Josué 17 - Li Santil hu

Aꞌaneb aꞌin li naꞌajej li queꞌxcꞌul eb li ralal xcꞌajol laj Manasés

¹ Ut queꞌbu̱lic chirix li naꞌajej li tixcꞌul laj Manasés li xbe̱n ralal laj José. Laj Maquir, aꞌan li xbe̱n ralal laj Manasés. Laj Maquir, aꞌan lix yucuaꞌ laj Galaad. Eb li ralal xcꞌajol laj Maquir cauheb rib chi pletic. Joꞌcan nak queꞌre̱chani li naꞌajej Galaad ut Basán.

² Ut queꞌbu̱lic ajcuiꞌ chirix li naꞌajej li teꞌxcꞌul li jun chꞌol chic li ralal xcꞌajol laj Manasés, aꞌ yal chanru xqꞌuialeb li junju̱nk chꞌu̱tal. Aꞌaneb aꞌin li queꞌcꞌuluc re li naꞌajej li cuan jun pacꞌal li nimaꞌ Jordán saꞌ li oeste: laj Abiezer, laj Helec, laj Asriel, laj Siquem, laj Hefer, ut laj Semida. Eb li cui̱nk aꞌin, aꞌaneb li ralal laj Manasés ut lix yucuaꞌchineb, aꞌan laj José. Ut eb aꞌan queꞌcuan ralal xcꞌajol.

³ Laj Manasés, aꞌan xyucuaꞌ laj Maquir. Laj Maquir, aꞌan xyucuaꞌ laj Galaad. Laj Galaad, aꞌan xyucuaꞌ laj Hefer. Ut laj Hefer, aꞌan xyucuaꞌ laj Zelofehad. Abanan laj Zelofehad incꞌaꞌ quicuan ralal. Junes xrabin. Aꞌaneb aꞌin xcꞌabaꞌeb lix rabin: lix Maala, lix Noa, lix Hogla, lix Milca ut lix Tirsa.

⁴ Eb li ixk aꞌin queꞌco̱eb riqꞌuineb laj Eleazar laj tij ut laj Josué li ralal laj Nun, rochbeneb li nequeꞌcꞌamoc be saꞌ xya̱nkeb li tenamit ut queꞌxye reheb: —Li Ka̱cuaꞌ Dios quixye re laj Moisés nak ta̱qꞌue kachꞌochꞌ la̱o, joꞌ eb ajcuiꞌ li kechꞌalal, chanqueb. Joꞌcan nak laj Josué quixqꞌue xchꞌochꞌeb aꞌan joꞌ nak quixqꞌue reheb li rechꞌalal, joꞌ quiyeheꞌ reheb xban li Ka̱cuaꞌ Dios.

⁵ Joꞌcaꞌin nak queꞌxcꞌul laje̱b jachal chic li chꞌochꞌ saꞌ xbe̱n li ac xeꞌxcꞌul aran Galaad ut Basán. Li naꞌajej aꞌan nacana jun pacꞌal li nimaꞌ Jordán, li cuan saꞌ li este.

⁶ Quixcꞌul laje̱b jachal chic li chꞌochꞌ laj Manasés xban nak li o̱b chi xrabin laj Zelofehad queꞌqꞌueheꞌ xchꞌochꞌeb joꞌ nak queꞌqꞌueheꞌ xchꞌochꞌeb li cui̱nk. Li naꞌajej Galaad, aꞌan li quiqꞌueheꞌ reheb li jun chꞌol chic li ralal xcꞌajol laj Manasés.

⁷ Li naꞌajej li quiqꞌueheꞌ reheb li ralal xcꞌajol laj Manasés naticla chak saꞌ li naꞌajej Aser. Nacuulac saꞌ li naꞌajej Micmetat li cuan saꞌ xcaꞌyaba̱l li naꞌajej Siquem. Naxic toj cuan cuiꞌ li naꞌajej Tapúa.

⁸ Eb li naꞌajej li cuanqueb xcue̱nt Tapúa, aꞌan reheb li ralal xcꞌajol laj Manasés. Abanan li tenamit Tapúa li cuan saꞌ li nuba̱l, aꞌan reheb li ralal xcꞌajol laj Efraín.

⁹ Cuan ajcuiꞌ naꞌajej queꞌtzꞌak li ralal xcꞌajol laj Efraín xcomon lix naꞌajeb li ralal xcꞌajol laj Manasés. Li tenamit aꞌin li queꞌtzꞌak li ralal xcꞌajol laj Manasés, aꞌan naticla chak cuan cuiꞌ li nimaꞌ Caná li cuan saꞌ li sur ut nacuulac saꞌ li nuba̱l li nacana saꞌ li norte. Nacuulac toj saꞌ li na-oc cuiꞌ li nimaꞌ saꞌ li palau Mediterráneo.

¹⁰ Li naꞌajej li quitzꞌak laj Efraín, aꞌan li cuan saꞌ li sur. Ut li naꞌajej li quitzꞌak laj Manasés, aꞌan li cuan saꞌ li norte. Ut li nuba̱l reheb li naꞌajej aꞌan, aꞌan li palau Mediterráneo saꞌ li oeste. Naxcꞌul rib lix naꞌajeb riqꞌuin lix naꞌaj laj Aser saꞌ li norte ut naxcꞌul ajcuiꞌ rib lix naꞌajeb riqꞌuin lix naꞌaj laj Isacar saꞌ li este.

¹¹ Cuan li naꞌajej quitzꞌak laj Manasés xcomon lix naꞌajeb laj Isacar. Aꞌaneb aꞌin lix cꞌabaꞌeb: Aser ut Bet-seán rochben li cocꞌ cꞌaleba̱l; Ibleam rochben li cocꞌ cꞌaleba̱l joꞌ ajcuiꞌ li tenamit Dor ut li tenamit Endor rochbeneb li cocꞌ cꞌaleba̱l; li tenamit Taanac ut eb li cocꞌ cꞌaleba̱l joꞌ ajcuiꞌ li tenamit Meguido rochbeneb li oxib chi tenamit li cuanqueb saꞌ xbe̱n bol.

¹² Eb li ralal xcꞌajol laj Manasés incꞌaꞌ queꞌru risinquileb laj cananeo saꞌ xya̱nkeb xban nak eb laj cananeo incꞌaꞌ queꞌraj e̱lc saꞌ li naꞌajej aꞌan. Joꞌcan nak queꞌcana chi cua̱nc saꞌ xya̱nkeb.

¹³ Abanan nak eb laj Israel queꞌrecꞌa nak queꞌcacuu xmetzꞌe̱uheb, queꞌxye reheb laj cananeo nak tento teꞌtojok. Ut incꞌaꞌ queꞌrisiheb aran.

¹⁴ Eb li ralal xcꞌajol laj José queꞌa̱tinac riqꞌuin laj Josué ut queꞌxye re: —¿Cꞌaꞌut nak incꞌaꞌ qꞌui li kanaꞌaj li xaqꞌue ke? La̱o nabalo xban nak li Ka̱cuaꞌ yo̱ chikosobtesinquil toj chalen anakcuan, chan.

¹⁵ Laj Josué quichakꞌoc ut quixye reheb: —Cui la̱ex nabalex, ayukex saꞌ li qꞌuicheꞌ ut te̱cꞌale ru. Saꞌ li naꞌajej aꞌan cuanqueb laj ferezeo ut eb laj refaíta. Ayukex aran xban nak li naꞌajej aꞌin incꞌaꞌ chic natzꞌakloc chokꞌ e̱re, chan.

¹⁶ Eb li ralal xcꞌajol laj José queꞌxye: —Li naꞌajej li tzu̱l ru incꞌaꞌ ta̱tzꞌaklok chokꞌ ke. Ut eb laj cananeo li cuanqueb saꞌ li naꞌajej aꞌan, joꞌ ajcuiꞌ li cuanqueb saꞌ li ru takꞌa cuanqueb xcarruaje re pletic. Joꞌcan ajcuiꞌ li cuanqueb Bet-seán, joꞌ ajcuiꞌ li cuanqueb saꞌ li cꞌaleba̱l. Joꞌcan ajcuiꞌ li cuanqueb saꞌ li ru takꞌa Jezreel, chanqueb.

¹⁷ Laj Josué quixye reheb li ralal xcꞌajol laj Efraín ut reheb li ralal xcꞌajol laj Manasés: —La̱ex kꞌaxal nabalex ut cau e̱rib. ¿Ma incꞌaꞌ ta biꞌ ta̱ru̱k te̱re̱chani li naꞌajej aꞌan?

¹⁸ La̱ex te̱re̱chani chixjunil li naꞌajej li tzu̱l ru ut te̱cꞌale. Ta̱cꞌanjelak che̱ru li qꞌuicheꞌ. Te̱risiheb laj cananeo saꞌ li naꞌajej aꞌan. Usta cuanqueb xcarruaje re pletic ut usta kꞌaxal cauheb rib, la̱ex tex-e̱chani̱nk re, chan.