Josué 19 - Li Santil hu

Aꞌan aꞌin li naꞌajej li quiqꞌueheꞌ reheb li ralal xcꞌajol laj Simeón

¹ Li xcab li queꞌxbu̱li rix, aꞌan li naꞌajej li queꞌtzꞌak li ralal xcꞌajol laj Simeón. Li naꞌajej li quiqꞌueheꞌ reheb li ralal xcꞌajol laj Simeón, aꞌan cuan saꞌ xya̱nk lix naꞌajeb li ralal xcꞌajol laj Judá.

² Ut aꞌaneb aꞌin li tenamit li quiqꞌueheꞌ reheb: Beerseba, Seba, Molada,

³ Hazar-sual, Bala, Ezem,

⁴ Eltolad, Betul, Horma,

⁵ Siclag, Bet-marcabot, Hazar-susa,

⁶ Bet-lebaot ut Saruhén. Oxlaju chi tenamit li quiqꞌueheꞌ reheb rochbeneb li cocꞌ cꞌaleba̱l.

⁷ Ut quiqꞌueheꞌ reheb eb li tenamit Aín, Rimón, Eter ut Asán. Ca̱hib chi tenamit rochbeneb li cocꞌ cꞌaleba̱l.

⁸ Ut quiqꞌueheꞌ ajcuiꞌ reheb eb li cꞌaleba̱l li cuanqueb toj saꞌ li naꞌajej Baalat-beer, li cuan saꞌ xcue̱nt li tenamit Ramat, li cuan Neguev. Aꞌan aꞌin li naꞌajej li quiqꞌueheꞌ reheb li ralal xcꞌajol laj Simeón aꞌ yal chanru xqꞌuial li junju̱nk chꞌu̱tal.

⁹ Li ralal xcꞌajol laj Simeón queꞌqꞌueheꞌ xnaꞌajeb saꞌ xya̱nk lix naꞌajeb li ralal xcꞌajol laj Judá xban nak kꞌaxal cuiꞌchic nabal lix chꞌochꞌeb. Joꞌcan nak queꞌqꞌueheꞌ xnaꞌajeb saꞌ xya̱nkeb li ralal xcꞌajol laj Judá.

Aꞌan aꞌin li naꞌajej li quiqꞌueheꞌ reheb li ralal xcꞌajol laj Zabulón

¹⁰ Li rox li queꞌxbu̱li rix, aꞌan li naꞌajej li queꞌtzꞌak li ralal xcꞌajol laj Zabulón. Li naꞌajej li quiqꞌueheꞌ reheb li ralal xcꞌajol laj Zabulón quicuulac toj saꞌ li tenamit Sarid.

¹¹ Ut naxic toj saꞌ li oeste ut nacuulac toj saꞌ li naꞌajej Marala. Chirix aꞌan naxic toj Dabeset ut nocoxrakekꞌ cuan cuiꞌ li nimaꞌ li cuan saꞌ xcaꞌyaba̱l li tenamit Jocneam.

¹² Ut aran Sarid naxqꞌue chak vue̱lt saꞌ li este li na-el cuiꞌ li sakꞌe. Ut nacuulac toj saꞌ li naꞌajej Quislot-tabor. Nocox-e̱lk saꞌ li naꞌajej Daberat ut naxic saꞌ li tzu̱l Jafía.

¹³ Nocoxnumekꞌ saꞌ li este cuan cuiꞌ li naꞌajej Gat-hefer ut cuan cuiꞌ li naꞌajej Ita-cazín. Nocox-e̱lk cuan cuiꞌ li naꞌajej Rimón ut naxqꞌue chak vue̱lt saꞌ li naꞌajej Nea.

¹⁴ Ut saꞌ li norte li nuba̱l naxic Hanatón ut nocox-e̱lk saꞌ li ru takꞌa Jefte-el.

¹⁵ Li nuba̱l nanumeꞌ ajcuiꞌ saꞌ eb li tenamit Catat, Naalal, Simrón, Idala ut Belén. Cablaju chixjunil li tenamit li quiqꞌueheꞌ reheb li ralal xcꞌajol laj Zabulón rochbeneb li cocꞌ cꞌaleba̱l.

¹⁶ Aꞌaneb aꞌin li naꞌajej rochbeneb li tenamit ut eb li cocꞌ cꞌaleba̱l li quiqꞌueheꞌ reheb li ralal xcꞌajol laj Zabulón, aꞌ yal chanru xqꞌuial li junju̱nk chꞌu̱tal.

Aꞌan aꞌin li naꞌajej li quiqꞌueheꞌ reheb li ralal xcꞌajol laj Isacar

¹⁷ Li xca̱ li queꞌxbu̱li rix, aꞌan li naꞌajej li queꞌtzꞌak li ralal xcꞌajol laj Isacar aꞌ yal chanru xqꞌuial li junju̱nk chꞌu̱tal.

¹⁸ Li naꞌajej li quiqꞌueheꞌ reheb, aꞌaneb aꞌin: Jezreel, Quesulot, Sunem,

¹⁹ Hafaraim, Sihón, Anaharat,

²⁰ Rabit, Quisión, Abez,

²¹ Remet, En-ganim, En-hada ut Bet-pases.

²² Li nuba̱l re li naꞌajej aꞌin, aꞌan nacuulac saꞌ eb li tenamit Tabor, Sahazima, ut Bet-semes ut nocoxrakekꞌ cuan cuiꞌ li nimaꞌ Jordán. Cuaklaju chixjunileb li tenamit rochbeneb li cocꞌ cꞌaleba̱l.

²³ Aꞌan aꞌin li naꞌajej rochbeneb li tenamit ut eb li cocꞌ cꞌaleba̱l li quiqꞌueheꞌ reheb li ralal xcꞌajol laj Isacar, aꞌ yal chanru xqꞌuial li junju̱nk chꞌu̱tal.

Aꞌaneb aꞌin li naꞌajej li quiqꞌueheꞌ reheb li ralal xcꞌajol laj Aser

²⁴ Li roꞌ li queꞌxbu̱li rix, aꞌan li naꞌajej li queꞌtzꞌak li ralal xcꞌajol laj Aser, aꞌ yal chanru xqꞌuial li junju̱nk chꞌu̱tal.

²⁵ Li naꞌajej li quiqꞌueheꞌ reheb, aꞌaneb aꞌin: Helcat, Halí, Betén, Acsaf,

²⁶ Alamelec, Amad ut Miseal. Nacuulac cuan cuiꞌ li tzu̱l Carmelo li cuan saꞌ li oeste ut nacuulac cuan cuiꞌ li naꞌajej Sihor-libnat.

²⁷ Chirix aꞌan naxqꞌue chak vue̱lt ut naxic saꞌ li este toj saꞌ li naꞌajej Bet-dagón ut naxcꞌul rib riqꞌuin lix naꞌajeb laj Zabulón li cuan saꞌ li ru takꞌa re Jefte-el, li cuan saꞌ li norte riqꞌuineb li naꞌajej Bet-emec ut Neiel. Nocox-e̱lk saꞌ li naꞌajej Cabul li cuan saꞌ li norte.

²⁸ Nacuulac toj saꞌ eb li tenamit Hebrón, Rehob, Hamón ut Caná. Nacuulac toj cuan cuiꞌ li nimla tenamit Sidón.

²⁹ Li nuba̱l naxqꞌue chak vue̱lt toj saꞌ li naꞌajej Ramá ut nacuulac cuan cuiꞌ li tenamit Tiro, li sutsu saꞌ tzꞌac. Ut naxic cuan cuiꞌ li naꞌajej Hosa ut nocox-e̱lk saꞌ lix naꞌaj laj Aczib, cuan cuiꞌ li palau Mediterráneo.

³⁰ Ut nacuulac ajcuiꞌ toj saꞌ eb li tenamit Uma, Afec, ut Rehob. Cuib xcaꞌcꞌa̱l chixjunileb li tenamit rochbeneb li cocꞌ cꞌaleba̱l.

³¹ Aꞌaneb aꞌin li naꞌajej rochbeneb li tenamit ut eb li cocꞌ cꞌaleba̱l li quiqꞌueheꞌ reheb li ralal xcꞌajol laj Aser, aꞌ yal chanru xqꞌuial li junju̱nk chꞌu̱tal.

Aꞌan aꞌin li naꞌajej li quiqꞌueheꞌ reheb li ralal xcꞌajol laj Neftalí

³² Li xcuak li queꞌxbu̱li rix, aꞌan li naꞌajej li queꞌtzꞌak li ralal xcꞌajol laj Neftalí, aꞌ yal chanru xqꞌuial li junju̱nk chꞌu̱tal.

³³ Li nuba̱l re li naꞌajej li queꞌxcꞌul nacuulac toj saꞌ eb li tenamit Helef, Alón-saananim, Adami-neceb ut Jabneel. Nacuulac cuan cuiꞌ li naꞌajej Lacum ut nocox-e̱lk cuan cuiꞌ li nimaꞌ Jordán.

³⁴ Li nuba̱l naxic saꞌ li naꞌajej Aznot-tabor saꞌ li oeste. Chirix aꞌan naxic toj saꞌ li naꞌajej Hucoc ut naxcꞌul rib saꞌ li sur riqꞌuin lix naꞌajeb li ralal xcꞌajol laj Zabulón. Ut naxcꞌul ajcuiꞌ rib saꞌ li oeste riqꞌuin lix naꞌajeb li ralal xcꞌajol laj Aser, joꞌ ajcuiꞌ riqꞌuin lix naꞌajeb li ralal xcꞌajol laj Judá cuan cuiꞌ li nimaꞌ Jordán saꞌ li este.

³⁵ Aꞌaneb aꞌin li tenamit li sutsu saꞌ tzꞌac li quiqꞌueheꞌ reheb li ralal xcꞌajol laj Neftalí: Sidim, Zer, Hamat, Racat, Cineret,

³⁶ Adama, Ramá, Hazor,

³⁷ Cedes, Edrei, En-hazor,

³⁸ Irón, Migdal-el, Horem, Bet-anat ut Bet-semes. Bele̱laju chixjunileb li tenamit rochbeneb li cocꞌ cꞌaleba̱l.

³⁹ Aꞌaneb aꞌin li naꞌajej rochbeneb li tenamit ut eb li cocꞌ cꞌaleba̱l li quiqꞌueheꞌ reheb li ralal xcꞌajol laj Neftalí, aꞌ yal chanru xqꞌuial li junju̱nk chꞌu̱tal.

Aꞌan aꞌin li naꞌajej li quiqꞌueheꞌ reheb li ralal xcꞌajol laj Dan

⁴⁰ Li xcuuk li queꞌxbu̱li rix, aꞌan li naꞌajej li queꞌtzꞌak li ralal xcꞌajol laj Dan, aꞌ yal chanru xqꞌuial li junju̱nk chꞌu̱tal.

⁴¹ Aꞌaneb aꞌin li tenamit li quiqꞌueheꞌ reheb: Zora, Estaol, Ir-semes,

⁴² Saalabín, Ajalón, Jetla,

⁴³ Elón, Timnat, Ecrón,

⁴⁴ Elteque, Gibetón, Baalat,

⁴⁵ Jehúd, Bene-berac, Gat-rimón,

⁴⁶ Mejarcón ut Racón, rochbeneb li tenamit li cuanqueb saꞌ xcaꞌyaba̱l li tenamit Jope.

⁴⁷ Eb li ralal xcꞌajol laj Dan incꞌaꞌ quitzꞌakloc lix naꞌajeb. Joꞌcan nak queꞌco̱eb chi pletic saꞌ li tenamit Lesem. Queꞌxcamsiheb chi chꞌi̱chꞌ li cristian ut queꞌre̱chani li naꞌajej ut aran queꞌcana chi cua̱nc. Li tenamit aꞌan Lesem xcꞌabaꞌ, abanan eb aꞌan queꞌxqꞌue Dan chokꞌ xcꞌabaꞌ xban nak aꞌan xcꞌabaꞌ lix xeꞌto̱nil yucuaꞌeb.

⁴⁸ Aꞌaneb aꞌin li naꞌajej rochbeneb li tenamit ut eb li cocꞌ cꞌaleba̱l li quiqꞌueheꞌ reheb li ralal xcꞌajol laj Dan, aꞌ yal chanru xqꞌuial li junju̱nk chꞌu̱tal.

Aꞌan aꞌin li naꞌajej li quiqꞌueheꞌ re laj Josué

⁴⁹ Nak ac xeꞌxchoy xjeqꞌuinquil li naꞌajej reheb laj Israel, quiqꞌueheꞌ ajcuiꞌ xnaꞌaj laj Josué, li ralal laj Nun, saꞌ xya̱nkeb lix naꞌajeb laj Israel.

⁵⁰ Quiqꞌueheꞌ li naꞌajej li quixtzꞌa̱ma laj Josué, joꞌ quixye li Ka̱cuaꞌ. Quiqꞌueheꞌ re li tenamit Timnat-sera li cuan saꞌ li naꞌajej tzu̱l ru re laj Efraín. Ut laj Josué quixyi̱b cuiꞌchic li tenamit ut aran quicana chi cua̱nc.

⁵¹ Aꞌaneb aꞌin li naꞌajej li queꞌxjeqꞌui laj Eleazar laj tij, ut laj Josué li ralal laj Nun, rochbeneb li nequeꞌcꞌamoc be saꞌ xya̱nkeb li ralal xcꞌajol laj Israel. Queꞌxbu̱li rix li naꞌajej chiru li Dios chiru li oqueba̱l re li tabernáculo nak cuanqueb aran Silo. Joꞌcaꞌin nak queꞌxchoy xjeqꞌuinquil li naꞌajej reheb laj Israel.