San Juan 2 - Li Santil hu

Li Jesús quixcꞌutbesi lix cuanquil nak quixsukꞌisi li haꞌ chokꞌ vino saꞌ jun li sumla̱c

¹ Yo̱ chic rox cutan xcꞌulbal a cꞌaꞌak re ru aꞌin nak quicuan jun li sumla̱c saꞌ li tenamit Caná re Galilea. Cuan lix naꞌ li Jesús aran.

² Ut quibokeꞌ saꞌ li sumla̱c li Jesús rochbeneb lix tzolom.

³ Nak ac yo̱ li ninkꞌe, qui-osoꞌ li vino. Ut lix naꞌ li Jesús quixye re: —Ma̱cꞌaꞌ chic li vino, chan re.

⁴ Ut li Jesús quixye re: —¿Cꞌaꞌut nak nacatchal xyebal cue aꞌan? Toj ma̱jiꞌ xkꞌehil nak tincꞌutbesi lin cuanquil, chan re lix naꞌ.

⁵ Lix naꞌ li Jesús quixye reheb li yo̱queb chi cꞌanjelac: —Cheba̱nuhak li cꞌaꞌru tixye e̱re, chan.

⁶ Ut aran cuanqueb cuakib li ni̱nki cuc yi̱banbil riqꞌuin pec. Aꞌan nacꞌanjelac chokꞌ xnaꞌaj xhaꞌeb laj judío re xchꞌajobresinquil ribeb joꞌ naxye saꞌ lix chakꞌrabeb. Li junju̱nk chi cuc aꞌan naxcꞌam oxib ni̱nki cuc chi haꞌ.

⁷ Li Jesús quixye reheb li yo̱queb chi cꞌanjelac aran nak teꞌxnujtesi li ni̱nki cuc riqꞌuin haꞌ. Ut eb aꞌan queꞌxqꞌue li haꞌ saꞌ li cuc toj retal queꞌnujac.

⁸ Quixye cuiꞌchic li Jesús reheb: —Lecomak caꞌchꞌinak ut te̱cꞌam riqꞌuin li najolomin re li ninkꞌe, chan. Ut eb aꞌan queꞌxba̱nu joꞌ quiyeheꞌ reheb xban li Jesús.

⁹ Li haꞌ ac sukꞌisinbil chokꞌ vino xban li Jesús nak queꞌxcꞌam riqꞌuin li najolomin re li ninkꞌe. Aꞌan incꞌaꞌ quixnau bar ta xchal li vino. Caꞌaj cuiꞌ eb laj cꞌanjel li queꞌlecoc chak re queꞌxnau. Li najolomin re li ninkꞌe quixyal li vino. Tojoꞌnak quixbok li be̱lomej ut quixye re:

¹⁰ —Chixjunileb li nequeꞌninkꞌei̱c xbe̱n cua nequeꞌxjecꞌ li cha̱bil vino. Ut nak ac xeꞌucꞌac chi nabal li ulaꞌ, nequeꞌxjecꞌ li incꞌaꞌ mas cha̱bil. Abanan la̱at xacꞌu̱la li cha̱bil vino ut toj anakcuan xacuisi chak, chan re.

¹¹ Aꞌan aꞌin li xbe̱n milagro li quixba̱nu li Jesús nak quixsukꞌisi li haꞌ chokꞌ vino aran Caná re Galilea. Riqꞌuin li milagro aꞌin quixcꞌutbesi nak cuan xcuanquil ut eb lix tzolom queꞌxpa̱b nak li Jesús aꞌan li Ralal li Dios.

¹² Chirix chic aꞌan co̱ Capernaum li Jesús rochben lix naꞌ ut eb li ri̱tzꞌin. Queꞌco̱eb ajcuiꞌ lix tzolom ut queꞌcana aran cuib oxib cutan.

Li Jesús quirisiheb laj cꞌay saꞌ li templo

¹³ Nak ac yo̱ chi cuulac xkꞌehil li Pascua, lix ninkꞌe eb laj judío, li Jesús quicuulac Jerusalén.

¹⁴ Quicuulac saꞌ li templo ut aran quixtauheb li yo̱queb chi cꞌayi̱nc bo̱yx, carner ut paloma. Chunchu̱queb ajcuiꞌ aran laj jalol ru tumin.

¹⁵ Li Jesús quixyi̱b jun lix tzꞌu̱m riqꞌuin cꞌa̱m ut quixyolesiheb. Quirisiheb chixjunileb chirix cab rochbeneb lix xul. Quixpaji lix tumin eb laj jalol ru tumin ut quixbalkꞌusi lix me̱xeb.

¹⁶ Quixye reheb li yo̱queb chi cꞌayi̱nc paloma: —Isihomak chixjunil aꞌin saꞌ li templo. Me̱sukꞌisi chokꞌ cꞌayil li rochoch lin Yucuaꞌ, chan li Jesús reheb.

¹⁷ Tojoꞌnak quinak saꞌ xchꞌo̱leb lix tzolom nak tzꞌi̱banbil retalil saꞌ li Santil Hu li naxye chi joꞌcaꞌin: La̱in ninra la̱ cuochoch ut narahoꞌ saꞌ inchꞌo̱l nak nequeꞌxba̱nu li incꞌaꞌ us saꞌ la̱ cuochoch. (Sal. 69:9)

¹⁸ Ut eb laj judío queꞌxye re li Jesús: —¿Cꞌaꞌru retalil ta̱cꞌut chiku re nak takanau nak cuan a̱cuanquil chirisinquileb saꞌ li templo? chanqueb re.

¹⁹ Quichakꞌoc li Jesús ut quixye reheb: —Jucꞌumak li templo aꞌin ut chiru oxib cutan tincuaclesi cuiꞌchic chi acꞌ, chan reheb.

²⁰ Eb laj judío queꞌchakꞌoc ut queꞌxye re li Jesús: —Chiru cuakib roxcꞌa̱l (46) chihab queꞌcablac re xyi̱banquil li templo aꞌin. ¿Ma nacacꞌoxla la̱at nak yal chiru oxib cutan ta̱cuaclesi cuiꞌchic? chanqueb.

²¹ Abanan li Jesús incꞌaꞌ yo̱ chi a̱tinac chirix li templo. Yo̱ ban chi a̱tinac chirix lix camic ut lix cuaclijic cuiꞌchic chi yoꞌyo.

²² Joꞌcan nak ac xcuacli cuiꞌchic chi yoꞌyo saꞌ xya̱nkeb li camenak, queꞌnak saꞌ xchꞌo̱leb lix tzolom li cꞌaꞌru quixye li Jesús nak toj ma̱jiꞌ nacam. Ut queꞌxpa̱b li cꞌaꞌru tzꞌi̱banbil chak najter saꞌ li Santil Hu ut queꞌxpa̱b ajcuiꞌ li cꞌaꞌru quiyeheꞌ reheb xban li Jesús.

Li Jesús naxnau chanru xnaꞌleb li junju̱nk

²³ Nak li Jesús cuan aran Jerusalén chixnumsinquil li ninkꞌe Pascua, nabaleb queꞌpa̱ban re xban nak queꞌril li milagro li quilajxba̱nu.

²⁴ Abanan li Jesús incꞌaꞌ quixcꞌojob xchꞌo̱l riqꞌuineb xban nak naxnau chanru lix cꞌaꞌuxeb.

²⁵ Incꞌaꞌ tento nak ta̱chꞌoloba̱k chiru chanru lix cꞌaꞌuxeb xban nak ac naxnau chanru lix naꞌleb li junju̱nk.