Josué 21 - Li Santil hu

Aꞌaneb aꞌin li tenamit li quiqꞌueheꞌ reheb li ralal xcꞌajol laj Leví

¹ Eb li nequeꞌcꞌamoc be saꞌ xya̱nkeb li ralal xcꞌajol laj Leví queꞌco̱eb riqꞌuin laj Eleazar laj tij ut riqꞌuin laj Josué li ralal laj Nun, joꞌ ajcuiꞌ riqꞌuineb li nequeꞌcꞌamoc be saꞌ xya̱nkeb laj Israel.

² Queꞌa̱tinac riqꞌuineb aran Silo saꞌ li naꞌajej Canaán ut queꞌxye reheb: —Li Ka̱cuaꞌ Dios quixye re laj Moisés nak te̱qꞌue ke eb li tenamit re tocua̱nk cuiꞌ joꞌ ajcuiꞌ li cꞌaleba̱l re teꞌcua̱nk cuiꞌ li kaqueto̱mk, chanqueb.

³ Eb laj Israel queꞌxqꞌue eb lix tenamiteb chokꞌ reheb li ralal xcꞌajol laj Leví, joꞌ quixye li Ka̱cuaꞌ. Ut queꞌxqꞌue ajcuiꞌ li cꞌaleba̱l reheb.

⁴ Ut nak queꞌbu̱lic chirix li naꞌajej li teꞌxcꞌul eb laj levita, li xbe̱n li queꞌtzꞌak, aꞌaneb li ralal xcꞌajol aj Coat li ralal laj Aarón laj tij. Oxlaju li tenamit li quiqꞌueheꞌ reheb xbaneb laj Judá, laj Simeón, ut laj Benjamín.

⁵ Ut eb li jun chꞌol chic li ralal xcꞌajol laj Coat queꞌxcꞌul laje̱b li tenamit riqꞌuineb li ralal xcꞌajol laj Efraín, laj Dan ut yijach li ralal xcꞌajol laj Manasés li cuanqueb saꞌ li oeste.

⁶ Ut queꞌxcꞌul ajcuiꞌ lix tenamiteb li ralal xcꞌajol laj Gersón riqꞌuineb li ralal xcꞌajol laj Isacar, laj Aser, laj Neftalí ut li yijach chic li ralal xcꞌajol laj Manasés, li queꞌcuan saꞌ li este. Oxlaju chixjunileb li tenamit li queꞌxcꞌul aran Basán.

⁷ Joꞌcan ajcuiꞌ eb li ralal xcꞌajol laj Merari queꞌxcꞌul ajcuiꞌ lix tenamiteb riqꞌuineb li ralal xcꞌajol laj Rubén, laj Gad, ut laj Zabulón. Cablaju chixjunil li tenamit li queꞌxcꞌul, aꞌ yal chanru xqꞌuial li junju̱nk chꞌu̱tal.

⁸ Eb laj Israel queꞌxjeqꞌui eb li tenamit aꞌin reheb li ralal xcꞌajol laj Leví riqꞌuin bu̱lic. Ut quiqꞌueheꞌ ajcuiꞌ li cꞌaleba̱l reheb lix queto̱mkeb joꞌ quixye li Ka̱cuaꞌ re laj Moisés.

⁹ Aꞌaneb aꞌin lix cꞌabaꞌeb li tenamit li quiqꞌueheꞌ reheb li ralal xcꞌajol laj Leví xbaneb li ralal xcꞌajol laj Judá ut xbaneb li ralal xcꞌajol laj Simeón.

¹⁰ Nak queꞌbu̱lic, li ani quiqꞌueheꞌ xnaꞌajeb xbe̱n cua, aꞌaneb li ralal xcꞌajol laj Coat li ralal laj Aarón.

¹¹ Aꞌ li tenamit Quiriat-arba quiqꞌueheꞌ reheb. Saꞌ li naꞌajej aꞌan quicuan li mamaꞌ cui̱nk laj Anac. Hebrón nequeꞌxye ajcuiꞌ re li tenamit aꞌan li cuan saꞌ li tzu̱l ru saꞌ lix naꞌajeb laj Judá. Ut quiqꞌueheꞌ ajcuiꞌ reheb li xnaꞌajeb lix queto̱mk li cuan chi nachꞌ.

¹² Abanan li cꞌaleba̱l re li tenamit aꞌan, joꞌ ajcuiꞌ li cocꞌ cꞌaleba̱l, aꞌan quiqꞌueheꞌ chokꞌ xnaꞌaj laj Caleb, li ralal laj Jefone.

¹³ Li naꞌajej li quiqꞌueheꞌ reheb li ralal xcꞌajol laj Aarón laj tij, aꞌan li tenamit Hebrón. Aꞌan ajcuiꞌ li tenamit li quisiqꞌueꞌ ru re teꞌxcol cuiꞌ rib li ani naxcamsi ras ri̱tzꞌin chi incꞌaꞌ yal naraj xchꞌo̱l. Ut quiqꞌueheꞌ ajcuiꞌ eb li tenamit Libna,

¹⁴ Jatir, Estemoa,

¹⁵ Holón, Debir,

¹⁶ Aín, Juta, Bet-semes. Bele̱b chixjunileb li tenamit joꞌ ajcuiꞌ li cocꞌ cꞌaleba̱l li quiqꞌueheꞌ reheb xbaneb li ralal xcꞌajol laj Judá ut eb li ralal xcꞌajol laj Simeón.

¹⁷ Ut eb li naꞌajej li queꞌxqꞌue eb li ralal xcꞌajol laj Benjamín, aꞌaneb aꞌin: Gabaón, Geba,

¹⁸ Anatot ut Almón. Aꞌaneb aꞌin li ca̱hib chi tenamit rochbeneb li naꞌajej li teꞌxqꞌuiresi cuiꞌ lix queto̱mkeb, li quiqꞌueheꞌ reheb xbaneb li ralal xcꞌajol laj Benjamín.

¹⁹ Oxlaju chixjunileb li tenamit rochbeneb li naꞌajej li teꞌxqꞌuiresi cuiꞌ lix queto̱mkeb, li quiqꞌueheꞌ reheb li ralal xcꞌajol laj Aarón, laj tij.

²⁰ Eb li jun chꞌol chic li ralal xcꞌajol laj Coat, li ralal laj Leví, queꞌxcꞌul lix tenamiteb riqꞌuineb li ralal xcꞌajol laj Efraín.

²¹ Quiqꞌueheꞌ reheb li tenamit Siquem li tzu̱l ru, li cuan saꞌ lix naꞌajeb li ralal xcꞌajol laj Efraín. Aꞌan li tenamit li quisiqꞌueꞌ ru re teꞌxcol cuiꞌ rib eb li nequeꞌxcamsi ras ri̱tzꞌin chi incꞌaꞌ yal naraj xchꞌo̱l. Ut quiqꞌueheꞌ ajcuiꞌ reheb li tenamit Gezer,

²² Kibsaim ut Bet-horón. Ca̱hib chi tenamit li quiqꞌueheꞌ reheb rochbeneb lix naꞌajeb lix queto̱mk.

²³ Ut li naꞌajej li queꞌxqꞌue eb li ralal xcꞌajol laj Dan, aꞌaneb aꞌin: eb li tenamit Elteque ut Gibetón,

²⁴ eb li tenamit Ajalón ut Gat-rimón. Ca̱hib chi tenamit li quiqꞌueheꞌ reheb rochbeneb lix naꞌajeb lix queto̱mkeb.

²⁵ Ut li queꞌxcꞌul riqꞌuineb li yijach li ralal xcꞌajol laj Manasés, aꞌaneb aꞌin: eb li tenamit Taanac, ut Gat-rimón. Cuib chi tenamit quiqꞌueheꞌ reheb rochbeneb lix naꞌajeb li queto̱mkeb.

²⁶ Laje̱b chixjunileb li tenamit li quiqꞌueheꞌ reheb li ralal xcꞌajol laj Coat, rochbeneb lix naꞌajeb lix queto̱mkeb.

²⁷ Ut eb li ralal xcꞌajol laj Gersón, li ralal laj Leví, queꞌxcꞌul eb li tenamit aꞌin riqꞌuineb yijach li ralal xcꞌajol laj Manasés: li tenamit Beestera, joꞌ ajcuiꞌ li tenamit Golán li cuan Basán, li quisiqꞌueꞌ ru re teꞌxcol cuiꞌ rib li teꞌxcamsi ras ri̱tzꞌin chi incꞌaꞌ yal teꞌraj xchꞌo̱l.

²⁸ Ut riqꞌuineb li ralal xcꞌajol laj Isacar queꞌxcꞌul eb li tenamit aꞌin: Cisón, Daberat,

²⁹ Jarmut ut En-ganim. Ca̱hib chi tenamit rochbeneb lix naꞌajeb lix queto̱mkeb.

³⁰ Ut riqꞌuineb li ralal xcꞌajol laj Aser queꞌxcꞌuleb li tenamit aꞌin: Miseal, Abdón,

³¹ Helcat ut Rehob. Ca̱hib chi tenamit rochbeneb lix naꞌajeb lix queto̱mkeb.

³² Ut riqꞌuineb li ralal xcꞌajol laj Neftalí queꞌxcꞌuleb li tenamit aꞌin: Hamot-dor, Cartán ut Cedes li cuan Galilea. Aꞌan ajcuiꞌ li quisiqꞌueꞌ ru re teꞌxcol cuiꞌ rib li nequeꞌxcamsi ras ri̱tzꞌin chi incꞌaꞌ yal naraj xchꞌo̱l.

³³ Oxlaju chixjunileb li tenamit li quiqꞌueheꞌ reheb li ralal xcꞌajol laj Gersón, rochbeneb lix naꞌajeb lix queto̱mkeb.

³⁴ Eb li ralal xcꞌajol laj Merari, li ralal laj Leví, li toj ma̱jiꞌ nequeꞌxcꞌul reheb, eb aꞌan queꞌqꞌueheꞌ xtenamiteb xbaneb li ralal xcꞌajol laj Zabulón. Aꞌaneb aꞌin li tenamit li quiqꞌueheꞌ reheb: Jocneam, Carta,

³⁵ Dimna ut Naalal. Ca̱hib chi tenamit rochbeneb lix naꞌajeb lix queto̱mkeb.

³⁶ Ut queꞌxcꞌul ajcuiꞌ eb li tenamit aꞌin riqꞌuineb li ralal xcꞌajol laj Rubén: Beser, Jahaza,

³⁷ Cademot, ut Mefaat. Ca̱hib chi tenamit rochbeneb lix naꞌajeb lix queto̱mkeb.

³⁸ Ut eb li tenamit li queꞌxcꞌul riqꞌuineb li ralal xcꞌajol laj Gad, aꞌaneb aꞌin: Mahanaim ut Ramot li cuan Galaad, li quisiqꞌueꞌ ru re teꞌxcol cuiꞌ rib li nequeꞌxcamsi ras ri̱tzꞌin chi incꞌaꞌ yal nequeꞌraj xchꞌo̱l.

³⁹ Ut queꞌxcꞌul ajcuiꞌ eb li tenamit aꞌin: Hesbón, ut Jazer. Ca̱hib chi tenamit rochbeneb lix naꞌajeb lix queto̱mkeb.

⁴⁰ Aꞌaneb aꞌin chixjunileb li tenamit li queꞌxcꞌul li ralal xcꞌajol laj Merari, li ralal laj Leví, li toj ma̱jiꞌ queꞌxcꞌul xnaꞌajeb. Cablaju chixjunil li tenamit li queꞌxcꞌul riqꞌuin bu̱lic.

⁴¹ Cuakxakib roxcꞌa̱l chixjunileb li tenamit li quiqꞌueheꞌ reheb li ralal xcꞌajol laj Leví. Li tenamit li quiqꞌueheꞌ reheb, aꞌan cuan saꞌ lix naꞌajeb laj Israel. Ut quiqꞌueheꞌ ajcuiꞌ xnaꞌajeb lix queto̱mkeb chi xjun sutam lix tenamiteb.

⁴² Eb li tenamit aꞌin xjunes cuanqueb ut cuan lix naꞌajeb lix queto̱mk chi xjun sutam. Joꞌcaꞌin nak quiqꞌueheꞌ xnaꞌajeb li ralal xcꞌajol laj Leví.

⁴³ Joꞌcaꞌin nak li Ka̱cuaꞌ quixqꞌueheb lix chꞌochꞌ laj Israel, joꞌ quixyechiꞌi chak reheb lix xeꞌto̱nil yucuaꞌ riqꞌuin juramento. Queꞌxcꞌul chokꞌ reheb ut queꞌcuan aran.

⁴⁴ Ut li Ka̱cuaꞌ quixba̱nu li cꞌaꞌru quixyechiꞌi reheb. Quixqꞌueheb chi cua̱nc saꞌ usilal saꞌ lix tenamiteb. Ut ma̱ jun reheb li xicꞌ nequeꞌiloc reheb queꞌru chi pletic riqꞌuineb xban nak li Ka̱cuaꞌ naxqꞌueheb laj Israel chi numta̱c saꞌ xbe̱neb.

⁴⁵ Chixjunil li us li quixyechiꞌi reheb laj Israel, li Ka̱cuaꞌ quixqꞌue. Ma̱ jun li cꞌaꞌak re ru li quixyechiꞌi quicana ta yal chi joꞌcan. Quixba̱nu ban chixjunil li quixye.