Josué 24 - Li Santil hu

Laj Josué quixchakꞌrabiheb laj Israel

¹ Laj Josué quixchꞌutubeb chixjunileb lix te̱paleb laj Israel aran Siquem. Quixbokeb li nequeꞌcꞌamoc be saꞌ xya̱nkeb, ut eb li nequeꞌtaklan saꞌ xbe̱neb, ut eb laj rakol a̱tin, joꞌ eb ajcuiꞌ li cuanqueb xcuanquil. Queꞌxchꞌutub ribeb chiru li Dios.

² Ut laj Josué quixye reheb chixjunileb li tenamit: —Aꞌan aꞌin li xye li Ka̱cuaꞌ li kaDios la̱o aj Israel: “Najter kꞌe cutan eb le̱ xeꞌto̱nil yucuaꞌ, laj Taré lix yucuaꞌeb laj Abraham, ut laj Nacor, queꞌcuan jun pacꞌal li nimaꞌ Éufrates ut queꞌxlokꞌoniheb li jalanil dios.

³ La̱in quincꞌamoc re laj Abraham la̱ xeꞌto̱nil yucuaꞌ jun pacꞌal li nimaꞌ Éufrates. La̱in quincꞌamoc be chiru nak quinumeꞌ saꞌ chixjunil li naꞌajej Canaán. Quinqꞌue laj Isaac li ralal ut quinqꞌue ajcuiꞌ chi ta̱mc li ralal xcꞌajol.

⁴ Ut quinqꞌue cuib li ralal laj Isaac. Aꞌaneb laj Jacob ut laj Esaú. Re laj Esaú quinqꞌue li naꞌajej li tzu̱l ru. Ut laj Jacob ut li ralal xcꞌajol queꞌco̱eb saꞌ li naꞌajej Egipto.

⁵ Mokon chic quintakla laj Moisés ut laj Aarón aran Egipto re risinquileb laj Israel aran. Ut nabal li raylal quintakla saꞌ xbe̱neb laj Egipto toj retal quexcuisi saꞌ li naꞌajej aꞌan.

⁶ Nak quicuisiheb le̱ xeꞌto̱nil yucuaꞌ aran, eb laj Egipto queꞌxta̱keheb laj Israel saꞌ lix carruaje ut chirixeb lix cacua̱y. Ut queꞌcuulac cuan cuiꞌ li Caki Palau.

⁷ Ut eb le̱ xeꞌto̱nil yucuaꞌ queꞌxjap re chixtzꞌa̱manquil xtenkꞌanquil chicuu. Ut quinqꞌue li kꞌojyi̱n saꞌ xyiheb aꞌan ut eb laj Egipto. Ut la̱in quintakla li haꞌ re nak tixjunaji rib saꞌ xbe̱neb laj Egipto ut queꞌosoꞌ. La̱ex nequenau cꞌaꞌru quinba̱nu. Ut najt quexcuan saꞌ li chaki chꞌochꞌ.

⁸ Chirix aꞌan quexincꞌam saꞌ lix naꞌajeb laj amorreo li queꞌcuan jun pacꞌal li nimaꞌ Jordán saꞌ li este bar na-el chak li sakꞌe. Eb aꞌan queꞌpletic e̱riqꞌuin, abanan la̱in quexintenkꞌa chi numta̱c saꞌ xbe̱neb. La̱in quexintenkꞌa chixsachbal ruheb ut quere̱chani lix naꞌajeb.

⁹ Ut lix reyeb laj Moab, laj Balac li ralal laj Zipor, quipletic e̱riqꞌuin. Ut quixtakla xbokbal laj Balaam li ralal laj Beor re nak tixtzꞌa̱ma ma̱usilal saꞌ e̱be̱n.

¹⁰ Abanan la̱in incꞌaꞌ quinsume li cꞌaꞌru quixtzꞌa̱ma chicuu laj Balaam. Joꞌcan nak nabal sut quixtzꞌa̱ma e̱rosobtesinquil ut la̱in xincoloc e̱re chiru laj Balac.

¹¹ Joꞌcan nak quexnumeꞌ jun pacꞌal li nimaꞌ Jordán ut quexcuulac saꞌ li tenamit Jericó. Ut eb li cuanqueb aran queꞌpletic e̱riqꞌuin. Ut queꞌpletic ajcuiꞌ e̱riqꞌuin eb laj amorreo, eb laj ferezeo, eb laj cananeo, eb laj heteo, eb laj gergeseo, eb laj heveo, ut eb laj jebuseo. Ut la̱in xexintenkꞌa chi numta̱c saꞌ xbe̱neb.

¹² Nak yo̱quex chi xic, la̱in quinsach lix naꞌlebeb re nak ta̱ru̱k te̱risiheb li cuib chi rey li nequeꞌtaklan saꞌ xbe̱neb laj amorreo. Ma̱cuaꞌ la̱ex li quexba̱nun re riqꞌuin le̱ tzimaj, chi moco riqꞌuin le̱ chꞌi̱chꞌ. La̱in ban quin-isin reheb.

¹³ La̱in xinqꞌue li chꞌochꞌ e̱re ac cꞌanjelanbil, ac aubil xsaꞌ. Li tenamit li cuanquex cuiꞌ anakcuan, moco toj xeyi̱b ta. Ac cuan ban nak xexcuulac. Ac aubil li uvas ut li cheꞌ olivos nak xexcuulac. Moco toj xerau ta li yo̱quex chixtzacanquil anakcuan”, chan li Ka̱cuaꞌ e̱re.

¹⁴ Laj Josué quixye ajcuiꞌ reheb laj Israel: —Anakcuan ut chexucua ru li Ka̱cuaꞌ ut chexcꞌanjelak chiru chi anchal le̱ chꞌo̱l ut chi tzꞌakal re ru. Isihomakeb saꞌ e̱ya̱nk li yi̱banbil dios li queꞌxlokꞌoni le̱ xeꞌto̱nil yucuaꞌ nak cuanqueb aran jun pacꞌal li nimaꞌ Éufrates ut nak cuanqueb aran Egipto. Chexcꞌanjelak ban chiru li Ka̱cuaꞌ chi anchal e̱chꞌo̱l.

¹⁵ Cui la̱ex nequecꞌoxla nak incꞌaꞌ us cꞌanjelac chiru li Ka̱cuaꞌ Dios, sicꞌomak ani te̱cꞌanjela ru. ¿Ma texcꞌanjelak chiruheb li yi̱banbil dios li queꞌxcꞌanjela chak ru le̱ naꞌ e̱yucuaꞌ nak queꞌcuan jun pacꞌal li nimaꞌ Éufrates, malaj ut texcꞌanjelak chiruheb lix dioseb laj amorreo li cuanqueb arin saꞌ li naꞌajej aꞌin? Abanan, la̱in joꞌqueb ajcuiꞌ li cualal incꞌajol tocꞌanjelak chiru li Ka̱cuaꞌ Dios, chan laj Josué.

¹⁶ Ut eb li tenamit queꞌchakꞌoc ut queꞌxye: —Incꞌaꞌ taxak takacanab li Ka̱cuaꞌ li kaDios. La̱o incꞌaꞌ naru takacanab xlokꞌoninquil li Ka̱cuaꞌ yal xban xlokꞌoninquil li yi̱banbil dios.

¹⁷ Li Ka̱cuaꞌ li kaDios, aꞌan li qui-isin chak reheb li kaxeꞌto̱nil yucuaꞌ joꞌ ajcuiꞌ la̱o saꞌ li naꞌajej Egipto bar cocuan cuiꞌ chak chokꞌ rahobtesinbil mo̱s. Aꞌan quixba̱nu qꞌuila milagro chiku ut aꞌan ajcuiꞌ li qui-iloc ke nak quilajonumeꞌ chak saꞌ eb li naꞌajej aꞌan.

¹⁸ Li Ka̱cuaꞌ quikꞌaxtesin saꞌ kukꞌ chixjunileb li tenamit ut quixkꞌaxtesiheb ajcuiꞌ laj amorreo li queꞌcuan saꞌ li chꞌochꞌ aꞌin. Joꞌcan nak la̱o tocꞌanjelak ajcuiꞌ chiru li Ka̱cuaꞌ joꞌ nacatcꞌanjelac la̱at xban nak aꞌan li kaDios, chanqueb.

¹⁹ Ut laj Josué quixye reheb: —La̱ex incꞌaꞌ texru̱k chi cꞌanjelac chiru li Ka̱cuaꞌ xban nak aꞌan jun Dios Santo. Aꞌan incꞌaꞌ tixcuy e̱ma̱c cui yo̱kex chixlokꞌoninquil li yi̱banbil dios. Aꞌan incꞌaꞌ tixcuy e̱ma̱c riqꞌuin le̱ kꞌetkꞌetil chi moco tixcuy e̱ma̱c riqꞌuin le̱ ma̱usilal.

²⁰ Cui la̱ex te̱tzꞌekta̱na li Ka̱cuaꞌ ut te̱lokꞌoni li yi̱banbil dios, li Ka̱cuaꞌ ta̱qꞌuehok e̱re chixtojbal rix le̱ ma̱c ut tixsach e̱ru usta ac xexrosobtesi, chan laj Josué.

²¹ Ut eb li tenamit queꞌchakꞌoc ut queꞌxye: —Incꞌaꞌ ta̱cꞌulma̱nk chi joꞌcan. La̱o tocꞌanjelak chiru li Ka̱cuaꞌ, chanqueb.

²² Ut laj Josué quixye ajcuiꞌ reheb: —Anakcuan xeye nak texcꞌanjelak chiru li Ka̱cuaꞌ. La̱ex ajcuiꞌ xexyehoc re. Cheqꞌuehak retal le̱ ra̱tin, chan. Queꞌchakꞌoc ut queꞌxye: —Ya̱l nak la̱o xoyehoc re, chanqueb.

²³ Ut laj Josué quixye reheb: —Cui ya̱l nak te̱raj cꞌanjelac chiru li Ka̱cuaꞌ, tento te̱risiheb chi junaj cua chixjunileb li jalanil dios li cuanqueb saꞌ e̱ya̱nk. Ut chi anchal le̱ chꞌo̱l te̱kꞌaxtesi e̱rib chi cꞌanjelac chiru li Ka̱cuaꞌ li kaDios la̱o aj Israel, chan.

²⁴ Ut queꞌxye re: —La̱o tocꞌanjelak chiru li Ka̱cuaꞌ li kaDios ut takaba̱nu li cꞌaꞌru tixye ke, chanqueb.

²⁵ Saꞌ ajcuiꞌ li cutan aꞌan saꞌ li naꞌajej Siquem, laj Josué quixba̱nu jun li contrato riqꞌuineb laj Israel. Quixqꞌue li chakꞌrab reheb ut quixye reheb chanru teꞌxba̱nu.

²⁶ Ut laj Josué quixtzꞌi̱ba retalil li queꞌxba̱nu saꞌ li hu li tzꞌi̱banbil cuiꞌ lix chakꞌrab li Dios. Ut quixchap jun li nimla pec ut quixxakab rubel jun to̱n li ji li cuan aran chixcꞌatk li tabernáculo.

²⁷ Ut quixye reheb laj Israel: —Li pec aꞌin ta̱cꞌanjelak e̱re chokꞌ retalil nak la̱ex xesume xba̱nunquil chixjunil li joꞌ qꞌuial xye ke li Ka̱cuaꞌ Dios. Nak te̱ril li pec aꞌin, ta̱julticokꞌ e̱re li cꞌaꞌru xeye cui incꞌaꞌ yo̱quex chixba̱nunquil li cꞌaꞌru quesume xba̱nunquil. Li pec aꞌin ta̱cꞌanjelak re nak incꞌaꞌ texcana̱k chokꞌ aj ticꞌtiꞌ chiru li Ka̱cuaꞌ li kaDios, chan laj Josué.

²⁸ Chirix aꞌan laj Josué quixtaklaheb chixjunju̱nkaleb saꞌ li naꞌajej li quiqꞌueheꞌ reheb.

Nak quicam laj Josué

²⁹ Nak ac xcꞌulman chixjunil li cꞌaꞌak re ru aꞌin, quicam laj Josué, laj cꞌanjel chiru li Dios. Laj Josué aꞌan li ralal laj Nun. Oꞌcꞌa̱l chihab riqꞌuin laje̱b (110) chihab cuan re nak quicam.

³⁰ Quimukeꞌ saꞌ li tenamit Timnat-sera li quiqꞌueheꞌ re, li cuan saꞌ eb li tzu̱l Efraín. Li naꞌajej aꞌan cuan jun pacꞌal li tzu̱l Gaas saꞌ xjayal li norte.

³¹ Ut eb laj Israel queꞌcꞌanjelac chiru li Ka̱cuaꞌ nak toj yoꞌyo laj Josué. Joꞌcan ajcuiꞌ queꞌxba̱nu chiruheb laj cꞌamol be li toj queꞌcana nak quicam laj Josué xban nak eb aꞌan queꞌxnau chixjunil li joꞌ qꞌuial li usilal quixba̱nu li Ka̱cuaꞌ reheb laj Israel.

Nak queꞌxmuk lix bakel laj José aran Siquem

³² Eb laj Israel queꞌxcꞌam chak lix bakel laj José nak queꞌel chak Egipto ut queꞌxmuk aran Siquem saꞌ li chꞌochꞌ li quixlokꞌ laj Jacob junxil riqꞌuineb li ralal laj Hamor. Laj Hamor, aꞌan lix yucuaꞌ laj Siquem. Jun ciento chi tumin plata quixtoj cuiꞌ laj Jacob ut li naꞌajej aꞌan quicana chokꞌ xnaꞌajeb li ralal xcꞌajol laj José.

Nak quicam laj Eleazar laj tij

³³ Nak quicam laj Eleazar li ralal laj Aarón quimukeꞌ aran saꞌ jun li chꞌina tzu̱l li cuan saꞌ li naꞌajej li quiqꞌueheꞌ re laj Finees, li ralal laj Eleazar. Li naꞌajej aꞌan cuan saꞌ xya̱nkeb li tzu̱l re laj Efraín.