Josué 9 - Li Santil hu

Eb li cristian li cuanqueb saꞌ li tenamit Gabaón queꞌxbalakꞌi laj Josué

¹ Eb li rey li cuanqueb jun pacꞌal li nimaꞌ Jordán saꞌ li oeste queꞌrabi resil li cꞌaꞌru queꞌxba̱nu laj Israel. Eb li rey aꞌan cuanqueb saꞌ eb li naꞌajej li tzu̱l ru ut li ru takꞌa ut cuanqueb ajcuiꞌ chire li Palau Mediterráneo chiru li naꞌajej Líbano. Aꞌaneb laj heteo, eb laj amorreo, eb laj cananeo, eb laj ferezeo, eb laj heveo ut eb laj jebuseo.

² Chixjunileb aꞌan queꞌxcꞌu̱b rib re nak teꞌoc chi pletic saꞌ comonil riqꞌuin laj Josué ut eb lix soldado.

³ Eb laj heveo li cuanqueb Gabaón queꞌrabi resil chixjunil li quixba̱nu laj Josué riqꞌuineb li tenamit Jericó ut Hai.

⁴ Queꞌxcꞌu̱b ru chanru nak teꞌxbalakꞌiheb laj Israel. Teꞌxba̱nu rib nak aꞌaneb li yo̱queb chi xic chi a̱tinac saꞌ xcꞌabaꞌ lix tenamiteb. Queꞌxsicꞌ xtzacae̱mkeb ut queꞌxqꞌue saꞌ eb li kꞌel coxtal ut queꞌxtaksi chirix lix bu̱reb. Ut queꞌxcꞌam ajcuiꞌ li bo̱ls tzꞌu̱m re li vino pejel ut xitinbileb.

⁵ Queꞌxqꞌue kꞌel xa̱b chi rokeb xitinbileb ut queꞌxqꞌue ajcuiꞌ rakꞌeb kꞌel chirixeb. Ut lix tzacae̱mkeb li queꞌxcꞌam re teꞌxcuaꞌ saꞌ be moꞌ ru.

⁶ Queꞌcuulac Gilgal saꞌ li naꞌajej li yo̱queb cuiꞌ chi hila̱nc laj Israel. Ut queꞌxye re laj Josué: —La̱o xochal saꞌ najtil tenamit ut takaj nak ta̱ba̱nu junak contrato kiqꞌuin, chanqueb.

⁷ Ut eb laj Israel queꞌxchakꞌbe laj heveo ut queꞌxye: —Ma̱re anchal nachꞌ cuanquex kiqꞌuin. ¿Chanru nak takaba̱nu junak contrato e̱riqꞌuin la̱ex?—

⁸ Eb laj Gabaón queꞌxye re laj Josué: —La̱o tocꞌanjelak che̱ru, chanqueb re. Ut laj Josué quixye reheb: —¿Anihex tzꞌakal la̱ex? Ut, ¿bar xexchal chak?—

⁹ Ut eb aꞌan queꞌchakꞌoc ut queꞌxye: —La̱o xochal chak saꞌ najtil tenamit xban nak xkabi chixjunil li yo̱ chixba̱nunquil li Ka̱cuaꞌ le̱ Dios. Xkabi resil chixjunil li quilajxba̱nu chak aran Egipto.

¹⁰ Ut xkabi ajcuiꞌ resil li quixba̱nu reheb li cuib chi rey li queꞌcuan chokꞌ xreyeb laj amorreo li cuanqueb jun pacꞌal li nimaꞌ Jordán. Xkabi resil nak queꞌsach ruheb li rey Sehón aran Hesbón ut laj Og, lix rey eb laj Basán, li quicuan Astarot.

¹¹ Joꞌcan nak eb li nequeꞌcꞌamoc be saꞌ kaya̱nk ut eb li kech tenamitil xeꞌxye ke: “Cꞌamomak le̱ tzacae̱mk ut ayukex riqꞌuineb laj Israel. Ut te̱ye reheb nak la̱o tocꞌanjelak chiruheb. Ut te̱ye ajcuiꞌ reheb nak la̱o takaj xba̱nunquil junak contrato riqꞌuineb.”

¹² Saꞌ li cutan nak co-el chak saꞌ li kochoch tik chi us li kacaxlan cua li kacꞌam chak re takacuaꞌ saꞌ li be. Ut anakcuan ac xchakic ut moꞌ chic ru.

¹³ Joꞌcan ajcuiꞌ li bo̱ls tzꞌu̱m toj acꞌ nak kaqꞌue li vino chi saꞌ ut anakcuan kꞌel chic chi us. Ut xeꞌkꞌeloꞌ li kakꞌ ut li kaxa̱b xban xnajtil xochal cuiꞌ chak, chanqueb.

¹⁴ Eb laj Israel queꞌxchap lix cuaheb ut queꞌril. Abanan incꞌaꞌ queꞌxtzꞌa̱ma chiru li Dios cꞌaꞌru us teꞌxba̱nu.

¹⁵ Joꞌcan nak laj Josué quixba̱nu li contrato re nak teꞌxcꞌam rib saꞌ usilal riqꞌuineb laj Gabaón. Ut quixyechiꞌi reheb nak incꞌaꞌ tixcamsiheb. Ut joꞌcan ajcuiꞌ queꞌxba̱nu eb laj cꞌamol be saꞌ xya̱nkeb laj Israel.

¹⁶ Nak ac xnumeꞌ chic oxib cutan xba̱nunquil li contrato riqꞌuineb laj Gabaón, eb laj Israel queꞌrabi resil nak eb aꞌan nachꞌ cuan lix naꞌajeb riqꞌuineb.

¹⁷ Nak ac xnumeꞌ oxib cutan chic queꞌco̱eb laj Israel chixsicꞌbaleb saꞌ lix tenamiteb. Eb li tenamit aꞌan, aꞌaneb Gabaón, Cafira, Beerot, ut Quiriat-jearim.

¹⁸ Abanan eb laj Israel incꞌaꞌ queꞌxcamsiheb li tenamit aꞌan xban nak eb laj cꞌamol be saꞌ xya̱nkeb laj Israel ac xeꞌxba̱nu li contrato riqꞌuineb saꞌ xcꞌabaꞌ li Ka̱cuaꞌ lix Dioseb. Joꞌcan nak chixjunileb laj Israel yo̱queb chixcuechꞌinquil rixeb laj cꞌamol be saꞌ xya̱nkeb.

¹⁹ Chixjunileb laj cꞌamol be saꞌ xya̱nkeb queꞌxye re li tenamit: —Ma̱cꞌaꞌ naru takaba̱nu reheb xban nak ac xkaba̱nu jun li contrato riqꞌuineb saꞌ xcꞌabaꞌ li Ka̱cuaꞌ Dios.

²⁰ Incꞌaꞌ takacamsiheb. Ma̱re ta̱cha̱lk xjoskꞌil li Dios saꞌ kabe̱n cui takakꞌet li contrato li xkaba̱nu riqꞌuineb.

²¹ Incꞌaꞌ takacamsiheb. Abanan teꞌcana̱k chokꞌ aj sicꞌol siꞌ ut aj cꞌamol haꞌ chokꞌ ke la̱o aj Israel, chanqueb laj cꞌamol be saꞌ xya̱nkeb laj Israel. Joꞌcan queꞌxba̱nu re nak teꞌxba̱nu li cꞌaꞌru queꞌxyechiꞌi reheb.

²² Ut chirix aꞌan laj Josué quixbokeb laj Gabaón ut quixye reheb: —¿Cꞌaꞌut nak xoe̱balakꞌi? ¿Cꞌaꞌut nak xeye ke nak najt e̱tenamit? Moco ya̱l ta nak najt cuanquex kiqꞌuin. Nachꞌ ban cuanquex.

²³ Xban nak xoe̱balakꞌi, anakcuan tenebanbil li raylal saꞌ e̱be̱n. La̱ex texcana̱k joꞌ mo̱s junelic. Junes yocꞌoc siꞌ te̱ba̱nu ut bela̱nc haꞌ nak ta̱ajma̱nk ru li haꞌ ut li siꞌ nak takalokꞌoni li Dios, chan laj Josué.

²⁴ Eb aꞌan queꞌxye re laj Josué: —La̱o xexkabalakꞌi xban kaxiu. Xkabi resil nak li Ka̱cuaꞌ le̱ Dios quixye re laj Moisés laj cꞌanjel chiru nak tixkꞌaxtesi e̱re li naꞌajej aꞌin ut te̱sach ruheb chixjunileb li cuanqueb arin. La̱o xkacꞌoxla nak toe̱camsi.

²⁵ Anakcuan takacanab kib rubel a̱cuanquil. Ba̱nu li cꞌaꞌru nacacꞌoxla nak us xba̱nunquil, chanqueb laj Gabaón.

²⁶ Ut laj Josué incꞌaꞌ quixcanabeb re nak teꞌcamsi̱k xbaneb laj Israel.

²⁷ Abanan quixqꞌueheb chi cꞌanjelac joꞌ mo̱s. Queꞌyocꞌoc siꞌ ut queꞌbelan haꞌ re ta̱cꞌanjelak chiruheb laj Israel ut re ajcuiꞌ ta̱cꞌanjelak saꞌ lix artal li Ka̱cuaꞌ Dios saꞌ li naꞌajej li quisiqꞌueꞌ ru xban li Ka̱cuaꞌ. Ut toj chalen anakcuan aꞌan ajcuiꞌ li cꞌanjel li nequeꞌxba̱nu.