Josué 2 - Li Santil hu

Laj Josué quixtaklaheb laj qꞌuehol etal aran Jericó

¹ Laj Josué, li ralal laj Nun, toj Sitim quixtakla cuibeb laj qꞌuehol etal chi mukmu ut quixye reheb: —Ayukex xqꞌuebal retal li naꞌajej Canaán ut li tenamit Jericó, chan. Eb aꞌan queꞌco̱eb ut queꞌcuulac saꞌ rochoch jun li ixk xcomoneb li nequeꞌxcꞌayi rib, xRahab xcꞌabaꞌ. Ut aran queꞌcana chixnumsinquil li kꞌojyi̱n.

² Abanan cuan li queꞌyehoc resil re li rey li cuan Jericó. Ut queꞌxye: —Cuanqueb aj Israel xeꞌchal chixqꞌuebal retal li tenamit chiru li kꞌojyi̱n aꞌin, chanqueb.

³ Ut li rey quixtakla xyebal re lix Rahab: —Isiheb li cui̱nk aꞌan li cuanqueb saꞌ la̱ cuochoch xban nak eb aꞌan xeꞌchal chi qꞌuehoc etal, chan.

⁴ Abanan lix Rahab quixmukeb li cui̱nk ut quixye reheb li takl: —Ya̱l nak xeꞌcꞌulun li cui̱nk cuiqꞌuin. Abanan incꞌaꞌ xinnau bar xeꞌchal chak.

⁵ Nak x-ecuu, xco̱eb xban nak saꞌ li o̱r aꞌan nequeꞌxtzꞌap li oqueba̱l re li tenamit ut incꞌaꞌ ninnau bar xco̱eb. Cui la̱ex texxic chirixeb saꞌ junpa̱t ma̱re toxe̱tauheb, chan lix Rahab.

⁶ Abanan lix Rahab ac xtaklaheb li cuib chi cui̱nk saꞌ xbe̱n li cab bar yo̱ cuiꞌ chixchinanquil lix cheꞌel li acui̱mk lino. Ut quixmukeb saꞌ xya̱nk li lino.

⁷ Li cui̱nk li quixtaklaheb li rey chixta̱kenquileb laj qꞌuehol etal co̱eb toj chire li nimaꞌ Jordán bar incꞌaꞌ cham li haꞌ. Nak ac xeꞌco̱eb li soldado li quixtaklaheb li rey, queꞌxtzꞌap li oqueba̱l re li tenamit.

⁸ Nak toj ma̱jiꞌ nequeꞌcuar laj qꞌuehol etal, co̱ lix Rahab saꞌ xbe̱n li cab chirilbaleb ut quixye reheb:

⁹ —La̱in ninnau nak li Ka̱cuaꞌ xqꞌue e̱re li naꞌajej aꞌin. Ut aꞌan ajcuiꞌ xqꞌuehoc kaxiu chikajunilo. Chixjunileb li cuanqueb arin ca̱mqueb re xban xxiuheb e̱ban la̱ex.

¹⁰ La̱o nakanau nak quex-el chak Egipto li Dios quixchakihobresi li haꞌ saꞌ li Caki Palau re nak texnumekꞌ jun pacꞌal. Ut nakanau ajcuiꞌ nak la̱ex quesach ruheb chi junaj cua li cuib chi rey laj Sehón ut laj Og, lix reyeb laj amorreo li cuanqueb jun pacꞌal li nimaꞌ Jordán.

¹¹ Cꞌajoꞌ nak coxucuac nak xkanau nak ma̱ ani naru napletic e̱riqꞌuin la̱ex xban nak li Ka̱cuaꞌ le̱ Dios cuan xcuanquil saꞌ choxa ut cuan ajcuiꞌ xcuanquil saꞌ ruchichꞌochꞌ.

¹² Joꞌcan nak la̱in nintzꞌa̱ma che̱ru nak te̱ba̱nu li juramento saꞌ xcꞌabaꞌ li Ka̱cuaꞌ le̱ Dios nak te̱ba̱nu usilal reheb li cuechꞌalal joꞌ nak xinba̱nu usilal e̱re la̱in. Te̱qꞌue junak retalil cue re nak tinnau nak ya̱l nak te̱ba̱nu li cꞌaꞌru yo̱quin chixtzꞌa̱manquil che̱ru.

¹³ Checol rix xyuꞌam lin naꞌ ut lin yucuaꞌ joꞌ ajcuiꞌ eb li cuas ut eb li cui̱tzꞌin joꞌ ixk joꞌ cui̱nk ut chixjunil li cꞌaꞌruheb re. Choe̱col taxak re nak incꞌaꞌ toca̱mk, chan lix Rahab.

¹⁴ Ut eb aꞌan queꞌxye: —Joꞌ nak xacol rix li kayuꞌam la̱o, joꞌcan ajcuiꞌ nak takacol rix le̱ yuꞌam la̱ex cui ma̱ ani aj e ta̱ye li cꞌaꞌru yo̱co chixba̱nunquil. Ut nak ac xkꞌaxtesi saꞌ kukꞌ li naꞌajej aꞌin li Ka̱cuaꞌ, la̱o takaba̱nu usilal e̱re ut saꞌ xya̱lal tocua̱nk e̱riqꞌuin, chanqueb.

¹⁵ Li rochoch lix Rahab, aꞌan yi̱banbil saꞌ xbe̱n li tzꞌac li sutsu cuiꞌ li tenamit. Joꞌcan nak quixcubsiheb li cui̱nk saꞌ li ventana riqꞌuin jun li nimla cꞌa̱m.

¹⁶ Ut quixye reheb: —Ayukex saꞌ li naꞌajej li tzu̱l ru re nak incꞌaꞌ textaꞌekꞌ xbaneb li yo̱queb chi sicꞌoc e̱re. Mukumak e̱rib aran chiru oxib cutan. Nak ac xeꞌsukꞌi chak li soldado saꞌ li tenamit, naru nequexxic la̱ex, chan.

¹⁷ Eb aꞌan queꞌchakꞌoc ut queꞌxye: —La̱o takaba̱nu li cꞌaꞌru xkaye saꞌ li juramento joꞌ xatzꞌa̱ma chiku.

¹⁸ Nak to-oc chire̱chaninquil li tenamit aꞌin, la̱at ta̱tꞌuyub li caki cꞌa̱m aꞌin saꞌ li ventana, li xoa̱cubsi cuiꞌ. Ut ta̱chꞌutubeb saꞌ la̱ cuochoch la̱ naꞌ ut la̱ yucuaꞌ rochbeneb la̱ cuas ut eb la̱ cui̱tzꞌin, ut chixjunileb li cuanqueb saꞌ rochoch la̱ yucuaꞌ.

¹⁹ Abanan cui ta̱e̱lk junak saꞌ la̱ cuochoch, aꞌan cuan xma̱c cui nacam. Ma̱cuaꞌ chic kama̱c la̱o. La̱o cuan kama̱c cui junak nacuulac chixcamsinquil junak reheb li cuanqueb saꞌ la̱ cuochoch.

²⁰ Cui la̱at toa̱jit, la̱o incꞌaꞌ chic tento takaba̱nu li cꞌaꞌru xkaye saꞌ li juramento li xkaba̱nu a̱cuiqꞌuin, chanqueb.

²¹ —Us. Joꞌcan takaba̱nu, chan li ixk ut quixchakꞌrabiheb. Eb aꞌan queꞌco̱eb. Chirix aꞌan li ixk quixbacꞌ li caki cꞌa̱m saꞌ lix ventana.

²² Li cuibeb laj qꞌuehol etal queꞌco̱eb saꞌ li naꞌajej li tzu̱l ru ut aran queꞌxmuk ribeb chiru oxib cutan. Ut eb li soldado yo̱queb chixsicꞌbal yalak bar. Ut ma̱ bar queꞌxtauheb. Joꞌcan nak queꞌsukꞌi Jericó eb li soldado.

²³ Ut eb laj qꞌuehol etal queꞌcube saꞌ li naꞌajej li tzu̱l ru ut queꞌco̱eb. Queꞌxkꞌax li nimaꞌ Jordán ut coxeꞌxtau laj Josué. Queꞌxserakꞌi re li cꞌaꞌru queꞌxcꞌul.

²⁴ Queꞌxye re: —Li Ka̱cuaꞌ xkꞌaxtesi saꞌ kukꞌ li naꞌajej aꞌan xban nak chixjunileb li cuanqueb saꞌ li naꞌajej aꞌan ca̱mqueb re xban xxiuheb kaban la̱o, chanqueb.