo̱l lix María nak aꞌan aj ilol acui̱mk ut quixye re: —Ka̱cuaꞌ, cui la̱at xatcꞌamoc re, ba̱nu usilal, ye cue bar xaqꞌue re nak tincꞌam, chan.

¹⁶ Li Jesús quixye re: —¡María!— Quixsukꞌisi rib lix María ut quixye saꞌ ra̱tinoba̱l aj hebreo: —Raboni.— (Chi jalbil ru naraj naxye aj tzolonel).

¹⁷ Li Jesús quixye re: —Mina̱bay. Canabin chi xic. Tento nak tinxic riqꞌuin lin Yucuaꞌ. Ayu ut ye reheb lin herma̱n nak xic cue riqꞌuin lin Yucuaꞌ. Aꞌan ajcuiꞌ le̱ yucuaꞌ la̱ex. Aꞌan lin Dios ut aꞌan ajcuiꞌ le̱ Dios la̱ex, chan li Jesús.

¹⁸ Co̱ lix María ut quixye reheb lix tzolom li Jesús nak quiril ru li Ka̱cuaꞌ Jesús ut quixye ajcuiꞌ reheb chixjunil li quiyeheꞌ re xban.

Li Jesús quixcꞌutbesi rib chiruheb lix tzolom

¹⁹ Saꞌ li xbe̱n cutan re li xama̱n, nak ac oc re li kꞌojyi̱n, queꞌxchꞌutub ribeb lix tzolom li Jesús. Tzꞌaptzꞌo chi us lix puertil li cab li chꞌutchꞌu̱queb cuiꞌ xban nak queꞌxucuac xbaneb li nequeꞌtaklan saꞌ xbe̱neb laj judío. Xaka̱mil li Jesús chiruheb ut quixye reheb: —Chicua̱nk taxak li tuktu̱quil usilal e̱riqꞌuin, chan reheb.

²⁰ Ut quixcꞌut chiruheb li rukꞌ ut lix cꞌatk xsaꞌ li quihopeꞌ. Cꞌajoꞌ nak queꞌsahoꞌ saꞌ xchꞌo̱leb lix tzolom nak queꞌril cuiꞌchic ru li Ka̱cuaꞌ.

²¹ Li Jesús quixye cuiꞌchic reheb: —Chicua̱nk taxak li tuktu̱quil usilal e̱riqꞌuin. Joꞌ nak xinixtakla chak lin Yucuaꞌ la̱in, joꞌcan ajcuiꞌ nak texintakla la̱ex, chan.

²² Ut nak quixye aꞌan, quirapuheb ut quixye reheb: —Cꞌulumak li Santil Musikꞌej.

²³ Li ani te̱cuy xma̱c la̱ex, ta̱cuyekꞌ ajcuiꞌ xma̱c xban li Dios. Ut li ani incꞌaꞌ te̱cuy xma̱c la̱ex, incꞌaꞌ ajcuiꞌ ta̱cuyekꞌ xma̱c xban li Dios, chan li Jesús.

Nak quiril li retalil li claux saꞌ rukꞌ li Jesús, laj Tomás quixpa̱b nak yoꞌyo chic

²⁴ Laj Tomás, aꞌan jun reheb lix tzolom cablaju, li nequeꞌxye ajcuiꞌ lut re. Aꞌan ma̱ ani saꞌ xya̱nkeb nak quixcꞌutbesi rib li Jesús chiruheb.

²⁵ Li rech aj tzolonelil queꞌxye re: —Xkil ru li Ka̱cuaꞌ, chanqueb re. Abanan laj Tomás quixye reheb: —Cui incꞌaꞌ tincuil li retalil li claux saꞌ rukꞌ ut cui incꞌaꞌ tinqꞌue li ruꞌuj cuukꞌ saꞌ xnaꞌaj li claux ut cui incꞌaꞌ tinchꞌic li cuukꞌ saꞌ xcꞌatk xsaꞌ, la̱in incꞌaꞌ tinpa̱b nak xcuacli cuiꞌchic chi yoꞌyo, chan laj Tomás.

²⁶ Ac xnumeꞌ chic cuukub cutan nak queꞌxchꞌutub cuiꞌchic ribeb lix tzolom li Jesús. Laj Tomás cuan saꞌ xya̱nkeb. Tzꞌaptzꞌo̱queb lix puertil li cab chi us. Nak queꞌril ac xaka̱mil li Jesús chiruheb ut quixye reheb: —Chicua̱nk taxak li tuktu̱quil usilal e̱riqꞌuin, chan.

²⁷ Tojoꞌnak quixye re laj Tomás: —Il chi us li cuukꞌ. Chꞌic li ruꞌuj la̱ cuukꞌ arin saꞌ xnaꞌaj li claux. Ut chꞌic la̱ cuukꞌ saꞌ xcꞌatk lin saꞌ. Chatpa̱ba̱nk. ¿Cꞌaꞌut nak incꞌaꞌ xapa̱b nak xincuacli cuiꞌchic chi yoꞌyo?—

²⁸ Ut laj Tomás quixye re: —¡At Ka̱cuaꞌ, at inDios!—

²⁹ Li Jesús quixye re: —La̱at toj xacuil cuu, tojoꞌnak xina̱pa̱b. Abanan la̱in ninye a̱cue, us xak reheb li nequeꞌpa̱ban cue chi incꞌaꞌ xeꞌril cuu, chan li Jesús re.

Li hu aꞌin tzꞌi̱banbil re nak te̱nau nak li Jesús, aꞌan li Cristo li Ralal li Dios

³⁰ Nabal chic li milagro quixba̱nu li Jesús chiruheb lix tzolom li incꞌaꞌ tzꞌi̱banbil retalil saꞌ li hu aꞌin.

³¹ Abanan li joꞌ qꞌuial tzꞌi̱banbil retalil saꞌ li hu aꞌin, quitzꞌi̱ba̱c re nak te̱pa̱b nak li Jesús, aꞌan li Cristo. Aꞌan li Ralal li Dios. Quitzꞌi̱ba̱c re nak riqꞌuin xpa̱banquil ta̱cua̱nk e̱yuꞌam chi junelic saꞌ xcꞌabaꞌ aꞌan.