Josué 7 - Li Santil hu

Laj Acán quima̱cob chiru li Dios

¹ Jun li cui̱nk aj Acán xcꞌabaꞌ, xcomoneb li ralal xcꞌajol laj Judá, quixxoc chokꞌ re li cꞌaꞌru ac kꞌaxtesinbil xban li Dios re sachecꞌ. Laj Acán, aꞌan li ralal laj Carmi. Laj Carmi, aꞌan li ralal laj Zabdi ut laj Zabdi, aꞌan li ralal laj Zera. Li ma̱c quixba̱nu laj Acán, li Dios quixqꞌue saꞌ xbe̱neb chixjunileb li ralal xcꞌajol laj Israel, ut cꞌajoꞌ nak quijoskꞌoꞌ saꞌ xbe̱neb.

² Mokon chic laj Josué quixtakla cuib oxibeb li cui̱nk saꞌ li tenamit Hai, li cuan nachꞌ riqꞌuin li naꞌajej Bet-avén li cuan saꞌ li este riqꞌuin li tenamit Bet-el. Quixye reheb li cui̱nk: —Ayukex ut qꞌuehomak chak retal li tenamit Hai.— Ut eb aꞌan queꞌco̱eb ut queꞌxqꞌue retal li tenamit.

³ Ut nak queꞌsukꞌi chak queꞌxye re laj Josué: —Incꞌaꞌ tento nak ta̱taklaheb nabaleb li soldado chi pletic. Incꞌaꞌ naru ta̱lubtesiheb li soldado chi ma̱cꞌaꞌ rajbal. Ma̱re cuib mil malaj oxib mil ajcuiꞌ teꞌxic chi pletic. Tzꞌakal riqꞌuin aꞌan xban nak incꞌaꞌ qꞌuiheb li yo̱queb chi iloc re li tenamit Hai, chanqueb.

⁴ Joꞌcan nak queꞌco̱eb li oxib mil chi cui̱nk chi pletic riqꞌuineb li cuanqueb Hai re nak teꞌre̱chani. Abanan aꞌaneb chic li cuanqueb Hai queꞌnumta saꞌ xbe̱neb toj retal queꞌe̱lelic eb laj Israel.

⁵ Queꞌcamsi̱c cuaklaju xcaꞌcꞌa̱l (36) eb laj Israel. Ut eb lix comoneb queꞌe̱lelic. Queꞌxtiquib ra̱linanquileb saꞌ li tenamit Hai. Queꞌcuulac cuan cuiꞌ li cubsi̱nc li nequeꞌisin cuiꞌ pec ut aran queꞌnumta saꞌ xbe̱neb. Joꞌcan nak eb laj Israel queꞌchꞌinan xchꞌo̱l. Incꞌaꞌ chic queꞌcacuu xchꞌo̱leb chi pletic.

⁶ Laj Josué ut eb li nequeꞌcꞌamoc be saꞌ xya̱nkeb laj Israel queꞌxkꞌich li rakꞌeb ut queꞌxcut rib saꞌ chꞌochꞌ chiru li Lokꞌlaj Ca̱x xban xrahil xchꞌo̱leb ut queꞌxqꞌue poks saꞌ xjolomeb ut queꞌcana aran toj qui-ecuu.

⁷ Laj Josué quixye: —At Ka̱cuaꞌ Dios, ¿cꞌaꞌut nak xoa̱qꞌue chak chi numecꞌ saꞌ li nimaꞌ Jordán yal re nak toa̱kꞌaxtesi saꞌ rukꞌeb laj amorreo re teꞌxsach ku? Kꞌaxal us raj chokꞌ ke nak xocana chak jun pacꞌal li nimaꞌ Jordán.

⁸ At Ka̱cuaꞌ, ¿cꞌaꞌru ta̱ru̱k takaye anakcuan? Eb li soldado aj Israel incꞌaꞌ xeꞌxcuy pletic riqꞌuineb laj Hai. Xeꞌe̱lelic ban chiruheb.

⁹ Nak teꞌrabi eb laj cananeo ut chixjunileb li cuanqueb saꞌ li naꞌajej aꞌin li cꞌaꞌru xkacꞌul, ma̱re teꞌxchꞌutub chak rib ut teꞌcha̱lk chi pletic kiqꞌuin ut ma̱re ma̱ ani chic ke ta̱colekꞌ. Cui joꞌcan takacꞌul, ¿cꞌaꞌru ta̱ba̱nu la̱at re xcolbal rix la̱ lokꞌal? chan.

¹⁰ Ut li Ka̱cuaꞌ Dios quixye re laj Josué: —¡Cuaclin! ¿Cꞌaꞌut nak nacacut a̱cuib saꞌ chꞌochꞌ?

¹¹ Eb laj Israel xeꞌma̱cob ut xeꞌxkꞌet li contrato li xinba̱nu riqꞌuineb nak xinye reheb nak incꞌaꞌ teꞌxxoc li cꞌaꞌak re ru ac kꞌaxtesinbil re ta̱sachekꞌ. Eb aꞌan xeꞌrelkꞌa li cꞌaꞌru incꞌaꞌ raj xeꞌxchꞌeꞌ ut xeꞌticꞌtiꞌic. Ut li cꞌaꞌru xeꞌxxoc, xeꞌxqꞌue saꞌ xya̱nk li cꞌaꞌruheb re.

¹² Joꞌcan nak eb laj Israel incꞌaꞌ teꞌxcuy pletic riqꞌuineb li xicꞌ nequeꞌiloc reheb. Teꞌe̱lelik ban chiruheb xban nak xeꞌxbok raylal saꞌ xbe̱neb xban nak xeꞌxxoc li ac kꞌaxtesinbil re sachecꞌ. La̱in incꞌaꞌ chic tincua̱nk e̱riqꞌuin cui incꞌaꞌ te̱sach ru li cꞌaꞌru xeꞌxxoc.

¹³ ¡Cuaclin! Ut ye reheb li tenamit nak teꞌxsantobresi ribeb re cuulaj xban nak la̱in li Ka̱cuaꞌ le̱ Dios la̱ex aj Israel, ninye chi joꞌcaꞌin: “La̱ex aj Israel, xexoc li cꞌaꞌak re ru li tento raj xesach ru chi junaj cua. Ut xexoc chokꞌ e̱re li xkꞌaxtesi̱c raj chi cꞌanjelac chicuu. Cui la̱ex incꞌaꞌ te̱risi aꞌan saꞌ e̱ya̱nk ma̱ jokꞌe te̱cuy pletic riqꞌuineb li xicꞌ nequeꞌiloc e̱re.”

¹⁴ Cuulaj teꞌcha̱lk chicuu chixjunileb lix te̱paleb laj Israel. Chi junju̱nk te̱p teꞌnumekꞌ chicuu. Li jun te̱p li tincꞌut la̱in, aꞌaneb li teꞌnumekꞌ chi ju̱nk chꞌu̱tal li rechꞌalaleb rib. Li jun chꞌu̱tal chi rechꞌalaleb rib li tincꞌut la̱in, aꞌaneb li teꞌnumekꞌ chi junju̱nk cabal chicuu. Ut li jun cabal li tincꞌut la̱in, tento nak teꞌnumekꞌ chicuu li junju̱nk chi cui̱nk re li jun cabal aꞌan.

¹⁵ Ut li cui̱nk li xxococ re li cꞌaꞌru tento raj xsachman, aꞌan li cuan xma̱c. Aꞌan ta̱cꞌatekꞌ rochben li rixakil ut li ralal xcꞌajol joꞌ ajcuiꞌ chixjunil li cꞌaꞌru cuan re xban nak xba̱nu li incꞌaꞌ us saꞌ xya̱nkeb laj Israel nak quixkꞌet li contrato li quinba̱nu riqꞌuineb, chan li Ka̱cuaꞌ.

¹⁶ Joꞌ cuulajak chic laj Josué quicuacli toj ekꞌela. Ut quixye reheb nak teꞌnumekꞌ laj Israel chi te̱p. Ut lix te̱pal li ralal xcꞌajol laj Judá quicꞌuteꞌ chiru laj Josué xban li Dios.

¹⁷ Ut queꞌqꞌueheꞌ chi numecꞌ chi ubej li ju̱nk chꞌu̱tal li rechꞌalaleb rib. Ut saꞌ xya̱nkeb aꞌan, quicꞌuteꞌ li ralal xcꞌajol laj Zera. Ut chirix aꞌan queꞌnumeꞌ li junju̱nk cabal li ralal xcꞌajol laj Zera. Ut quicꞌuteꞌ li ralal xcꞌajol laj Zabdi.

¹⁸ Ut nak queꞌnumeꞌ chi xjunju̱nkaleb lix cui̱nkilaleb li ralal xcꞌajol laj Zabdi, li Dios quixcꞌut laj Acán, li ralal laj Carmi. Laj Carmi, aꞌan li ralal laj Zabdi. Ut laj Zabdi, aꞌan li ralal laj Zera. Aꞌaneb xcomoneb li ralal xcꞌajol laj Judá.

¹⁹ Ut laj Josué quixye re laj Acán: —At Acán, la̱in nintzꞌa̱ma cha̱cuu nak ta̱qꞌue xlokꞌal li Ka̱cuaꞌ, li kaDios la̱o aj Israel. Ye lix ya̱lal. Ta̱ye cue cꞌaꞌru xaba̱nu. Ma̱muk chicuu, chan laj Josué.

²⁰ Laj Acán quichakꞌoc ut quixye: —Ya̱l nak la̱in xinma̱cob chiru li Ka̱cuaꞌ li kaDios la̱o aj Israel. Aꞌin li ma̱c li xinba̱nu.

²¹ Nak xo-oc aran Jericó, xcuil saꞌ xya̱nkeb li cꞌaꞌak re ru jun cha̱bil tꞌicr xcomon li akꞌej li nequeꞌrocsi laj Babilonia. Xcuil ajcuiꞌ cuib ciento chi tumin plata ut numenak na jun libra li oro. La̱in quinra ru. Joꞌcan nak quinxoc chokꞌ cue. Xinbec jun li jul saꞌ li naꞌajej li cuanquin cuiꞌ chi hila̱nc ut aran xinmuk. Xinqꞌue li tumin rubel li tꞌicr, chan laj Acán.

²² Laj Josué quixtakla cuib oxib li takl saꞌ li naꞌajej li nahilan cuiꞌ laj Acán. Queꞌxtau chixjunil li cꞌaꞌru quixmuk laj Acán. Li plata cuan rubel li tꞌicr.

²³ Nak queꞌxtau li cꞌaꞌru quixxoc laj Acán, queꞌxcꞌam chak chiru laj Josué ut eb laj Israel ut chiru ajcuiꞌ li Ka̱cuaꞌ Dios.

²⁴ Laj Josué ut chixjunileb laj Israel queꞌxchap laj Acán ut queꞌxcꞌam saꞌ li ru takꞌa Acor rochben li plata, li tꞌicr, li oro, ut eb li ralal xcꞌajol joꞌ ixk joꞌ cui̱nk. Queꞌxcꞌam ajcuiꞌ lix bo̱yx, lix bu̱r ut eb lix carner. Ut queꞌxcꞌam ajcuiꞌ lix muheba̱l. Chixjunil li cꞌaꞌru cuan re queꞌxcꞌam.

²⁵ Laj Josué quixye re: —¿Cꞌaꞌut nak xacꞌam chak li raylal aꞌin saꞌ kabe̱n? Anakcuan li Ka̱cuaꞌ xqꞌuehak chatoj li raylal li xacꞌam chak saꞌ kabe̱n.— Nak quixye aꞌin laj Josué, chixjunileb laj Israel queꞌxcamsi chi pec laj Acán joꞌ ajcuiꞌ chixjunil li cuanqueb rochben. Ut chirix aꞌan queꞌxcꞌat.

²⁶ Ut queꞌxtu̱b nabal li pec saꞌ xbe̱n ut eb li pec aꞌan toj cuanqueb anakcuan. Riqꞌuin aꞌin qui-el xjoskꞌil li Ka̱cuaꞌ saꞌ xbe̱neb laj Israel. Toj chalen anakcuan nequeꞌxye re li naꞌajej aꞌan “Li ru takꞌa re Acor”.