San Juan 14 - Li Santil hu

Li ani napa̱ban re li Jesús naxpa̱b ajcuiꞌ li Dios Acuabej

¹ Misach e̱chꞌo̱l chi cꞌoxlac. Chepa̱b li Dios ut chine̱pa̱b ajcuiꞌ la̱in.

² Saꞌ rochoch lin Yucuaꞌ nabal li naꞌajej cuan. Cui ta ma̱cꞌaꞌ li naꞌajej, ac xinye raj e̱re. La̱in xic cue chixcauresinquil e̱naꞌaj.

³ Nak ac xya̱loꞌ le̱ naꞌaj, tincha̱lk cuiꞌchic ut texincꞌam cuiqꞌuin re nak bar cua̱nkin la̱in, aran ajcuiꞌ cua̱nkex la̱ex.

⁴ La̱ex nequenau lix behil li naꞌajej li xic cuiꞌ cue, chan li Jesús.

⁵ Laj Tomás quixye re: —At Ka̱cuaꞌ, incꞌaꞌ nakanau bar xic a̱cue. ¿Chan ta cuiꞌ ru nak takanau li be? chan.

⁶ Li Jesús quixye re: —La̱in aj cꞌamol be che̱ru. La̱in ninchꞌolob lix ya̱lal li Dios ut la̱in ninqꞌuehoc junelic yuꞌam. Ma̱ ani ta̱ru̱k ta̱oc riqꞌuin lin Yucuaꞌ cui incꞌaꞌ tinixpa̱b la̱in.

⁷ Li ani naxnau cuu la̱in naxnau ajcuiꞌ ru lin Yucuaꞌ. Chalen anakcuan nequenau chic ru lin Yucuaꞌ ut xeril ru, chan li Jesús.

⁸ Laj Felipe quixye re: —Ka̱cuaꞌ, cꞌutbesi chiku li Yucuaꞌbej ut ta̱cꞌojla̱k kachꞌo̱l, chan.

⁹ Li Jesús quixye re: —At Felipe, ac junxil nin-oc saꞌ e̱ya̱nk. ¿Ma toj ma̱jiꞌ nequenau cuu? Li ani nanaꞌoc cuu la̱in, aꞌan naxnau ajcuiꞌ ru li Yucuaꞌbej. ¿Cꞌaꞌut nak nacaye cue, “Cꞌut chiku li Yucuaꞌbej?”

¹⁰ Felipe, ¿ma incꞌaꞌ nacapa̱b nak la̱in ut li Yucuaꞌbej junaj ku chi kibil kib? Li cꞌaꞌru xinye e̱re moco yal injunes ta xinye. Li Yucuaꞌbej cuan cuiqꞌuin, ut aꞌan nacꞌutuc chicuu li cꞌaꞌru ninba̱nu.

¹¹ Chepa̱b nak la̱in cuanquin riqꞌuin li Yucuaꞌbej ut aꞌan cuan cuiqꞌuin. Junaj ku chi kibil kib. Cui incꞌaꞌ niquine̱pa̱b xban li cꞌaꞌru ninye, chine̱pa̱bak xbaneb li milagro li yo̱quin chixba̱nunquil.

¹² Relic chi ya̱l ninye e̱re, li ani napa̱ban cue la̱in, aꞌan tixba̱nu li cꞌanjel ninba̱nu la̱in. Ut kꞌaxal cuiꞌchic nabal li tixba̱nu chiru li xinba̱nu la̱in xban nak la̱in xic cue riqꞌuin li Yucuaꞌbej.

¹³ Chixjunil li te̱tzꞌa̱ma saꞌ incꞌabaꞌ, la̱in tinqꞌue e̱re re nak ta̱nima̱k xlokꞌal li Yucuaꞌbej saꞌ incꞌabaꞌ la̱in.

¹⁴ Joꞌcan ut nak yalak cꞌaꞌru te̱tzꞌa̱ma saꞌ incꞌabaꞌ, la̱in tinqꞌue e̱re.

Li Jesús quixye nak tixtakla li Santil Musikꞌej re ta̱cua̱nk riqꞌuineb li ralal xcꞌajol

¹⁵ Cui niquine̱ra, cheba̱nuhak joꞌ xexinchakꞌrabi cuiꞌ.

¹⁶ La̱in tintzꞌa̱ma chiru lin Yucuaꞌ nak tixqꞌue e̱re li Santil Musikꞌej. Aꞌan ta̱cꞌojoba̱nk e̱chꞌo̱l ut aꞌan ta̱tenkꞌa̱nk e̱re. Aꞌan ta̱cua̱nk e̱riqꞌuin chi junelic.

¹⁷ Ut aꞌan ajcuiꞌ li Santil Musikꞌej li ta̱cꞌutuk re lix ya̱lal che̱ru chirix li Dios. Li incꞌaꞌ niquineꞌxpa̱b incꞌaꞌ naru nacuan li Santil Musikꞌej riqꞌuineb xban nak incꞌaꞌ nequeꞌxnau ani aꞌan, chi moco nequeꞌxqꞌue retal li cꞌaꞌru naxba̱nu li Santil Musikꞌej. Abanan la̱ex nequenau ani aꞌan xban nak aꞌan cuan saꞌ e̱ya̱nk anakcuan ut ta̱cua̱nk e̱riqꞌuin chi junelic.

¹⁸ Nak tinxic incꞌaꞌ texincanab e̱junes. Tincha̱lk cuiꞌchic e̱riqꞌuin.

¹⁹ Cuulac re xkꞌehil nak incꞌaꞌ chic teꞌril cuu li incꞌaꞌ nequeꞌpa̱ban cue. Abanan la̱ex te̱ril cuu. Ut xban nak yoꞌyo̱kin la̱in, yoꞌyo̱kex ajcuiꞌ la̱ex.

²⁰ Toj saꞌ li cutan aꞌan la̱ex te̱qꞌue retal nak li Yucuaꞌbej cuan cuiqꞌuin ut la̱in cuanquin riqꞌuin aꞌan. Junaj ku chi kibil kib. Ut la̱ex cua̱nkex cuiqꞌuin ut la̱in cua̱nkin e̱riqꞌuin.

²¹ Li ani naxcꞌul lin chakꞌrab ut naxba̱nu li naxye, aꞌan li narahoc cue. Li ani narahoc cue naraheꞌ ajcuiꞌ xban lin Yucuaꞌ. Ut la̱in tinra ajcuiꞌ aꞌan ut tincꞌutbesi cuib chiru, chan li Jesús reheb lix tzolom.

²² Laj Judas jun chic, li ma̱cuaꞌ laj Judas Iscariote, quixye re: —Ka̱cuaꞌ, ¿chanru nak ta̱cꞌutbesi a̱cuib chiku la̱o, ut incꞌaꞌ ta̱cꞌutbesi a̱cuib chiruheb li incꞌaꞌ nequeꞌpa̱ban a̱cue? chan.

²³ Quichakꞌoc li Jesús ut quixye re: —La̱in tincꞌutbesi cuib chiruheb li nequeꞌrahoc cue ut nequeꞌxba̱nu li cꞌaꞌru ninye. Eb aꞌan teꞌrahekꞌ xban lin Yucuaꞌ. La̱in ut lin Yucuaꞌ toxic riqꞌuineb ut tocua̱nk riqꞌuineb.

²⁴ Li ani incꞌaꞌ narahoc cue incꞌaꞌ naxba̱nu li cꞌaꞌru ninye. Li cꞌaꞌru xinye e̱re, incꞌaꞌ xinye yal injunes. Lin Yucuaꞌ li quitaklan chak cue, aꞌan li nacꞌutuc chicuu cꞌaꞌru tinye.

²⁵ Yo̱quin chixyebal e̱re aꞌin nak toj cuanquin saꞌ e̱ya̱nk.

²⁶ Li Santil Musikꞌej li tixtakla chak li Yucuaꞌbej chokꞌ cuu̱chil, aꞌan ta̱tenkꞌa̱nk e̱re ut aꞌan ta̱cꞌutuk che̱ru chixjunil li cꞌaꞌak re ru li incꞌaꞌ nequetau ru. Ut aꞌan tixjultica e̱re chixjunil li cꞌaꞌru xinye e̱re.

²⁷ La̱in tincanab li tuktu̱quil usilal e̱riqꞌuin nak tinxic. Li tuktu̱quil usilal li tinqꞌue e̱re moco joꞌ ta li nequeꞌxqꞌue li cuanqueb saꞌ ruchichꞌochꞌ. La̱in tinqꞌue xtuktu̱quilal le̱ chꞌo̱l. Mexcꞌoxlac chi moco texxucuak.

²⁸ Ac xinye e̱re nak tinxic, ut tincha̱lk cuiꞌchic. Cui ya̱l nak niquine̱ra, ta̱sahokꞌ raj saꞌ e̱chꞌo̱l nak tinxic riqꞌuin lin Yucuaꞌ, xban nak aꞌan kꞌaxal nim xcuanquil chicuu la̱in.

²⁹ La̱in yo̱quin chixyebal e̱re aꞌin nak toj ma̱jiꞌ nacꞌulman. Nak ta̱cꞌulma̱nk li cꞌaꞌru xinye, la̱ex te̱pa̱b nak ya̱l li cꞌaꞌru xinye e̱re.

³⁰ Incꞌaꞌ chic ta̱ru̱k tina̱tinak chi nabal e̱riqꞌuin xban nak yo̱ chi cha̱lc li nataklan saꞌ li ruchichꞌochꞌ, usta aꞌan ma̱cꞌaꞌ xcuanquil saꞌ inbe̱n la̱in.

³¹ La̱in yo̱quin chixba̱nunquil chixjunil li quixye cue lin Yucuaꞌ re nak chixjunileb li cuanqueb saꞌ ruchichꞌochꞌ teꞌxqꞌue retal nak la̱in ninra li Yucuaꞌbej. Anakcuan yoꞌkeb. E̱lko saꞌ li naꞌajej aꞌin, chan li Jesús.