Josué 20 - Li Santil hu

Eb laj Israel queꞌxye nak teꞌxsicꞌ junak li naꞌajej re teꞌxcol cuiꞌ rib

¹ Li Ka̱cuaꞌ Dios quia̱tinac riqꞌuin laj Josué ut quixye re:

² —Ta̱ye reheb laj Israel nak teꞌxsicꞌ ruheb li tenamit li teꞌxcol cuiꞌ chak ribeb, joꞌ quinye re laj Moisés.

³ Saꞌ li tenamit aꞌan teꞌxcol chak rib li ani naxcamsi ras ri̱tzꞌin chi incꞌaꞌ yal naraj xchꞌo̱l nak tixcamsi. Saꞌ li tenamit li teꞌxsicꞌ ru, aran teꞌxcol chak ribeb chiru li rechꞌalal li camenak li yo̱k chi sicꞌoc re.

⁴ Li ani ta̱xic chixcolbal rib saꞌ junak reheb li tenamit aꞌan, tento nak ta̱xic saꞌ li oqueba̱l re li tenamit ut tixye reheb li nequeꞌcꞌamoc be saꞌ li tenamit aꞌan cꞌaꞌru xma̱c re nak teꞌxcꞌul saꞌ lix tenamiteb ut teꞌxqꞌue xnaꞌaj re nak ta̱cua̱nk aran.

⁵ Cui li rechꞌalal li camenak ta̱xic chixsicꞌbal saꞌ li tenamit aꞌan, eb li nequeꞌtaklan saꞌ li tenamit incꞌaꞌ naru teꞌxkꞌaxtesi saꞌ rukꞌeb li cui̱nk li quixcamsi li ras ri̱tzꞌin chi incꞌaꞌ yal xraj xchꞌo̱l xban nak eb li cui̱nk aꞌan moco quicuan ta xple̱teb chi ribileb rib.

⁶ Li cui̱nk aꞌan ta̱cana̱k saꞌ li tenamit aꞌan toj ta̱rakekꞌ a̱tin chirix xbaneb li tenamit ut toj ta̱ca̱mk lix yucuaꞌil laj tij li cua̱nk saꞌ eb li cutan aꞌan. Chirix aꞌan naru ta̱xic cuiꞌchic saꞌ li rochoch ut saꞌ li tenamit li qui-el cuiꞌ chak, chan li Ka̱cuaꞌ.

⁷ Ut eb laj Israel queꞌxsicꞌ ruheb li tenamit aꞌin: Cedes li cuan aran Galilea saꞌ li tzu̱l ru saꞌ lix naꞌajeb li ralal xcꞌajol laj Neftalí: li tenamit Siquem li tzu̱l ru li cuan saꞌ lix naꞌajeb li ralal xcꞌajol laj Efraín: ut li tenamit Quiriat-arba li nequeꞌxye ajcuiꞌ Hebrón re. Li tenamit aꞌan cuan saꞌ li naꞌajej tzu̱l ru saꞌ lix naꞌajeb li ralal xcꞌajol laj Judá.

⁸ Ut queꞌxsicꞌ ajcuiꞌ ruheb li tenamit aꞌin jun pacꞌal li nimaꞌ Jordán li nacana saꞌ li este re li tenamit Jericó: Beser li cuan saꞌ li ru takꞌa saꞌ li chaki chꞌochꞌ saꞌ lix chꞌochꞌeb li ralal xcꞌajol laj Rubén, joꞌ ajcuiꞌ li tenamit Ramot aran Galaad saꞌ lix chꞌochꞌeb li ralal xcꞌajol laj Gad, ut li tenamit Golán aran Basán saꞌ lix chꞌochꞌeb li ralal xcꞌajol laj Manasés.

⁹ Aꞌaneb aꞌin li tenamit li quisiqꞌueꞌ ruheb xbaneb laj Israel re teꞌxcol ribeb ut re ajcuiꞌ nak teꞌxcol ribeb li jalaneb xtenamit li naxcamsi ras ri̱tzꞌin chi incꞌaꞌ yal naraj xchꞌo̱l. Teꞌxcol rib saꞌ li tenamit aꞌan re nak incꞌaꞌ teꞌcamsi̱k xbaneb li rechꞌalal li camenak toj ta̱rakekꞌ a̱tin saꞌ xbe̱neb.