San Juan 1 - Li Santil hu

Li Jesucristo quitzꞌejcualoꞌ ut quicꞌulun saꞌ ruchichꞌochꞌ

¹ Chalen chak saꞌ xticlajic li ruchichꞌochꞌ ac cuan chak li A̱tin. Li A̱tin cuan chak riqꞌuin li Dios ut aꞌan tzꞌakal Dios. Li A̱tin, aꞌan li Cristo.

² Li Cristo ac cuan chak saꞌ xticlajic riqꞌuin li Dios.

³ Chixjunil li cꞌaꞌru cuan, li Dios quixyi̱b saꞌ xcꞌabaꞌ li Cristo. Ut ma̱cꞌaꞌ cꞌaꞌak re ru cuan chi ma̱cuaꞌ aꞌan ta li quiyi̱ban re.

⁴ Li Cristo, aꞌan li naqꞌuehoc junelic yuꞌam. Ut li yuꞌam li naxqꞌue naxcutanobresi lix cꞌaꞌuxeb li cristian.

⁵ Li Cristo naxcutanobresi lix cꞌaꞌuxeb li toj cuanqueb saꞌ xkꞌojyi̱nal ru li ma̱c. Li ma̱c incꞌaꞌ quinumta saꞌ xbe̱n li Cristo.

⁶ Quicuan jun li cui̱nk aj Juan xcꞌabaꞌ taklanbil chak xban li Dios.

⁷ Quitakla̱c chak chixchꞌolobanquil xya̱lal nak li Jesús, aꞌan li cutan saken re nak chixjunileb li ani teꞌabi̱nk re, teꞌpa̱ba̱nk.

⁸ Li Cristo, aꞌan li tzꞌakal cutan saken. Ma̱cuaꞌ laj Juan. Laj Juan quicꞌulun chixchꞌolobanquil xya̱lal ani li tzꞌakal cutan saken.

⁹ Aꞌan li tzꞌakal cutan saken li quicꞌulun saꞌ ruchichꞌochꞌ chixcutanobresinquil xcꞌaꞌuxeb chixjunileb li cristian.

¹⁰ Li Cristo quicuan saꞌ ruchichꞌochꞌ. Abanan li cuanqueb saꞌ ruchichꞌochꞌ incꞌaꞌ queꞌxqꞌue retal chi tzꞌakal nak aꞌan li Cristo usta saꞌ xcꞌabaꞌ aꞌan quiyi̱ba̱c li ruchichꞌochꞌ.

¹¹ Quicꞌulun saꞌ lix tenamit. Abanan incꞌaꞌ quicꞌuleꞌ saꞌ xya̱lal xbaneb.

¹² Abanan chixjunileb li queꞌcꞌuluc re ut queꞌpa̱ban re nak aꞌan taklanbil chak xban li Dios, aꞌaneb li quixcꞌuleb chokꞌ ralal xcꞌajol li Dios.

¹³ Queꞌoc chokꞌ ralal xcꞌajol li Dios xban nak joꞌcan quiraj li Dios. Moco yal xcꞌaꞌux cui̱nk ta. Moco joꞌ ta nak nayoꞌla junak cristian arin saꞌ ruchichꞌochꞌ. Yoꞌlajenakeb ban chic saꞌ musikꞌej ut ralal xcꞌajoleb chic li Dios.

¹⁴ Li Jesucristo quitzꞌejcualoꞌ ut tzꞌakal cui̱nk nak quicuan arin saꞌ kaya̱nk. Cꞌajoꞌ li rusilal ut aꞌan naxcꞌut lix ya̱lal. Aꞌan li Ralal li Dios li junaj chi ribil ut la̱o xkil lix lokꞌal.

¹⁵ Laj Juan laj Cubsihom Haꞌ quixchꞌolob xya̱lal chi cau xya̱b xcux ut quixye: —Aꞌan aꞌin li quinchꞌolob chak xya̱lal che̱ru nak quinye e̱re: Mokon ta̱cha̱lk jun kꞌaxal nim xcuanquil chicuu la̱in xban nak aꞌan ac cuan ajcuiꞌ chak junxil chicuu la̱in, chan.

¹⁶ Xban xnimal rusilal, kꞌaxal numtajenak li kosobtesinquil naxqꞌue.

¹⁷ Li Dios quixqꞌue li chakꞌrab re laj Moisés re nak tixcꞌut chiku. Aban lix ya̱lal chirix li Dios ut li rusilal quixcꞌutbesi chiku li Jesucristo.

¹⁸ Ma̱ ani qui-iloc ru li Dios. Caꞌaj cuiꞌ li Dios Cꞌajolbej, aꞌan tzꞌakal li cuan chi sum a̱tin riqꞌuin li Dios Acuabej. Ut aꞌan li quicꞌutbesin chiku chanru li Dios.

Laj Juan laj Cubsihom Haꞌ quixye nak aꞌan ma̱cuaꞌ li Cristo li yechiꞌinbil xban li Dios

¹⁹ Eb laj judío li cuanqueb Jerusalén queꞌxtaklaheb laj tij ut eb laj levita chixpatzꞌbal re laj Juan, ut queꞌxye re: —¿Anihat la̱at? ¿Ma la̱at li Cristo li taklanbil chak xban li Dios? chanqueb re.

²⁰ Quichakꞌoc laj Juan ut quixye reheb: —La̱in ma̱cuaꞌin li Cristo, chan.

²¹ Ut queꞌxye cuiꞌchic re: —Ye ke anihat la̱at. ¿Ma la̱at laj Elías?— Quichakꞌoc laj Juan ut quixye: —Moco la̱in ta, chan. —¿Ma la̱at li profeta li ta̱cha̱lk? chanqueb cuiꞌchic re. —Incꞌaꞌ, chan laj Juan.

²² —Ye ke chi tzꞌakal anihat re nak ta̱ru̱k takaye reheb li xeꞌtaklan chak ke. Tento nak ta̱ye ke anihat, chanqueb.

²³ Quixye laj Juan: —La̱in li yo̱quin chixchꞌolobanquil lix ya̱lal chiruheb li cristian chi cau xya̱b incux saꞌ li chaki chꞌochꞌ ut ninye resil li quixye li profeta Isaías: Yi̱bomak le̱ yuꞌam ut yoꞌon cua̱nkex chixcꞌulbal li Ka̱cuaꞌ joꞌ nak nequeꞌxyi̱b li be re xcꞌulbal junak li nim xcuanquil.— (Isa. 40:3)

²⁴ Li queꞌtakla̱c chi a̱tinac riqꞌuin laj Juan, aꞌan xcomoneb laj fariseo.

²⁵ Queꞌxye cuiꞌchic re laj Juan: —¿Cꞌaꞌut nak nacatcubsin haꞌ cui ma̱cuaꞌ la̱at li Cristo, chi moco la̱at laj Elías, chi moco la̱at li profeta? chanqueb re laj Juan.

²⁶ Quichakꞌoc cuiꞌchic laj Juan ut quixye: —La̱in nincubsin haꞌ riqꞌuin haꞌ. Abanan cuan jun saꞌ e̱ya̱nk la̱ex incꞌaꞌ nequenau chi tzꞌakal ani aꞌan.

²⁷ Aꞌan li ta̱oc chi cꞌanjelac mokon. Kꞌaxal nim xcuanquil aꞌan chicuu la̱in. Moco incꞌulub ta xba̱nunquil lix cꞌanjel aꞌan xban nak cubenak incuanquil. Joꞌcan nak moco incꞌulub ta xhitbal xcꞌa̱mal lix xa̱b, chan.

²⁸ Chixjunil a cꞌaꞌak re ru aꞌin quicꞌulman saꞌ li naꞌajej Betania li cuan jun pacꞌal li nimaꞌ Jordán, li yo̱ cuiꞌ chi cubsi̱nc haꞌ laj Juan.

Laj Juan quixjuntakꞌe̱ta li Jesús riqꞌuin jun li carner

²⁹ Joꞌ cuulajak chic laj Juan quiril li Jesús yo̱ chak chi cha̱lc riqꞌuin ut quixye: —Ilomak. Cueꞌ chak li Cristo, li taklanbil chak xban li Dios. Chanchan jun li carner. Ta̱camsi̱k re xtojbal rix lix ma̱queb li cuanqueb saꞌ ruchichꞌochꞌ.

³⁰ Aꞌan aꞌin li quina̱tinac chak chirix nak quinye e̱re nak ta̱cha̱lk jun cui̱nk kꞌaxal nim xcuanquil chicuu la̱in xban nak aꞌan ac cuan ajcuiꞌ chak junxil chicuu la̱in.

³¹ La̱in incꞌaꞌ ninnau nak aꞌan li Cristo. Abanan yo̱quin chi cubsi̱nc haꞌ re nak li Dios tixcꞌutbesi chiku la̱o aj Israel ani tzꞌakal li Cristo, chan.

³² Laj Juan quixchꞌolob xya̱lal li cꞌaꞌru quiril. Quixye: —Quicuil nak li Santil Musikꞌej quicube chak saꞌ choxa. Chanchan jun li paloma nak quicube ut quihilan saꞌ xbe̱n li Jesús.

³³ Incꞌaꞌ raj xinnau nak aꞌan li Cristo cui ta incꞌaꞌ quicuil li quicꞌulman. Xinnau nak aꞌan li Cristo xban nak li Dios li quitaklan chak cue chi cubsi̱nc haꞌ quixye cue, “Nak ta̱cuil li Santil Musikꞌej chanchan jun li paloma yo̱k chi cubec ut ta̱hila̱nk saꞌ xbe̱n jun li cui̱nk, aꞌan retalil nak aꞌan li ta̱qꞌuehok e̱re li Santil Musikꞌej”, chan li Dios.

³⁴ Ut la̱in quicuil nak quicube chak li Santil Musikꞌej saꞌ xbe̱n li Jesús. Joꞌcan nak ninnau chi tzꞌakal nak aꞌan tzꞌakal Ralal li Dios, chan laj Juan.

Laj Andrés ut laj Simón, aꞌaneb li xbe̱n li quixsiqꞌueb ru chokꞌ xtzolom li Jesucristo

³⁵ Joꞌ cuulajak chic laj Juan cuan cuiꞌchic chire li nimaꞌ Jordán rochben cuibeb lix tzolom.

³⁶ Nak quiril li Jesús yo̱ chi numecꞌ nachꞌ cuanqueb cuiꞌ, laj Juan quixye: —Cueꞌ chak li Cristo, li chanchan carner qꞌuebil chak xban li Dios, chan.

³⁷ Ut eb lix tzolom cuib, nak queꞌrabi li quixye laj Juan, queꞌxta̱ke li Jesús.

³⁸ Li Jesús quixakli ut quixsukꞌisi rib. Quiril nak yo̱queb chi xic chirix. Quixye reheb: —¿Cꞌaꞌut nak yo̱quex chinta̱kenquil? ¿Cꞌaꞌru te̱raj? chan reheb. Queꞌchakꞌoc eb aꞌan ut queꞌxye: —At tzolonel ¿bar nacathilan? chanqueb re.

³⁹ Quichakꞌoc li Jesús ut quixye reheb: —Yoꞌkeb chicuix re nak te̱nau bar ninhilan, chan li Jesús reheb. Joꞌcan nak queꞌco̱eb chirix ut queꞌril bar nahilan. Ut queꞌcana riqꞌuin xban nak ac ca̱hib o̱r chic re ecuu.

⁴⁰ Laj Andrés li ri̱tzꞌin laj Simón Pedro, aꞌan jun reheb li cuib li queꞌabin re li cꞌaꞌru quixye laj Juan ut queꞌxta̱ke li Jesús.

⁴¹ Nak ac x-a̱tinac riqꞌuin li Jesús, ticto co̱ laj Andrés riqꞌuin laj Simón ut quixye re: —Anakcuan xkatau li Mesías, chan. (Chi jalbil ru naraj naxye “li Cristo li taklanbil chak xban li Dios”.)

⁴² Ut quixcꞌam laj Simón riqꞌuin li Jesús. Li Jesús quiril aꞌan ut quixye re: —La̱at laj Simón li ralal laj Jonás. Anakcuan Pedro chic a̱cꞌabaꞌ.— (Chi jalbil ru naraj naxye “Pec”.)

Laj Felipe ut laj Natanael queꞌsiqꞌueꞌ ru xban li Jesucristo

⁴³ Joꞌ cuulajak chic li Jesús quiraj xic sa li naꞌajej Galilea. Quixtau laj Felipe ut quixye re: —China̱ta̱ke, chan.

⁴⁴ Laj Felipe, aꞌan Betsaida xtenamit. Aꞌan ajcuiꞌ xtenamiteb laj Andrés ut laj Pedro.

⁴⁵ Laj Felipe ticto co̱ chixsicꞌbal laj Natanael ut quixye re: —Xkatau li Mesías li tzꞌi̱banbil chak retalil saꞌ li chakꞌrab xban laj Moisés ut xbaneb li profeta. Aꞌan li Jesús ralal laj José. Nazaret xtenamit, chan laj Felipe.

⁴⁶ Laj Natanael quixye re: —¿Ma cuan ta biꞌ junak cha̱bil ta̱cha̱lk chak Nazaret? chan. Ut laj Felipe quixye re: —Yoꞌo rilbal re nak ta̱pa̱b, chan.

⁴⁷ Li Jesús quiril nak laj Natanael yo̱ chak chi cha̱lc riqꞌuin ut quixye: —Cueꞌ chak jun cui̱nk tzꞌakal aj Israel. Cha̱bil xnaꞌleb. Aꞌan incꞌaꞌ nabalakꞌic, chan li Jesús.

⁴⁸ Laj Natanael quixye re li Jesús: —¿Chanru nacanau nak cha̱bil innaꞌleb? chan. Li Jesús quichakꞌoc ut quixye re: —Xinnau chanru a̱naꞌleb nak cuancat rubel li jun to̱n chi higo nak toj ma̱jiꞌ nacatxbok laj Felipe, chan.

⁴⁹ Quichakꞌoc laj Natanael ut quixye re: —At tzolonel, la̱at li Ralal li Dios. La̱at lix Reyeb laj Israel, chan re li Jesús.

⁵⁰ Li Jesús quixye re: —Xapa̱b nak la̱in li Cristo xban nak xinye a̱cue nak xinnau chanru la̱ naꞌleb nak cuancat rubel li jun to̱n chi higo. Abanan toj cuan cuiꞌchic xni̱nkal ru naꞌleb talaja̱cuil chiru aꞌin, chan li Jesús.

⁵¹ Ut quixye ajcuiꞌ reheb: —Relic chi ya̱l tinye e̱re nak te̱ril li choxa chi teto. Ut eb lix ángel li Dios yo̱keb chi takecꞌ ut yo̱keb chi cubec cuanquin cuiꞌ la̱in li Cꞌajolbej, chan li Jesús reheb.