Josué 22 - Li Santil hu

Eb li ralal xcꞌajol laj Rubén, laj Gad ut li yijach li ralal xcꞌajol laj Manasés queꞌsukꞌi saꞌ lix naꞌajeb saꞌ li este

¹ Laj Josué quixbokeb li ralal xcꞌajol laj Rubén ut eb li ralal xcꞌajol laj Gad joꞌ eb ajcuiꞌ li yijach li ralal xcꞌajol laj Manasés.

² Ut quixye reheb: —La̱ex xex-abin chiru laj Moisés laj cꞌanjel chiru li Dios ut xeba̱nu li cꞌaꞌru quinye la̱in.

³ Chalen chak junxil ut toj chalen anakcuan ma̱ jun sut xecanabeb xjuneseb laj Israel le̱ rech tenamitil. Xeba̱nu ban chi tzꞌakal re ru le̱ chakꞌrabinquil xban li Ka̱cuaꞌ li kaDios.

⁴ Anakcuan ac xqꞌue ke li Ka̱cuaꞌ li cꞌaꞌru quixyechiꞌi ut eb le̱ rech tenamitil cuanqueb saꞌ xya̱lal. Anakcuan tintzꞌa̱ma che̱ru nak texsukꞌi̱k saꞌ le̱ naꞌaj aran jun pacꞌal li nimaꞌ Jordán, li quiqꞌueheꞌ e̱re xban laj Moisés laj cꞌanjel chiru li Ka̱cuaꞌ.

⁵ Caꞌaj cuiꞌ li cꞌaꞌru nintzꞌa̱ma che̱ru, aꞌan nak te̱ba̱nu chi anchal e̱chꞌo̱l li cꞌaꞌru naxye saꞌ lix chakꞌrab li Ka̱cuaꞌ li quixqꞌue e̱re laj Moisés laj cꞌanjel chiru. La̱in nacuaj nak te̱ra li Ka̱cuaꞌ li kaDios. Ut texcua̱nk joꞌ naraj aꞌan. Chexocak saꞌ le̱ chꞌo̱l lix chakꞌrab. Chexpa̱ba̱nk ut chexcꞌanjelak chiru chi anchal e̱chꞌo̱l, chan laj Josué.

⁶ Ut chirix aꞌan laj Josué quixtzꞌa̱ma chiru li Dios nak ta̱rosobtesiheb, tojoꞌnak quixtaklaheb saꞌ lix muheba̱leb.

⁷ Yijach li ralal xcꞌajol laj Manasés quiqꞌueheꞌ xnaꞌajeb aran Basán saꞌ li este xban laj Moisés. Ut li yijach chic li ralal xcꞌajol laj Manasés quiqꞌueheꞌ xnaꞌajeb xban laj Josué saꞌ xya̱nkeb laj Israel, li xeꞌcana chi cua̱nc aran jun pacꞌal li nimaꞌ Jordán saꞌ li oeste. Ut eb li yijach li ralal xcꞌajol laj Manasés, li quiqꞌueheꞌ xnaꞌajeb saꞌ li este, laj Josué quixtaklaheb saꞌ rochocheb nak acak xtzꞌa̱ma rosobtesinquileb chiru li Ka̱cuaꞌ.

⁸ Ut quixye ajcuiꞌ reheb: —Ayukex saꞌ le̱ muheba̱l ut yalomak xsahil li biomal li xere̱chani riqꞌuineb li xicꞌ nequeꞌiloc ke. Nabaleb li queto̱mk, li plata, li oro, ut li bronce ut nabal li akꞌej re te̱jeqꞌui che̱rix la̱ex, joꞌ ajcuiꞌ chirixeb le̱ rech tenamitil, chan.

⁹ Joꞌcaꞌin nak queꞌxjach ribeb li ralal xcꞌajol laj Rubén ut eb li ralal xcꞌajol laj Gad, joꞌ ajcuiꞌ li yijach li ralal xcꞌajol laj Manasés riqꞌuineb li jun chꞌol chic laj Israel. Queꞌxjach ribeb aran Silo saꞌ li naꞌajej Canaán ut queꞌco̱eb saꞌ li naꞌajej Galaad, li naꞌajej li quiqꞌueheꞌ reheb joꞌ quixye li Ka̱cuaꞌ re laj Moisés.

Queꞌxyi̱b jun li artal chire li nimaꞌ Jordán

¹⁰ Nak queꞌcuulac saꞌ li nuba̱l cuan cuiꞌ li nimaꞌ Jordán, queꞌxyi̱b jun nimla artal saꞌ li naꞌajej Canaán eb li ralal xcꞌajol laj Rubén ut eb li ralal xcꞌajol laj Gad, joꞌ ajcuiꞌ li yijach li ralal xcꞌajol laj Manasés.

¹¹ Ut eb laj Israel queꞌrabi resil nak eb li ralal xcꞌajol laj Rubén ut eb li ralal xcꞌajol laj Gad, joꞌ ajcuiꞌ li yijach li ralal xcꞌajol laj Manasés queꞌxyi̱b jun li artal saꞌ li nuba̱l re lix chꞌochꞌeb laj Israel chire li nimaꞌ Jordán.

¹² Queꞌxchꞌutub ribeb chixjunileb laj Israel li cuanqueb saꞌ li oeste re teꞌxic chi pletic riqꞌuineb.

¹³ Eb laj Israel queꞌxtaklaheb saꞌ li naꞌajej Galaad laj Finees li ralal laj Eleazar laj tij riqꞌuineb li ralal xcꞌajol laj Rubén, li ralal xcꞌajol laj Gad ut li yijach li ralal xcꞌajol laj Manasés.

¹⁴ Queꞌxtakla ajcuiꞌ laje̱b li nequeꞌcꞌamoc be saꞌ xya̱nkeb li junju̱nk te̱p. Queꞌco̱eb saꞌ xcꞌabaꞌ li junju̱nk chꞌu̱tal li ralal xcꞌajol laj Israel.

¹⁵ Eb aꞌan queꞌtakla̱c saꞌ li naꞌajej Galaad chi a̱tinac riqꞌuineb li ralal xcꞌajol laj Rubén, li ralal xcꞌajol laj Gad, ut li yijach li ralal xcꞌajol laj Manasés.

¹⁶ Ut queꞌxye reheb: —La̱o xochal chi a̱tinac e̱riqꞌuin saꞌ xcꞌabaꞌeb laj Israel, le̱ rech tenamitil. ¿Cꞌaꞌut nak xeba̱nu li ma̱c aꞌin chiru li kaDios? ¿Cꞌaꞌut nak xex-oc chixyi̱banquil li artal aꞌin? ¿Cꞌaꞌut nak yo̱quex chixkꞌetbal lix chakꞌrab li Ka̱cuaꞌ Dios?

¹⁷ ¿Ma incꞌaꞌ ta biꞌ nabal li ma̱c xkaba̱nu nak xkalokꞌoni li yi̱banbil dios saꞌ li naꞌajej Peor? Li ma̱c aꞌan toj cuan ajcuiꞌ saꞌ kabe̱n chalen anakcuan. Xban li ma̱c aꞌan, nabaleb lix tenamit li Dios queꞌcam.

¹⁸ Ut la̱ex yo̱quex chixcanabanquil li Ka̱cuaꞌ Dios ut yo̱quex chixkꞌetkꞌetinquil e̱rib chiru. Cui joꞌcan yo̱quex, ta̱cha̱lk xjoskꞌil li Dios saꞌ kabe̱n la̱o aj Israel.

¹⁹ Cui la̱ex nequecꞌoxla nak le̱ naꞌaj muxbil ru naru nequexnumeꞌ saꞌ kaya̱nk ut naru nequexcuan saꞌ li naꞌajej cuan cuiꞌ lix tabernáculo li Ka̱cuaꞌ Dios. La̱o incꞌaꞌ nakaj nak te̱kꞌetkꞌeti e̱rib chiru li Ka̱cuaꞌ, chi moco te̱kꞌetkꞌeti e̱rib chiku la̱o riqꞌuin xyi̱banquil jalan chic artal chiru lix artal li Ka̱cuaꞌ Dios.

²⁰ Chijulticokꞌ e̱re nak laj Acán li ralal laj Zera quima̱cob riqꞌuin xchapbal li ta̱cꞌanjelak chiru li Dios ut riqꞌuin xchapbal li ac kꞌaxtesinbil re sachecꞌ. Xban li ma̱c li quixba̱nu, li Ka̱cuaꞌ quijoskꞌoꞌ saꞌ kabe̱n chikajunilo ut moco caꞌaj cuiꞌ ta aꞌan quicam xban li ma̱c li quixba̱nu, chanqueb.

²¹ Eb li ralal xcꞌajol laj Rubén ut eb li ralal xcꞌajol laj Gad, joꞌ eb ajcuiꞌ yijach li ralal xcꞌajol laj Manasés queꞌchakꞌoc ut queꞌxye reheb laj cꞌamol be saꞌ xya̱nkeb laj Israel:

²² —Li Ka̱cuaꞌ li nimajcual Dios, aꞌan naxnau chixjunil. Aꞌan naxnau cꞌaꞌru aj e nak xkayi̱b li artal aꞌin. Ut aꞌan ta̱cꞌutuk re lix ya̱lal che̱ru. Cui la̱o xkayi̱b li artal aꞌin re takakꞌetkꞌeti kib chiru, malaj ut re xtzꞌekta̱nanquil li Dios, choxqꞌuehak ta chi ca̱mc.

²³ Aꞌ ta li Ka̱cuaꞌ chiqꞌuehok ke chixtojbal li kama̱c cui la̱o xkayi̱b li artal aꞌin re xtzꞌekta̱nanquil li Dios malaj ut re li mayej re xcꞌambal kib saꞌ usilal, malaj ut re xqꞌuebal li cꞌatbil mayej.

²⁴ La̱o xkayi̱b li artal aꞌin xban nak xkacꞌoxla nak mokon eb le̱ ralal e̱cꞌajol ma̱re teꞌxye ke: “La̱ex incꞌaꞌ naru nequexchal arin chixlokꞌoninquil li Ka̱cuaꞌ li kaDios la̱o aj Israel.”

²⁵ Ut ma̱re teꞌxye: “Li Ka̱cuaꞌ Dios quixqꞌue li nimaꞌ Jordán chokꞌ nuba̱l re li kanaꞌaj. Ut aꞌan najachoc re li kanaꞌaj riqꞌuin le̱ re la̱ex li ralal xcꞌajol laj Rubén, ut li ralal xcꞌajol laj Gad,” ma̱re chaꞌkeb reheb li kalal kacꞌajol. Ut ma̱re teꞌxcanab xxucuanquil ru li Ka̱cuaꞌ Dios.

²⁶ Joꞌcan nak xkacꞌu̱b ru nak takayi̱b junak li artal. Ma̱cuaꞌ re qꞌuehoc mayej chi moco re cꞌatoc xul.

²⁷ Xkayi̱b ban joꞌ retalil chokꞌ ke ut chokꞌ e̱re la̱ex ut reheb ajcuiꞌ li kalal kacꞌajol li teꞌcua̱nk mokon. Xkayi̱b re xcꞌutbal nak la̱o naru ajcuiꞌ nakalokꞌoni li Ka̱cuaꞌ Dios ut naru ajcuiꞌ toxic saꞌ li tabernáculo re xqꞌuebal li kamayej ut li cꞌatbil mayej re xtzꞌa̱manquil xcuybal li kama̱c ut re ajcuiꞌ xcꞌambal kib saꞌ usilal riqꞌuin li Dios. Chi joꞌcan eb le̱ ralal e̱cꞌajol incꞌaꞌ naru teꞌxye reheb li kalal kacꞌajol nak incꞌaꞌ naru teꞌxic chixlokꞌoninquil li Dios.

²⁸ La̱o xkacꞌoxla nak cui ani ta̱yehok reheb li kalal kacꞌajol chi joꞌcan, eb aꞌan teꞌxye, “Qꞌuehomak retal. Eb li kaxeꞌto̱nil yucuaꞌ queꞌxyi̱b li artal aꞌin chokꞌ re li Ka̱cuaꞌ. Ma̱cuaꞌ re qꞌuehoc mayej chi moco re xcꞌatbal li xul. Re ban nak ta̱cꞌanjelak chokꞌ retalil chiku la̱o ut che̱ru la̱ex.”

²⁹ Incꞌaꞌ taxak chicꞌulma̱nk chi joꞌcan. Incꞌaꞌ taxak takakꞌetkꞌeti kib chiru li Ka̱cuaꞌ chi moco takatzꞌekta̱na riqꞌuin xyi̱banquil li artal re li cꞌatbil mayej, chi moco re qꞌuehoc mayej, chi moco re li cꞌatbil xul, xban nak ma̱cꞌaꞌ chic junak artal chiru lix artal li Ka̱cuaꞌ Dios li cuan chiru li tabernáculo, chanqueb.

³⁰ Laj Finees laj tij ut eb li nequeꞌcꞌamoc be, joꞌ ajcuiꞌ li nequeꞌtaklan saꞌ xbe̱neb li junju̱nk chꞌu̱tal queꞌrabi li cꞌaꞌru queꞌxye li ralal xcꞌajol laj Rubén, ut eb li ralal xcꞌajol laj Gad, ut li yijach li ralal xcꞌajol laj Manasés. Ut queꞌxcꞌul xchꞌo̱l li cꞌaꞌru queꞌxye.

³¹ Ut laj Finees li ralal laj Eleazar laj tij quixye reheb: —Anakcuan nakanau nak li Ka̱cuaꞌ Dios cuan kiqꞌuin. La̱ex incꞌaꞌ xekꞌet xchakꞌrab li Dios nak xeyi̱b li artal aꞌin. Anakcuan nakanau nak li Dios incꞌaꞌ tixqꞌue raylal saꞌ kabe̱n la̱o aj Israel, chan.

³² Chirix aꞌan laj Finees laj tij rochbeneb li queꞌco̱eb chirix queꞌel riqꞌuineb li ralal xcꞌajol laj Rubén ut laj Gad saꞌ li naꞌajej Galaad. Queꞌsukꞌi Canaán saꞌ lix naꞌajeb ut queꞌxye reheb chixjunileb laj Israel li cꞌaꞌru quiyeheꞌ reheb.

³³ Eb laj Israel queꞌxcꞌul xchꞌo̱l li cꞌaꞌru queꞌxye chak. Joꞌcan nak eb laj Israel queꞌxlokꞌoni li Dios ut incꞌaꞌ chic queꞌxcꞌoxla xic chi pletic riqꞌuineb li ralal xcꞌajol laj Rubén, ut li ralal xcꞌajol laj Gad chixsachbal ru li naꞌajej li cuanqueb cuiꞌ.

³⁴ Ut eb li ralal xcꞌajol laj Rubén ut eb li ralal xcꞌajol laj Gad queꞌxqꞌue “Ed” chokꞌ xcꞌabaꞌ li artal ut queꞌxye: —Li artal aꞌin, aꞌan retalil chokꞌ ke nak li Ka̱cuaꞌ, aꞌan li tzꞌakal Dios, chanqueb.