Josué 18 - Li Santil hu

Queꞌxcꞌul ajcuiꞌ lix naꞌajeb li cuukub te̱p chic laj Israel

¹ Chixjunileb laj Israel queꞌxchꞌutub ribeb aran Silo ut queꞌxyi̱b li tabernáculo re teꞌxchꞌutub ribeb chixlokꞌoninquil li Dios. Aꞌin quicꞌulman nak ac xeꞌre̱chani li naꞌajej aꞌan.

² Toj cuanqueb cuukub te̱p chic laj Israel li toj ma̱jiꞌ nequeꞌre̱chani lix naꞌajeb.

³ Laj Josué quixye reheb: —¿Joꞌ najtil chic toj yo̱kex chiroybeninquil le̱ naꞌaj? ¿Ma incꞌaꞌ naru te̱cꞌul le̱ naꞌaj li xqꞌue e̱re li Ka̱cuaꞌ lix Dioseb le̱ xeꞌto̱nil yucuaꞌ?

⁴ Sicꞌomak ruheb ox ox chi cui̱nk saꞌ xya̱nkeb li junju̱nk te̱p re nak tebintakla chi rilbal li naꞌajej. Teꞌxqꞌue chak retal chi us ut teꞌcha̱lk cuiqꞌuin ut teꞌxye cue chanru nak takajeqꞌui li naꞌajej aꞌan.

⁵ Cuukub jachal teꞌrisi nak teꞌxjeqꞌui. Ut li naꞌajej li ta̱qꞌuehekꞌ reheb li ralal xcꞌajol laj Judá, aꞌan li cuan saꞌ li sur. Ut li naꞌajej li ta̱qꞌuehekꞌ reheb li ralal xcꞌajol laj José, aꞌan li cuan saꞌ li norte.

⁶ Nak acak xeꞌxbis ut ac xeꞌxjachi chi cuukub jachal, teꞌxtzꞌi̱ba retalil ut teꞌxcꞌam chak cuiqꞌuin re nak takabu̱li rix li naꞌajej chiru li Ka̱cuaꞌ Dios.

⁷ Li ralal xcꞌajol laj Leví incꞌaꞌ ta̱qꞌuehekꞌ xnaꞌajeb xban nak eb aꞌan teꞌcꞌanjelak chokꞌ aj tij chiru li Ka̱cuaꞌ. Eb li ralal xcꞌajol laj Gad ut eb li ralal xcꞌajol laj Rubén, ut yijach li ralal xcꞌajol laj Manasés, eb aꞌan ac xeꞌxcꞌul lix naꞌajeb jun pacꞌal li nimaꞌ Jordán, li nacana saꞌ li este. Aran quiqꞌueheꞌ xnaꞌajeb xban laj Moisés laj cꞌanjel chiru li Dios, chan laj Josué.

⁸ Eb li cui̱nk li queꞌsiqꞌueꞌ ru queꞌco̱eb riqꞌuin laj Josué. Ut laj Josué quixtaklaheb ut quixye reheb: —Ayukex ut qꞌuehomak chak retal li naꞌajej aꞌin. Te̱bis chak ut nak acak xebis, te̱cꞌam chak li retalil cuiqꞌuin arin Silo, re nak la̱in tinbu̱li rix chiru li Ka̱cuaꞌ Dios, chan.

⁹ Queꞌco̱eb ut eb li cui̱nk aꞌin ut queꞌxbis chak li naꞌajej chi cuukub jachal ut queꞌxtzꞌi̱ba retalileb li tenamit saꞌ jun li hu. Ut chirix aꞌan queꞌsukꞌi cuiꞌchic riqꞌuin laj Josué saꞌ lix muheba̱leb aran Silo.

¹⁰ Laj Josué quibu̱lic chirix li naꞌajej chiru li Ka̱cuaꞌ Dios aran Silo. Chi joꞌcaꞌin quixjeqꞌui li chꞌochꞌ aꞌin reheb li ralal xcꞌajol laj Israel.

Aꞌin li naꞌajej li queꞌtzꞌak li ralal xcꞌajol laj Benjamín

¹¹ Nak ac xeꞌxbu̱li rix li naꞌajej, eb li ralal xcꞌajol laj Benjamín queꞌxcꞌul li naꞌajej li cuan saꞌ xyi lix naꞌajeb li ralal xcꞌajol laj Judá ut eb li ralal xcꞌajol laj José.

¹² Li naꞌajej li queꞌtzꞌak eb aꞌan naticla cuan cuiꞌ li nimaꞌ Jordán saꞌ li norte. Ut nacuulac cuan cuiꞌ li tenamit Jericó saꞌ li norte. Naxic cuan cuiꞌ li tzu̱l li cuan saꞌ li oeste. Ut nocox-e̱lk saꞌ li chaki chꞌochꞌ Bet-avén.

¹³ Li nuba̱l naxic toj cuan cuiꞌ li naꞌajej Luz li nequeꞌxye ajcuiꞌ Bet-el re ut naxic saꞌ li sur. Ut nacuulac saꞌ li tenamit Atarot-adar li cuan cuiꞌ li tzu̱l li cuan saꞌ li sur riqꞌuin li tenamit Bet-horón li cuan takꞌa.

¹⁴ Li nuba̱l naxqꞌue chak vue̱lt saꞌ li oeste saꞌ xjayal li tenamit Bet-horón li cuan saꞌ xcaꞌyaba̱l li palau Mediterráneo ut nacuulac saꞌ li tenamit Quiriat-baal li nequeꞌxye ajcuiꞌ Quiriat-jearim re. Li naꞌajej aꞌan reheb li ralal xcꞌajol laj Judá. Aꞌan li nuba̱l li cuan saꞌ li oeste.

¹⁵ Li nuba̱l li cuan saꞌ li sur naticla saꞌ li tenamit Quiriat-jearim ut naxic cuan cuiꞌ li yuꞌam haꞌ Neftoa li cuan saꞌ li oeste.

¹⁶ Li nuba̱l naticla chak cuan cuiꞌ li tzu̱l li cuan saꞌ xcaꞌyaba̱l li ru takꞌa Ben-hinom, li cuan saꞌ li norte riqꞌuin li ru takꞌa re Refaim. Naxic saꞌ li ru takꞌa re Hinom li cuan saꞌ li sur cuanqueb cuiꞌ laj jebuseo ut chirix aꞌan naxic cuan cuiꞌ li yuꞌam haꞌ Rogel.

¹⁷ Naxqꞌue chak vue̱lt saꞌ li naꞌajej En-semes ut naxic toj Gelilot li cuan saꞌ xcaꞌyaba̱l li tzu̱l Adumín ut nacuulac toj cuan cuiꞌ li sako̱nac li cuan saꞌ lix naꞌaj laj Bohán li ralal laj Rubén.

¹⁸ Nocoxnumekꞌ cuan cuiꞌ li tzu̱l li cuan saꞌ xcaꞌyaba̱l li naꞌajej Arabá, li cuan saꞌ li norte. Ut naxic toj saꞌ li naꞌajej Arabá.

¹⁹ Nacuulac Bet-hogla saꞌ li norte ut nocoxrakekꞌ saꞌ li naꞌajej li nocox-ocak cuiꞌ rok li nimaꞌ Jordán saꞌ li palau Mar Muerto xcꞌabaꞌ. Aꞌan aꞌin li nuba̱l saꞌ li sur.

²⁰ Li nimaꞌ Jordán, aꞌan li nuba̱l saꞌ li este. Aꞌan aꞌin li naꞌajej li quijeqꞌui̱c reheb li ralal xcꞌajol laj Benjamín, aꞌ yal chanru xqꞌuial li junju̱nk chꞌu̱tal.

²¹ Eb li tenamit li quiqꞌueheꞌ reheb li ralal xcꞌajol laj Benjamín, aꞌaneb aꞌin: Jericó, Bet-hogla, li ru takꞌa Casis,

²² Bet-arabá, Zemaraim, Bet-el,

²³ Avim, Pará, Ofra,

²⁴ Quefar-haamoni, Ofni ut Geba. Cablaju chixjunileb li tenamit rochbeneb li cocꞌ cꞌaleba̱l.

²⁵ Quiqꞌueheꞌ ajcuiꞌ reheb li tenamit Gabaón, Ramá, Beerot,

²⁶ Mizpa, Cafira, Mozah,

²⁷ Requem, Irpeel, Tarala,

²⁸ Zela, Elef, Jebús li nequeꞌxye ajcuiꞌ Jerusalén re, Gabaa ut Quiriat. Ca̱laju chixjunileb li tenamit rochbeneb li cocꞌ cꞌaleba̱l. Aꞌan aꞌin li naꞌajej li quiqꞌueheꞌ reheb li ralal xcꞌajol laj Benjamín, aꞌ yal chanru xqꞌuial li junju̱nk chꞌu̱tal.