Josué 23 - Li Santil hu

Laj Josué quixqꞌueheb xnaꞌleb laj Israel

¹ Li Ka̱cuaꞌ quixqꞌueheb laj Israel chixnumsinquil nabal chihab chi saheb saꞌ xchꞌo̱leb chi ma̱cꞌaꞌ chic ple̱t riqꞌuineb li xicꞌ nequeꞌiloc reheb. Laj Josué ac ti̱x chic chi us.

² Joꞌcan nak laj Josué quixtakla xbokbaleb laj Israel ut eb li nequeꞌcꞌamoc be chiruheb, ut eb li nequeꞌtaklan saꞌ xbe̱neb, joꞌ eb ajcuiꞌ laj rakol a̱tin ut li cuanqueb xcuanquil. Ut quixye reheb: —La̱in xinti̱x. Incꞌaꞌ chic nincuy.

³ Ac xeril chixjunil li quixba̱nu li Ka̱cuaꞌ le̱ Dios reheb li tenamit aꞌin saꞌ e̱cꞌabaꞌ la̱ex. Li Ka̱cuaꞌ le̱ Dios, aꞌan li quitenkꞌan e̱re saꞌ li ple̱t.

⁴ La̱in xinye e̱re bar cuan li naꞌajej li textzꞌak usta toj ma̱jiꞌ nake̱chani chixjunil. Ma̱cuaꞌ caꞌaj cuiꞌ li naꞌajej li ac xke̱chani xinjeqꞌui e̱re riqꞌuin bu̱lic. Xinjeqꞌui aj ban cuiꞌ e̱re chixjunil li naꞌajej li toj ma̱jiꞌ nake̱chani, li naticla chak cuan cuiꞌ li nimaꞌ Jordán ut nacuulac toj saꞌ li palau Mediterráneo li cuan saꞌ li oeste.

⁵ Li Ka̱cuaꞌ le̱ Dios ta̱tenkꞌa̱nk e̱re chirisinquileb chi junaj cua li cuanqueb saꞌ li naꞌajej aꞌan re nak te̱re̱chaniheb lix naꞌajeb joꞌ quixyechiꞌi e̱re li Ka̱cuaꞌ le̱ Dios.

⁶ Joꞌcan nak checacuubresi e̱chꞌo̱l ut cheqꞌuehak retal chi us re nak te̱ba̱nu chi tzꞌakal chixjunil li cꞌaꞌru tzꞌi̱banbil saꞌ li chakꞌrab li quiqꞌueheꞌ re laj Moisés. Ut incꞌaꞌ te̱canab xba̱nunquil li naxye saꞌ li chakꞌrab.

⁷ Me̱junaji e̱rib riqꞌuineb li tenamit li toj cuanqueb saꞌ e̱ya̱nk, chi moco te̱ba̱nu li juramento saꞌ xcꞌabaꞌ lix dioseb, chi moco te̱lokꞌoniheb, chi moco te̱cuikꞌib e̱rib chiruheb.

⁸ Junelic te̱pa̱b li Ka̱cuaꞌ le̱ Dios joꞌ yo̱quex chixba̱nunquil chalen anakcuan.

⁹ Li Ka̱cuaꞌ quitenkꞌan e̱re chirisinquileb saꞌ li naꞌajej aꞌin li xni̱nkal ru tenamit li kꞌaxal cauheb rib. Ut chalen anakcuan ma̱ jun nequeꞌru chi numta̱c saꞌ e̱be̱n.

¹⁰ Jun li cui̱nk saꞌ e̱ya̱nk naru ta̱ra̱linaheb jun mil chi cui̱nk, usta jun ajcuiꞌ, xban nak li Ka̱cuaꞌ le̱ Dios yo̱ che̱tenkꞌanquil chi pletic joꞌ quixyechiꞌi e̱re junxil.

¹¹ Joꞌcan nak tento te̱ba̱nu cue̱nt ut cherahak li Ka̱cuaꞌ le̱ Dios.

¹² Abanan cui te̱canab xlokꞌoninquil li Ka̱cuaꞌ, ut cui te̱junaji e̱rib riqꞌuineb li tenamit li toj cuanqueb saꞌ e̱ya̱nk, ut cui texsumla̱k riqꞌuineb, ut cui te̱rochbeniheb,

¹³ chenauhak nak li Ka̱cuaꞌ le̱ Dios incꞌaꞌ chic textenkꞌa chi numta̱c saꞌ xbe̱neb li tenamit nak yo̱kex chi pletic riqꞌuineb. Aꞌaneb ban chic teꞌnumta̱k saꞌ e̱be̱n. Teꞌcꞌanjelak joꞌ raꞌal chokꞌ e̱re, re nak textꞌanekꞌ saꞌ rukꞌeb. Chanchan yo̱keb chixqꞌuebal e̱tzꞌu̱m xban nak teꞌxba̱nu raylal e̱re. Chanchanakeb li qꞌuix li ta̱oc saꞌ xnakꞌ e̱ru. Cui te̱ba̱nu li incꞌaꞌ us, eb aꞌan teꞌnumta̱k saꞌ e̱be̱n ut ma̱ jun e̱re ta̱cana̱k saꞌ li cha̱bil naꞌajej aꞌin li xqꞌue e̱re li Ka̱cuaꞌ le̱ Dios.

¹⁴ La̱in cuulac re xkꞌehil lin camic. La̱in nacuaj nak te̱qꞌue retal chi anchal e̱chꞌo̱l ut chi anchal e̱ra̱m nak chixjunil li cha̱bil li quixyechiꞌi e̱re li Ka̱cuaꞌ, xqꞌue e̱re. Ut ma̱ jun li cꞌaꞌru quixyechiꞌi e̱re incꞌaꞌ ta xqꞌue.

¹⁵ Joꞌ nak xqꞌue chixjunil li cha̱bil li quixyechiꞌi e̱re li Ka̱cuaꞌ le̱ Dios, joꞌcan ajcuiꞌ nak tixqꞌue chak raylal saꞌ e̱be̱n joꞌ quixye e̱re, cui incꞌaꞌ te̱ba̱nu li us. Tixsach e̱ru re nak incꞌaꞌ chic texcua̱nk saꞌ li cha̱bil naꞌajej aꞌin li quixqꞌue e̱re li Ka̱cuaꞌ.

¹⁶ Cui incꞌaꞌ te̱ba̱nu li naxye saꞌ li contrato li quixba̱nu li Dios e̱riqꞌuin, malaj ut cui te̱lokꞌoni li jalanil dios ut texcꞌanjelak chiruheb, ta̱cha̱lk xjoskꞌil li Dios saꞌ e̱be̱n, ut saꞌ junpa̱t tex-isi̱k saꞌ li cha̱bil naꞌajej aꞌin li quixqꞌue e̱re li Dios, chan laj Josué.