Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Josué 3 - Li Santil hu


Eb laj Israel queꞌnumeꞌ saꞌ li nimaꞌ Jordán

1 Joꞌ cuulajak chic ekꞌela queꞌel Sitim laj Josué rochbeneb chixjunileb laj Israel ut queꞌco̱eb. Queꞌcuulac cuan cuiꞌ li nimaꞌ Jordán. Abanan incꞌaꞌ queꞌnumeꞌ jun pacꞌal. Toj queꞌcana chi hila̱nc aran.

2 Nak ac xnumeꞌ oxib cutan, eb li nequeꞌcꞌamoc be saꞌ xya̱nkeb laj Israel queꞌxsuti li naꞌajej li yo̱queb cuiꞌ chi hila̱nc.

3 Ut queꞌxye reheb chixjunileb chi joꞌcaꞌin: —Nak te̱ril nak yo̱k chak chi cha̱lc li Lokꞌlaj Ca̱x li yo̱keb chak chixcꞌambal eb laj levita laj tij, la̱ex tex-e̱lk chak saꞌ le̱ naꞌaj ut texxic chirix,

4 re nak te̱nau li be bar yo̱kex chi xic, xban nak la̱ex ma̱ jun sut numenakex saꞌ li be aꞌan. Abanan mexjiloc chi nachꞌ riqꞌuin li Lokꞌlaj Ca̱x li xocxo cuiꞌ lix contrato li Dios. Jun kilómetro ban xnajtil cua̱nkex chirix, chanqueb laj cꞌamol be.

5 Laj Josué quixye reheb li tenamit: —Santobresihomak e̱rib xban nak cuulaj tixba̱nu xni̱nkal ru milagro li Ka̱cuaꞌ saꞌ kaya̱nk.—

6 Ut laj Josué quixye ajcuiꞌ reheb laj tij: —Pakomak li Lokꞌlaj Ca̱x ut numenkex chiruheb li tenamit, chan. Ut eb aꞌan queꞌxpako li Lokꞌlaj Ca̱x ut queꞌnumeꞌ chiruheb li tenamit.

7 Li Ka̱cuaꞌ Dios quixye re laj Josué: —Chalen anakcuan tinqꞌue a̱cuanquil re nak eb laj Israel teꞌxqꞌue a̱lokꞌal ut teꞌxnau nak la̱in cuanquin a̱cuiqꞌuin joꞌ nak quincuan riqꞌuin laj Moisés.

8 Ta̱ye reheb laj tij li yo̱keb chi cꞌamoc re li Lokꞌlaj Ca̱x, “Nak tex-oc saꞌ li nimaꞌ Jordán, aran texxakli̱k,” chan li Ka̱cuaꞌ.

9 Laj Josué quixye reheb laj Israel: —Jilonkex chak ut abihomak li cꞌaꞌru yo̱ chixyebal li Ka̱cuaꞌ li kaDios.—

10 Ut quixye ajcuiꞌ reheb: —Nak li Lokꞌlaj Ca̱x ta̱numekꞌ jun pacꞌal li nimaꞌ Jordán, te̱nau nak li yoꞌyo̱quil Dios cuan saꞌ kaya̱nk ut aꞌan ajcuiꞌ ta̱isi̱nk reheb laj cananeo, eb laj heteo, eb laj heveo, eb laj ferezeo, eb laj gergeseo, eb laj amorreo ut eb laj jebuseo saꞌ li kabe li bar tonumekꞌ cuiꞌ.

11 Ut lix Lokꞌlaj Ca̱x li Ka̱cuaꞌ laj e̱chal re chixjunil li ruchichꞌochꞌ, aꞌan ta̱cꞌamok be chiku nak tonumekꞌ jun pacꞌal li nimaꞌ.

12 Anakcuan ut ta̱sicꞌ ruheb cablaju chi cui̱nk. Junju̱nk chi cui̱nk ta̱sicꞌ saꞌ xya̱nkeb li junju̱nk xte̱paleb laj Israel.

13 Nak teꞌxxakab li rokeb saꞌ li nimaꞌ Jordán eb laj tij li yo̱keb chi cꞌamoc re lix Lokꞌlaj Ca̱x li Ka̱cuaꞌ laj e̱chal re chixjunil li ruchichꞌochꞌ, li haꞌ tixjach rib chi ribil rib. Li rok li haꞌ li nachal chak takecꞌ tixtu̱b rib. Incꞌaꞌ chic ta̱be̱k, chan laj Josué.

14 Eb laj Israel queꞌel chak saꞌ lix naꞌajeb li cuanqueb cuiꞌ ut eb laj tij li yo̱queb chi cꞌamoc re li Lokꞌlaj Ca̱x, aꞌaneb li yo̱queb chi cꞌamoc be chiruheb.

15 Li nimaꞌ Jordán cau yo̱ chi be̱c rok xban nak nabutꞌin saꞌ xkꞌehil li sicꞌoc trigo. Ut eb laj tij li yo̱queb chi cꞌamoc re li Lokꞌlaj Ca̱x queꞌxqꞌue li rokeb saꞌ li haꞌ chire li nimaꞌ.

16 Ut li rok li haꞌ li nachal chak takecꞌ quixakli nachꞌ riqꞌuin li tenamit Adam li cuan chixcꞌatk li naꞌajej Saretán. Li tenamit aꞌan najt cuan riqꞌuin li naꞌajej li yo̱queb cuiꞌ chi numecꞌ laj Israel. Ut incꞌaꞌ chic naxic li haꞌ takꞌa saꞌ li palau Mar Muerto xcꞌabaꞌ. Joꞌcan nak quixjach rib li haꞌ nak quixakli. Ut eb laj Israel queꞌnumeꞌ jun pacꞌal saꞌ xjayal li naꞌajej Jericó.

17 Ut chaki li chꞌochꞌ queꞌnumeꞌ cuiꞌ chixjunileb laj Israel saꞌ li nimaꞌ Jordán. Ut eb laj tij li yo̱queb chi cꞌamoc re lix Lokꞌlaj Ca̱x li Ka̱cuaꞌ xakxo̱queb saꞌ xyi li nimaꞌ Jordán nak yo̱queb chi numecꞌ li tenamit, ut chaki li chꞌochꞌ li xakxo̱queb cuiꞌ.

© 2019, Wycliffe Bible Translators. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ